SATAN ke an̄wana ye afo! Enye imaha fi ndomo esisịt. Enye akama ata idiọk n̄kpọekọn̄ an̄wana ye afo. Ọmọfiọk se n̄kpọekọn̄ oro edide? Edi abian̄a. Abian̄a ke Satan ada an̄wana ye afo! Enye oyom ndida abian̄a ‘mbiat fi ekikere,’ oro edi ndibiat fi ibuot.

Apostle Paul ama ekpeme idem ye abian̄a Satan, edi idịghe kpukpru nditọete ke eyo esie ẹkekpeme. Ke uwụtn̄kpọ, ndusụk nditọete ke Corinth ẹkekere ke mmimọ imenen̄ede isọn̄ idem ke esop, ke Satan ikemeke ndibian̄a mmimọ. (1 Cor. 10:12) Ntak edi oro Paul ọkọdọhọde mmọ ete: “Mmefehe ndịk, mbak ndusụk nte urụkikọt akabian̄ade Eve ke n̄kari esie, ẹdibiat mbufo ekikere ẹwọn̄ọde ẹkpọn̄ ido akpanikọ ye edisana ido eke ekemde ye Christ.”​—2 Cor. 11:3.

Item Paul emi owụt ke oyom fi enen̄ede ekpeme mbak Satan idibian̄a fi. Edieke ọfiọkde nte abian̄a ọdiọkde eketre, eyekeme ndikpeme idem mbak ẹdibiat fi ibuot.

ABIAN̄A ỌDIỌK ADAN̄A DIDIE?

Ẹsibian̄a mme owo man ẹtụn̄ mmọ usụn̄ m̀mê ẹnam mmọ ẹkere se mîkpekereke ẹnyụn̄ ẹnam se mîkpanamke. N̄wed kiet oro ẹkotde Propaganda and Persuasion ọdọhọ ke abian̄a ọdiọk etieti. Ndusụk owo ẹdọhọ ke abian̄a esitịmede owo ekikere, abiat owo ibuot, anam owo enịm nsu ke akpanikọ, onyụn̄ anam se mîkpanamke.

Abian̄a ọdiọk adan̄a didie? Abian̄a ekeme ndinam owo enịm nsu ke akpanikọ idiọn̄ọke. Abian̄a etie nte idiọk ofụm emi mînyeneke utebe, emi owo mîkemeke ndikụt, emi onyụn̄ ekemede ndiwot owo. Oro anam Vance Packard, emi ekpepde n̄kpọ aban̄a ido mme owo ọdọhọ ke ‘ẹbian̄a ata ediwak  owo mfịn ẹkan nte mmọ ẹkerede.’ Ataifiọk kiet ọdọhọ ke abian̄a anam ata ediwak iren ye iban “ẹnam n̄kpọ emi odorode owo ediyịk,” utọ nte ‘ndin̄wana ekọn̄, ndinen̄ede nsua nnyụn̄ n̄wot mbon orụk en̄wen ye mbon oro ẹkade ido ukpono en̄wen. Abian̄a esinyụn̄ anam mme owo ẹnam ndiọi n̄kpọ eken.’​—Easily Led​—A History of Propaganda.

Edieke mme owo ẹkemede ndibian̄a nnyịn, Satan ndien-e? Satan ekpep nte mme owo ẹsinamde n̄kpọ tọn̄ọ Abasi okobot owo. “Ofụri ererimbot” esịne enye ke ubọk. Ntre enye ekeme ndida n̄kpọ ekededi ke ererimbot emi mbian̄a mme owo. (1 John 5:19; John 8:44) Enye ‘anam ikike ata ediwak owo ekịm’ onyụn̄ ‘otụn mme andidụn̄ isọn̄ usụn̄.’ (2 Cor. 4:4; Edi. 12:9) Nso ke akpanam mbak Satan idibian̄a fi?

SE AKPANAMDE MBAK SATAN IDIBIAN̄A FI

Jesus ama etịn̄ mmemmem n̄kpọ emi afo akpanamde mbak Satan idibian̄a fi. Enye ọkọdọhọ ete: “Mbufo ẹyefiọk akpanikọ, akpanikọ oyonyụn̄ anam mbufo ẹwọrọ ufụn.” (John 8:​31, 32) Ke ini ekọn̄, esifọn mbonekọn̄ ẹnyene owo emi esinọde mmọ nnennen ntọt sia mme asua ẹsitịn̄ ediwak n̄kpọ emi mîdịghe akpanikọ man ẹnyene mmọ. Edieke mmọ ẹfiọkde se idide akpanikọ, mme asua idikemeke ndibian̄a mmọ. Kpasụk ntre, Jehovah ọnọ fi Bible man ọfiọk abian̄a Satan.​—2 Tim. 3:​16, 17.

Satan ọfiọk ke edieke afo okotde Bible, ke ọyọfiọk nte imọ isisan̄ade ibian̄a owo. Ntre enye ada ererimbot esie anam ọsọn̄ ndikot nnyụn̄ n̄kpep Bible. Kûyak enye ada n̄kari esie enyene fi! (Eph. 6:11) Kụt ete ke emenen̄ede ọfiọk akpanikọ emi afo ekpepde ke Bible. (Eph. 3:18) Imọdiọn̄ọ ke idimemke utom ndinam emi. Edi kûfre se ewetn̄wed kiet, emi ekerede Noam Chomsky, eketịn̄de ete: “Owo idisiakke fi ibuot isịn akpanikọ. Afo ke idemfo enyene ndidụn̄ọde mfiọk se idide akpanikọ.” Ntre sịn idem “[dụn̄ọde] N̄wed Abasi ke usen ke usen” man ọfiọk akpanikọ.​—Utom 17:11.

Edieke ọfiọkde nte abian̄a ọdiọkde eketre, eyekeme ndikpeme idem mbak ẹdibiat fi ibuot

Satan oyom ndibian̄a fi mbak udûkere n̄kpọ ọfọn unyụn̄ ufiọk se afo ekpepde ke Bible. Ntak-a? N̄wed kiet emi ẹkotde Media and Society in the Twentieth Century ọdọhọ  ke abian̄a isiyakke mme owo ẹkere n̄kpọ ọfọn. Ntre kûnịm kpukpru se okopde, dụn̄ọde kan̄a se m̀mê se okopde edi akpanikọ. (N̄ke 14:15) Abasi ama obot fi man ekeme ndikere n̄kpọ ọfọn, ntre tie kere se ekpepde ke Bible man ekeme ndinen̄ede mma akpanikọ.​—N̄ke 2:​10-15; Rome 12:​1, 2.

KÛYAK SATAN ADIAN̄ADE FI ỌKPỌN̄ NDITỌETE

Abian̄a esinam idem enyek mbonekọn̄ inyụn̄ iyakke mmọ ẹnen̄ede ẹnyene uko ẹn̄wana ekọn̄. Abian̄a akam ekeme ndinam mmọ ẹn̄wana ke otu idemmọ m̀mê ẹdian̄ade ẹkpọn̄ kiet eken. Ẹdọhọ ke akamba owoekọn̄ Germany kiet ọkọdọhọ ke ndikpan̄ utọn̄ nnọ abian̄a mme asua edi n̄kpọ kiet emi akanamde ẹkan mmimọ ke akpa ekọn̄ ererimbot. Satan n̄ko esidomo ndibian̄a nnyịn man anam idian̄ade ikpọn̄ nditọete nnyịn. Ke uwụtn̄kpọ, enye esidomo ndinam nnyịn itọhọ ye nditọete nnyịn m̀mê iwọrọ ikpọn̄ esop Jehovah ke ntak emi ikerede ke ẹfịk nnyịn m̀mê ke eyenete anam se iyatde nnyịn esịt.

Kûyak Satan abian̄a fi! Yak Ikọ Abasi ada fi usụn̄. Ke uwụtn̄kpọ, edieke afo enyenede mfịna ye eyenete fo, ‘fen nọ enye ke ofụri esịt’ nte Bible ọdọhọde nyụn̄ sọsọp nam emem ke ini mfịna odude. (Col. 3:​13, 14; Matt. 5:​23, 24) Bible odụri nnyịn utọn̄ ete ikûdian̄ade ukpọn̄ nditọete ke esop. (N̄ke 18:1) Nen̄ede biere ke Satan idibian̄ake fi. Bụp idemfo ete: ‘N̄kanam didie n̄kpọ ke ini eyenete mi akanamde se iyatde mi esịt? Ndi n̄kanam se inemde Abasi esịt m̀mê Satan?’​—Gal. 5:​16-26; Eph. 2:​2, 3.

KÛYAK SATAN ANAM FI ỌKPỌN̄ ESOP ABASI

Owoekọn̄ idisịnke idem in̄wana ekọn̄ edieke n̄kpọ anamde enye okûbuọt idem ye etubom mmọ. Sia mme asua ẹfiọkde emi, mmọ ẹsidomo ndinam owoekọn̄ okûbuọt idem ye etubom mmọ. Mme asua ẹkeme ndidọhọ: “Kûkop se mme adausụn̄ mbufo ẹtịn̄de!” mîdịghe ẹdọhọ: “Kûyak mme adausụn̄ mbufo ẹsịn fi ke fehesan̄!” Edieke mme adausụn̄ emi ẹnamde ekpri ndudue, mme asua ẹyetori ndudue emi ẹnyan man ẹnam owoekọn̄ oro okûbuọt idem ye mmọ. Se Satan esinyụn̄ anamde edi emi. Enye esịn ofụri ukeme ndinam fi okûbuọt idem  ye mbon oro Jehovah emekde ẹda esop esie usụn̄.

Nso ke afo edinam? Biere ke imọ idikpọn̄ke esop Jehovah, nyụn̄ sụk ibuot nọ mbon oro Jehovah emekde ẹda esop esie usụn̄ kpa ye oro mmọ mîfọnke ima. (1 Thess. 5:​12, 13) “[Kûyak] ekikere awara etịmede” fi ke ini mbon mfiakedem m̀mê “mbon abian̄a emi ẹbiatde owo ekikere” ẹtịn̄de n̄kpọ ẹyom ndibiat esop Abasi, ekpededi se mmọ ẹtịn̄de ebiet akpanikọ. (2 Thess. 2:2; Titus 1:10) Nam item oro Paul ọkọnọde Timothy. Kûkpọn̄ akpanikọ emi afo ekekpepde, kûnyụn̄ ufre ebiet emi ekekpepde enye. (2 Tim. 3:​14, 15) Ediwak ntak ẹdu emi akpanamde fi ọbuọt idem ye ofụn emi anamde akpanikọ. Ofụn emi ke Jehovah ada ekpep nnyịn akpanikọ ke n̄kpọ nte isua ikie idahaemi.​—Matt. 24:​45-47; Heb. 13:​7, 17.

KÛYAK SATAN ANAM NDỊK ANAM FI

Idịghe abian̄a kpọt ke Satan esidomo ndida nnam nnyịn ikpọn̄ Abasi, enye esidomo ndinam idem enyek nnyịn n̄ko. N̄wed oro Easily Led​—A History of Propaganda ọdọhọ ke ebịghi mme asua ẹketọn̄ọ ndisinam idem enyek mme owo man ẹda oro ẹnyene mmọ. Ke uwụtn̄kpọ, Prọfesọ Philip M. Taylor, emi otode Britain, ọdọhọ ke mbon Assyria ẹma ẹsibian̄a mme asua mmọ ẹnyụn̄ ẹnam idem enyek mmọ man ẹkan mmọ. Satan ayada owo, ukọbọ, n̄kpa, ye n̄kpọ en̄wen ekededi odomo ndinam idem enyek fi man anam fi etre ndinam n̄kpọ Jehovah.​—Isa. 8:12; Jer. 42:11; Heb. 2:15.

Kûyak Satan anam idem enyek fi tutu afo etre ndinam n̄kpọ Jehovah. Jesus ọkọdọhọ ete: “Ẹkûfehe mmọ emi ẹwotde ikpọkidem ndien mîkemeke ndinam n̄kpọ n̄kan oro.” (Luke 12:4) Nen̄ede nịm ke Jehovah eyese aban̄a fi, ọnọ fi “odudu eke ebede ukeme owo,” onyụn̄ an̄wam fi ọsọn̄ọ ada ọbiọn̄ọ Satan.​—2 Cor. 4:​7-9; 1 Pet. 3:14.

Ndusụk n̄kpọ ẹkeme ndinam idem emem fi, mîdịghe anam ndịk anam fi. Edi kûfre se Jehovah eketịn̄de ọdọn̄ Joshua esịt. Enye ọkọdọhọ Joshua ete: “Nyene uko nyụn̄ kop odudu. Kûdịghe, kûnyụn̄ uyak idem enyek fi, koro Jehovah Abasi fo odude ye afo ke ebiet ekededi eke afo akade.” (Josh. 1:9) Edieke esịt etịmerede fi, sọsọp bọn̄ akam nọ Jehovah nyụn̄ tịn̄ kpukpru se ifịnade fi nọ enye. Ndien ‘emem Abasi eyekpeme fi esịt ye ekikere’ mbak Satan idida abian̄a ibiat fi ibuot.​—Phil. 4:​6, 7, 13.

N̄kọ emeti nte Rabshakeh, isụn̄utom mbon Assyria, akabian̄ade ikọt Abasi man anam idem enyek mmọ. Enye ama akam ọdọhọ mmọ ete, ‘Idụhe owo emi ekemede ndinyan̄a mbufo nsio Assyria ke ubọk. Jehovah Abasi mbufo inyụn̄ ikemede ndinyan̄a mbufo.’ Ekem enye ama ọsọn̄ enyịn ọdọhọ ke Jehovah ọdọn̄ mmimọ idisobo Jerusalem. Nso ke Jehovah ọkọdọhọ nditọ Israel? Jehovah ọkọdọhọ mmọ ete: “Kûkop ndịk uban̄a ikọ emi afo okopde, emi mme asan̄autom edidem Assyria ẹtịn̄de ẹsụn̄i mi.” (2 Ndi. 18:​22-25; 19:6) Jehovah ama ọdọn̄ angel kiet okowot mbonekọn̄ Assyria 185,000 ke okoneyo kiet!​—2 Ndi. 19:35.

WỤT KE EMENYENE ỌNIỌN̄ NYỤN̄ KOP UYO JEHOVAH KPUKPRU INI

Ndi akanam emese fim emi ẹbian̄ade owo ẹnyụn̄ ẹnamde owo utọtọ? Ndi ama ọdọn̄ fi ndikpọdọhọ owo oro, ‘Kûnịm, kûnịm! Ẹbabian̄a fi!’ Ukem ntre, kere nte mme angel ẹdọhọde fi ẹte: “Kûyak Satan abian̄a fi!”

Kûkpan̄ utọn̄ ukop nsu Satan. (N̄ke 26:​24, 25) Kpan̄ utọn̄ nọ Jehovah nyụn̄ buọt idem ye enye kpukpru ini. (N̄ke 3:​5-7) Nam se Jehovah ọdọhọde fi emi: “Eyen mi, nyene ọniọn̄, nyụn̄ dat mi esịt.” (N̄ke 27:11) Edieke anamde emi, Satan idikemeke ndida abian̄a esie mbiat fi ibuot.