Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) FEBRUARY 2016

Ka Iso Ndinam N̄kpọ Jehovah ye Idatesịt

Ka Iso Ndinam N̄kpọ Jehovah ye Idatesịt

EWE usen ke esịt ekenen̄ede enem fi akan? Ndi usen emi akanamde ndọ m̀mê usen emi akpa eyen fo akamanade? Ndi edi usen emi akanade baptism? Ekeme ndidi usen baptism fo ekedi ata akpan usen ye usen inemesịt ọnọ fi. Esịt ama enen̄ede enem nditọete usen oro ndikụt nte anamde kpukpru owo ẹfiọk ke amama Jehovah ke ofụri esịt, ukpọn̄, ekikere, ye ke ofụri ukeme fo.—Mark 12:30.

Anaedi enen̄ede enem fi ndinam n̄kpọ Jehovah tọn̄ọ akana baptism. Edi, ndusụk nditọete ikopke aba inem ndinam n̄kpọ Abasi nte ẹkesikopde ke ini ẹkenade baptism. Ntak edide ntre? Ntak emi akpanade ika iso inam n̄kpọ Jehovah ye idatesịt?

NTAK EMI NDUSỤK OWO MÎKOPKE ABA INEM NDINAM N̄KPỌ ABASI

Eti mbụk Obio Ubọn̄ esinam inen̄ede ikop idatesịt. Ntak-a? Koro Jehovah ọn̄wọn̄ọ ke ibịghike ukara imọ ọmọn̄ osobo idiọk ererimbot emi efep onyụn̄ anam isọn̄ edi obufa. Zephaniah 1:14 ọdọhọ ete: “Akwa usen Jehovah emekpere. Enye emekpere, oyonyụn̄ ọsọp etieti.” Edi edieke ikerede ke imebet Obio Ubọn̄ Abasi ebịghi akaha, ekeme ndidi utom Abasi idinemke nnyịn aba nte ekesinemde. Emi ekeme ndinam nnyịn isịnke ifịk aba inam n̄kpọ Abasi nte ikesinamde.—Mme N̄ke 13:12.

Ndisidu ye nditọete nnyịn esin̄wam nnyịn ika iso inam n̄kpọ Jehovah ye idatesịt. Ekeme ndidi nti edu oro ikọt Abasi ẹnyenede akanam nnyịn idikpep akpanikọ, inyụn̄ itọn̄ọ ndinam n̄kpọ Abasi ye idatesịt. (1 Peter 2:12) Edi nso ikeme nditịbe edieke ẹtụnọde eyenete ke esop ke ntak emi enye akabiatde ibet Abasi? Emi ekeme ndinam idem emem ndusụk nditọete emi ẹkedụkde esop Abasi ke ntak nti edu ikọt Abasi, inyụn̄ iyakke mmọ ẹkop inemesịt aba ndinam n̄kpọ Abasi.

Uma-inyene n̄ko ekeme ndinam nnyịn ikopke inem aba ndinam n̄kpọ Abasi. Didie? Ererimbot Satan emi esinam etie nte ke ana inyene se ededi oro ikụtde, edide imenen̄ede iyom n̄kpọ oro m̀mê iyomke. Edi ikpanaha ifre ikọ Jesus emi: “Baba owo kiet ikemeke ndidụk ufụn nnọ eteufọk iba; koro eyedi enye ayasua kiet onyụn̄ ama enye eken, mîdịghe enye ayadiana ye kiet onyụn̄ esịn enye eken ke ndek. Mbufo ikemeke ndidụk ufụn nnọ Abasi ye Inyene.” (Matthew 6:24) Nnyịn ikemeke-keme ndinam n̄kpọ Jehovah ye idatesịt edieke iyomde ndinyene kpukpru se ikụtde ke ererimbot emi.

KOP INEMESỊT NDINAM N̄KPỌ JEHOVAH

Mbon emi ẹmade Jehovah idaha utom esie nte ndodobi mbiomo. (1 John 5:3) Ti ke Jesus ọkọdọhọ ete: “Ẹtiene mi, kpukpru mbufo emi ẹkpade utom ẹnyụn̄ ẹbiomde ndodobi mbiomo, ndien nyọnọ mbufo nduọkodudu. Ẹmen ọkpọnọ mi ẹkọn̄ọ ke itọn̄ mbufo ẹnyụn̄ ẹkpebe mi, koro ami mmenyene ifụre ifụre ido nnyụn̄ nsụhọde idem, ndien mbufo ẹyekụt nduọkodudu ẹnọ ukpọn̄ mbufo. Koro ọkpọnọ mi ememem, mbiomo mi onyụn̄ efefere.” (Matthew  11:28-30) Ndidi ata Christian obiomode nnyịn ndodobi mbiomo onyụn̄ anam ikop inemesịt. Ke akpanikọ, nnyịn imenyene ata ediwak ntak ndikop inemesịt ndinam n̄kpọ Jehovah. Ẹyak ineme ita ke otu emi.—Habakkuk 3:18.

Nnyịn inam n̄kpọ inọ Abasi inemesịt emi ọnọde nnyịn uwem. (1 Timothy 1:11; Utom 17:28) Imọfiọk ke mîkpedịghe Abasi nnyịn ikpodụhe uwem. Ntre, ẹyak nnyịn ika iso ndinam n̄kpọ esie ye idatesịt, inamke n̄kpọ m̀mê ebịghi didie ikana baptism.

Ke ini Héctor etide se Obio Ubọn̄ Abasi edinamde, enye esikop inemesịt ndika iso n̄kwọrọ ikọ

Da Héctor emi ekedide esenyịn oro asan̄ade-san̄a ke isua 40 ke uwụtn̄kpọ. Enye osụk okokop inemesịt ndinam n̄kpọ Abasi idem “ke ini usọn̄.” (Psalm 92:12-14) Kpa ye oro udọn̄ọ an̄wan esie mîyakke enye anam n̄kpọ Abasi nte ekesinamde, enye osụk okokop inemesịt ndinam n̄kpọ Abasi. Enye ọdọhọ ete: “Esifịna mi ndikụt nte edide eyo esiere idem etetịm ọdiọk n̄wan mi, isinyụn̄ imemke utom ndise mban̄a enye, edi nsiyakke oro anam mi n̄kûkop inemesịt ndinam n̄kpọ nnọ ata Abasi. Ndifiọk ke Jehovah emi mîkobotke owo ke ikpîkpu enịm mi uwem esịm mfịn, anam nnen̄ede mma enye nnyụn̄ nnam n̄kpọ esie ke ofụri esịt. Mmesidomo ndisịn idem n̄kwọrọ ikọ nnyụn̄ nnam n̄kpọ Obio Ubọn̄ edi akpa ke uwem mi, man n̄ka iso n̄kop inem ndinam n̄kpọ Abasi.”

Jehovah ọnọ Eyen esie edikpa ọnọ nnyịn man ikeme ndikop inem uwem. Bible ọdọhọ ke “Abasi ama enen̄ede ama ererimbot tutu enye ọnọ ikpọn̄-ikpọn̄ edibon Eyen esie, man owo ekededi eke ọbuọtde idem ye enye okûtak edi enyene nsinsi uwem.” (John 3:16) Ntre, Abasi ekeme ndifen mme idiọkn̄kpọ nnyịn onyụn̄ anam idu uwem ke nsinsi, edieke ibuọtde idem ke uwa ufak Jesus Christ, kpa ata ọsọn̄urua enọ emi Abasi ọnọde nnyịn. Ata akpan ntak emi ikpọkọmde Abasi edi emi! Edieke inen̄erede ima ufak emi, eyenen̄ede enem nnyịn ndinam n̄kpọ Jehovah.

Jesús ama ọkpọn̄ utom oro enye akanamde, onyụn̄ okop inemesịt ndinam n̄kpọ Jehovah ke ediwak isua

Eyenete nnyịn kiet emi ekerede Jesús, emi okodụn̄de ke Mexico, ọkọdọhọ ete: “Mma ndụk ufụn nnọ utom mi. Nsinam utom ọtọn̄ọde ke usenubọk tutu eyo okụt kpukpru usen, kpa ye oro owo mîkọdọhọke ke ana nnam ntre. N̄kanam man nnyene ediwak okụk. Ekem mma ndikpep n̄kpọ mban̄a Jehovah ye nte enye ọkọnọde edima Eyen esie edikpa ọnọ nnyịn. Emi ama anam enen̄ede ọdọn̄ mi ndinam n̄kpọ esie. Ntre, mma nyak uwem mi nnọ Jehovah nnyụn̄ nna baptism. Ke mma n̄kanam utom ke ofụri isua 28, mma mbiere ndikpọn̄ utom oro man ntọn̄ọ utom usiakusụn̄ ofụri ini.” Ini oro ke Jesús ekenen̄ede okop inemesịt ndinam n̄kpọ Abasi.

Nnyịn idụhe oburobụt uwem, emi anam ikop inemesịt. Ndi emeti nte ekesidude uwem ke ini mûkọdiọn̄ọke Jehovah? Apostle Paul ama eti mme Christian ke Rome ke mmọ ‘ẹkedi ifịn idiọkn̄kpọ,’ edi ke mmọ “ẹma ẹkabade ẹdi ifịn edinen ido.” Mmọ  ẹma ẹdori enyịn ndidu uwem ke nsinsi, sia mmọ ikodụhe oburobụt uwem. (Rome 6:17-22) Nnyịn n̄ko idụhe oburobụt uwem, ntak edi oro nnyịn mîbọhọ ufen oro mbon emi ẹdude oburobụt m̀mê afai afai uwem ẹsibọde. Emi anam nnyịn inen̄ede ikop inemesịt!

“Isua oro ndade nnam n̄kpọ Jehovah ke nnen̄ede n̄kop inemesịt n̄kan ke uwem mi.”—Jaime

Ke uwụtn̄kpọ, Jaime emi ekedide otopita, ekenịm ke mme n̄kpọ ẹsifoforo, ikonyụn̄ inịmke ke Abasi odu. Enye ama ọtọn̄ọ ndidụk mbono esop Mme Ntiense Jehovah, ndien ama enen̄ede enem enye ndikụt nte Mme Ntiense ẹmade kiet eken. Enye ama ọbọn̄ akam eben̄e Jehovah an̄wam imọ ifiọk enye inyụn̄ itre idiọk uwem oro ikesidude. Enye ọdọhọ ete: “Sụn̄sụn̄ mma ndifiọk ke Abasi emi edide edima Ete, emi esinyụn̄ atuade owo mbọm odu. Ndinịm ibet Abasi enen̄ede an̄wam mi. Ekpedi n̄kokpụhọkede, ekeme ndidi ẹkpekewot mi nte ẹkewotde ndusụk ufan mi oro ikesitopde ita kiet. Mme isua oro ndade nnam n̄kpọ Jehovah ke nnen̄ede n̄kop inemesịt n̄kan ke uwem mi.”

KÛKPA MBA!

Nnyịn ikpanam n̄kpọ didie nte itiede ibet utịt idiọk ererimbot emi? Ti ke edieke isịnde idem inam n̄kpọ Abasi, iyodu uwem ke nsinsi. “Ntre ẹyak nnyịn ikûkpa mba ke edinam eti n̄kpọ, koro ke edikem ini nnyịn iyọdọk mbun̄wụm edieke nnyịn mîkpaha mba.” (Galatia 6:8, 9) Ẹyak nnyịn iben̄e Jehovah an̄wam nnyịn ika iso inyene ime, inam se ikekeme man inyene nti edu oro ẹdinamde nnyịn ibọhọ “akwa ukụt” oro edide, inyụn̄ ika iso inam n̄kpọ Jehovah ye idatesịt.—Ediyarade 7:9, 13, 14; James 1:2-4.

Imenịm ke Jehovah ọyọdiọn̄ nnyịn edieke ikade iso inyene ime, sia enye ọdiọn̄ọ se nnyịn inamde inọ enye ye adan̄a nte imade enye, inyụn̄ iyomde ẹnam enyịn̄ esie asana. Edieke ikade iso inam n̄kpọ esie ye idatesịt, iyetịn̄ se David eketịn̄de ete: “Mmenịm Jehovah ke iso mi kpukpru ini. Koro enye odude mi ke ubọk nnasia, ami ndisehekede. Ntem esịt mi adara, ubọn̄ mi onyụn̄ anam mi ndat esịt. N̄ko, obụkidem mi oyodụn̄ ke ifụre.”—Psalm 16:8, 9.