Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme (Eke Ukpepn̄kpọ)  |  December 2017

Nte Afo Emeti?

Nte Afo Emeti?

Ndi ama etịn̄ enyịn okot mme Enyọn̄-Ukpeme ndondo emi? Ọfọn, se m̀mê emekeme ndibọrọ mme mbụme oro ẹtienede mi:

Ntak emi mme ete ye eka oro ẹdụn̄de ke esenidụt ẹkpekerede ẹban̄a usem emi edin̄wamde nditọ mmọ ẹnen̄ede ẹkpere Jehovah?

Nditọ mbufo ẹkeme ndikpep usem idụt emi mbufo ẹdụn̄de ke ufọkn̄wed ye ke ini mmọ ẹnemede nneme ye mbon en̄wen. Edieke mmọ ẹfiọkde ndisem usem iba, oro ekeme ndinam n̄kpọ esisọp an̄wan̄a mmọ ẹnyụn̄ ẹsọp ẹmehe ye mme owo. Akpana mme ete ye eka ẹse m̀mê ewe usem idin̄wan̄a nditọ mmọ ikan inyụn̄ inam mmọ ẹsịn idem ẹnam n̄kpọ Abasi. Ndi edi usem obio emana mmọ m̀mê usem idụt emi mmọ ẹdụn̄de? Ọfọn mbufo ẹkere ẹban̄a se idin̄wamde nditọ mbufo ẹkpere Jehovah, utu ke ndikere mban̄a se mbufo ẹmade.​—w17.05, p. 9-11.

Jesus ama obụp Peter ete: “Nte afo amama mi akan mmọ emi?” Nso ikedi “mmọ emi” oro Jesus eketịn̄de aban̄a? (John 21:15)

Etie nte Jesus eketịn̄ aban̄a iyak emi mme mbet ẹkemụmde m̀mê utom ukọiyak. Ke Jesus ama akakpa, Peter ama afiak aka utom ukọiyak. Ikpanaha iyak utom edi akpan n̄kpọ akan ndinam n̄kpọ Jehovah.​—w17.05, p. 22-23.

Ntak emi Abraham ọkọdọhọde n̄wan esie ọdọhọ ke idi eyeneka imọ? (Gen. 12:​10-13)

Sarah ekedi ata eyenete esie. Edieke Sarah ọkpọkọdọhọde ke imọ edi n̄wan Abraham, ekeme ndidi ẹkpekewot Abraham, enye ikpokonyụn̄ inyeneke eyen oro Abasi ọkọn̄wọn̄ọde ọnọ enye.​—wp17.3, p. 14-15.

Nso ke Elias Hutter akanam man an̄wam mbon oro ẹkeyomde ndikpep usem Hebrew?

Enye ama esiwet ndusụk ikọ Hebrew ke ndodobi ubọkn̄wed onyụn̄ ewet n̄kpri n̄kpri ikọ oro ẹsimende-men ẹdian ye ikọ ke mfefere ubọkn̄wed. Emi ama anam mbon oro ẹkeyomde ndikpep usem Hebrew ẹsọsọp ẹfiọk mme ikọ Hebrew. Se ẹnyụn̄ ẹnamde edi oro ke mme ikọ idakisọn̄ New World Translation of the Holy Scriptures​—With References.​—wp17.4, p. 11-12.

Nso ke asan̄autom Abasi ọkpọdiọn̄ọ edieke enye oyomde ndinyene ikan̄ nda n̄kpeme idem?

Akpana enye ọdiọn̄ọ ke: Abasi idaha uwem ibre mbre. Jesus ikọdọhọke mbet esie ẹdep akan̄kan̄ ẹda ẹkpeme idem. (Luke 22:​36, 38) Bible ọdọhọ ida akan̄kan̄ nnyịn idom n̄kpọ ufụn̄ isọn̄. Uwem edi ata akpan n̄kpọ akan inyene. Ikọt Abasi isinamke n̄kpọ emi ekemede ndinam esịt afịna mbon en̄wen, ẹsinyụn̄ ẹnịm eti uwụtn̄kpọ. (2 Cor. 4:2)​—w17.07, p. 31-32.

Ntak emi se Matthew ewetde aban̄a Jesus ini emi Jesus edide ekpri akparawa okpụhọrede ye se Luke ewetde?

Matthew enen̄ede etịn aban̄a Joseph, utọ nte se enye akanamde ini enye ọkọfiọkde ke Mary oyomo, ini angel ọkọdọhọde enye emen ubon esie efehe aka Egypt, ekem emen afiak ọnyọn̄ edi Israel. Luke enen̄ede etịn̄ aban̄a Mary; ke uwụtn̄kpọ, nte enye akakade ekese Elizabeth, ye nte enye akanamde n̄kpọ ke ini Jesus okosụhọrede etie ke temple ini edide isua 12.​—w17.08, p. 32.

Nso idi ndusụk n̄kpọ oro akpakanamde Bible okûdu esịm mfịn?

Mme usem oro ẹkedade ẹwet Bible ẹma ẹkpụhọde nte ini akakade. Ndikpụhọ ukara ama anam ẹkpụhọ usem oro ediwak owo ẹkesemde. Ẹma ẹsinyụn̄ ẹkọbọ mbon oro ẹkekabarede Bible ẹsịn ke usem oro an̄wan̄ade ediwak owo.​—w17.09, p. 19-21.

Ndi imenyene angel emi esikpemede nnyịn?

Ihih. Edi Jesus ama ọdọhọ ke mme angel mbet esie ẹsikụt iso Abasi. (Matt. 18:10) Ikọ Jesus emi ikọwọrọke ke mbet esie kiet kiet enyene angel emi esikpemede enye, edi ọkọwọrọ ke mme angel ẹkere ẹban̄a kpukpru mbet esie.​—wp17.5, p. 5.

Nso utọ ima ikpon ikan?

A ga’pe. Enye esinam owo anam se inende, ekere aban̄a mbon en̄wen, onyụn̄ an̄wam mmọ. Idụhe orụk ima eke okponde ntem.​—w17.10, p. 7.