Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME NO. 1 2016

 Item Eset Emi Osụk Enyenede Ufọn

Ẹkûtịmede Esịt

Ẹkûtịmede Esịt

ITEM BIBLE: “Ẹtre nditịmede esịt mban̄a uwem mbufo.”—Matthew 6:25.

Nso ke emi ọwọrọ? Jesus eketịn̄ ikọ emi ke ini enye ọkọkwọrọde ikọ ke obot ọnọ otuowo. N̄wed ukabade ikọ Bible kiet ọdọhọ ke ikọ Greek oro ẹkabarede “nditịmede esịt” ekeme ndiwọrọ “owo ndifịna idem ke ntak ubuene, biọn̄, ye mme mfịna en̄wen emi ẹsịmde enye ke usen ke usen.” Mme owo ẹsiwak nditịmede esịt mban̄a se iditịbede ke ini iso. Idiọkke ndikere mban̄a se ididade idu uwem ye nte n̄kpọ etiede ye mbon nnyịn. (Philippi 2:20) Edi ke ini Jesus ọkọdọhọde mme mbet esie “ẹkûtịmede esịt,” enye ọkọnọ mmọ item ete ẹkûyak n̄kpọ afịna mmọ akaha, oro edi, ndikere nte n̄kpọn̄ editiede tutu emi iyakke mmọ ẹkop inem uwem mfịn.—Matthew 6:31, 34.

Ndi item emi ke osụk enyenyene ufọn? Ọfọn inam item Jesus emi. Ntak-a? Ndusụk n̄wed ndụn̄ọde ẹdọhọ ke nditịmede esịt n̄kaha ekeme ndinam owo ọdọn̄ọ utọ udọn̄ọ nte ebende (ulcer), ikọn̄ obun̄wek, ye udọn̄ọ esịt.

Jesus ama etịn̄ ata akpan ntak emi akpanamde nnyịn ikûtịmede esịt—nditịmede esịt inyeneke ufọn ndomokiet. Emi akanam Jesus obụp ete: “Anie ke otu mbufo ekeme ndidian cubit kiet ke isua uwem esie ke ntak emi enye okopde editịmede esịt?” (Matthew 6:27) Nditie ntịmede esịt ididianke cubit kiet ke isua uwem nnyịn idinyụn̄ inamke uwem nnyịn ọfọn. N̄ko, ediwak n̄kpọ emi isitịmerede esịt iban̄a isidịghe nte nnyịn ikekerede. Ataifiọk kiet ọkọdọhọ ete: “Nditịmede esịt mban̄a n̄kpọn̄ edi ubiatini sia n̄kpọn̄ isidiọkke nte nnyịn ikekerede.”

Nso ke ikpanam man ikûtịmede esịt? Akpa, buọt idem ke Abasi. Edieke Abasi esinọde inuen udia onyụn̄ abanade flawa, ndi enye idinọhọ nnyịn emi ituakde ibuot inọ enye se inanade nnyịn? (Matthew 6:25, 26, 28-30) Ọyọhọ iba, kûfịna idem uban̄a n̄kpọn̄. Jesus ọkọdọhọ ete: “Ẹkûtịmede esịt ẹban̄a n̄kpọn̄, koro n̄kpọn̄ eyenyene editịmede esịt esie.” Ntre, ufọn idụhe ndimen editịmede esịt n̄kpọn̄ ndidian ye eke mfịn sia “afanikọn̄ usen ekem ye usen.”—Matthew 6:34.

Edieke inamde item Jesus emi, nnyịn ididọn̄ọke mme udọn̄ọ emi mbon emi ẹsitịmerede esịt ẹsidọn̄ọde. Akan oro, esịt ayana nnyịn sụn̄ sia imenyene se Bible okotde “emem Abasi.”—Philippi 4:6, 7.

Kpep N̄kpọ En̄wen

Ndi Ọyọbuọt Idem ke Abasi?

Eyenem fi ndidiọn̄ọ ke Abasi edi ata eti Ufan.