Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme (Eke Ukpepn̄kpọ)  |  March 2018

Ana Mme Christian Ẹna Baptism

Ana Mme Christian Ẹna Baptism

“Se idide ukem ye emi ke ẹda ẹnyan̄a mbufo . . . oro edi, baptism.” ​—1 PET. 3:21.

IKWỌ: 52, 41

1, 2. (a) Esitie didie ndusụk ete ye eka ini eyen mmọ ọdọhọde ke imọn̄ ina baptism? (b) Nso isinam ẹbụp mbon oro ẹyomde ndina baptism m̀mê mmọ ẹma ẹyak idemmọ ẹnọ Jehovah? (Se akpa ndise ibuotikọ emi.)

MARIA edi isua usụkkiet. Enye oyom ndina baptism. Ete ye eka esie ke ẹse nte enye etienede mbon oro ẹyomde ndina baptism adaha ada. Ẹbụp mmọ mbụme iba, enye etiene ọbọrọ ke ọkpọsọn̄ uyo. Ekem enye ana baptism.

2 Enem ete ye eka Maria nte eyen mmọ ayakde idemesie ọnọ Jehovah onyụn̄ anade baptism. Edi ama enyene nte eketiede eka esie ini Maria ọkọdọhọde mmọ ke imoyom ndina baptism. Enye ama obụp idemesie ete: ‘Ndi Maria ikprike ikaha ndina baptism? Ndi enye enen̄ede ọfiọk se ọwọrọde ndina baptism? Ndi ikpakam ifọnke enye afiak ebet kan̄a?’ Ediwak ete ye eka ẹsibụp idemmọ ukem mbụme emi n̄ko ini eyen mmọ ọdọhọde ke imọn̄ ina baptism. Ntak emi mmọ ẹmade nditọ mmọ esinam mmọ ẹbụp. (Eccl. 5:5) Ndiyak idem nnọ Jehovah nnyụn̄ nna baptism idịghe n̄kpọ mbre.​—Se ekebe oro “ Ndi Amayak Idemfo Ọnọ Jehovah?

3, 4. (a) Didie ke apostle Peter okowụt ke edi ata akpan n̄kpọ nnyịn ndina baptism? (b) Ntak emi ẹmende baptism ẹdomo ye Noah ndikọkọn̄ ubom?

 3 Apostle Peter ekemen baptism odomo ye Noah ndikọn̄ ubom. Enye ọkọdọhọ ete: “Se idide ukem ye emi ke ẹda ẹnyan̄a mbufo n̄ko ke emi, oro edi, baptism.” (Kot 1 Peter 3:​20, 21.) Ubom oro Noah ọkọkọn̄de ama anam mme owo ẹkụt ke se ikenen̄erede ibehe enye ekedi ndinam n̄kpọ Jehovah. Noah ama anam kpukpru se Jehovah ọkọdọhọde enye anam. Enye ndikọkọn̄ ubom oro okowụt ke enye ọbuọt idem ye Abasi. Mbuọtidem esie ama anam Jehovah anyan̄a enye ye ubon esie. Nso ke Peter akada uwụtn̄kpọ oro ekpep nnyịn?

4 Ke ini mme owo ẹkekụtde ubom oro Noah ọkọkọn̄de, mmọ ẹma ẹfiọk ke enye ọbuọt idem ye Jehovah. Ukem ntre, ke ini mme owo ẹkụtde owo anade baptism, mmọ ẹsida oro ẹfiọk ke enye ama ayak idemesie ọnọ Jehovah ke ntak oro enye ọbuọtde idem ye Jesus. Mbon oro ẹyakde idem ẹnọ Abasi ẹsinam kpukpru se enye ọdọhọde mmọ ẹnam kpa nte Noah akanamde. Ini Jehovah edisobode idiọk ererimbot emi, enye ayanyan̄a mbon oro ẹnade baptism ẹnyụn̄ ẹkade iso ẹnam n̄kpọ esie ukem nte enye akanyan̄ade Noah. (Mark 13:10; Edi. 7:​9, 10) Ndi emi iwụtke ke ndiyak idem nnọ Jehovah nnyụn̄ nna baptism edi ata akpan n̄kpọ? Owo emi osụk ọdọhọde nyana, nyana, edi inaha, ekeme nditre ndidụk Obio Ubọn̄ Abasi.

5. Nso ke idineme ke ibuotikọ emi?

5 Sia ima ikọfiọk nte baptism edide akpan n̄kpọ eketre, ọfọn ibọrọ mbụme ita emi: Nso ke Bible etịn̄ aban̄a baptism? Nso ke ana owo anam man odot ndina baptism? Ke ini ikpepde nditọ nnyịn  m̀mê mbon en̄wen Bible, ntak emi ikpesitide ke baptism edi ata akpan n̄kpọ?

SE BIBLE ETỊN̄DE ABAN̄A BAPTISM

6, 7. (a) Nso ikanam John enịm mme owo baptism? (b) Baptism anie okokpụhọde ye kpukpru mbon oro John ekenịmde baptism, ndien ntak-a?

6 John Andinịm Owo Baptism edi akpa owo emi Bible ọdọhọde ke ama enịm owo baptism. (Matt. 3:​1-6) Mbon oro ẹkebiatde Ibet Moses, edi ekem ẹkabade esịt ẹma ẹka ẹbịne John ẹte ẹnịm mmimọ baptism man ẹwụt ke imakabade esịt. Edi ke otu mbon emi John ekenịmde baptism, idụhe owo oro baptism esie ekebietde eke Jesus sia enye ikanaha baptism ke ntak emi akabarede esịt. Jesus ekedi Eyen Abasi, ama onyụn̄ ọfọn ama. (Matt. 3:​13-17) Jesus ikanamke idiọkn̄kpọ, ntre ufọn ikodụhe enye ndikabade esịt. (1 Pet. 2:22) Enye akana baptism man owụt ke imeben̄e idem ndinam uduak Abasi.​—Heb. 10:7.

7 Mme mbet Jesus ẹma ẹsinyụn̄ ẹnịm owo baptism ini Jesus okodude ke isọn̄ ọkwọrọ ikọ. (John 3:22; 4:​1, 2) Mbon oro ẹkebiatde Ibet Moses ekem ẹkabade esịt ke mmọ ẹkenịm baptism ukem nte John ekenịmde. Edi ikedịghe ntre aba ke Jesus ama akakpa onyụn̄ eset. N̄kpọ en̄wen anam mbon oro ẹyomde ndidi mbet Jesus ẹna baptism.

8. (a) Ke Jesus ama ekeset, nso ke enye ọkọdọhọ mbet esie ẹnam? (b) Tịn̄ ntak emi anade owo oro oyomde ndidi mbet Christ ana baptism.

8 Esisịt ini ke Jesus ama ekeset ke isua 33 eyo mme apostle, enye ama etịn̄ ikọ ọnọ se ibede irenowo ye iban 500. Anaedi nditọwọn̄ ẹma ẹtiene ẹdu do. Etie nte ini oro ke Jesus ọkọdọhọ ete: “Ẹka ẹkenam mme owo ke kpukpru idụt ẹdi mbet mi, ẹnịm mmọ baptism ke enyịn̄ Ete ye Eyen ye edisana spirit, ẹkpep mmọ ẹnam kpukpru n̄kpọ eke n̄ketemede mbufo.” (Matt. 28:​19, 20; 1 Cor. 15:6) Etie nte ata ediwak mbet Jesus ẹma ẹdu ini enye ọkọdọhọde ẹnam mme owo ẹdi mbet imọ. Jesus akada emi owụt ke owo ekededi emi enyịmede ndikọn̄ọ “ọkpọnọ” imọ, m̀mê enyịmede ndidi mbet imọ, ana ana baptism. (Matt. 11:​29, 30) Ana owo oro oyomde Jehovah ama se imọ inamde inọ enye enyịme ke Jesus ke Jehovah ada anam uduak esie osu. Idahaoro ndien ke enye ekeme ndina baptism. Utọ baptism emi ke Jehovah enyịme. Bible owụt ke mbon oro ẹkedidide mbet Christ ke eyo mme apostle ẹma ẹfiọk ke baptism edi ata akpan n̄kpọ. Ntak edi oro mmọ mîkabiatke ini ndina baptism.​—Utom 2:41; 9:18; 16:​14, 15, 32, 33.

KÛBIAT INI

9, 10. Nte owo Ethiopia ye Paul ẹkenamde n̄kpọ ini ẹkekwọrọde ikọ ẹnọ mmọ ekpep nnyịn nso?

9 Kot Utom 8:​35, 36. Owo Ethiopia kiet ọkọnyọn̄ ndikpono Abasi ke Jerusalem. Nte enye akade ke usụn̄, angel Jehovah ọdọhọ Philip ọkọkwọrọ “eti mbụk emi aban̄ade Jesus ọnọ enye.” Nso ke owo Ethiopia oro akanam? Se enye akanamde ama owụt ke enye enen̄ede ama se Philip ọkwọrọde ọnọ enye. Enye ama ana baptism inikiet inikiet sia enye okoyom ndinam se Jehovah amade.

10 Owo en̄wen emi mîkabiatke ini ndina baptism ekedi eren Jew kiet emi ekesikọbọde mme Christian. Ofụri idụt mmọ ẹma ẹyak idem ẹnọ Abasi. Edi Jehovah ama esịn mmọ sia mmọ ikokopke uyo esie. Eren oro ama esịn idem etieti ke Ido Ukpono Mme Jew. Edi enyịn ama edin̄wan̄a enye ini Jesus Christ eketiede ke heaven ọkwọrọ ikọ ọnọ enye.  Eren oro akanam n̄kpọ didie? Enye ama enyịme Ananias emi ekedide mbet Christ an̄wam enye. Bible ọdọhọ ke ‘enye ama adaha ke enyọn̄ ana baptism.’ (Utom 9:​17, 18; Gal. 1:14) Anaedi ama ọfọfiọk ke apostle Paul ke itịn̄ iban̄a emi. N̄kọ omokụt ke Paul ikabiatke ini ndina baptism ndondo oro enye ọfiọkde ke Jesus ke Jehovah ada osu uduak esie.​—Kot Utom 22:​12-16.

11. (a) Nso isinam mbon oro ikpepde Bible ẹna baptism? (b) Esitie nnyịn didie ke idem ndikụt mme owo ẹnade baptism?

11 Ediwak mbon oro ikpepde Bible isibiatke ini ndina baptism ukem nte Paul ye owo Ethiopia oro mîkabiatke, edide mmọ edi ikpọ owo m̀mê mme uyen. Esidọdọn̄ mmọ ndiyak idem nnọ Jehovah nnyụn̄ nna baptism sia mmọ ẹbuọt idem ye Abasi ẹnyụn̄ ẹnen̄ede ẹma se mmọ ẹkpepde ke Bible. Isitetie ibet utịn̄ikọ baptism ke mbono circuit ye ikpọ mbono. Esinem nnyịn ke ini owo oro ikpepde Bible enyịmede se Bible ekpepde, ekem ana baptism. Esinem mme ete ye eka n̄ko ke ini nditọ mmọ ẹnade baptism. Ke isua utom 2017, “mbon oro ẹnyenede eti esịt” emi ẹkenade baptism ẹma ẹwak ẹbe 284,000. Oro okowụt ke mmọ ẹma ẹyak idemmọ ẹnọ Jehovah. (Utom 13:48) Kpukpru mmọ ẹma ẹfiọk ke ana kpukpru ikọt Jehovah ẹna baptism. Nso ke mmọ ẹkenam man ẹdot ndina baptism?

12. Nso ye nso ke ana owo oro ikpepde Bible anam mbemiso enye anade baptism?

12 Mbemiso owo odotde ndina baptism, ana enye ọfiọk Abasi, ọfiọk se Abasi aduakde ndinam nnọ mme owo, ọfiọk se Enye aduakde ndinam ke isọn̄, onyụn̄ ọfiọk se Enye akanamde man anyan̄a ubonowo. (1 Tim. 2:​3-6) Ana enye ọbuọt idem ye Abasi. Mbuọtidem ayan̄wam enye enịm ibet Abasi okûnyụn̄ unam se Abasi asuade. (Utom 3:19) Edieke owo ayakde idem ọnọ Abasi edi ke ananam n̄kpọ ekededi emi mîdiyakke enye odụk Obio Ubọn̄ Abasi, utọ uyakidem oro iwọrọke usụn̄. (1 Cor. 6:​9, 10) Edi ndi onyụn̄ okụre ke owo ndinịm ibet Abasi? Ana owo emi oyomde ndinam se inende esidụk mbono esop, ọkwọrọ ikọ, onyụn̄ ekpep mme owo Bible. Jesus ọkọdọhọ ke ata mbet imọ ẹyekwọrọ eti mbụk. (Utom 1:8) Ke owo ama akanam mme n̄kpọ emi ke enye ekeme ndibọn̄ akam ndien ndọhọ Jehovah ke imayak idem imọ inọ enye. Ekem enye ana baptism man mme owo ẹfiọk ke ima iyak idem inọ Jehovah.

N̄WAM MBON ORO AFO EKPEPDE N̄KPỌ ẸDIỌN̄Ọ KE BAPTISM EDI AKPAN N̄KPỌ

Ndi emesiti ke ndina baptism edi ata akpan n̄kpọ? Ndi emesinam mbon oro afo ekpepde Bible ẹfiọk oro? (Se ikpehe 13)

13. Ntak emi mbon oro ẹkpepde owo Bible mîkpefreke ke ana kpukpru mbon oro ẹyomde ndidi mbet Christ ẹna baptism?

13 Nte isụk in̄wamde nditọ nnyịn ye mbon oro isikpepde Bible ẹnam se idin̄wamde mmọ ẹdot ndina baptism, inaha ifre ke ana kpukpru mbon oro ẹyomde ndidi mbet Christ ẹna baptism. Emi ayanam emem nnyịn utom ndisinam mmọ ẹfiọk ntak emi mmọ ẹkpeyakde idem ẹnọ Jehovah ẹnyụn̄ ẹnade baptism. Iyesinam emi ini ekededi oro ikụtde ke ọfọn inam ntre. Ọdọn̄ nnyịn ndikụt nditọ nnyịn ye mbon oro isikpepde Bible ẹyakde idem ẹnọ Abasi ẹnyụn̄ ẹnade baptism.

14. Ntak emi nnyịn mîkpenyịkke owo ndomokiet ite ana baptism?

14 Ikpanaha inyịk nditọ nnyịn m̀mê mbon oro isikpepde Bible ite ẹna baptism, ikponyụn̄ inaha owo ekededi ke esop enyịk mmọ. Jehovah idọhọke owo okpono imọ m̀mê enye ama m̀mê imaha. (1 John 4:8) Utu ke oro, ke ini ikpepde mmọ Bible, ikpenyene ndin̄wam mmọ ẹfiọk ntak emi ọfọnde mmọ ẹdi ufan Jehovah. Edieke owo oro isikpepde Bible  amade se enye ekpepde aban̄a Jehovah onyụn̄ enen̄erede oyom ndidi mbet Christ, oro ayanam ọdọn̄ enye ndina baptism.​—2 Cor. 5:​14, 15.

15, 16. (a) Ndi Bible asiak isua emana emi anade owo esịm mbemiso anade baptism? Nam an̄wan̄a. (b) Ntak emi anade owo osụk ana baptism ekpededi enye ama anana ke ufọkabasi emi enye ekesikade?

15 Bible inịmke isua emana emi owo akpanade baptism, owo ye owo inyụn̄ idịghe ukem. Ndusụk owo ẹsisọp ẹnam se ẹkpepde mmọ ẹkan ndusụk. Ediwak mbon oro ẹkenade baptism ini ẹdide n̄kpri ke ẹnanam n̄kpọ Jehovah tutu emi. Edi ndusụk owo ẹma ẹsọsọn̄ mbemiso ẹdifiọkde akpanikọ Bible ẹnyụn̄ ẹnade baptism. Ndusụk mmọ ẹma ẹkam ẹbe isua 100!

16 Akanian̄wan kiet ama obụp Sista emi esikpepde enye Bible m̀mê ufọn osụk odu imọ ndifiak nna baptism. Enye ama anana baptism ke nsio nsio ufọkabasi emi enye ekesikade. Sista oro ama eneme mme itie Bible emi etịn̄de n̄kpọ aban̄a baptism ye enye. Ke enye ama okokụt se Bible etịn̄de aban̄a baptism, enye ikabiatke ini ndina baptism. Kpa ye oro enye ekekperede ndisịm isua 80, enye ikekereke ke ufọn idụhe imọ ndina baptism. N̄kukụre baptism emi Jehovah enyịmede edi eke mbon emi ẹnen̄erede ẹdiọn̄ọ uduak esie. Ntre, ekpededi ima ina baptism ke ufọkabasi emi ikesikade, ana isụk ina baptism edieke iyomde ndidi Ntiense Jehovah.​—Kot Utom 19:​3-5.

17. Nso ke ikpekere iban̄a ke usen oro inade baptism?

17 Inua ikemeke nditịn̄ nte esịt esinemde nnyịn usen oro inade baptism. Edi usen baptism edi usen emi ikpenen̄erede itie ikere se nnyịn ndiyak idem nnọ Jehovah nnyụn̄ nna baptism ọwọrọde. Ndika iso nnam se ikọn̄wọn̄ọde inọ Jehovah ini ikayakde idem inọ enye idịghe efere obu obu. Oro akanam Jesus emen owo ndidi mbet esie odomo ye owo ndikọn̄ọ ọkpọnọ esie. Inaha mme mbet Jesus ‘ẹdu uwem ẹnọ idemmọ, edi ana ẹdu ẹnọ enye emi akakpade ọnọ mmọ onyụn̄ esetde.’​—2 Cor. 5:15; Matt. 16:24.

18. Nso ke idineme ke ibuotikọ oro etienede?

18 Eka Maria ama ọfiọk ke baptism idịghe n̄kpọ mbubru. Ntak edi oro enye okobụpde idemesie mme mbụme oro ke ikpehe iba. Ekpedi emenyene eyen, anaedi emesikere ete: ‘Ndi eyen mi enen̄ede eben̄e idem ndina baptism? Ndi enye ọfiọk Jehovah ekem ndiyak idemesie nnọ enye? Ndi akpana nnam enye enen̄ede aka n̄wed kan̄a onyụn̄ enyene utom mbemiso anade baptism? Nso iditịbe edieke enye anamde akwa idiọkn̄kpọ ke ama akana baptism?’ Ke ibuotikọ oro etienede, iyọbọrọ mme mbụme emi inyụn̄ ineme nte mme ete ye eka ẹkpedade baptism.