Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme (Eke Ukpepn̄kpọ)  |  March 2016

Domo ndifiọk se nditọete fo ẹyomde anam ọnọ mmimọ. Ndi mmọ ẹyom ọdọn̄ mmimọ esịt m̀mê ada Bible ọsọn̄ọ mmimọ idem?

Ndi Emekeme Ndin̄wam ke Esop Mbufo?

Ndi Emekeme Ndin̄wam ke Esop Mbufo?

MBEMISO Jesus ọkọnyọn̄de heaven, enye ama ọdọhọ mbet esie ete: ‘Mbufo ẹyetie ntiense ẹban̄a mi tutu esịm ata utịt ikpehe isọn̄.’ (Utom 1:8) Mmọ ẹdisan̄a didie ikwọrọ ikọ ke ofụri isọn̄?

Martin Goodman, prọfesọ kiet ke Ufọkn̄wed Ntaifiọk Oxford ọkọdọhọ ke “mme Christian ndifiọk ke mmimọ imenyene ata akpan utom emi anade inam, akanam mmọ ẹkpụhọde ye mme ido ukpono eken, esịnede Ido Ukpono Mme Jew emi okodude ke eyo Ukara Rome.” Jesus ama esika nsio nsio itie ọkọkwọrọ ikọ. Akana mme ata Christian ẹsan̄a ẹkwọrọ “eti mbụk obio ubọn̄ Abasi” ke kpukpru ebiet kpa nte Jesus akanamde. Mmọ ẹkenyene ndisan̄a nyom mbon emi ẹdimade ndifiọk akpanikọ. (Luke 4:43) Emi akanam ẹnyene mme apostle ini oro. Apostle ọwọrọ owo emi ẹdọn̄de utom. (Mark 3:14) Jesus ama owụk mme mbet esie ete: “Ẹka ẹkenam mme owo ke kpukpru idụt ẹdi mbet mi.”—Matthew 28:18-20.

Mme apostle Jesus 12 oro idụhe ke isọn̄ mfịn, edi ediwak ikọt Jehovah ke ẹkwọrọ ikọ ẹnọ mme owo nte mme apostle oro ẹkesikwọrọde. Ini ekededi emi ẹyomde mbon emi ẹkpekwọrọde ikọ ke ebiet emi mme ọkwọrọikọ mîwakke, mmọ ẹsidọhọ ẹte: ‘Se nnyịn mi! Dọn̄ nnyịn utom.’ (Isaiah 6:8) Ndusụk mmọ, utọ nte mbon emi ẹkụrede ukpep ke Ufọkn̄wed Gilead, ẹsika mme idụt emi ẹyomde usụn̄ ẹkekwọrọ ikọ. Mbon eken ẹsika nsio nsio itie ke idụt mmọ ẹkekwọrọ ikọ. Ediwak mmọ ẹkpep mbufa usem man ẹn̄wam esop m̀mê otu emi ẹsemde esen usem. Imemke utom ndinam kpukpru emi, edi kpukpru nditọete emi ẹnyịme ndiyak n̄kpọ atak mmọ man ẹwụt adan̄a nte imade Jehovah ye mme owo. Ntem, mmọ ẹsinam  ata eti ndutịm; ẹda okụk, ini, ye odudu mmọ ẹka ẹkekwọrọ ikọ ke ebiet emi ẹnen̄erede ẹyom mme ọkwọrọikọ. (Luke 14:28-30) Ata eti utom ke nditọete emi ẹnam emi.

Idịghe kpukpru nnyịn idikeme ndiwọrọ n̄ka ebiet emi ẹnen̄erede ẹyom mme ọkwọrọikọ m̀mê ndikpep obufa usem. Edi kpukpru nnyịn imekeme ndinam n̄kpọ nte isụn̄utom ke esop nnyịn.

DI ISỤN̄UTOM KE ESOP MBUFO

Da ini fo

Ke eyo mme apostle, mme Christian ẹma ẹsisịn ifịk ẹkwọrọ ikọ kpa ye emi ediwak mmọ ẹkedude ke obio mmọ, mîkonyụn̄ idịghe isụn̄utom. Paul ọkọdọhọ Timothy ete: “Nam utom ọkwọrọ eti mbụk, nam utom fo ọyọhọ ọyọhọ ma.” (2 Timothy 4:5) Paul eketịn̄ ikọ emi ọnọ mme Christian eyo esie, edi ikọ esie ebehe nnyịn n̄ko. Ana kpukpru Christian ẹkwọrọ eti mbụk Obio Ubọn̄ ẹnyụn̄ ẹnam mme mbet kpa nte Jesus okowụkde. Ediwak n̄kpọ ẹdu emi ikemede ndinam nte mme isụn̄utom idem ke esop nnyịn.

Ke uwụtn̄kpọ, ke ini mme isụn̄utom ẹkade idụt en̄wen ẹkekwọrọ ikọ, n̄kpọ isitiehe nte eketiede ke obio mmọ, ntem, mmọ ẹsikpekpep nte ẹkpedude uwem ke obio owo. Edieke nnyịn mîkemeke ndika ebiet emi ẹnen̄erede ẹyom mme ọkwọrọikọ, imekeme ndiyom nsio nsio usụn̄ emi ikpọkwọrọde ikọ inọ mme owo. Ke uwụtn̄kpọ, ke 1940, ẹma ẹsidọhọ nditọete nnyịn ẹsikwọrọ ikọ ke efak ini kiet ke urua. Ndi akanam ọmọkwọrọ ikọ ke efak? Ndi akanam amada ukpatn̄kpọ emi ẹdọn̄de n̄wed ọkwọrọ ikọ? Ndi emeben̄e idem ndidomo nsio nsio usụn̄ ukwọrọikọ nse?

N̄wam mbon en̄wen ẹtiene ẹnam “utom ọkwọrọ eti mbụk”

Edieke amade ukwọrọikọ, edinenem fi ndisịn ifịk n̄kwọrọ ikọ. Mbon oro ẹkade ebiet emi ẹnen̄erede ẹyom mme ọkwọrọikọ m̀mê emi ẹkpepde obufa usem ẹsiwak ndidi nditọete oro ẹsọn̄de idem, emi ẹkemede ndin̄wam esop. Ke uwụtn̄kpọ, mmọ ẹsida iso ke utom ukwọrọikọ kpa nte mme isụn̄utom ẹsidade iso ke utom esop tutu nditọete emi mmọ ẹkekade ndin̄wam ẹkeme ndise mban̄a esop. Edieke afo edide eyenete emi ama akana baptism, ndi ke anam n̄kpọ emi edinamde fi odot ndidi asan̄autom unamutom m̀mê ebiowo man ekeme ndin̄wam nditọete ke esop?—1 Timothy 3:1.

 SỌN̄Ọ NDITỌETE IDEM

Nam n̄kpọ nọ owo

Enyene mme usụn̄ en̄wen emi ikemede ndin̄wam esop nnyịn. Kpukpru nnyịn ke esop, edide akwaowo m̀mê eyenọwọn̄, edide erenowo m̀mê n̄wan, imekeme ndin̄wam nditọete nnyịn oro ẹyomde un̄wam inyụn̄ isọn̄ọ mmọ idem.—Colossae 4:11.

Dọn̄ mbon oro ẹnyenede mfịna, esịt

Edi ana idiọn̄ọ nditọete nnyịn ọfọn mbemiso ikemede ndin̄wam mmọ. Bible owụt ke akpana ikere iban̄a nditọete nnyịn ke ini isopde idem ọtọkiet. (Mme Hebrew 10:24) Emi iwọrọke ke akpana inọhọ ke mbubehe nditọete nnyịn inyụn̄ iyom ndidiọn̄ọ kpukpru n̄kpọ mban̄a mmọ. Edi ọwọrọ yak idomo ndifiọk nte n̄kpọ etiede ye mmọ inyụn̄ idiọn̄ọ se mmọ ẹyomde. Mmọ ẹkeme ndiyom ẹnam n̄kpọ ẹnọ mmimọ, ẹdọn̄ mmimọ esịt, mîdịghe ẹda Bible ẹsọn̄ọ mmimọ idem. Edi akpanikọ ke mbiowo ye mme asan̄autom unamutom kpọt ẹkeme ndinọ ndusụk un̄wam emi nditọete ẹyomde. (Galatia 6:1) Edi kpukpru nnyịn imekeme ndin̄wam nditọete nnyịn oro ẹsọn̄de m̀mê ubon oro ẹnyenede mfịna.

Ẹma ẹn̄wam Salvatore. Ke ntak emi n̄kpọ ọkọsọn̄de ye enye etieti, enye ama anyam mbubehe esie, ufọk esie, ye ediwak n̄kpọ oro mmọ ẹkenyenede. Nte n̄kpọ eketiede ye ubon esie ama anam esịt enen̄ede etịmede enye. Eyenete kiet ye n̄wan esie ke esop mmọ ẹma ẹkụt ke mmọ ẹyom un̄wam. Mmọ ẹma ẹnọ Salvatore okụk ẹnyụn̄ ẹn̄wam enye ye n̄wan esie ẹnyene utom. Mmọ ẹma ẹsika n̄kan̄ mme Salvatore ẹketie ẹneme nneme ẹnyụn̄ ẹdọn̄ mmọ esịt. Emi ama anam mmọ ẹtetịm ẹmehe. Idahaemi, ke ini ubon mbiba emi ẹtide nte nsọn̄ọn̄kpọ oro akanamde mmimọ inen̄ede imehe, esịt esinem mmọ.

Mme ata Christian ẹsima nditịn̄ se mmọ ẹnịmde ke akpanikọ ẹnọ mbon en̄wen. Ana ikpebe Jesus inyụn̄ inam kpukpru owo ẹfiọk se Abasi ọn̄wọn̄ọde ndinam nnọ nnyịn. Idịghe kpukpru nnyịn ikeme ndika n̄kọkwọrọ ikọ ke ebiet oro ẹnen̄erede ẹyom mme ọkwọrọikọ. Edi kpukpru nnyịn imekeme ndinam se ikekeme man in̄wam nditọete ke esop nnyịn. (Galatia 6:10) Esịt eyenem nnyịn ke ini in̄wamde nditọete nnyịn, iyonyụn̄ ‘ika iso in̄wụm mfri ke kpukpru nti utom.’—Colossae 1:10; Utom 20:35.