Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) JULY 2016

Kwọrọ Eti Mbụk Mfọnido Abasi Oro Owo Mîdotke

Kwọrọ Eti Mbụk Mfọnido Abasi Oro Owo Mîdotke

‘Nọ ọyọhọ ikọ ntiense ban̄a eti mbụk mfọnido Abasi oro owo mîdotke.’—UTOM 20:24.

IKWỌ: 101, 84

1, 2. Didie ke apostle Paul okowụt ke imenen̄ede ikọm Abasi ke mfọnido esie oro owo mîdotke?

APOSTLE PAUL ọkọdọhọ ete: “Mfọnido [Abasi] oro owo mîdotke emi ẹwụtde mi ikedịghe ke ikpîkpu.” (Kot 1 Corinth 15:9, 10.) Paul ama enen̄ede ọfiọk ke imọ idotke se Abasi akpatuade mbọm, sia imọ ima isikọbọ ikọt Abasi etieti.

2 Mbemiso Paul akakpade, enye ama ewet leta ọnọ Timothy ete: “Mmọkọm Christ Jesus Ọbọn̄ nnyịn, emi ọkọnọde mi odudu, koro enye akabatde mi ke owo akpanikọ ke ndinọ mi utom nnam.” (1 Tim. 1:12-14) Ewe utom ke Paul eketịn̄ aban̄a? Paul ama anam mbiowo esop Ephesus ẹfiọk se utom emi edide, ke ini enye ọkọdọhọde ete: “Mbatke ukpọn̄ mi ke n̄kpọ, man n̄kpekeme ndifehe mbuba mi mma nnyụn̄ nnam utom emi n̄kọbọde nto Ọbọn̄ Jesus, ndinọ ọyọhọ ikọ ntiense mban̄a eti mbụk mfọnido Abasi oro owo mîdotke.”Utom 20:24.

3. Ewe utom ke ẹkenọ Paul? (Se akpa ndise ibuotikọ emi.)

 3 Ewe eti mbụk oro apostle Paul ọkọkwọrọde akanam ẹfiọk mfọnido Abasi oro owo mîdotke? Paul ọkọdọhọ nditọete ke Ephesus ete: “Mbufo [ẹmekop] ẹban̄a itie akama-ukpọhọde emi Abasi akadade mfọnido esie oro owo mîdotke ọnọ mi ke ufọn mbufo.” (Eph. 3:1, 2) Jesus Christ ama ọdọhọ Paul ọkọkwọrọ eti mbụk ọnọ mbon oro mîkedịghe mme Jew man mmọ n̄ko ẹkpetiene imọ ẹkara ke Obio Ubọn̄ imọ. (Kot Ephesus 3:5-8.) Paul ama esịn ifịk ọkwọrọ eti mbụk Obio Ubọn̄ Abasi onyụn̄ enịm eti uwụtn̄kpọ ọnọ nnyịn mfịn. Enye ama owụt ke mfọnido oro Abasi okowụtde imọ ikedịghe ke “ikpîkpu.”

NSO KE MFỌNIDO ABASI ORO OWO MÎDOTKE AKPANAM FI ANAM?

4, 5. Ntak emi ikpọdọhọde ke “eti mbụk obio ubọn̄” edi ukem ye “eti mbụk mfọnido Abasi oro owo mîdotke”?

4 Ke utịt ini emi, Jehovah Abasi ọdọn̄ ikọt esie ẹkwọrọ “eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt.” (Matt. 24:14) Bible okot eti mbụk emi, “eti mbụk mfọnido Abasi oro owo mîdotke,” koro nnyịn idikeme ndibọ kpukpru edidiọn̄ oro Abasi ọn̄wọn̄ọde ndinọ nnyịn ke Obio Ubọn̄ esie ke ntak mfọnido esie oro owo mîdotke. Abasi edida Jesus Christ ọdiọn̄ nnyịn. (Eph. 1:3) Ndi nnyịn imesikọm Jehovah ke mfọnido esie oro owo mîdotke nte Paul ọkọkọmde, inyụn̄ isịn ifịk ikwọrọ ikọ?—Kot Rome 1:14-16.

5 Ke ibuotikọ oro ikekpepde urua oko, ima ikụt ke kpa ye oro nnyịn mîfọnke ima, ke Jehovah ọdiọn̄ nnyịn ke nsio nsio usụn̄ ke ntak mfọnido esie oro owo mîdotke. Ntre, ana isịn ifịk inam mbon en̄wen ẹtiene ẹfiọk ima emi Jehovah amade mme owo ye se mmọ ẹkpenamde man enye etiene ama mmọ. Nso idi ndusụk n̄kpọ emi ikpanamde mmọ ẹfiọk ẹban̄a mfọnido Abasi oro owo mîdotke?

NAM MME OWO ẸDIỌN̄Ọ UFỌN UWA UFAK CHRIST

6, 7. Didie ke “eti mbụk mfọnido Abasi oro owo mîdotke” anam mme owo ẹfiọk ufak?

6 Esịt isifịnake ediwak owo ke ini mmọ ẹnamde idiọkn̄kpọ, ntem mmọ isikwe ufọn emi ikpoyomde Abasi efen ọnọ mmimọ m̀mê afak mmimọ osio ke idiọkn̄kpọ. Kpa ye oro, ediwak mmọ ẹkụt ke ndidu utọ uwem emi inamke mmimọ ikop inemesịt. Ediwak mmọ ẹsidi ẹdidiọn̄ọ se idiọkn̄kpọ edide, se idiọkn̄kpọ anamde nnyịn, ye se ikpanamde man iwọrọ ke ufụn̄ idiọkn̄kpọ ke ini Mme Ntiense Jehovah ẹkwọrọde ikọ ẹnọ mmọ. Esinen̄ede enem mbon oro ẹmade Abasi ndifiọk ke Jehovah ọkọnọ Eyen esie edikpa ke ibuot nnyịn man afak nnyịn osio ke idiọkn̄kpọ ye n̄kpa, ke ntak emi enye amade nnyịn etieti, ye ke ntak mfọnido esie oro owo mîdotke.—1 John 4:9, 10.

7 Paul ọkọdọhọ ntem aban̄a edima Eyen Abasi: “Nnyịn inyene ubọhọ-ufụn ke [Jesus] ebe ke ufak oto ke iyịp owo oro, kpa edifen mme idiọkn̄kpọ nnyịn, nte asan̄ade ekekem ye akpakịp mfọnido [Jehovah] oro owo mîdotke.” (Eph. 1:7) Abasi ndikọnọ Christ edikpa afak nnyịn owụt ke enye enen̄ede ama nnyịn, onyụn̄ owụt adan̄a nte enye ọfọnde ido ye nnyịn, kpa ye oro nnyịn mîdotke mfọnido esie. Enen̄ede enem nnyịn ndifiọk ke edieke ibuọtde idem ke uwa ufak Jesus, Abasi eyefen mme idiọkn̄kpọ nnyịn, esịt idinyụn̄ ibiomke nnyịn  aba. (Heb. 9:14) Eti mbụk emi ke ikpọkwọrọ inọ mme owo!

N̄WAM MME OWO ẸDI UFAN ABASI

8. Ntak emi anade ẹn̄wam mme owo ẹdu ke emem ye Abasi?

8 Ana nnyịn inam mme owo ẹfiọk ke mmọ ẹkeme ndidi ufan Abasi. Abasi ada mbon oro mîbuọtke idem ke uwa ufak Jesus nte mme asua esie. Apostle John ọkọdọhọ ete: “Owo eke ọbuọtde idem ke Eyen enyene nsinsi uwem; owo eke ọsọn̄de ibuot ye Eyen idikwe uwem, edi iyatesịt Abasi odoro enye ke idem.” (John 3:36) Uwa ufak Christ anam mme owo ẹkeme ndidu ke emem ye Abasi. Paul ọkọdọhọ ete: “Mbufo emi ini kiet ko ẹkedian̄arede ẹda ẹnyụn̄ ẹdide mme asua ke ntak emi ekikere mbufo okodude ke mme utom eke ẹdiọkde, enye ke emi amada obụkidem owo oro anam ẹfiak ẹdu ke emem ebe ke n̄kpa esie.”—Col. 1:21, 22.

9, 10. (a) Nso utom ke Christ ọkọnọ nditọete esie oro ẹyetde aran? (b) Didie ke “mme erọn̄ en̄wen” ẹn̄wam mbon oro ẹyetde aran?

9 Jesus Christ ọnọ nditọete esie oro ẹyetde aran, emi ẹdude ke isọn̄ mfịn ‘utom edinam mme owo ẹfiak ẹtie ke emem ye Abasi.’ Paul ọkọdọhọ mbon oro ẹkeyetde aran ke eyo esie ete: “Kpukpru n̄kpọ ẹto Abasi, emi akanamde nnyịn ifiak itie ke emem ye enye ebe ke Christ onyụn̄ ọnọde nnyịn utom edinam owo afiak etie ke emem ye enye, oro edi, nte ke Abasi ada Christ anam ererimbot afiak etie ke emem ye enye, ibatke idiọkn̄kpọ mmọ inọ mmọ, ndien enye ama ayak ikọ edinam owo afiak etie ke emem ye enye esịn nnyịn ke ubọk. Ntre nnyịn idi mme isụn̄utom emi idade ke ibuot Christ, nte n̄kpọ eke Abasi adade nnyịn anam n̄kpeubọk. Nte mme andida ke ibuot Christ nnyịn iben̄e ite: ‘Ẹfiak ẹtie ke emem ye Abasi.’”—2 Cor. 5:18-20.

10 “Mme erọn̄ en̄wen” ẹda ke edi ata n̄kpọ ukpono ndin̄wam nditọete Christ ẹnam utom emi. (John 10:16) Sia “mme erọn̄ en̄wen” ẹwakde ẹkan mbon oro ẹyetde aran, mmọ ẹkwọrọ ikọ ẹnọ ata ediwak owo, ẹkpep mmọ n̄kpọ ẹnyụn̄ ẹn̄wam mmọ ẹdi ufan Abasi. Emi edi ata akpan usụn̄ oro ikwọrọde eti mbụk mfọnido Abasi oro owo mîdotke.

NAM MME OWO ẸFIỌK KE ABASI ESIKOP AKAM

11, 12. Ntak emi ikpekpepde mme owo ndibọn̄ akam nnọ Jehovah?

11 Ediwak owo ẹsibọn̄ akam ke ntak emi akam esinamde esịt ana mmọ sụn̄, edi mmọ inịmke ke Abasi esikop akam mmimọ. Ana nnyịn inam mmọ ẹfiọk ke Jehovah edi “Andikop akam.” Edidem David ekewet ete: “O Andikop akam, kpukpru obụkidem ẹyedi ẹbịne fi. Mme ndudue ẹmekop odudu ẹkan mi. Amaedi mme ubiatibet nnyịn, afo eyefen mmọ.”—Ps. 65:2, 3.

12 Jesus ọkọdọhọ mbet esie ete: “Edieke mbufo ẹben̄ede n̄kpọ ekededi ke enyịn̄ mi, nyanam.” (John 14:14) “N̄kpọ ekededi” ọwọrọ n̄kpọ emi ekemde ye uduak Jehovah. Ntak edi oro John ọkọdọhọde ete: “Mbuọtidem emi nnyịn inyenede ke enye edi emi, ite, se ededi oro nnyịn iben̄ede nte ekemde ye uduak esie, enye ọbiọn̄ utọn̄ ke eben̄e nnyịn.” (1 John 5:14) Ọfọn ikpep mme owo ke nnyịn ikpọbọn̄ke akam n̄kukụre man esịt ana nnyịn sụn̄, edi ke akam esin̄wam nnyịn isan̄a ikpere ‘ebekpo mfọnido Abasi oro owo mîdotke.’ (Heb. 4:16) Edieke ikpepde mme owo nnennen usụn̄ emi mmọ ẹkpebọn̄de  akam, nnennen owo emi mmọ ẹkpebọn̄de akam ẹnọ, ye nnennen n̄kpọ emi mmọ ẹkpeben̄ede Abasi ke ini mmọ ẹbọn̄de akam, iyan̄wam mmọ ẹnen̄ede ẹkpere Jehovah ẹnyụn̄ ẹkop ndọn̄esịt ke ini nnanenyịn.—Ps. 4:1; 145:18.

MFỌNIDO ABASI ORO OWO MÎDOTKE KE OBUFA ERERIMBOT

13, 14. (a) Nso ke Jehovah edinam inọ mbon oro ẹyetde aran? (b) Nso ke mbon oro ẹyetde aran ẹdinam inọ mme owo?

13 Mfọnido Abasi oro owo mîdotke oyosụk aka iso tutu ke obufa ererimbot. Apostle Paul ama etịn̄ se Abasi edinamde inọ owo 144,000 oro ẹditienede Jesus ikara ke heaven ke ntak mfọnido esie oro owo mîdotke. Enye ọkọdọhọ ete: “Abasi, emi awakde mbọm, oto ke akwa ima eke enye amade nnyịn, akanam nnyịn idu uwem ye Christ, idem ke ini nnyịn ima ikakpan̄a ke mme idiọkn̄kpọ—ẹma ẹnyan̄a mbufo oto ke mfọnido oro owo mîdotke—enye ama onyụn̄ anam nnyịn iset ọtọkiet onyụn̄ anam nnyịn itie ọtọkiet ke mme itie eke heaven ke Christ Jesus, man ke editịm n̄kpọ emi edide enye akpada akakan mfọnido esie oro owo mîdotke ọfọn nnyịn emi ibuanade n̄kpọ ye Christ Jesus mfọn.”—Eph. 2:4-7.

14 Inua ikemeke nditịn̄ ofụri se Jehovah edinamde inọ mbon oro ẹyetde aran ke ini mmọ ẹditienede Christ ikara ke heaven. (Luke 22:28-30; Phil. 3:20, 21; 1 John 3:2) Mmọ ke Jehovah edinen̄ede iwụt “akakan mfọnido esie oro owo mîdotke.” Mmọ ẹdidi “obufa Jerusalem,” oro edi, n̄wanndọ Christ. (Edi. 3:12; 17:14; 21:2, 9, 10) Mmọ ẹyediana ye Jesus “ẹkọk mme idụt udọn̄ọ,” ẹn̄wam mme owo ẹwọrọ ke ufụn idiọkn̄kpọ ye n̄kpa, ẹnyụn̄ ẹnam mme owo ẹfọn ẹma.—Kot Ediyarade 22:1, 2, 17.

15, 16. Nso ke Jehovah edinam inọ ikọt esie oro ẹma ẹkekpan̄a ke ntak mfọnido esie oro owo mîdotke?

15 Ephesus 2:7 anam nnyịn ifiọk ke Abasi oyowụt nnyịn mfọnido esie oro owo mîdotke ke “editịm n̄kpọ emi edide.” Ini oro, kpukpru owo ke isọn̄ ẹyekụt ‘akakan mfọnido Abasi oro owo mîdotke.’ (Luke 18:29, 30) Ata akpan n̄kpọ kiet emi Abasi edinamde inọ nnyịn edidi ndinam mme akpan̄kpa ẹset. (Job 14:13-15; John 5:28, 29) Jehovah ayanam nti ikọt esie oro ẹkekpan̄ade mbemiso Eyen esie ekedide edikpa afak mme owo ẹset, oyonyụn̄ anam kpukpru nti ikọt esie oro ẹkpade ke mme akpatre usen emi ẹset ẹdika iso ẹnam n̄kpọ esie.

16 Abasi ayanam ediwak miliọn mbon emi mîkọdiọn̄ọke enye ẹset n̄ko. Mmọ ẹyenyene ifet ndiwụt m̀mê iyenyịme Jehovah akara mmimọ. John ekewet ete: “N̄kụt mme akpan̄kpa, ikpọ ye n̄kpri, nte ẹdade ke iso ebekpo, ẹnyụn̄ ẹkûbọde mme n̄wed. Edi ẹkûbọde n̄wed en̄wen; enye edi n̄wed uwem. Ndien ẹda mme n̄kpọ eke ẹwetde ke mme n̄wed emi ẹkpe ikpe mme akpan̄kpa nte ekemde ye mme edinam mmọ. Ndien inyan̄ asana mme akpan̄kpa oro ẹdude ke esịt esie ayak, n̄kpa ye Udi ẹnyụn̄ ẹsana mme akpan̄kpa emi ẹdude mmọ ke esịt ẹyak, ndien ẹkpe ikpe mmọ owo kiet kiet nte ekemde ye mme edinam mmọ.” (Edi. 20:12, 13) Oyoyom mbon oro ẹdisetde do ẹkpep Ikọ Abasi ẹnyụn̄ ẹnam se mmọ ẹkpepde. Oyonyụn̄ oyom mmọ ẹnam mme n̄kpọ oro ẹdiwetde ke “mme n̄wed,” emi edin̄wamde mmọ ẹdu uwem ke obufa ererimbot nte Jehovah oyomde. Se ẹdiwetde ke “mme n̄wed”  oro ayanam nnyịn ika iso ifiọk mfọnido Abasi oro owo mîdotke.

KA ISO KWỌRỌ ETI MBỤK

17. Nso ke ikpesiti ke ini ikwọrọde ikọ?

17 Ana inen̄ede isịn idem idahaemi ikwọrọ eti mbụk koro utịt ererimbot emi enen̄ede ekpere. (Mark 13:10) Ke ini ikwọrọde ikọ, ọyọfọn isiti ke eti mbụk Obio Ubọn̄ anam ẹdiọn̄ọ mfọnido Abasi oro owo mîdotke. Akpan ntak oro isikwọrọde ikọ edi man inọ Jehovah ubọn̄. Didie ke ikeme ndinam emi? Ana inam mme owo ẹfiọk ke kpukpru n̄kpọ oro Abasi ọn̄wọn̄ọde ndinam nnọ nnyịn ke obufa ererimbot edi ke ntak mfọnido esie oro nnyịn mîdotke.

Sịn ifịk kwọrọ ikọ nte eti “akama-ukpọhọde mfọnido Abasi eke owo mîdotke.”1 Pet. 4:10 (Se ikpehe 17-19)

18, 19. Didie ke nnyịn inam mme owo ẹdiọn̄ọ mfọnido Abasi oro owo mîdotke?

18 Ke ini ikwọrọde ikọ, ọfọn inam mme owo ẹfiọk ke idinen̄erede ibọ ufọn uwa ufak Jesus, inyụn̄ ifọn ima ke ini Obio Ubọn̄ Abasi edisịmde isọn̄. Bible ọdọhọ ete: “Ẹyenam mme n̄kpọ oro ẹbotde ẹbọhọ ufụn itie mbiara ẹnyụn̄ ẹnyene ubọn̄ ubọn̄ ifụre nditọ Abasi.” (Rome 8:21) Mfọnido Abasi oro owo mîdotke edinam emi etịbe.

19 Enen̄ede enem nnyịn ndinam mme owo ẹdiọn̄ọ se Abasi ọn̄wọn̄ọde ke Ediyarade 21:4, 5. Itien̄wed oro ọdọhọ ete: “‘[Abasi] ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba. N̄kani n̄kpọ ẹma ẹbe ẹfep.’ Ndien [Jehovah] emi etiede ke ebekpo ọdọhọ ete: ‘Sese! Mmanam kpukpru n̄kpọ ẹdi mbufa.’ Enye onyụn̄ ọdọhọ ete: ‘Wet, koro ikọ emi edi akpanikọ ye se ẹkemede ndibuọt idem.’” Ke ini isịnde ifịk ikwọrọ eti mbụk inọ mme owo, nnyịn inam mmọ ẹdiọn̄ọ mfọnido Abasi oro owo mîdotke!