Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) SEPTEMBER 2016

“Ikọ Abasi enyene uwem”

Mme Mbụme Oro Mme Andikot Ẹbụpde

Mme Mbụme Oro Mme Andikot Ẹbụpde

Nso idi “ikọ Abasi” emi Mme Hebrew 4:12 ọdọhọde ke “enyene uwem onyụn̄ enyene odudu”?

Se ikotde ke Mme Hebrew ibuot inan̄ owụt ke apostle Paul eketịn̄ aban̄a etop m̀mê uduak Abasi oro odude ke Bible.

Imesiwak nditịn̄ mban̄a Mme Hebrew 4:12 ke n̄wed nnyịn, ke ini iyomde ndiwụt ke Bible enyene odudu ndikpụhọde owo. Se isitịn̄de emi enen. Edi se Paul etịn̄de aban̄a ke Mme Hebrew ibuot inan̄ anam nnyịn ifiọk se ikọ esie ke ufan̄ikọ 12 enen̄erede ọwọrọ. Enye ọkọdọhọ mme Christian emi ẹkedide mme Hebrew ete ẹsịn idem ẹnam uduak Abasi. Ẹma ẹwet ediwak n̄kpọ emi Abasi aduakde ndinam ke ndisana uwetn̄kpọ. Paul ama etịn̄ aban̄a nditọ Israel emi Abasi okosiode ke ufụn Egypt. Abasi ama ọn̄wọn̄ọ ndinam mmọ ẹdụn̄ ke “isọn̄ emi ọfiọrọde mmọn̄eba ye aranọkwọk,” man mmọ ẹkeme ndinyene ata nduọkodudu.—Ex. 3:8; Deut. 12:9, 10.

Uduak Abasi ekedi oro. Edi nditọ Israel ẹma ẹsọn̄ ibuot inyụn̄ ibuọtke idem ye Abasi; ntak edi oro ediwak mmọ mîkodụkke nduọkodudu Abasi. (Num. 14:30; Josh. 14:6-10) Edi Paul ama ọdọhọ ke ‘un̄wọn̄ọ edidụk ke nduọkodudu Abasi osụk ododu.’ (Heb. 3:16-19; 4:1) “Un̄wọn̄ọ” emi edi kiet ke otu n̄kpọ emi Abasi aduakde ndinam. Ukem nte mme Christian oro ẹkedide mme Hebrew, ana nnyịn n̄ko ikot Ikọ Abasi man ikeme ndinam uduak esie. Paul ama okot oto se ẹwetde ke Genesis 2:2 ye Psalm 95:11 ndiwụt ke un̄wọn̄ọ emi odu ke Ikọ Abasi.

Enen̄ede enem nnyịn ndifiọk ke ‘un̄wọn̄ọ edidụk ke nduọkodudu Abasi osụk ododu.’ Nnyịn imenịm ke imekeme ndidụk nduọkodudu Abasi, ke inyụn̄ inam se ikemede man idụk. Nnyịn inamke emi ke ndinịm Ibet Moses m̀mê ndinam utom en̄wen ekededi man inem Jehovah esịt. Utu ke oro, inam emi ke ndibuọt idem ye Abasi nnyụn̄ n̄ka iso nnam uduak esie. Nte ima iketetịn̄, “ikọ Abasi” emi Mme Hebrew 4:12 etịn̄de aban̄a ekeme n̄ko ndidi Bible, sia ediwak tọsịn owo mfịn ke ẹkpep Bible man ẹfiọk uduak Abasi. Ediwak mmọ ẹkpụhọde, ẹbuọt idem ye Abasi, ẹnyụn̄ ẹna baptism. Mmọ ndinam kpukpru emi owụt ke “ikọ Abasi enyene uwem onyụn̄ enyene odudu.” Uduak Abasi oro ikotde ke Bible anam nnyịn ikpụhọde, oyonyụn̄ aka iso ndinyene odudu ke uwem nnyịn.