Be ka se isịnede

Be ka se isịnede

Mme Ntiense Jehovah

Mek usem Efịk

Ima Edi Ata Akpan Edu

Ima Edi Ata Akpan Edu

JEHOVAH ama anam apostle Paul ewet edu usụkkiet emi edisana spirit esinamde inyene. (Gal. 5:​22, 23) Enye ọkọtọ edu usụkkiet emi adian kiet okot “mbun̄wụm spirit” Abasi. * Owo oro enyenede mbun̄wụm spirit Abasi ‘emen obufa owo esịne.’ (Col. 3:10) Ukem nte eyop emi ẹtịmde ẹdiọn̄ esin̄wụmde ediwak ifen, kpasụk ntre n̄ko, owo emi spirit Abasi adade usụn̄ eyenyene nti edu emi Paul asiakde ke Galatia 5:​22, 23.​—Ps. 1:​1-3.

Ima edi akpa ikpehe mbun̄wụm spirit Abasi oro Paul akasiakde. Ntak emi ima edide ata akpan edu? Paul ọkọdọhọ ke edieke imọ mînyeneke ima, ke imọ ‘idịghe n̄kpọ ndomokiet.’ (1 Cor. 13:2) Nso idi ima, didie ke ikeme ndinyene ima, ndien nso ke ikpanam man iwụt ke imenyene ima?

SE IMA EDIDE

Ọsọsọn̄ ndinyene ikọ kiet nda ntịn̄ kpukpru se ima edide. Edi Bible etịn̄ se nnyịn ikpanamde man iwụt ke imenyene ima. Ke uwụtn̄kpọ, Bible ọdọhọ ke ima ‘enyenyene anyanime, ọfọn ido, adara se idide akpanikọ, eme kpukpru n̄kpọ, enịm kpukpru n̄kpọ ke akpanikọ, odori enyịn ke kpukpru n̄kpọ, onyụn̄ ọyọ kpukpru n̄kpọ.’ Owo oro enyenede ima esinen̄ede ekere aban̄a mbon en̄wen onyụn̄ enen̄ede ekpere mmọ idem. Edi owo oro mînyeneke ima esifịbe ufụp, okohode idem, anam ido eke mîdotke, oyom ufọn idemesie, ọsọp iyatesịt, isinyụn̄ imaha ndifen nnọ owo. Utu ke ndinyene utọ ndiọi edu emi, ọfọn inyene ata ima ikûnyụn̄ ‘uyom ufọn idem nnyịn.’​—1 Cor. 13:​4-8.

JEHOVAH YE JESUS ẸKPEP NNYỊN NDIMA IMA

“Abasi edi ima.” Enye esinam kpukpru n̄kpọ ke ima. (1 John 4:8) Kpukpru se enye obotde ye nte enye anamde n̄kpọ ye nnyịn owụt ke enye edi ima. Akakan n̄kpọ oro enye akanamde ndiwụt ke imama nnyịn ekedi ndinọ Jesus edikpa afak nnyịn. Apostle John ọkọdọhọ ete: “Ẹkeda emi ẹwụt ima oro Abasi amade nnyịn, koro Abasi okosiode ikpọn̄-ikpọn̄ edibon Eyen esie ọdọn̄ edi ke ererimbot man nnyịn ikpenyene uwem ebe ke enye. Ima odu ke orụk usụn̄ emi, idịghe koro nnyịn ikamade Abasi, edi koro enye akamade nnyịn okonyụn̄ osiode Eyen esie ọdọn̄ nte uwa usio-isop kaban̄a mme idiọkn̄kpọ nnyịn.” (1 John 4:​9, 10) Sia Abasi amade nnyịn, enye esifen ọnọ nnyịn, ọnọ nnyịn idotenyịn, oyonyụn̄ anam idu uwem ke nsinsi.

Jesus ama owụt adan̄a nte imọ imade nnyịn ke ndinyịme ndikpa man uduak Abasi osu. Paul ekewet ete: “[Jesus] ọdọhọ ete: ‘Sese! mmedi ndinam uduak fo.’ . . . Ẹda ‘uduak’ oro ẹtịn̄de mi ẹnam nnyịn isana oto ke ediwa idem Jesus Christ ini kiet kpọt.” (Heb. 10:​9, 10) Idụhe owo ndomokiet mi ke isọn̄ oro akpamade nnyịn utọ ima emi. Jesus ọkọdọhọ ete: “Idụhe owo emi enyenede ima eke okponde akan emi, owo ndikpayak ukpọn̄ esie nnọ ke ibuot mme ufan esie.” (John 15:13) Ndi  nnyịn imekeme ndima mme owo nte Jehovah ye Jesus ẹmade nnyịn? Imekeme! Ẹyak ise nte ikemede ndinam emi.

“ẸKA ISO ẸSAN̄A KE IMA”

Paul eketeme nnyịn ete: “Ẹdi mme andikpebe Abasi, nte ndima nditọ, ẹnyụn̄ ẹka iso ẹsan̄a ke ima, kpa nte Christ n̄ko akamade mbufo okonyụn̄ ayakde idemesie ọnọ ke ibuot mbufo.” (Eph. 5:​1, 2) Nnyịn ‘ika iso isan̄a ke ima’ ke ini inamde kpukpru n̄kpọ ke ima. Ana inanam iwụt ke imama mme owo idịghe nditetịn̄ ke inua kpọt. John ọkọdọhọ ete: “N̄kpri nditọ, ẹyak nnyịn ikûma ke ikọ inua m̀mê ke edeme, edi ẹyak ima ke edinam ye ke akpanikọ.” (1 John 3:18) Ke uwụtn̄kpọ, edieke imade Abasi ye mbọhọidụn̄ nnyịn, iyọkwọrọ “eti mbụk obio ubọn̄” inọ mme owo. (Matt. 24:14; Luke 10:27) Ke ini imede ime, ifọnde ido, inyụn̄ ifende inọ mme owo, emi owụt ke nnyịn ke ‘ika iso isan̄a ke ima.’ Ntak edi oro Bible ọdọhọde nnyịn ete: “Kpa nte Jehovah ekefende mbufo ke ofụri esịt, ẹfen mbon en̄wen kpasụk ntre.”​—Col. 3:13.

Owo emi enyenede ata ima isidopke uyo ke ini owo emi enye amade anamde se mîfọnke. Ke uwụtn̄kpọ, ke ini eyenọwọn̄ atuade, ndusụk ete ẹsinọ eyen oro se ededi emi enye oyomde man odop uyo. Edi ete emi enen̄erede ama eyen esie oyotụnọ enye ke ini anade enye anam ntre. Kpasụk ntre, sia Abasi edide ima, enye ‘esitụnọ owo eke enye amade.’ (Heb. 12:6) Edieke isan̄ade ke ima, nnyịn n̄ko iyotụnọ owo ke ini anade inam ntre. (N̄ke 3:​11, 12) Ke ini iyomde nditụnọ owo, ọfọn iti ke nnyịn ifọnke ima, ke imesinyụn̄ inam ndudue. Ntre, enyene se kpukpru nnyịn ikemede ndinam man itetịm ima mme owo. Ẹyak ineme n̄kpọ ita oro ẹkemede ndin̄wam nnyịn itetịm ima mme owo.

DIDIE KE IKEME NDINYENE IMA?

Akpa, ben̄e Abasi ọnọ fi edisana spirit esie, sia edisana spirit esinam owo enyene ima. Jesus ọkọdọhọ ke Jehovah esinọ “mbon oro ẹben̄ede enye edisana spirit” esie. (Luke 11:13) Edieke ibọn̄de akam iben̄e Abasi edisana spirit inyụn̄ ‘isan̄ade ke spirit,’ emi ayanam itetịm ima mme owo. (Gal. 5:16) Ke uwụtn̄kpọ, ebiowo ekeme ndiben̄e Abasi anam edisana spirit esie an̄wam imọ ida Bible inọ nditọete item ke ima. Mîdịghe, ete m̀mê eka ekeme ndiben̄e Abasi anam edisana spirit esie an̄wam imọ itụnọ nditọ imọ ke ima idịghe ke iyatesịt.

Ọyọhọ iba, tie kere nte Jesus akamade mme owo idem ke ini ẹkenamde se iyatde enye. (1 Pet. 2:​21, 23) Ọfọn inen̄ede ikpebe Christ ke ini mme owo ẹnamde se iyatde nnyịn m̀mê ẹfịkde nnyịn. Ke ini utọ n̄kpọ emi etịbede, ọfọn ibụp idem nnyịn ite, ‘Nso ke Jesus akpanam?’ Sista Leigh ọdọhọ ke mbụme emi esin̄wam imọ ikere kan̄a mbemiso inamde n̄kpọ. Enye ọdọhọ ete: “Isan̄ kiet, eyenan̄wan kiet ke itieutom nnyịn ama ewet ndiọi n̄kpọ aban̄a mi ye utom mi ọnọ mbon itieutom nnyịn ke e-mail. N̄kpọ oro ama abiak mi etieti. Edi mma mbụp idemmi nte, ‘Nso ke Jesus akpanam ekpedi enye ke ẹnam utọ n̄kpọ emi?’ Ke mma n̄ketie n̄kere se Jesus akpanamde, mma nsion̄o idem n̄kpọn̄ n̄kpọ oro. Ekem mma ndifiọk ke imemke inọ eyenan̄wan oro ke ntak udọn̄ọ esie, ye ke ntak ọkpọsọn̄ editịmede esịt. Mma ndọhọ idemmi ke idịghe se enye okoyomde ndiwet edi oro. Nditi nte Jesus ekesimade mme owo idem ke ini ẹkenamde se iyatde enye ama an̄wam mi n̄ka iso mma eyenan̄wan oro.” Edieke ikpebede Jesus, idinam kpukpru n̄kpọ ke ima.

Ọyọhọ ita, siyak ima anam fi oyom ufọn mbon en̄wen sia utọ ima oro ke ẹda ẹdiọn̄ọ mme ata Christian. (John 13:​34, 35) Ntak edi oro Bible ọdọhọde nnyịn ‘ikere n̄kpọ’ nte Christ. ‘Okposụkedi emi enye ekedide mbiet Abasi,’ enye ama ọkpọn̄ heaven edi isọn̄ edikpa ke ibuot nnyịn. (Phil. 2:​5-8) Edieke itiede ikere nte ima akanamde Christ edikpa ke ibuot nnyịn, emi ayanam inen̄ede ikere n̄kpọ  nte Christ inyụn̄ inam n̄kpọ nte enye, iyonyụn̄ ima ndisiyom ufọn mbon en̄wen. Nso idi ufọn en̄wen oro idibọde edieke inyenede ima?

MME UFỌN ORO IDIBỌDE EDIEKE INYENEDE IMA

Iyọbọ ediwak ufọn edieke inyenede ima. Ẹyak ineme iba kpọt:

Nso ufọn ke idibọ edieke inyenede ima?

  • IYADIANA KIET NTE NDITỌETE KE OFỤRI ERERIMBOT: Sia imade kiet eken, imọdiọn̄ọ ke esop ekededi oro ikade ke ofụri ererimbot, ke nditọete do ẹyedara nnyịn. Enem nnyịn tutu ndidiọn̄ọ ke ‘ofụri otu nditọete nnyịn ke ererimbot’ ẹma nnyịn. (1 Pet. 5:9) Nnyịn kpọt ima kiet eken ntre!

  • IYENYENE EMEM: ‘Ndiyọ kiet eken ke ima’ ayanam ‘idu ke emem.’ (Eph. 4:​2, 3) Imesikụt ke imenyene emem ke ini idụkde mbono esop, ikade mbono circuit, ye ke ini idụkde akamba mbono. Ndi ọmọfiọk mbon en̄wen emi ẹdude ke emem ntem ke ererimbot oro mme owo mîdianake kiet mi? (Ps. 119:165; Isa. 54:13) Ke ini idude ke emem ye mbon en̄wen, oro owụt ke imenen̄ede ima mmọ, emi esinyụn̄ adat Jehovah esịt.​—Ps. 133:​1-3; Matt. 5:9.

“IMA ỌBỌBỌP”

Paul ọkọdọhọ ke “ima ọbọbọp.” (1 Cor. 8:1) Nso ke ikọ emi ọwọrọ? Ẹkot akpa n̄wed Corinth ibuot 13 “Ikwọ Ima.” Ke itien̄wed oro, apostle Paul ama anam an̄wan̄a nte ima esibọpde-bọp. Akpa, owo oro enyenede ima isiyomke ufọn idemesie. (1 Cor. 10:24; 13:5) Ọyọhọ iba, owo oro enyenede ima esikere aban̄a mbon en̄wen, eme ime onyụn̄ ọfọn ido, ndien emi esinam mme owo ke ubon ye ke esop ẹdiana kiet. Se ikọ Paul oro “ima ọbọbọp” ọwọrọde edi emi.​—Col. 3:14.

Ima oro imade Abasi ọfọn akan onyụn̄ okpon akan ima oro imade mme owo. Utọ ima emi anam mme imọ owo, mme ubuene, mbon oro ẹtode nsio idụt, ẹnyụn̄ ẹsemde nsio nsio usem ẹkop inemesịt ndidiana kiet nnam n̄kpọ Jehovah “ke esịt kiet.” (Zeph. 3:9) Ẹyak nte inamde n̄kpọ kpukpru usen owụt ke imenyene ima emi edide ikpehe mbun̄wụm spirit Abasi.

^ ikp. 2 Ibuotikọ enye emi edi akpa ke otu ibuotikọ usụkkiet emi idinemede ikpehe mbun̄wụm spirit Abasi kiet kiet.