Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) AUGUST 2016

Mme Mbụme Oro Mme Andikot Ẹbụpde

Mme Mbụme Oro Mme Andikot Ẹbụpde

Ntak emi mme asua Jesus ẹkeyatde esịt ke mbet esie iyetke ubọk?

Kiet ke otu n̄kpọ emi mme asua Jesus ẹkeyomde ndida nsịn mfịna ye enye ye mme mbet esie edi emi. Ibet emi Abasi ọkọnọde nditọ Israel ama etịn̄ nsio nsio n̄kpọ emi ẹkemede ndinam owo edehe, utọ nte akpamfia, n̄kpọ ndiwọrọ owo ke idem, ye nditụk okpo owo m̀mê eke unam. Ibet oro ama etịn̄ n̄ko se ẹkpenamde man owo oro edehede asana. Ẹma ẹsifọp uwa, ẹdọhọ owo oro eyere mmọn̄, mîdịghe ẹda mmọn̄ ẹsịme enye man enye asana.—Lev., ibuot 11-15; Num., ibuot 19.

Mbon oro ẹkesikpepde mme Jew ibet, ẹma ẹnam ediwak ibet idemmọ ẹdian ke Ibet oro Abasi ọkọnọde nditọ Israel. N̄wed kiet ọdọhọ ke mmọ ẹma ẹsitie “ẹdụn̄ọde n̄kpọ kiet kiet emi ekemede ndinam owo edehe, ye nte owo emi enye anamde edehe ekemede ndinam mbon en̄wen, mme n̄kpọufọk, ye mme n̄kpọ eken ẹdehe. Mmọ ẹma ẹtịn̄ n̄ko mme n̄kpọufọk ye mme n̄kpọ eken oro enye mîdikemeke ndinam ẹdehe. Mmọ ẹma ẹnyụn̄ ẹtịn̄ se anade owo anam man afiak asana.”

Mme asua Jesus ẹma ẹbụp enye ẹte: “Ntak emi mme mbet fo mîsan̄ake nte ekemde ye ido mbon eset, edi ẹdiade udia mmọ ye ndedehe ubọk?” (Mark 7:5) Idịghe nte mmọ ẹkeyom mbet Jesus ẹyet ubọk mbemiso ẹdiade udia mbak mmọ ididọn̄ọ. Mmọ ẹkesidọhọ ke ana ẹtọhọ owo mmọn̄ ke ubọk mbemiso enye adiade udia. N̄wed oro iketịn̄de iban̄a ọdọhọ n̄ko ete: “Mmọ ẹma ẹsitịn̄ utọ n̄kpọ emi ẹkpesịnde mmọn̄ ẹtọhọ owo ke ubọk, utọ mmọn̄ emi ẹkpetọhọde owo, owo emi ọkpọtọhọde owo mmọn̄ ke ubọk, ye ebiet emi ẹkpetọhọde owo mmọn̄ ke ubọk eketre.”

Jesus akada didie kpukpru ibet oro mmọ ẹkebọpde do. Enye ọkọdọhọ mme adaiso ido ukpono mme Jew ete: “Isaiah ama etịn̄ ntịn̄nnịm ikọ nte odotde aban̄a mbufo mbon mbubịk, nte ẹwetde ẹte, ‘Mbon emi ẹkpono mi ke n̄kpọkinua mmọ, edi esịt mmọ ada nsannsan ye ami [Jehovah]. Mmọ ẹtuak ibuot ẹnọ mi ke ikpîkpu, koro mmọ ẹkpepde mme ewụhọ owo ke ukpepn̄kpọ mmọ.’ Mbufo ẹmekpọn̄ ewụhọ Abasi, ẹsọn̄ọ ẹmụm ido eset mme owo ẹkama.”—Mark 7:6-8.