Be ka se isịnede

Be ka se isịnede

Mme Ntiense Jehovah

Mek usem Efịk

1 Bible Ekeme Ndin̄wam Nnyịn Ikûdụk Mfịna

1 Bible Ekeme Ndin̄wam Nnyịn Ikûdụk Mfịna

Udiana Timothy 3:16 ọdọhọ ke Bible “ọfọn ndida nnọ ukpep, nsua nnọ owo, nnen̄ede mme n̄kpọ.” Ndi emi edi akpanikọ? Yak ineme nte item Bible akan̄wamde ndusụk mbon oro ẹkesinamde mme n̄kpọ emi ekpekesịnde mmọ ke mfịna.

NDIN̄WỌN̄ MMỊN N̄KAHA

Delphine oro iketịn̄de iban̄a ke ibuotikọ oro osụk okụrede do ọdọhọ ke editịmede esịt ama anam imọ itọn̄ọ ndin̄wọn̄ mmịn n̄kaha. Bible idọhọke owo okûn̄wọn̄ mmịn, edi ọdọhọ ete: “Kûdu ke otu mme ofobo wine.” (Mme N̄ke 23:20) Ndụn̄ọde oro ẹnamde owụt ke ndin̄wọn̄ mmịn n̄kaha esinam owo ọdọn̄ọ ndiọi udọn̄ọ, asuan ufan, abiat ndọ, onyụn̄ anam ata ediwak owo ẹkpa n̄kpa nsek kpukpru isua. Edieke owo anamde item Bible, enye idinyeneke mme mfịna emi.

Delphine ama anam se Bible ọdọhọde. Enye ọdọhọ ete: “Mma n̄kụt ke mmịn ikanamke ntre nditịmede esịt. Mma nnam se idude ke Philippi 4:​6, 7, emi ọdọhọde ete: ‘Ẹkûtịmede esịt ke baba n̄kpọ kiet, edi . . . ẹben̄e Abasi se mbufo ẹyomde.’ Ke ini esịt ekesitịmerede mi okoneyo, mma nsibọn̄ akam nnọ Jehovah. Mma nsitịn̄ nte etiede mi ke idem nnọ enye, ntịn̄ se iyatde mi, se ifịnade mi, ye se ibiakde mi nnọ enye nnyụn̄ mben̄e enye an̄wam mi n̄kere nti n̄kpọ. Eyo ama esiere, mma nsibiere ke ndiyakke mme n̄kpọ emi afịna mi aba. Ndinam ntre ama anam nsikere se nnyenede utu ke nditie n̄kere se ikatakde mi. Mma mbiere ke ndin̄wọn̄ke mmịn aba. Emem emi Abasi ọkọnọde mi ama enem mi tutu, ntre n̄koyomke ndinam n̄kpọ ekededi emi edinamde n̄kûnyene emem oro aba.”

 OBUROBỤT IDO

Iwakke n̄kpọ emi esibụn̄de owo esịt onyụn̄ anamde owo ofụhọ nte oburobụt ido. Edi item Bible ekeme ndin̄wam nnyịn ikûdụk utọ afia emi. Bible anam ifiọk mme n̄kpọ emi ẹsinamde owo anam oburobụt ido, utọ nte owo ndibre mbre ima ye owo emi mîdịghe ebe m̀mê n̄wan esie ye ndisise ndise idan̄. Akparawa emi ekerede Samuel ọdọhọ ete: “Ikọsọn̄ke nditọn̄ọ mbre ima ye owo. Ndusụk ini idịghe nte ke ami n̄kọtọn̄ọ mbre emi, edi ekesidi mma n̄kụt ke eyenan̄wan ama mi, ami ntọn̄ọ mbre ima ye enye.” Samuel ama edikụt ke ọkpọkọm imọ ibreke mbre ye iban, ke ẹsụk ẹkot imọ ekpe iban. Ntre oro ama anam enye ọtọn̄ọ ndisibre mbre ima ye iban. Edi n̄kpọ emi ama afịna enye. Enye ọdọhọ ete: “Ido emi ikọfọnke sia ama anam ntọn̄ọ ndikere mban̄a idem mi kpọt.”

Samuel ama okot ibuotikọ kiet emi ẹwetde ẹnọ n̄kparawa ke ikpehe Intanet emi, jw.org. Enye ama onyụn̄ etie ekere se ẹwetde ke Mme N̄ke 20:​11, emi ọdọhọde ete: “Se eyenọwọn̄ anamde ke ẹda ẹfiọk m̀mê edinam esie asana onyụn̄ enen.” Didie ke itien̄wed emi akan̄wam enye? Samuel ama edikụt ke inenke imọ ndibre mbre ima, ke utọ mbre oro inyụn̄ isanake ke enyịn Abasi. Enye ọdọhọ ete: “Mma ndifiọk n̄ko ke uyen emi esibrede mbre ima ye owo anam n̄kpọ emi edinamde enye edi idiọk ebe m̀mê n̄wan. Mma ntọn̄ọ ndikere nte editiede n̄wan emi ndidọde edieke enye okụtde mi mbrede mbre ima ye n̄wan en̄wen. Emi ama anam n̄kụt ke ido oro ifọnke. Mbre ima esinem, edi asan̄a ye afanikọn̄.” Samuel ama etre ndisibre mbre ima ye iban, ndien oro akan̄wam enye okûnam use.

Antonio ama esise ndise idan̄, ndien emi akpakanam enye esịn efịbe. Okposụkedi emi enye ekenen̄erede ama n̄wan esie, enye ama esise ndise idan̄ ediwak ini. Enye ọdọhọ ke nditie n̄kere se idude ke 1 Peter 5:8 ekenen̄ede an̄wam imọ. Itie oro ọdọhọ ete: “Ẹnyene ikike, ẹnyụn̄ ẹdu ke ukpeme. Asua mbufo, kpa Devil, ke oyoyo nte ekpe eke okụnide, oyom owo eke enye editade.” Antonio ọdọhọ ete: “Ndise idan̄ ọyọyọhọ ererimbot emi, ndien ekeme ndisọn̄ ndisọhi ndiọi ndise emi mfep ke ibuot nnyịn. Itie N̄wed Abasi oro ama an̄wam mi mfiọk owo emi esidade ndiọi ndise oro odomo mi. Mma n̄kpep ndisọsọp nti ke Satan anam ndise idan̄ awak ntem ke ererimbot. Mmedi ndifiọk ke Jehovah ikpọn̄ ekeme ndin̄wam mi ‘nnyene ikike nnyụn̄ ndu ke ukpeme’ mbak oburobụt ndise oro idibiat mi ekikere ye esịt, inyụn̄ ibiat ndọ mi.” Ẹma ẹn̄wam Antonio, ndien enye isehe aba ndise idan̄. Emi anam enye okûdụk akamba mfịna.

Omokụt do ke Bible ekeme ndin̄wam nnyịn ikûnam mme n̄kpọ emi ẹkemede ndisịn nnyịn ke ikpọ mfịna. Edi nso ke ikpanam edieke edide imododụk mfịna? Yak ineme nte Ikọ Abasi ekemede ndin̄wam nnyịn ikọk mfịna.

Item Bible ekeme ndinam ikûdụk mfịna