Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) MARCH 2016

Mme Uyen—Didie ke Mbufo Ẹkeme Ndiben̄e Idem Nnọ Baptism?

Mme Uyen—Didie ke Mbufo Ẹkeme Ndiben̄e Idem Nnọ Baptism?

“Mmadat esịt ndinam uduak fo, O Abasi mi.”—PSALM 40:8.

IKWỌ: 51, 58

1, 2. (a) Tịn̄ ntak emi baptism mîdịghe n̄kpọ mbubru. (b) Ini ewe ke uyen akpana baptism, ndien ntak-a?

NDI afo edi uyen ndien akpama ndina baptism? Edieke edide ntre, amanam etieti sia idụhe se ifọnde ntem. Nte ima iketetịn̄ ke ibuotikọ oro ikekpepde urua oko, baptism idịghe n̄kpọ mbubru. Ke ini anade baptism, afo owụt ke ama ayak idem ọnọ Jehovah, oro edi, ke ọmọn̄wọn̄ọ ọnọ Jehovah ke imọ iyanam n̄kpọ esie ke nsinsi nsinsi, ndien ke ndinam n̄kpọ esie edidi ata akpan n̄kpọ ke uwem imọ. Idịghe ekpri un̄wọn̄ọ edi emi; ntem, ọfọn ana baptism ke ini okponde onyụn̄ ọdiọn̄ọde idem ekem ndibiere n̄kpọ ke idemfo, ke ini afo ke idemfo ebierede ndinam ntre, ye ke ini ọdiọn̄ọde se ndiyak idem nnọ Abasi ọwọrọde.

2 Edi, emekeme ndikere ke imọ iben̄eke idem kan̄a ndina baptism. Mîdịghe, ekeme ndidi ekere ke imọ imeben̄e idem ndina baptism, edi ete ye eka fo ẹdọhọ ke akpana ebet tutu afo  okpon ekem, n̄kpọ onyụn̄ enen̄ede an̄wan̄a fi. Nso ke akpanam? Kûyak emi anam idem emem fi. Utu ke oro, da ini oro mûnaha baptism mi kan̄a nam se idin̄wamde fi odot ndina baptism ke ini iso. Man ekeme ndinam emi, nam n̄kpọ ita emi: (1) dụn̄ọde m̀mê se enịmde edi akpanikọ, (2) dụn̄ọde nte esinamde n̄kpọ, nyụn̄ (3) se m̀mê emesinen̄ede ọkọm Abasi ke se enye anamde ọnọ fi.

DỤN̄ỌDE M̀MÊ SE ENỊMDE EDI AKPANIKỌ

3, 4. Nso ke mme uyen ẹkeme ndikpep nto Timothy?

3 Didie ke ọkpọbọrọ mbụme emi: Nso inam nnịm ke Abasi odu? Ntak emi nnịmde ke Bible edi N̄wed Abasi? Ntak emi nnịmde ewụhọ Abasi utu ke ndidu uwem nte mbon ererimbot? Mme mbụme emi ẹkeme ndin̄wam fi anam item apostle Paul emi: “[Ẹdomo] ẹfiọk uduak Abasi eke edide eti onyụn̄ enemde enye esịt onyụn̄ ọfọnde ama.” (Rome 12:2) Ntak emi akpanamde item emi?

Timothy ama enịm ke imọ ikpep akpanikọ koro enye ama etie ekere se enye ekekpepde

4 Uwụtn̄kpọ Timothy ekeme ndin̄wam fi. Enye ama enen̄ede ọdiọn̄ọ Ikọ Abasi, sia eka esie ye ekaeka esie ẹma ẹkpep enye Ikọ Abasi. Edi, Paul ọkọdọhọ Timothy ete: “Ka iso ke se afo ekekpepde, ẹkenyụn̄ ẹkpekde fi enịm ke akpanikọ.” (2 Timothy 3:14, 15) Ikọ Greek oro ẹkabarede “ẹkpekde” ke itien̄wed emi ọwọrọ “ndinen̄ede nnịm ke n̄kpọ edi akpanikọ.” Ntem, akana Timothy enen̄ede enịm ke se ẹkpepde imọ ke Ikọ Abasi edi akpanikọ. Enye ama enịm se enye ekekpepde idịghe ke ntak emi eka ye ekaeka esie ẹkedọhọde enye enịm, edi ke ntak emi enye eketiede ekere se ẹkekpepde enye onyụn̄ okụt ke edi ata akpanikọ.—Kot Rome 12:1.

5, 6. Ntak emi ọfọnde ababak ọtọn̄ọ ọnọ “ukeme ukere n̄kpọ” fo ukpep?

5 Ndi emenen̄ede enịm ke se ẹkpepde fi edi akpanikọ? Ekeme ndidi ebịghi ọkọdiọn̄ọ akpanikọ. Edieke edide ntre, fiak tie kere ntak emi enịmde ke se afo ekpepde edi akpanikọ. Emi ayanam enen̄ede ọbuọt idem ye Abasi, idinyụn̄ iyakke ubọkn̄ka fo, ekikere mbon ererimbot, ye se afo esikerede anam fi anam se mûkpanamke.

6 Edieke afo ọnọde “ukeme ukere n̄kpọ” fo ukpep ke ini edide uyen, eyekeme ndibọrọ ubọkn̄ka fo utọ mbụme nte: ‘Nso inam afo enen̄ede enịm ke Abasi odu? Ntak emi Abasi esiyakde idiọkn̄kpọ etịbe ọnọ nnyịn, edieke edide enye ama nnyịn? Ndi edi akpanikọ ke Abasi inyeneke ntọn̄ọ inyụn̄ inyeneke utịt?’ Edieke afo esisịnde idem ekpep Bible, utọ mbụme emi idinamke fi eyịk se esikpepde, edi edikam ananam fi ọbuọt idem ye Abasi.

7-9. Tịn̄ nte “Nso ke Bible Ekpep?” emi odude ke jw.org/efi ekemede ndin̄wam fi enen̄ede enịm ke ekpep akpanikọ.

7 Ndisịn idem n̄kpep n̄kpọ ayan̄wam fi ekeme ndibọrọ ediwak mbụme onyụn̄ anam enịm ke se ẹkpepde fi edi akpanikọ. (Utom 17:11) Imenyene ediwak n̄wed ke esop Abasi emi afo ekemede ndida n̄kpep  n̄kpọ. Ediwak uyen ẹsima ndikpep mme n̄wed oro ẹnemede n̄kpọ ẹban̄a Jehovah, Akwa Andibot nnyịn, ye mme n̄kpọ oro enye okobotde. Ke adianade do, ediwak uyen ẹsima nsio nsio n̄kpọ emi ẹnemede ke ibuotikọ emi, “Nso ke Bible Ekpep?” emi odude ke jw.org/efi. Edieke oyomde ibuotikọ emi, ka SE BIBLE EKPEPDE, ndien se ekpri ibuotikọ emi, MME UYEN. Ibuotikọ kiet kiet emi ẹnemede mi ayanam enen̄ede enịm ke se afo ekpepde ke Bible edi akpanikọ.

8 Ekeme ndidi ọmọdọdiọn̄ọ ndusụk ibọrọ mbụme emi ẹnemede ke ikpehe emi sia emesikpep Bible. Edi, ndi emenen̄ede enịm mme n̄kpọ emi? Ikpehe emi ayan̄wam fi etie ekere nsio nsio itien̄wed Bible onyụn̄ ewet se inamde enịm ke se afo ekpepde edi akpanikọ. Emi ayanam ekeme nditịn̄ se enịmde ke akpanikọ ọnọ mbon en̄wen. Edieke ekemede ndision̄o se ẹnemede ke ibuotikọ emi, “Nso ke Bible Ekpep?” ke jw.org/efi, emekeme ndida enye n̄kpep idemfo n̄kpọ man enen̄ede okụt ke afo ekpep akpanikọ.

9 Ana odụn̄ọde Ikọ Abasi tutu afo enen̄ede enịm ke se ekpepde edi akpanikọ. Emi ayan̄wam fi eben̄e idem ọnọ baptism. Ekpri eyenete an̄wan kiet ọkọdọhọ ete: “Mbemiso n̄kanade baptism, mma nsụhọde ntie n̄kpep Bible tutu n̄kụt ke esop Abasi edi emi. Nte eyo esierede ntre ke ntetịm n̄kụt ke ndu ke esop Abasi.”

DỤN̄ỌDE NTE ESINAMDE N̄KPỌ

10. Ntak emi owo emi anade baptism okpodude uwem emi owụtde ke enye enyene mbuọtidem?

10 Bible ọdọhọ ete: “Mbuọtidem eke mîsan̄ake ye utom akpa.” (James 2:17) Nte afo anamde n̄kpọ ke ẹdida ẹdiọn̄ọ m̀mê afo emenen̄ede enịm se ekpepde ke akpanikọ. Edieke afo enịmde se ekpepde  ke akpanikọ, oyodu “edisana ido uwem” onyụn̄ anam “mme edinam uten̄e Abasi.”—Kot 2 Peter 3:11.

11. Nso idi “edisana ido uwem”?

11 Nso idi “edisana ido uwem”? Edieke afo odude edisana uwem udûnamke oburobụt ido. Ke uwụtn̄kpọ, fiak men ekikere fo ka ọfiọn̄ itiokiet emi ẹkebede. Ke ini ẹkedomode fi idomo, ndi ama enen̄ede ekere m̀mê nso idi nnennen n̄kpọ emi imọ ikpanamde? (Mme Hebrew 5:14) Ndi emekeme nditi ini emi afo ekebede idomo m̀mê ini emi mûkayakke ubọkn̄ka fo ẹnam fi anam se mûkpanamke? Ndi nditọ ufọkn̄wed mbufo ye mme andikpep fo ẹdiọn̄ọ fi nte eti eyen? Ndi emesinam se Jehovah amade, mîdịghe ndi esitiene nditọ ufọkn̄wed mbufo anam se mmọ ẹnamde mbak mmọ idisak fi? (1 Peter 4:3, 4) Imọdiọn̄ọ ke idụhe eke ọfọnde ama, sia enyene ini emi bụt mîsiyakke ndusụk mbon emi ẹma ẹkenam n̄kpọ Jehovah ke ediwak isua ẹkwọrọ ikọ ẹnọ mbon en̄wen. Edi ikpanaha bụt anam owo ekededi emi ayakde idem ọnọ Abasi ndinam mme owo ẹdiọn̄ọ ke imọ idi Ntiense Jehovah, ndinyụn̄ ndu uwem nte Ntiense Jehovah.

12. Siak ndusụk “edinam uten̄e Abasi,” ndien didie ke afo akpada mmọ?

12 Nso idi “mme edinam uten̄e Abasi”? Emi esịne mme n̄kpọ emi afo esinamde ke esop, utọ nte ndidụk mbono esop ye ndika ukwọrọikọ. Enye esịne n̄ko mme n̄kpọ en̄wen emi afo esinamde emi mme owo mîkwe, utọ nte ndibọn̄ akam nnọ Jehovah ye nditie ke idemfo n̄kpep n̄kpọ. Owo oro ayakde idem ọnọ Jehovah ididaha mme n̄kpọ emi nte mbiomo. Enye edida mmọ nte Edidem David akadade n̄kpọ Abasi. David ọkọdọhọ ete: “Mmadat esịt ndinam uduak fo, O Abasi mi, ibet fo onyụn̄ odu mi ke ọwọn̄esịt.”—Psalm 40:8.

Mme akpan n̄kpọ ewe ke esisịn ke akam fo, ndien didie ke mmọ ẹwụt ke amama Jehovah?

13, 14. Nso ikeme ndin̄wam fi anam “mme edinam uten̄e Abasi”? Tịn̄ nte emi an̄wamde ndusụk uyen.

13 Se ẹwetde ke n̄wed Mme Mbụme Oro N̄kparawa Owo Ẹbụpde—Mme Ibọrọ Oro Ẹnyenede Ufọn, Eboho 2, page 308 ye 309, ayan̄wam fi anam mme n̄kpọ emi ẹdin̄wamde fi eben̄e idem ndina baptism. Emekeme ndiwet ibọrọ mbụme oro ẹbụpde ke page 308 ye 309 ke mme ufan̄ oro ẹdude do. Ndusụk mbụme oro ẹdi: “Mme akpan n̄kpọ ewe ke esisịn ke akam fo, ndien didie ke mmọ ẹwụt ke amama Jehovah?” “Nso ye nso en̄wen ke esikpep?” “Ndi emesika ukwọrọikọ idem ekpededi ete ye eka fo ikaha?” Ufan̄ odu n̄ko ndiwet mme n̄kpọ oro afo edimade ndinam mban̄a akam fo, ukpepn̄kpọ idemfo, ye ukwọrọikọ.

14 Ediwak uyen oro ẹyomde ndina baptism ẹdọhọ ke se ẹwetde ke mme page emi enen̄ede an̄wam mmimọ. Ekpri eyenete an̄wan kiet emi ekerede Tilda ọkọdọhọ ete: “Mma nda se ẹwetde ke mme page emi mbiere se ndinamde. Mma nnam kpukpru se n̄kebierede, emi ama an̄wam mi mben̄e idem ndina baptism ke n̄kpọ nte isua kiet ebede.” N̄wed emi ama an̄wam ekpri eyenete nnyịn emi ekerede  Patrick n̄ko. Enye ọdọhọ ete: “Mma mbebiere se ndinamde, edi ndiwewet se n̄kebierede oro ama anam nnen̄ede nsịn idem nnam mmọ.”

Ndi ayaka iso anam n̄kpọ Jehovah idem edieke ete ye eka fo ẹtrede? (Se ikpehe 15)

15. Tịn̄ ntak emi akpanade owo ebiere ke idemesie ndina baptism.

15 Kiet ke otu mbụme emi ẹbụpde ke page 309 ke n̄wed N̄kparawa Owo Ẹbụp edi: “Ndi ayaka iso anam n̄kpọ Jehovah idem edieke ete ye eka fo ye mme ufan fo ẹtrede?” Ke ini ayakde idem ọnọ Jehovah onyụn̄ anade baptism, afo amakabade ufan Jehovah. Ntem, ọfọn anam n̄kpọ Jehovah ke ntak emi amade enye, idịghe ke ntak ete ye eka fo m̀mê owo en̄wen ekededi. Afo ndidu edisana uwem nnyụn̄ nnam mme edinam uten̄e Abasi owụt ke emenen̄ede enịm ke se ekpepde edi akpanikọ, ke omonyụn̄ oyom ndidu uwem nte Abasi amade. Idibịghike oyodot ndina baptism.

SE M̀MÊ EMESINEN̄EDE ỌKỌM ABASI KE SE ENYE ANAMDE ỌNỌ FI

16, 17. (a) Nso ikpanam owo akabade edi mbet Christ? (b) Ewe uwụtn̄kpọ owụt ntak emi ikpọkọmde Abasi ke ndikọnọ Eyen esie edikpa afak nnyịn?

16 Usen kiet, ete kiet emi ekenen̄erede ọfiọk Ibet Moses ama obụp Jesus ete: “Ewe edi n̄kponn̄kan ewụhọ ke Ibet?” Jesus ama ọbọrọ enye ete: “Afo enyene ndima  Jehovah Abasi fo ke ofụri esịt fo ye ke ofụri ukpọn̄ fo ye ke ofụri ekikere fo.” (Matthew 22:35-37) Ikọ Jesus ọwọrọ ke owo akpana baptism onyụn̄ akabade edi mbet imọ ke ntak emi enye amade Jehovah. N̄kpọ kiet emi ekemede ndin̄wam fi enen̄ede ama Jehovah edi nditie n̄kere mban̄a uwa ufak Christ, sia enye edi akakan enọ emi Abasi ọnọde nnyịn. (Kot 2 Corinth 5:14, 15; 1 John 4:9, 19.) Edieke anamde emi, ọyọdọn̄ fi ndikọm Abasi ke ndinọ eyen esie edikpa ọnọ fi.

17 Uwụtn̄kpọ emi ekeme ndinam an̄wan̄a ntak emi afo ekpenen̄erede ọkọm Abasi ke ndikọnọ Eyen esie edikpa ọnọ fi: Yak idọhọ ke asan̄a ke ubom aka n̄kpọ ndien ubom oro esịp, edi owo edi edinyan̄a fi. Ndi okposụk adaha ọnyọn̄ ukọmke enye? Ukpûnamke ntre! Ọkpọkọm enye, ukpûnyụn̄ ufreke se enye akanamde ọnọ fi. Kpasụk ntre n̄ko ke ikpọkọm Jehovah ye Jesus ke ndikekpe ufak ibuot nnyịn. Mmọ mbiba ẹnịm nnyịn uwem. Mmọ ẹsio nnyịn ke ufụn idiọkn̄kpọ ye n̄kpa. Ima emi mmọ mbiba ẹmade nnyịn anam nnyịn idori enyịn ndidu uwem ke nsinsi ke Paradise mi ke isọn̄.

18, 19. (a) Ntak emi mîkpanaha ndịk anam fi ndiyak idem nnọ Jehovah? (b) Didie ke ndinam n̄kpọ Jehovah anam uwem enem fi?

18 Ndi emesikọm Jehovah ke se enye anamde ọnọ fi? Edieke edide ntre, ọwọrọ idisọn̄ke fi ndiyak idem nnọ Jehovah nnyụn̄ nna baptism. Ke ini ayakde idem ọnọ Jehovah, afo ọn̄wọn̄ọ ọnọ enye ke imọ iyanam n̄kpọ esie ke nsinsi nsinsi. Ndi akpana okop ndịk ndinam utọ un̄wọn̄ọ emi? Baba! Jehovah oyom n̄kpọ ọfọn fi, enye iditreke-tre ndidiọn̄ mbon emi ẹnamde uduak esie. (Mme Hebrew 11:6) Ke ini ayakde idem ọnọ Jehovah onyụn̄ anade baptism, uwem idifekke fi, edi uwem edikam inenem fi. Eyenete emi edide isua 24 idahaemi, oro akanade baptism mbemiso esịmde isua 13, ọdọhọ ete: “Etie nte ntotụn̄ọ n̄kpọ oro Bible ekpepde ekpekenen̄ede an̄wan̄a mi ekpedi mma n̄kpon esisịt, edi ndikebiere ndiyak idem mi nnọ Jehovah ini oro ikayakke n̄kpọ ererimbot ẹdọn̄ mi.”

Satan iyomke n̄kpọ ọfọn fi, enye oyom ufọn idemesie ikpọn̄

19 Jehovah oyom n̄kpọ ọfọn fi. Edi Satan iyomke, enye oyom ufọn idemesie ikpọn̄. Ufọn idụhe nditiene enye, sia enye inyeneke eti n̄kpọ ndomokiet ndinọ fi. Enye inyeneke eti mbụk; ẹmọn̄ ẹsosobo enye ke mîbịghike. N̄kukụre se enye ekemede ndinam nnọ fi edi ndinam ẹsobo fi n̄ko.—Ediyarade 20:10.

20. Nso ke owo akpanam man odot ndiyak idem nnọ Abasi nnyụn̄ nna baptism? (Se ekebe emi, “Se idinamde fi ọkọri.”)

20 ldụhe n̄kpọ emi ọfọnde akan afo ndiyak idem nnọ Jehovah. Ndi emeben̄e idem ndinam emi? Edieke eben̄ede, kûyak ndịk akpan fi ndinam emi. Edi edieke mûben̄eke idem kan̄a, nam se ẹtịn̄de ke ibuotikọ emi man ekeme ndinam n̄kọri. Paul ọkọdọhọ nditọete ke Philippi ete ẹka iso ẹnam n̄kọri. (Philippi 3:16) Edieke anamde item Paul emi, idibịghike, ọyọdọn̄ fi ndiyak idem nnọ Jehovah nnyụn̄ nna baptism.