Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) NOVEMBER 2016

Nditịk Enyịn̄ Emi Ekenen̄erede Ọsọn̄ọ Iban Idem!

Nditịk Enyịn̄ Emi Ekenen̄erede Ọsọn̄ọ Iban Idem!

JESUS ama esikot iban, “n̄wan owo” ndusụk ini. Ke uwụtn̄kpọ, ke ini Jesus okoyomde ndikọk mma kiet emi udọn̄ọ akanamde enye onụhọ ke ofụri isua 18, enye ọkọdọhọ mma oro ete: “N̄wan owo, ẹsana fi ke mmemidem fo ẹyak.” (Luke 13:10-13) Jesus ama esikam okot eka esie, “n̄wan owo.” Owo ikadaha nditịk enyịn̄ emi nte usọn̄enyịn ke eyo Bible. (John 19:26; 20:13) Edi enyene nditịk enyịn̄ en̄wen emi ekesinemde iban akan.

Nditịk enyịn̄ enye emi ke mme andiwet Bible ẹkesikot ndusụk iban. Enyịn̄ emi ke Jesus okokot n̄wan emi ọkọdọn̄ọde uwọrọiyịp ke ofụri isua 12. Mma oro ama abiat ibet Abasi ke ini enye okodụkde otuowo aka nditụk Jesus, sia ibet Abasi ọkọdọhọ ke owo emi ọdọn̄ọde utọ udọn̄ọ oro edehe. Ntre, ikpakanaha enye odụk otuowo. (Lev. 15:19-27) Edi, nnanenyịn ikayakke enye eti kpukpru oro, sia “enye [ama] okụt ekese ubiak ke ubọk ediwak mbiausọbọ onyụn̄ abiat kpukpru se enye enyenede inyụn̄ ikwe ufọn, edi utu ke oro, ọdọdiọk akan.”—Mark 5:25, 26.

Mma oro ama oto edem edem, afaha odụk otuowo oro okotụk nyeriye ewụra Jesus. Ndien kpa idahaoro, iyịp oro ọkọwọrọde enye etre! Enye ekekere ke owo ndomokiet ididiọn̄ọke se itịbede emi, edi Jesus ama obụp ete: “Anie okotụk mi?” (Luke 8:45-47) Nsia ama eyemede mma oro, ndien enye ama ọduọ Jesus ke iso “etịn̄ ofụri akpanikọ ọnọ enye.”—Mark 5:33.

Jesus ama etịn̄ n̄kpọ oro akanamde idem okûnyek mma oro aba. Enye ọkọdọhọ ete: “Sọn̄ esịt, eyenan̄wan.” (Matt. 9:22) Ntaifiọk emi ẹnamde ndụn̄ọde ẹban̄a Bible ẹdọhọ ke usem Hebrew ye Greek ẹnyene ikọ oro ẹkabarede nte “eyenan̄wan,” ndien ke ẹkesikot n̄wan “eyenan̄wan” ndiwụt ke ẹnen̄ede “ẹma ẹnyụn̄ ẹkere ẹban̄a enye.” Jesus ama afiak ọdọhọ mma oro ete: “Mbuọtidem fo amanam idem ọsọn̄ fi. Nyọn̄ ke emem, bọhọ idiọk udọn̄ọ fo nyụn̄ kop nsọn̄idem.”—Mark 5:34.

Boaz, eyen Israel emi ekenyenede n̄kpọ etieti, okokot Ruth eyen Moab, “Eyen mi” m̀mê “eyenan̄wan.” Idem ama enyek Ruth sia enye ekedi esenowo, ikonyụn̄ idiọn̄ọke andinyene in̄wan̄ emi enye akatan̄de nsụhọ barley. Boaz ama ọdọhọ Ruth ete: “Kpan̄ utọn̄, eyen mi [m̀mê eyenan̄wan]. Kûka ukatan̄ nsụhọ barley ke in̄wan̄ efen.” Ruth ama ọduọ ekịbi iso ke isọn̄, onyụn̄ obụp Boaz m̀mê nso inam enye ọfọn imọ emi idide esenowo mfọn ntem. Boaz ama etịn̄ ikọ en̄wen emi ọkọdọn̄de enye esịt ete: “Ẹma ẹtịm ẹsian mi kpukpru se afo anamde ọnọ eka ebe fo [Naomi] . . . Jehovah akpakam ọnọ fi utịp utom fo.”—Ruth 2:8-12.

Jesus ye Boaz ẹnịm ata eti uwụtn̄kpọ ẹnọ mbiowo. Ndusụk ini, mbiowo iba ẹsika ẹkese eyenete an̄wan emi oyomde ẹdọn̄ esịt. Ke mmọ ẹma ẹkebọn̄ akam, mmọ ẹsikpan̄ utọn̄ ẹkop ofụri se eyenete emi enyenede nditịn̄, emi esin̄wam mmọ ẹfiọk nte ẹkpedade Ikọ Abasi ẹdọn̄ enye esịt.—Rome 15:4.