Ndusụk mfịna oro inyenede isimaha ndikụre. Ndusụk ẹkeme ndidia nnyịn idem mbemiso idiọn̄ọde ke imenyene utọ mfịna oro. Ndi Bible ekeme ndin̄wam nnyịn ikọk utọ mfịna oro? Yak ineme uwụtn̄kpọ ifan̄.

NDITỊMEDE ESỊT N̄KAHA

Rosie ọdọhọ ete: “Ke ini n̄kosobode mfịna, mma nsikere ke mfịna oro eyenen̄ede okpon akan oro, ndien oro ama esinam esịt enen̄ede etịmede mi.” Mme itie N̄wed Abasi ewe ikan̄wam enye? Kiet edi Matthew 6:34 emi ọdọhọde ete: “Ẹkûtịmede esịt ẹban̄a n̄kpọn̄, koro n̄kpọn̄ eyenyene editịmede esịt esie. Afanikọn̄ usen ekem ye usen.” Rosie ọdọhọ ke item Bible emi ama an̄wam imọ itre nditịmede esịt mban̄a se ikemede nditịbe n̄kpọn̄. Enye ọdọhọ n̄ko ete: “Mmenyenyene ediwak mfịna, ntre idịghe se ntiede ntịmede esịt mban̄a n̄kpọ emi mîtịbeke kan̄a m̀mê emi mîditịbeke-tịbe.”

Owo en̄wen emi ekesitịmerede esịt akaha edi Yasmine. Enye ọdọhọ ete: “Mma nsitua eyet ediwak usen, n̄kesinyụn̄ n̄kemeke ndide idap ndusụk okoneyo. Ọkpọsọn̄ editịmede esịt ama adia mi idem.” Ewe itie Bible ikan̄wam enye? Enye ọdọhọ ke 1 Peter 5:7 akan̄wam imọ. Itie oro ọdọhọ ete: ‘Ẹtop kpukpru editịmede esịt mbufo ẹdori Abasi ke idem, koro enye ekere aban̄a mbufo.’ Yasmine ọdọhọ ete: “Mma n̄ka iso ndibọn̄ akam nnọ Jehovah, ndien enye ama ọbọrọ akam mi. Eketie nte ẹbiomode mi ata ndodobi mbiomo. Esịt esisụk etetịmede mi ndusụk ini, edi idahaemi mmọdiọn̄ọ se n̄kpanamde ke ini emi etịbede.”

 NDITRE NDINAM N̄KPỌ KE NNENNEN INI

N̄kaiferi emi ekerede Isabella ọdọhọ ete: “N̄kere ke n̄kadada ido emi mmana sia ete mi n̄ko ikesinamke n̄kpọ ke nnennen ini. Mmesikpọn̄ akpan n̄kpọ emi n̄kpanamde n̄kese TV, mîdịghe ntie nnam efen. Ido emi ifọnke sia isiyakke owo enyene ini etịn̄ enyịn anam n̄kpọ ọfọn, esinyụn̄ anam esịt etịmede owo.” Itie N̄wed Abasi emi akan̄wamde enye edi 2 Timothy 2:​15, emi ọdọhọde ete: “Sịn ofụri ukeme fo ndiwụt idemfo nte owo emi Abasi enyịmede, anamutom emi mînyeneke ntak ndikop bụt.” Isabella ọdọhọ ete: “N̄koyomke Jehovah okop bụt ke ntak emi nsitrede ndinam se akpanade nnam ke nnennen ini.” Isabella ọtọn̄ọ ndisinam n̄kpọ ke nnennen ini.

Kelsey okonyụn̄ enyene ukem mfịna emi. Enye ọdọhọ ete: “Mma nsiyak akpan n̄kpọ emi n̄kpanamde nnịm tutu ini okụre ọkpọn̄ mi. Mma nsitua, ntaba idap, nnyụn̄ ntịmede esịt. N̄kpọ emi ama afịna mi.” Mme N̄ke 13:16 ama an̄wam Kelsey. Itie oro ọdọhọ ete: “Kpukpru owo eke ẹnyenede mbufiọk ẹyenam n̄kpọ ke ifiọk, edi ndisịme owo ayarade ebiọ.” Kelsey etịn̄ se enye ekekpepde ke ini enye eketiede ekere se itie N̄wed Abasi emi etịn̄de. Enye ọdọhọ ete: “Ọfọn owo ọdiọn̄ọ ke se imọ iyomde ndinam ekeme ndida imọ ini, ntre ke ana ibabak itọn̄ọ. Idahaemi mmenyene ekpri n̄wed emi ndoride ke okpokoro mi man n̄wet se nyomde ndinam, ndien emi esin̄wam mi mfiọk nnennen ini oro n̄kpanamde n̄kpọ, utu ke ndibet tutu ini okụre ọkpọn̄ mi.”

NDIKOP NDOBO

Kirsten ọdọhọ ete: “Ebe mi ama ọwọro ọkpọn̄ mi ye nditọ inan̄ ke ubọk.” Itie N̄wed Abasi ewe akan̄wam enye? Mme N̄ke 17:17 ọdọhọ ete: “Ata ufan amama ufan kpukpru ini, onyụn̄ edi eyeneka emi amanade ọnọ ini nnanenyịn.” Kirsten ama adian idem ye Mme Ntiense Jehovah nte enye. Ndi mmọ ẹma ẹn̄wam enye? Enye ọdọhọ ete: “Mme ufan mi ẹma ẹn̄wam mi ke ata ediwak usụn̄! Ndusụk mmọ ẹma ẹsinịm mme n̄kpọudia ye flawa ke enyịnusụn̄ mi. Ediwak mmọ ẹma ẹn̄wam mi ye nditọ mi ẹtan̄ n̄kpọ ke ini ikọwọrọde ikodụn̄ ke ufọk en̄wen; emi eketịbe ikata. Ufan mi kiet ama oyom utom ọnọ mi. Mmọ ikọkpọn̄ke mi ikpat kiet.”

Delphine oro iketịn̄de iban̄a ama esikop ndobo n̄ko. Kop se enye eketịn̄de aban̄a kpukpru se ikọwọrọde enye mi: “Eketie mi nte ke kpukpru owo ẹnyene owo, edi ami ikpọn̄ mmenyeneke owo. Emi ama anam nnen̄ede n̄kop ndobo.” Itie N̄wed Abasi kiet emi akan̄wamde enye edi Psalm 68:​6, emi ọdọhọde ete: “Abasi anam mme ikpọn̄ owo ẹdụn̄ ke ufọk.” Delphine ọdọhọ ete: “Mma mfiọk ke idịghe ata ata ufọk ke itien̄wed emi etịn̄ aban̄a. Utu ke oro, enye aban̄a nte Abasi anamde mbon oro ẹmade enye ẹdiana kiet ẹnyụn̄ ẹsọn̄ọ kiet eken idem nte n̄kpọ eke ẹdọhọde ke mmọ ẹto ufọk kiet. Edi mma ndiọn̄ọ ke ana n̄kpere Jehovah kan̄a mbemiso n̄kperede mbon en̄wen. Psalm 37:4 akanam mfiọk emi. Itie oro ọdọhọ ete: ‘Nen̄ede dat esịt ke Jehovah, ndien enye ọyọnọ fi se esịt fo oyomde.’

“Mma ndifiọk ke ana nnen̄ede n̄kpere Jehovah. Idụhe ufan emi etiede nte Jehovah! Ekem mma n̄wet nsio nsio n̄kpọ emi n̄kemede nditiene mbon en̄wen nnam n̄kop inemesịt. N̄kanam emi man ndi ufan ye mbon emi ẹmade Jehovah. Mma n̄kpep ndikụt nti n̄kpọ ke idem mbon en̄wen, nsehe ndudue mmọ.”

Imọdiọn̄ọ ke mbon emi ẹnamde n̄kpọ Abasi ifọnke ima. Mme Ntiense Jehovah ẹnyene mfịna nte kpukpru owo ke ererimbot emi ẹnyenede. Edi se mmọ ẹkpepde ke Bible esinam mmọ ẹn̄wam mbon en̄wen ini ekededi oro mmọ ẹkemede. Ọfọn ndinyene utọ ufan oro. Edi, ndi Bible ekeme ndin̄wam mbon emi ẹnyenede mfịna emi mmọ mîkemeke ndikọk, utọ nte udọn̄ọ emi mîmaha ndikụre ye ndifụhọ n̄kpa owo mmọ?

Ndinam item Bible ayanam enyene nti ufan emi ẹdin̄wamde fi ke ini mfịna