“Ebiet emi n̄kpọuto mbufo odude, do ke esịt mbufo edidu n̄ko.”​—LUKE 12:34.

IKWỌ: 153, 104

1, 2. (a) Siak n̄kpọuto ita emi Jehovah ọnọde nnyịn. (b) Nso ke idineme ke ibuotikọ emi?

IDỤHE owo emi enyenede n̄kpọ nte Jehovah ke ofụri ekondo. (1 Chron. 29:11, 12) Sia enye edide Ete emi esitatde ubọk ọnọ nditọ esie n̄kpọ, enye an̄wan̄a n̄kpọuto ọnọ kpukpru mbon oro ẹdiọn̄ọde ufọn. Enem nnyịn etieti nte enye ọnọde nnyịn mme n̄kpọuto, utọ nte (1) Obio Ubọn̄ esie, (2) utom ukwọrọikọ emi ẹdidade inyan̄a mme owo, ye (3) akpanikọ oro ikpepde ke Bible! Edi edieke nnyịn mîkpemeke, imekeme nditọn̄ọ ndida mme n̄kpọ emi ntre ntre tutu editie nte imotop mmọ iduọk. Ntre ana isiti idem nnyịn kpukpru ini nte mmọ ẹsọn̄de urua ẹketre inyụn̄ inen̄ede ima mmọ. Jesus ọkọdọhọ ete: “Ebiet emi n̄kpọuto mbufo odude, do ke esịt mbufo edidu n̄ko.”​—Luke 12:34.

2 Ẹyak ineme nte ikemede ndika iso mma Obio Ubọn̄ Abasi, utom ukwọrọikọ, ye akpanikọ oro ikpepde ke Bible. Nte isụk inemede emi, kere nte afo ekemede ndinen̄ede mma mme n̄kpọuto oro Jehovah ọnọde nnyịn.

 OBIO UBỌN̄ ABASI ETIE NTE PEARL EMI ỌSỌN̄DE URUA

3. Nso ke owo urua oro ekenyịme ndinam man enye enyene ọsọn̄urua pearl oro enye okụtde? (Se akpa ndise ibuotikọ emi.)

3 Kot Matthew 13:45, 46. Jesus ọnọ uwụtn̄kpọ aban̄a owo urua emi asan̄ade oyom pearl. Idịghe mfịn ke owo urua emi ọkọtọn̄ọ ndidep nnyụn̄ nnyam pearl. Edi idahaemi enye edikụt pearl emi enen̄erede ọsọn̄ urua, ndien emi anam esịt enem enye. Ntre enye ama enyịme ndinyam kpukpru se enye enyenede man ekeme ndidep pearl oro. Omokụt do nte enye akamade pearl oro!

4. Nso ke idinam edieke inen̄erede ima Obio Ubọn̄ Abasi?

4 Nso ke uwụtn̄kpọ emi ekpep nnyịn? Akpanikọ emi aban̄ade Obio Ubọn̄ Abasi ebiet pearl emi enen̄erede ọsọn̄ urua. Edieke imade Obio Ubọn̄ Abasi ukem nte owo urua oro akamade pearl oro enye okokụtde, iyosion̄o idem ikpọn̄ n̄kpọ ekededi oro ekemede ndikpan nnyịn ndidụk Obio Ubọn̄ Abasi. (Kot Mark 10:28-30.) Ẹyak ineme iban̄a owo iba emi ẹkewụtde ke imama Obio Ubọn̄ Abasi.

5. Nso ke Zacchaeus akanam ndiwụt ke imoyom ndidụk Obio Ubọn̄ Abasi?

5 Zacchaeus ekedi etubom mme ọbọ a-tax. Enye ama esikan mme owo ubọk ọbọ okụk, ndien oro ama anam enye oforo. (Luke 19:1-9) Edi ke ini enye okokopde nte Jesus ọkwọrọde aban̄a Obio Ubọn̄ Abasi, enye ama ọsọsọp akabade esịt sia enye ama ọfiọk ke idụhe se ifọnde nte Obio Ubọn̄ oro. Enye ama ọdọhọ ete: “Sese! Ọbọn̄, ke nnọnọ mme ubuene ubak inyene mi, ndien se ededi emi n̄kodoride owo ikọ mbọ ke n̄kanubọk, nsosio usiene utịm ikanan̄.” Ekenenem enye ndikpọn̄ mme n̄kpọ oro enye ekesibọde mme owo ke n̄kanubọk nnọ mme andinyene. Enye ama onyụn̄ etre ndidiọk itọn̄ nyom inyene.

6. Nso ke Rose akanam ndiwụt ke imokpụhọde, ndien ntak-a?

6 Ke ini eyenan̄wan kiet emi iyomde ndikot Rose okokopde eti mbụk Obio Ubọn̄ Abasi isua ifan̄ ko ke edem, enye ama enyene eyenan̄wan emi enye ekesidan̄de kiet. Enye okonyụn̄ edi etieibuot okpokoro n̄ka emi ẹken̄wanade nditre asari oro ẹsisaride irenowo emi ẹdan̄de ye irenowo, ye iban emi ẹdan̄de ye iban. Edi nte enye ekekpepde Bible, enye ama edikụt ke idụhe se ifọnde nte Obio Ubọn̄ Abasi. Enye ama edifiọk n̄ko ke ana imọ ikpụhọde nte ikesidude uwem. (1 Cor. 6:9, 10) Ntre enye ama ọwọrọ ke n̄ka oro onyụn̄ etre ndidan̄ ye n̄wan. Enye ama ana baptism ke 2009 onyụn̄ ọtọn̄ọ utom usiakusụn̄ ofụri ini ke 2010. Enye ama ama Jehovah ye Obio Ubọn̄ esie akan ndinam se idọn̄de enye.​—Mark 12:29, 30.

7. Nso ke ikpanam mbak nnyịn iditre ndima Obio Ubọn̄ Abasi?

7 Ediwak nnyịn imokpụhọde nte ikesidude uwem man idot ndidụk Obio Ubọn̄ Abasi. (Rome 12:2) Edi ikụreke ke oro. Ana ikpeme mbak mme n̄kpọ emi imade, utọ nte inyene ye oburobụt idan̄ idinam nnyịn itre ndima Obio Ubọn̄ Abasi. (N̄ke 4:23; Matt. 5:27-29) Enyene ọsọn̄urua n̄kpọuto en̄wen emi Jehovah ọnọde nnyịn man an̄wam nnyịn ika iso ima Obio Ubọn̄ esie ke ofụri esịt.

UTOM UKWỌRỌIKỌ

8. (a) Nso ikanam apostle Paul ọdọhọ ke ukwọrọikọ nnyịn edi ‘n̄kpọuto emi odude ke esombat’? (b) Didie ke Paul okowụt ke imama ukwọrọikọ?

8 N̄kọ emeti ke Jesus ọkọdọhọ nnyịn ikwọrọ inyụn̄ ikpep mme owo eti mbụk Obio Ubọn̄ Abasi? (Matt. 28:19, 20) Apostle Paul ama ọdiọn̄ọ ufọn utom ukwọrọikọ.  Enye ọkọdọhọ ke utom ukwọrọikọ obufa ediomi emi edi ‘n̄kpọuto emi odude ke esombat.’ (2 Cor. 4:7; 1 Tim. 1:12) Sia nnyịn mîfọnke ima, nnyịn itie nte esombat. Edi ukwọrọikọ nnyịn etie nte ọsọn̄urua n̄kpọuto sia enye ekeme ndinam nnyịn ye mbon oro ẹkopde ukwọrọikọ nnyịn idu uwem ke nsinsi. Emi akanam Paul ọdọhọ ete: “Nnanam kpukpru n̄kpọ kaban̄a eti mbụk, man n̄kpabuana enye ye mbon en̄wen.” (1 Cor. 9:23) Paul ama esịn idem anam mme owo ẹdi mbet Christ koro enye ama ama ukwọrọikọ. (Kot Rome 1:14, 15; 2 Timothy 4:2.) Ndien oro ama an̄wam enye ọyọ ukọbọ. (1 Thess. 2:2) Didie ke ikeme ndima ukwọrọikọ ntre?

9. Siak ndusụk usụn̄ emi ikemede ndiwụt ke imama ukwọrọikọ.

9 Usụn̄ kiet emi Paul okowụtde ke imama ukwọrọikọ ekedi ndikwọrọ ikọ nnọ mme owo ini ekededi. Ukem nte mme apostle ye mme Christian eyo mmọ, nnyịn imesikwọrọ ikọ ke ufọk ke ufọk, ke ini inamde mbubehe idem nnyịn, ye ke ebiet ekededi emi mme owo ẹwakde. (Utom 5:42; 20:20) Edieke ikemede, imesinam usiakusụn̄ unọ un̄wam m̀mê eke ofụri ini man ikeme ndikwọrọ ikọ nnọ ediwak owo. Imesinyụn̄ ikpep usem en̄wen, iwọrọ ika ebiet en̄wen ke idụt nnyịn m̀mê ke idụt en̄wen ikọkwọrọ ikọ.​—Utom 16:9, 10.

10. Nso idi ufọn Irene ndikebiere ndikwọrọ ikọ ke usem Russian?

10 Irene odu ke United States inyụn̄ idọhọ ebe. Ama ọdọn̄ enye ndikwọrọ ikọ nnọ mbon emi ẹsemde Russian. Ke ini enye ọkọtọn̄ọde ndikwọrọ ikọ ke usem oro ke 1993, n̄kpọ nte mme asuanetop 20 kpọt ẹkedu ke otu emi ẹsemde Russian ke New York City. Kop se Irene etịn̄de mi ke enye ama ọkọkwọrọ ikọ ke usem Russian ke se ibede isua 20: “Nsụk nnen̄ekede ndiọn̄ọ usem Russian.” Kpa ye oro, Jehovah an̄wam Irene ye mbon en̄wen ẹkeme ndikwọrọ ikọ nnọ mbon oro ẹsemde Russian. Esop usem Russian itiokiet ẹdu idahaemi ke New York City. Owo 15 ke otu mbon emi Irene esikpepde Bible ẹma ẹna baptism, ndien ndusụk mmọ ẹdu ke bethel, ndusụk ẹdi mme asiakusụn̄, ye mbiowo. Enye ọdọhọ ete: “Idụhe n̄kpọ ndomokiet en̄wen emi n̄kpakanamde yak ọnọ mi utọ inemesịt emi n̄kopde idahaemi.” Irene enen̄ede ama utom ukwọrọikọ!

Ndi amada utom ukwọrọikọ nte n̄kpọuto esinyụn̄ ọkwọrọ ikọ kpukpru urua? (Se ikpehe 11, 12)

11. Nso isitịbe ke ini ikade iso ndikwọrọ ikọ kpa ye emi ẹkọbọde nnyịn?

11 Edieke imade utom ukwọrọikọ, nnyịn iditreke ndikwọrọ ikọ idem ke ini ẹkọbọde nnyịn ukem nte apostle Paul mîketreke. (Utom 14:19-22) Ẹma ẹkọbọ nditọete nnyịn n̄kpa n̄kpa ke United States ọtọn̄ọde ke 1930 esịm 1944. Edi ukem nte Paul, mmọ iketreke ndikwọrọ ikọ. Ndien ke ini ukara ẹkesidomode ndikpan mmọ, mmọ ẹma ẹsisịn ikpe ke esop ẹnyụn̄ ẹkan ke  ediwak ikpe emi. Brọda Nathan H. Knorr ọkọdọhọ ke 1943 aban̄a ikpe emi ikakande ke N̄kponn̄kan Esopikpe United States, ete: “Ifịk oro mbufo ẹsịnde ke utom ukwọrọikọ anam nnyịn ikan ke ediwak ikpe. Edieke mbufo mme asuanetop mîkpakaha iso ikwọrọ ikọ, owo ikpemenke nnyịn ika N̄kponn̄kan Esopikpe; edi mbufo ye nditọete nnyịn ke ofụri ererimbot ndisọn̄ọ nda n̄kwọrọ ikọ anam nnyịn ikan mbon oro ẹkọbọde nnyịn. Ikọt Abasi ndisọn̄ọ nda anam nnyịn ikan ke ikpe emi.” Nnyịn ke ika iso ndikan ke mme idụt en̄wen n̄ko ke ntak emi ikọt Jehovah ẹsọn̄ọde ẹda. Nnyịn ndima utom ukwọrọikọ ekeme ndinam ikan mbon emi ẹkọbọde nnyịn.

12. Nso ke afo edinam edieke adade utom ukwọrọikọ nte ọsọn̄urua n̄kpọuto?

12 Edieke idade utom ukwọrọikọ nte ọsọn̄urua n̄kpọuto emi Jehovah ọnọde nnyịn, nnyịn idikaha ukwọrọikọ n̄kukụre man inyene hour se inọde ke utịt ọfiọn̄. Utu ke oro, iyesịn ofụri ukeme nnyịn man ikeme “ndinọ ọyọhọ ikọ ntiense mban̄a eti mbụk.” (Utom 20:24; 2 Tim. 4:5) Edi nso ke idikpep mme owo? Ẹyak ise n̄kpọuto en̄wen emi Abasi ọnọde nnyịn.

AKPANIKỌ EMI IKPEPDE KE BIBLE

13, 14. Nso idi “ufọk ubon n̄kpọuto” oro Jesus eketịn̄de aban̄a ke Matthew 13:52, ndien didie ke ikeme ndidọn̄ n̄kpọ nyọhọ enye?

13 Ọyọhọ n̄kpọuto ita emi Jehovah ọnọde nnyịn edi akpanikọ oro ikpepde ke Bible. Jehovah edi Abasi akpanikọ. (2 Sam. 7:28; Ps. 31:5) Sia enye edide Ete emi atatde ubọk, enye esinam mbon oro ẹbakde enye ẹfiọk akpanikọ. Ọtọn̄ọde ke akpa ini emi ikokopde akpanikọ emi, imaka iso ndikpep akpanikọ emi ke ini ikotde Bible ye mme n̄wed esop Abasi, idụkde mbono esop, inyụn̄ idụkde n̄kpri ye ikpọ mbono. Ndien emi anam nnyịn inyene “ufọk ubon n̄kpọuto” oro Jesus ọkọdọhọde. Do ke isidọn̄ n̄kani ye mbufa akpanikọ oro ikpepde. (Kot Matthew 13:52.) Edieke ikade iso iyom akpanikọ nte n̄kpọuto emi edịbede, Jehovah ayan̄wam nnyịn ikụt mbufa akpanikọ emi ididọn̄de ke “ufọk ubon n̄kpọuto” nnyịn. (Kot Mme N̄ke 2:4-7.) Didie ke ikeme ndinam emi?

14 Ana isisio ini inịm ikpep inyụn̄ itịn̄ enyịn idụn̄ọde Bible ye mme n̄wed esop Abasi. Emi ayanam nnyịn ifiọk “obufa” akpanikọ. Mmọ ẹdi mbufa sia nnyịn ikọfiọkke mmọ akpa. (Josh. 1:8, 9; Ps. 1:2, 3) Akpa Enyọn̄-Ukpeme Ikọmbakara emi ẹkesiode ke July 1879, ekemen akpanikọ Bible odomo ye flawa emi edịbede ke otu mbiet. Ana owo enen̄ede etịn̄ enyịn oyom man ekeme ndikụt utọ flawa oro. Ndien ke ini enye okụtde flawa kiet, ikpanaha enye etre ndiyom en̄wen. Akpana enye aka iso oyom man okụt ediwak flawa en̄wen adian do. Ukem ntre, ikpanaha edi ima ifọfiọk akpanikọ kiet nnyịn ikere ke oro ekem. Akpana esidọn̄ nnyịn ndidọn̄ akpanikọ nyọhọ “ufọk ubon n̄kpọuto” nnyịn.

15. Ntak emi ikemede ndikot ndusụk akpanikọ ‘n̄kani,’ ndien ewe ke afo enen̄ede ama?

15 Nnyịn ima idifiọk ndusụk akpanikọ ke ini ikọtọn̄ọde ndikpep Bible ye Mme Ntiense Jehovah. Imekeme ndidọhọ ke mmọ ẹdi ‘n̄kani’ idahaemi sia mmọ ke ikebem iso ifiọk. Ke uwụtn̄kpọ, ima idifiọk ke Jehovah okobot nnyịn onyụn̄ ọnọ nnyịn uwem, ndien ke enyene ntak emi enye okobotde nnyịn. Ima idifiọk n̄ko ke ntak emi Jehovah akamade nnyịn akanam enye ọnọ Eyen esie edikpa afak nnyịn man ibọhọ idiọkn̄kpọ ye n̄kpa. Ima inyụn̄ ifiọk ke Obio Ubọn̄ Abasi eyetre kpukpru ukụt nnyịn, ndien ke nnyịn imekeme ndidu uwem ke nsinsi, inyene emem inyụn̄ ikop inemesịt ke ini Obio Ubọn̄ Abasi edikarade isọn̄.​—John 3:16; Edi. 4:11; 21:3, 4.

16. Nso ke ikpanam ke ini ẹnamde ndusụk n̄kpọ etetịm an̄wan̄a nnyịn mfịn?

 16 Ke ini ke ini, ẹsinam prọfesi Bible m̀mê ndusụk itie N̄wed Abasi etetịm an̄wan̄a nnyịn. Ọfọn isida ini itịn̄ enyịn ikpep mme n̄kpọ oro ẹnamde ẹtetịm ẹn̄wan̄a mi, inyụn̄ itie ikere mmọ. (Utom 17:11; 1 Tim. 4:15) Idịghe ndidiọn̄ọ mme n̄kpọ oro ẹkpụhọde kpọt ekpebehe nnyịn, edi akpana iyom usụn̄ idiọn̄ọ ntak emi ẹkpụhọde mmọ, ye se inamde mmọ ẹfọn ẹkan se ikesinịmde akpa. Edieke inamde emi, ọwọrọ imatan̄ mbufa akpanikọ ididọn̄ ke ufọk ubon n̄kpọuto nnyịn. Ntak oro ọfọnde inam emi?

17, 18. Didie ke edisana spirit ekeme ndin̄wam nnyịn?

17 Jesus ama ọdọhọ ke edisana spirit ekeme nditi nnyịn mme n̄kpọ emi ima ikekpekpep. (John 14:25, 26) Didie ke emi ekeme ndin̄wam nnyịn ke ini ikwọrọde eti mbụk? Da Brọda Peter ke uwụtn̄kpọ. Enye ekedi isua 19 ke 1970, ikonyụn̄ ibịghike enye akaka Bethel Britain. Ke ini enye ọkọkwọrọde ikọ ke ufọk ke ufọk usen kiet, enye ama okụt ete kiet emi ekedide n̄kpọ nte isua 50 onyụn̄ enyenede anyan ntan̄ebek. Peter ama obụp ete oro m̀mê enye akpama ndifiọk se Bible ekpepde. Idem ama akpa ete oro ekedide rabbi do tutu enye obụp Peter m̀mê enye idiọn̄ọke ke ufọk mme rabbi edi emi. Rabbi oro ama obụp Peter ete: “Da, ẹkewet n̄wed Daniel ke ewe usem?” Enye okoyom ndidomo Peter nse m̀mê enye ọfiọk Ikọ Abasi. Peter ama ọbọrọ ete: “Ẹkewet ndusụk ibuot ke usem Aramaic.” Peter ọdọhọ ete: “Idem ama akpa rabbi oro nte n̄kekemede ndibọrọ mbụme esie. Edi ami ke idem akakpa akan! N̄kanam didie mfiọk? Ke ini n̄kesịmde ufọk, mma nse Enyọn̄-Ukpeme ye Ẹdemede! oro ẹkesiode ọfiọn̄ ifan̄ emi ẹkebede nnyụn̄ n̄kụt ibuotikọ emi ọdọhọde ke ẹkewet n̄wed Daniel ke usem Aramaic.” * Omokụt do ke edisana spirit ekeme ndinam nnyịn iti mme n̄kpọ oro ikokotde idọn̄ ke ufọk ubon n̄kpọuto nnyịn!​—Luke 12:11, 12; 21:13-15.

18 Edieke inen̄erede ima akpanikọ oro Jehovah ekpepde nnyịn, iyọdọn̄ n̄kani ye mbufa akpanikọ iyọhọ ufọk ubon n̄kpọuto nnyịn. Nte ikade iso ndima akpanikọ oro Jehovah ekpepde nnyịn, ntre ke iditetịm idot ndikpep mbon en̄wen akpanikọ emi.

NEN̄EDE KPEME N̄KPỌUTO FO

19. Ntak emi ikpenen̄erede ikpeme mme n̄kpọuto oro Jehovah ọnọde nnyịn?

19 Satan ye ererimbot esie ke ẹtịme nte ẹkekeme ndinam nnyịn ikûda mme n̄kpọuto oro inemede ke ibuotikọ emi ke n̄kpọ. Edieke nnyịn mîkpemeke, mmọ ẹkeme ndinyene nnyịn. Satan ye ererimbot esie ẹkeme ndinam ọdọn̄ nnyịn ndinam utom oro ẹkpede ata ediwak okụk, ndinyene enyọn̄ ye isọn̄ nnyụn̄ ndia uwem, m̀mê ndinam mme owo ẹkụt ke imenyene n̄kpọ. Ntak edi oro apostle John okodụride nnyịn utọn̄ ete ke ererimbot emi ke ebebe efep ye mme udọn̄ esie. (1 John 2:15-17) Ntre ana inen̄ede ikpeme se imade mbak mmọ idinam nnyịn ida mme n̄kpọuto oro Jehovah ọnọde nnyịn ke mbio.

20. Nso ke afo edinam man aka iso ama mme n̄kpọuto emi Jehovah ọnọde fi?

20 Sion̄o idem kpọn̄ n̄kpọ ekededi oro mîdiyakke fi ama Obio Ubọn̄ Abasi. Ka iso sịn ifịk kwọrọ ikọ nyụn̄ nen̄ede ma utom ukwọrọikọ. Sịn idem kpep akpanikọ oro odude ke Bible. Edieke anamde mme n̄kpọ emi, afo oyobon “n̄kpọuto eke mîdikpụhu ke heaven, ke ebiet emi inọ mîsan̄ake ikpere, utan̄kpọ mînyụn̄ ibiatke n̄kpọ. Koro ebiet emi n̄kpọuto [fo] odude, do ke esịt [fo] edidu n̄ko.”​—Luke 12:33, 34.