Be ka se isịnede

Be ka se isịnede

Mme Ntiense Jehovah

Mek usem Efịk

Uwa Ufak Jesus Edi ‘Enọ Eke Ọfọnde Ama,’ Emi Otode Ete

Uwa Ufak Jesus Edi ‘Enọ Eke Ọfọnde Ama,’ Emi Otode Ete

“Kpukpru nti enọ ye kpukpru enọ eke ẹfọnde ẹma . . . ẹto Ete.”​—⁠JAS. 1:⁠17.

IKWỌ: 148, 109

1. Nso ke uwa ufak Jesus anam ọnọ nnyịn?

NNYỊN imọbọ ediwak edidiọn̄ ke ntak uwa ufak Jesus Christ. Uwa ufak Jesus anam kpukpru nditọ Adam oro ẹmade edinen ido ẹdori enyịn ndifiak ndi nditọ Abasi. Uwa ufak Jesus n̄ko anam nnyịn idori enyịn ndidu ata eti uwem ke nsinsi. Edi idịghe n̄kukụre se uwa ufak Jesus anamde edi emi. Jesus ndikọsọn̄ọ nda nnam n̄kpọ Abasi tutu esịm utịt anam ẹbiere ata akpan n̄kpọ emi ebehede mme owo ye mme angel.​—⁠Heb. 1:​8, 9.

2. (a) Nso akpan n̄kpọ emi ebehede ofụri ekondo ke Jesus ekesịn ke akam? (Se akpa ndise ibuotikọ emi.) (b) Nso ke idineme ke ibuotikọ emi?

2 N̄kpọ nte isua iba mbemiso Jesus akakpade afak nnyịn, enye ama ekpep mbet esie ete ẹbọn̄ akam ẹte: “Ete nnyịn emi odude ke heaven, yak ẹnam enyịn̄ fo asana. Yak obio ubọn̄ fo edi. Yak uduak fo ada itie, nte edide ke heaven, yak edi ke isọn̄ kpasụk ntre.” (Matt. 6:​9, 10) Man ikụt adan̄a nte  uwa ufak Jesus enen̄erede ọsọn̄ urua, ẹyak ise nte uwa ufak Jesus anamde enyịn̄ Abasi asana, se enye enyenede ndinam ye Obio Ubọn̄ Abasi, ye nte enye edinamde uduak Abasi osu.

“YAK ẸNAM ENYỊN̄ FO ASANA”

3. Nso ke enyịn̄ Abasi owụt, ndien didie ke Satan akabiat Abasi enyịn̄?

3 Akpa n̄kpọ emi Jesus akasiakde ke Akam Ọbọn̄ ekedi, yak ẹnam enyịn̄ Abasi asana. Enyịn̄ Abasi, Jehovah, owụt ke enye ọfọn anana ndo, enyene uku, onyụn̄ asana. Ke ini Jesus ọkọbọn̄de akam ini en̄wen, enye okokot Jehovah, “Edisana Ete.” (John 17:11) Sia Jehovah edide edisana, kpukpru ibet emi enye ọnọde nnyịn ẹfọn ẹma. Kpa ye oro, se Satan eketịn̄de ke In̄wan̄ Eden okowụt ke Jehovah inyeneke unen ndinọ mme owo ibet. Satan ama osu nsu odori Jehovah onyụn̄ abiat enye enyịn̄.​—⁠Gen. 3:​1-5.

4. Nso iwụt ke Jesus ama odomo ofụri ukeme esie ndinam enyịn̄ Abasi asana?

4 Jesus ama ama enyịn̄ Abasi etieti. (John 17:​25, 26) Jesus ama anam se enye ekekeme man enyịn̄ Abasi asana. (Kot Psalm 40:​8-10.) Nte Jesus okodude uwem ke isọn̄ ama owụt ke ọfọn onyụn̄ enen Jehovah ndinọ mme owo ye mme angel ibet. Kpa ye oro Satan akanamde ẹtụhọde Jesus ẹnyụn̄ ẹwot enye, Jesus ama ọsọn̄ọ ada ye Ete esie esịm utịt. Enye ndikọsọn̄ọ nda ye Abasi ntem owụt ke owo emi ọfọnde ama ekeme ndinịm ibet Abasi nsịm utịt.

5. Didie ke ikeme nditiene nnam enyịn̄ Abasi asana?

5 Didie ke ikeme ndiwụt ke imama enyịn̄ Abasi? Nte idude uwem ediwụt emi. Jehovah oyom nnyịn isana. (Kot 1 Peter 1:​15, 16.) Emi ọwọrọ ke Jehovah ikpọn̄ ke ana ituak ibuot inọ, inyụn̄ ikop uyo inọ ke ofụri esịt. Ana idomo ndinịm ibet Abasi idem ke ini ẹkọbọde nnyịn. Ana inyụn̄ inam un̄wana nnyịn ayama ke ndinam nti n̄kpọ nnọ mme owo, ndien emi ayanam ẹnọ Jehovah ubọn̄. (Matt. 5:​14-16) Nnyịn ndidu edisana uwem owụt ke ibet Jehovah ọfọn, onyụn̄ owụt ke Satan ikenenke ndidọhọ ke Abasi inyeneke unen ndinọ mme owo ibet. Ke ini inamde ndudue, imesikabade esịt inyụn̄ itre ndinam n̄kpọ emi ekemede ndisuene Jehovah.​—⁠Ps. 79:⁠9.

6. Nso inam Jehovah ekeme ndibat nnyịn ke edinen okposụkedi emi nnyịn mîfọnke ima?

6 Uwa ufak Jesus anam Jehovah ekeme ndifen idiọkn̄kpọ mbon oro ẹbuọtde idem ke uwa ufak eyen esie. Mbon oro ẹyakde idem ẹnọ Jehovah ke enye enyịme ẹdi ikọt esie. Enye abat mbon oro ẹyetde aran ye “mme erọn̄ en̄wen” ke edinen. Enye ada mbon oro ẹyetde aran nte nditọ esie onyụn̄ ada “mme erọn̄ en̄wen” nte mme ufan esie. (John 10:16; Rome 5:​1, 2; Jas. 2:​21-25) Idem idahaemi, uwa ufak Christ anam nnyịn ikeme ndisan̄a n̄kpere Ete nnyịn, onyụn̄ anam ikeme nditiene nnam enyịn̄ esie asana.

“YAK OBIO UBỌN̄ FO EDI”

7. Nso ufọn ke idibọ ke ntak uwa ufak Jesus?

7 N̄kpọ en̄wen emi Jesus akasiakde ke Akam Ọbọn̄ ekedi, “yak obio ubọn̄ fo edi.” Edi, nso ke uwa ufak Jesus enyene ndinam ye Obio Ubọn̄ Abasi? Uwa ufak Jesus anam ẹkeme ndimek owo 144,000 nsio ke isọn̄ man ẹketiene Jesus ẹkara ke heaven nte ndidem ye mme oku. (Edi. 5:​9, 10; 14:⁠1) Jesus ye owo 144,000 emi ẹditienede enye ikara ke heaven, ẹyenam mme owo ẹka iso  ẹbọ ufọn uwa ufak ke isua tọsịn kiet. Ẹyenam isọn̄ edi Paradise, ẹnyụn̄ ẹnam kpukpru mbon oro ẹsọn̄ọde ẹda ẹnam n̄kpọ Abasi ẹfọn ẹma; ndien nditọ Abasi ke heaven ye mme owo mi ke isọn̄ ẹyenen̄ede ẹdiana kiet nte ubon kiet. (Edi. 5:13; 20:⁠6) Jesus ayanuak Satan ibuot onyụn̄ etre kpukpru nsọn̄ibuot oro Satan ọkọtọn̄ọde.​—⁠Gen. 3:⁠15.

8. (a) Didie ke Jesus akan̄wam mbet esie ẹkụt ke Obio Ubọn̄ Abasi edi akpan n̄kpọ? (b) Didie ke ikeme ndiwụt ke ida inọ Obio Ubọn̄ Abasi?

8 Ke ini Jesus okodude ke isọn̄, enye ama an̄wam mbet esie ẹkụt ke Obio Ubọn̄ Abasi edi akpan n̄kpọ. Ke ndondo oro Jesus anade Baptism, enye ama ọtọn̄ọ “nditan̄a eti mbụk obio ubọn̄ Abasi” ke nsio nsio ebiet. (Luke 4:43) Mbemiso Jesus akafiakde ọnyọn̄ heaven, enye ama ọdọhọ mbet esie ẹtie ntiense ẹban̄a imọ “tutu esịm ata utịt ikpehe isọn̄.” (Utom 1:​6-8) Utom ukwọrọikọ emi ayanam mme owo ke ofụri isọn̄ ẹfiọk ẹban̄a uwa ufak Jesus, ẹnyụn̄ ẹnam n̄kpọ man ẹdot ndidu uwem ke Obio Ubọn̄ Abasi. Mfịn, nnyịn iwụt ke ida inọ Obio Ubọn̄ Abasi ke ini itienede nditọete Christ emi ẹdude ke isọn̄ ikwọrọ eti mbụk Obio Ubọn̄ Abasi ke ofụri isọn̄.​—⁠Matt. 24:14; 25:40.

“YAK UDUAK FO ADA ITIE”

9. Nso inam inịm ke Jehovah ayanam mme owo ẹdu uwem ke nsinsi?

9 Jesus ama ọdọhọ n̄ko ete: “Yak uduak fo ada itie.” Nso ke ikọ esie ọkọwọrọ? Jehovah edi Andibot, ndien se ededi emi enye etịn̄de isitreke-tre ndisu. (Isa. 55:11) Enye idiyakke nsọn̄ibuot Satan akpan enye ndinam se enye akaduakde ndinam nnọ mme owo. Toto ke editọn̄ọ, Jehovah okoyom nditọ Adam ye Eve emi ẹfọnde ẹma ẹyọhọ ofụri isọn̄. (Gen. 1:28) Emi ikpekemeke nditịbe, edieke Adam ye Eve mîkpenyeneke nditọ. Ntem Jehovah ama ayak Adam ye Eve ẹnyene nditọ, idem ke mmọ ẹma ẹkenam idiọkn̄kpọ. Jehovah ọnọ kpukpru mbon oro ẹbuọtde idem ke uwa ufak Eyen esie ifet ndifọn mma, nnyụn̄ ndu uwem ke nsinsi. Jehovah ama mme owo, onyụn̄ oyom mbon oro ẹkopde uyo esie ẹdu uwem ke nsinsi kpa nte enye akaduakde.

10. Didie ke mbon oro ẹma ẹkekpan̄a ẹdibọ ufọn uwa ufak Jesus?

10 Nso iditịbe inọ ediwak biliọn owo oro ẹkekpan̄ade, emi mîkọfiọkke Jehovah? Ke ntak uwa ufak Jesus, Jehovah ayanam mmọ ẹset onyụn̄ ọnọ mmọ ifet ndikpep mban̄a uduak esie man mmọ ẹkeme ndidu uwem ke nsinsi. (Utom 24:15) Jehovah oyom mme owo ẹdu uwem ke nsinsi, enye iyomke nnyịn ikpa. Sia Jehovah edide Ntọn̄ọ Uwem, enye edidi Ete kpukpru mbon oro ẹnamde ẹset. (Ps. 36:⁠9) Ntak edi oro Jesus ekekpepde nnyịn ete ibọn̄ akam inọ “Ete nnyịn emi odude ke heaven.” (Matt. 6:⁠9) Jehovah ọnọ Jesus ata akpan utom, oro edi, nditiene nnam mme akpan̄kpa ẹset. (John 6:​40, 44) Ke Paradise, Jesus oyowụt ke imọ idi “ediset ye uwem.”​—⁠John 11:⁠25.

11. Nso ke Jehovah aduak ndinam nnọ “akwa otuowo”?

11 Jehovah oyom kpukpru owo ẹdia ufọn uwa ufak Jesus; ntak edi oro Jesus ọkọdọhọde ete: “Owo ekededi eke anamde uduak Abasi, enye emi edi eyeneka mi eren ye eyeneka mi an̄wan ye eka mi.” (Mark 3:35) Jehovah oyom “akwa otuowo, emi baba owo kiet mîkemeke ndibat, eke ẹtode kpukpru idụt ye esien ye obio ye usem” ẹtuak ibuot ẹnọ  imọ. Mbon oro ẹbuọtde idem ke uwa ufak Jesus, ẹnyụn̄ ẹnamde uduak Abasi ẹyetoro Abasi ẹte: “Edinyan̄a oto Abasi nnyịn, emi etiede ke ebekpo, onyụn̄ oto Eyenerọn̄.”​—⁠Edi. 7:​9, 10.

12. Didie ke Akam Ọbọn̄ anam nnyịn ifiọk se Jehovah aduakde ndinam nnọ mbon oro ẹkopde uyo esie?

12 Mme n̄kpọ oro Jesus akasiakde ke Akam Ọbọn̄ anam nnyịn ifiọk se Jehovah aduakde ndinam nnọ mbon oro ẹkopde uyo esie. Ana ikụt ite ke imetiene inam enyịn̄ Abasi asana, kpa nte akam oro ọdọhọde. (Isa. 8:13) Enyịn̄ Jesus ọwọrọ “Jehovah Edi Andinyan̄a.” Uwa ufak Jesus ndikeme ndinyan̄a nnyịn, anam ẹkpono ẹnyụn̄ ẹnọ enyịn̄ Abasi ubọn̄. Abasi ayada Obio Ubọn̄ esie anam kpukpru mbon oro ẹkopde uyo esie ẹnen̄ede ẹbọ ufọn uwa ufak Eyen esie. Ke akpanikọ, Akam Ọbọn̄ anam inen̄ede inịm ke idụhe n̄kpọ ndomokiet emi ekemede ndinam uduak Abasi okûsu.​—⁠Ps. 135:6; Isa. 46:​9, 10.

WỤT KE AMAMA NTE JESUS AKAKPADE AFAK NNYỊN

13. Nso ke iwụt ke ini inade baptism?

13 Akpan n̄kpọ kiet emi ikpanamde ndiwụt ke imenen̄ede ima nte Jesus akakpade afak nnyịn edi ndiyak idem nnọ Jehovah, nnyụn̄ nna baptism ke ntak emi ibuọtde idem ke uwa ufak Jesus. Ke ini inade baptism, nnyịn iwụt ke ‘Jehovah edinyene nnyịn.’ (Rome 14:⁠8) Nnyịn ndina baptism owụt n̄ko ke imeben̄e Abasi anam nnyịn inyene eti ubieresịt. (1 Pet. 3:21) Jehovah esinam eben̄e emi ke ndida iyịp Eyen esie nnam nnyịn isana. Ntre, imenen̄ede inịm ke enye ayanam kpukpru se enye ọn̄wọn̄ọde ọnọ nnyịn.​—⁠Rome 8:⁠32.

Nso ke ikpanam ndiwụt ke imama nte Jesus akakpade afak nnyịn? (Se ikpehe 13, 14)

14. Ntak emi ẹdọhọde ima mbọhọidụn̄ nnyịn?

 14 Nso en̄wen ke ikpanam man iwụt ke imama nte Jesus akakpade afak nnyịn? Sia Jehovah esinamde kpukpru n̄kpọ ke ntak ima, enye oyom kpukpru mbon oro ẹtuakde ibuot ẹnọ enye ẹnyene ima n̄ko. (1 John 4:​8-11) Edieke nnyịn iyomde ndidi “nditọ Ete [nnyịn] emi odude ke heaven,” ana ima mbọhọidụn̄ nnyịn. (Matt. 5:​43-48) Jesus ọkọdọhọ ke n̄kponn̄kan ye akpa ewụhọ edi ndima Jehovah, udiana edi ndima mbọhọidụn̄ nnyịn. (Matt. 22:​37-40) Ndikwọrọ eti mbụk Obio Ubọn̄ Abasi nnọ mme owo edi usụn̄ kiet emi iwụtde ke imama mbọhọidụn̄ nnyịn. Nnyịn imesinọ Abasi ubọn̄ ke ini imade mme owo. Ke akpanikọ, “ẹnam ima [Abasi] ọfọn ama ke esịt nnyịn” ke ini imade mbon en̄wen, akpan akpan nditọete nnyịn.​—⁠1 John 4:​12, 20.

UWA UFAK JESUS ANAM INYENE “NDUỌKODUDU” EMI OTODE JEHOVAH

15. (a) Nso ufọn ke ibọ idahaemi ke ntak uwa ufak Jesus? (b) Nso ufọn ke idibọ ke ini iso?

15 Edieke ibuọtde idem ke uwa ufak Jesus, Abasi ekeme ndifen idiọkn̄kpọ nnyịn ofụri ofụri, sia Ikọ Abasi ọdọhọ ke Abasi ekeme ‘ndisọhi’ idiọkn̄kpọ nnyịn mfep. (Kot Utom 3:​19-21.) Nte ima iketetịn̄, uwa ufak Jesus anam Jehovah ada ikọt esie oro ẹyetde aran enyene nte nditọ esie. (Utom 8:​15-17) Amaedi nnyịn ikọt esie oro idide “mme erọn̄ en̄wen,” etie nte n̄kpọ eke Jehovah anamde n̄wed ndidep nnyịn nnyene nte nditọ esie, edi isịnke ubọk kan̄a ke n̄wed oro. Ke ẹma ẹkenam nnyịn ifọn ima inyụn̄ ibe akpatre udomo, esịt eyenem Jehovah ndisịn ubọk ke n̄wed oro nnyụn̄ nda nnyịn nnyene nte ndima nditọ esie ke isọn̄. (Rome 8:​20, 21; Edi. 20:​7-9) Jehovah ayama nditọ esie ke nsinsi nsinsi. Nnyịn idisụk ibọbọ ufọn uwa ufak Jesus ke nsinsi nsinsi. (Heb. 9:12) Idụhe owo m̀mê n̄kpọ ndomokiet emi ekemede ndikpan nnyịn ndidia ufọn uwa ufak Jesus.

16. Didie ke uwa ufak Christ anam nnyịn inyene ifụre?

16 Satan idikemeke ndikpan owo ndomokiet emi enen̄erede akabarede esịt, nditiene ndu ke ubon Abasi. Jesus ama edi isọn̄ ediwa uwem esie “ini kiet kpọt.” Ntre, ufak oro enye ekekpede edi ke nsinsi. (Heb. 9:​24-26) Enye anam nnyịn ikeme ndiwọrọ ofụri ofụri ke ufụn idiọkn̄kpọ ye n̄kpa oro Adam akanyamde nnyịn esịn. Imọkọm Jehovah etieti ke ndikọnọ Christ edikpa afak nnyịn. Emi osio nnyịn ke ufụn idiọk ererimbot Satan emi, inyụn̄ iyakke ndịk n̄kpa anam nnyịn idụk ufụn inọ n̄kpọ ndomokiet.​—⁠Heb. 2:​14, 15.

17. Nso ke Jehovah edinam inọ fi ke ntak emi enye amade fi?

17 Kpa nte eyo mîsitreke ndikụt ke ntak ibet obot oro Jehovah ekenịmde, Jehovah isitreke ndinam se enye ọn̄wọn̄ọde. Jehovah idikpụhu nnyịn tutu amama, sia enye ikpụhọkede. (Mal. 3:⁠6) Jehovah ọnọ nnyịn uwem, enye onyụn̄ enen̄ede ama nnyịn. Bible ọdọhọ ete: “Nnyịn imedifiọk inyụn̄ inịm ite Abasi ama nnyịn. Abasi edi ima.” (1 John 4:16) Jehovah ayanam ofụri isọn̄ edi Paradise, ndien kpukpru owo ke isọn̄ ẹyema kiet eken, kpa nte Jehovah amade nnyịn. Ini oro, nnyịn iyetiene kpukpru nditọ Abasi ke heaven idọhọ ite: “Yak itoro ye ubọn̄ ye ọniọn̄ ye ekọm ye ukpono ye odudu ye ukeme ẹnyene Abasi nnyịn ke nsinsi nsinsi. Amen.”​—⁠Edi. 7:⁠12.