Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME NO. 1 2016

 Bible Okpụhọde Mme Owo

Nam Ndu ke Emem Nnyụn̄ N̄kop Inemesịt Isua Kiet Kpọt

Nam Ndu ke Emem Nnyụn̄ N̄kop Inemesịt Isua Kiet Kpọt
  • ISUA AKAMANADE: 1971

  • EBIET OTODE: FRANCE

  • SE ENYE EKEDIDE: AKPARA, ADA-N̄KPỌSỌN̄-IBỌK, YE ABIATIBET

NTE UWEM MI EKETIEDE:

Ubon nnyịn ẹkedụn̄ ke Tellancourt, obio-in̄wan̄ kiet ke France. Ete mi okoto France, eka mi oto Italy. Ke ini n̄kedide isua itiaita, ima iwọrọ ikodụn̄ ke ekpri obio kiet ke Rome emi mme owo mîkenyeneke okụk. Uwem ikememke do. Okụk ama esinam ete ye eka mi ẹtọhọ nte usen ọmọn̄ okụre.

Ke ini n̄kedide isua 15, eka mi ama ọdọhọ n̄wọrọ n̄kanam ufan ye mme owo. Ntre, mma nsiwak idem ke an̄wa. Ikebịghike mma ndụk idiọk nsan̄a. Usen kiet, ete kiet emi eketiede ufan ufan ama ọnọ mi n̄kpọsọn̄ ibọk, ndien mma nda ibọk emi man n̄wụt enye ke ndịghe eyenọwọn̄. Ntre ke n̄kọtọn̄ọ ndisida n̄kpọsọn̄ ibọk nnyụn̄ ndu oburobụt uwem. Ẹma ẹsabade mi ediwak ini. Uwem ikọwọrọke n̄kpọ ndomokiet inọ mi. N̄kpa ye uwem eketie mi ukem ukem. Mma nsikop ndobo etieti. Ke ini n̄kedide isua 16, mma ndomo ndiwot idem. Se n̄kanamde ekedi ndin̄wọn̄ ekpeme whiskey (ufiop mmịn) kiet nnyụn̄ mfrọ ndụk akamba mmọn̄. Mma nsụhọ nnyụn̄ ndiọn̄ọke idem ofụri usen ita.

Mma ndikụt ke ufọn idụhe ndiwot idem, edi n̄kesinam n̄kpọ afai afai nnyụn̄ nsan̄a mbian̄a mme owo. Mma nsidọhọ mme owo ke mmọn̄ nnyene ebuana idan̄ ye mmọ, ndien ke ini nsịmde ufọk mmọ, mma nsinam mmọ ẹda n̄kpọsọn̄ ibọk, ekem nyịp n̄kpọ ekededi emi odụkde mi enyịn nnyọn̄. Mma nsisan̄a ke ofụri Italy nnyam n̄kpọsọn̄ ibọk nnọ mme ikpọ inọ. Bodisi ẹma ẹsimụm mi ediwak ini. Uwem ama odorode mi, edi mma nnịm ke anaedi enyene ntak emi ndude uwem. Mma mbọn̄ akam mben̄e Abasi nte anam ndu ke emem nnyụn̄ n̄kop inemesịt isua kiet kpọt.

NTE BIBLE OKOKPỤHỌREDE UWEM MI:

Ke ini n̄kedide isua 24, mma mbiere ndiwọrọ n̄kodụn̄ ke England sia mma ndiọn̄ọ ke ẹkeme ndiwot mi ini ekededi ke ntak n̄kpọsọn̄ ibọk emi n̄kesinyamde. Mbemiso n̄kadahade, mma n̄ka n̄kese eka mi. Ama akpa mi idem ndikụt ete kiet emi ekerede Annunziato Lugarà enemede Ikọ Abasi ye enye. * Mma ndiọn̄ọ ke enye ekedi ata idiọkowo, ntre idem ama enyek mi ke ini n̄kokụtde enye ye eka mi. Mma  mbụp enye m̀mê nso ke enye anam do. Enye ama ọdọhọ ke imọ ima ikpụhọde inyụn̄ ikabade idi Ntiense Jehovah, onyụn̄ ọdọhọ mma nsịm England yak nyom usụn̄ nnyene nneme ye Mme Ntiense Jehovah. Mma ndọhọ ke nditreke ndinam oro. Edi ke ini nsịmde England, mma mfiak ntọn̄ọ idiọk uwem.

Usen kiet mma n̄kụt Ntiense Jehovah adade ke efak kiet ke London ọnọ mme owo Enyọn̄-Ukpeme ye Ẹdemede! Emi ama anam nti se Annunziato ọkọdọhọde nnam. Ntre mma mbụp Ntiense oro m̀mê enye ekeme ndidi ndikpep mi Bible.

Se n̄kekpepde ke Bible ama akpa mi idem. Ke uwụtn̄kpọ, se ẹwetde ẹban̄a Abasi ke 1 John 1:9 ama enen̄ede otụk mi. Itien̄wed oro ọdọhọ ete: “Edieke nnyịn iyararede mme idiọkn̄kpọ nnyịn, enye edi anam-akpanikọ onyụn̄ enen, ntre enye eyefen mme idiọkn̄kpọ nnyịn onyụn̄ eyet nnyịn.” Itien̄wed emi ama enen̄ede an̄wam mi sia n̄kekere ke n̄wọrọke n̄kpọ ke ntak oburobụt uwem oro n̄kodude. Mma nsọsọp ntọn̄ọ ndidụk mbono esop ke Ufọkmbono Obio Ubọn̄ Mme Ntiense Jehovah. Mme Ntiense ẹma ẹnen̄ede ẹdara ndikụt mi. Ke ini n̄kokụtde nte mmọ ẹmade ẹnyụn̄ ẹkperede kiet eken, ama ọdọn̄ mi nditiene ndu ke otu mmọ sia se n̄kesiyomde edi oro toto ke ini eyenọwọn̄.

Okposụkedi emi mîkọsọn̄ke mi nditre n̄kpọsọn̄ ibọk ye akpara, ama enen̄ede ọsọn̄ mi ndinyene nti edu. Mma n̄kụt ke akpana n̄kpep ndisinam n̄kpọ ukpono ukpono ye mme owo. Tutu emi, nsụk ntetịme nditre ndusụk ido emi mîfọnke. Edi Jehovah ke an̄wam mi. Ọfiọn̄ itiokiet kpọt ke mma n̄kọtọn̄ọ ndikpep Bible, mma nna baptism n̄kabade ndi Ntiense Jehovah. Emi eketịbe ke 1997.

UFỌN ORO MBỌDE:

Ke mma n̄kana baptism, mma ndọ eyenan̄wan kiet emi ekerede Barbara. Ikebịghike enye n̄ko akakabade edi Ntiense Jehovah. Ke ini ufan mi kiet okokụtde nte n̄kpụhọrede, enye n̄ko ama ọtọn̄ọ ndikpep Bible. Nte ini akade, enye ye eyeneka esie ẹma ẹkabade ẹdi Ntiense Jehovah. Ndien eyeneka eka-eka mi, emi ekebede isua 80, ama ọtọn̄ọ n̄ko ndikpep Bible onyụn̄ ana baptism mbemiso enye akpade.

Ndi ebiowo idahaemi ke esop Mme Ntiense Jehovah, ndien ami ye n̄wan mi isida ofụri ini nnyịn ikwọrọ ikọ inọ mme owo, akpan akpan mbon emi ẹsemde Italian ke London. Ndusụk ini, esifịna mi ke ini ntiede n̄kere nte n̄kodude uwem ke ini edem, edi n̄wan mi esidọn̄ mi esịt. Esịt enem mi ndien sia mmenyene se n̄kesiyomde-yom, oro edi, eti ubon ye edima Ete. N̄kọdọhọ Abasi anam nnyene emem nnyụn̄ n̄kop inemesịt isua kiet kpọt, edi enye ọnọ mi se ikande oro!

Esịt enem mi ndien sia mmenyene se n̄kesiyomde-yom, oro edi, eti ubon ye edima Ete

Kpep N̄kpọ En̄wen

Ufọn Uwem Emi-e?

Nso ikpanam n̄kpa ọdọn̄ owo?