NSO ke esinam ama oyom ndifiọk ini n̄kanika? Emekeme ndise n̄kanika ubọk fo m̀mê n̄kanika ibibene. Ufan fo okpobụp fi m̀mê ifan̄ imia, ọkpọbọrọ didie? Mme owo ẹsisiak ini n̄kanika ke nsio nsio usụn̄.

Ke uwụtn̄kpọ, yak idọhọ ke hour kiet ye minit edịp ye duop ebe tọn̄ọ duopeba uwemeyo akamia. Emekeme ndidọhọ ke ebe n̄kanika kiet ke minit 30. Enyene ebiet emi odụn̄de afo ọdọhọ ke amia 13 ebe ke minit 30. Mbon emi ẹsisiakde ini n̄kanika ntre isibatke n̄kanika itre ke 12 ifiak itọn̄ọ ke kiet, edi ẹsibat ẹsịm 24. Ke ndusụk itie, ẹkeme ndidọhọ ke ayak minit 30 ndimia iba.

Emekeme ndikere m̀mê mbon emi ẹkedude ke eyo Bible ẹkesisiak didie ini n̄kanika. Ama enyene ediwak usụn̄ emi mmọ ẹkesisiakde ini. N̄wed Abasi Usem Hebrew etịn̄ aban̄a “usenubọk,” “uwemeyo,” “ufọt uwemeyo,” ye “mbubreyo.” (Gen. 8:11; 19:27; 43:16; Deut. 28:29; 1 Ndi. 18:26) Edi enyene mme ini emi ẹkesisiakde ata nnennen ini.

Ẹma ẹsiwak ndinyene mbon ukpeme ke eyo Bible, akpan akpan okoneyo. Ata ediwak isua mbemiso Jesus edi isọn̄, nditọ Israel ẹkesibahade okoneyo ẹsịn ke ikpehe ita. Mmọ ẹkesikot mme ikpehe emi mme ini ukpeme. (Ps. 63:6) Judges 7:19 asiak “ini ukpeme ufọt okoneyo.” Edi ini Jesus okodude ke isọn̄, mme Jew ẹkebahade ini ukpeme ẹsịn ke ikpehe inan̄ nte mbon Greek ye mbon Rome ẹkesibaharede.

Ẹtịn̄ ẹban̄a mme ini ukpeme emi ke Matthew, Mark, Luke, ye John. Ke uwụtn̄kpọ, ekedi “ke ekperede ndisịm usiere,” oro edi, ke ọyọhọ ini ukpeme inan̄, ke Jesus akasan̄a ke enyọn̄ inyan̄ etiene mme mbet esie. (Matt. 14:25) Jesus ọkọdọhọ ete: “Edieke enyeneufọk ọkpọfiọkde ini [m̀mê ini ukpeme] emi inọ edidide, enye okpodu ke edidemede ikponyụn̄ iyakke ẹbụn̄ ufọk esie ẹdụk.”​—Matt. 24:43.

Jesus ama asiak ini ukpeme mbinan̄ emi ini enye ọkọdọhọde mme mbet esie ete: “Ẹdu ke ukpeme, koro mbufo mîfiọkke ini emi eteufọk edidide, m̀mê ke mbubreyo m̀mê ke ufọt okoneyo m̀mê ke ini ekikọ ọkpọkde m̀mê ke tụhi-tụhi usenubọk.” (Mark 13:35) Akpa ini ukpeme ekedi “mbubreyo,” ndien ọkọtọn̄ọ ke utịn ama okosop tutu esịm n̄kpọ nte n̄kanika usụkkiet okoneyo. Ọyọhọ ini ukpeme iba ekedi “ufọt okoneyo,” ndien ọkọtọn̄ọ ke n̄kpọ nte n̄kanika usụkkiet okoneyo esịm ufọt okoneyo. Ọyọhọ ini ukpeme ita ekedi “ke ini ekikọ ọkpọkde,” okonyụn̄ ọtọn̄ọ ke ufọt okoneyo esịm n̄kpọ nte n̄kanika ita usiere. Anaedi ini ukpeme enye emi ke ekikọ ọkọkpọk okoneyo oro ẹkemụmde Jesus. (Mark 14:72) Ọyọhọ ini ukpeme inan̄ ekedi “tụhi-tụhi usenubọk.” Enye emi ọkọtọn̄ọ ke n̄kpọ nte n̄kanika ita usiere tutu utịn asiaha.

Kpa ye oro n̄kanika mîkodụhe ke eyo Bible, imokụt ke enyene nte mbon ini oro ẹkesisan̄ade ẹfiọk ini n̄kanika uwemeyo ye okoneyo.