Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) FEBRUARY 2016

 MBỤK EYOUWEM

Jehovah Ọdiọn̄ Se Nnamde Nnọ Enye

Jehovah Ọdiọn̄ Se Nnamde Nnọ Enye

Mma ndọhọ owoekọn̄ oro ke ẹma ẹkọkọbi mi ke ntak oro mmen̄kamaha ndidụk ekọn̄. Mma mbụp enye nte: “Ndi ọmọn̄ anam mfiak mbọ utọ ufen oro n̄kọbọde do?” Ọyọhọ utịm-ikaba ekedi emi ẹkedọhọde ndidụk ekọn̄ ke United States.

N̄KAMANA ke 1926 ke Crooksville, Ohio, ke United States. Ete ye eka mi ikesikaha ufọkabasi, edi mmọ ẹma ẹsidọhọ nnyịn nditọ mmọ itiaita ika ufọkabasi. N̄kesika Ufọkabasi Methodist. Ke ini n̄kedide isua 14, pastọ ufọkabasi nnyịn ama ọnọ mi enọ ke ntak emi mmen̄kesifiakke ufọkabasi ke Sunday ke ofụri isua kiet.

Margaret Walker (ọyọhọ owo iba ọtọn̄ọde ke ufien) ekekpep mi Bible

Ini oro, Margaret Walker, mbọhọidụn̄ nnyịn emi ekedide Ntiense Jehovah, ama esidi ufọk nnyịn edikpep eka mi Bible. Usen kiet, mma nyom nditiene n̄kpan̄ utọn̄ ke nneme mmọ, edi eka mi ama ọdọhọ n̄wọrọ, sia enye ekekere ke ndiyakke imọ itịm ikpan̄ utọn̄. Edi mma nsidomo ndikpan̄ utọn̄ ke nneme mmọ. Usen kiet, ke ini enye ekedide edikpep eka mi Bible, enye ama obụp mi ete: “Ndi ọmọfiọk enyịn̄ Abasi?” Mma mbọrọ enye nte: “Idụhe owo emi mîfiọkke ke enyịn̄ esie edi Abasi.” Enye ama ọdọhọ n̄kot Psalm 83:18. Ke ini n̄kokotde, mma n̄kụt ke Abasi ekere Jehovah. Mma mfehe n̄kọdọhọ mme ufan mi nte: “Ẹma ẹsịm ufọk mbubreyo emi, ẹkot Psalm 83:18 man ẹfiọk enyịn̄ Abasi.” Usen oro ke n̄kọtọn̄ọ ndikwọrọ ikọ.

Mma n̄kpep Bible nnyụn̄ nna baptism ke 1941. Ikebịghike, ẹma ẹdọhọ nsinịm Ukpepn̄kpọ N̄wed Esop. Mma ndọhọ eka mi ye nditọeka mi ẹsidụk, ndien kpukpru mmọ ẹma ẹtọn̄ọ ndidụk Ukpepn̄kpọ N̄wed Esop oro n̄kesinịmde. Edi ete mi ikakam idọn̄ke-dọn̄ enyịn ke se ikanamde.

ETE MI AMA ỌBIỌN̄Ọ MI

Ẹma ẹnọ mi ediwak utom ke esop, ndien mma nnyene ediwak n̄wed esop Abasi ke ufọk nnyịn. Usen kiet, ete mi ama ọdọhọ mi ete: “Omokụt kpukpru n̄wed oro obobon ko, nte mbọp enyịn ntat, san̄a ye mmọ kpọn̄ ufọk mi.” Mma n̄kpọn̄ ufọk nnyịn n̄kodụn̄ ke Zanesville ke Ohio, emi ekekperede obio nnyịn. Edi mma nsika ufọk kpukpru ini n̄kọsọn̄ọ eka mi ye nditọeka mi idem.

Ete mi ama esidomo ndinam eka mi okûdụk mbono esop. Ndusụk ini, ke ini eka mi akade mbono esop, ete mi esibịne enye okomụm, odụri edisịn ke ufọk. Edi eka mi esito usụn̄ en̄wen efehe ọwọrọ aka kpa  mbono esop. Mma ndọhọ eka mi nte: “Kûfịna idem, ayakak enye usen kiet.” Ama onyụn̄ akak enye nte ini akakade. Eka mi ama ekeme ndien ndidụk mbono esop inyụn̄ idụhe eke afịnade enye.

Mma ntọn̄ọ ndisinọ utịn̄ikọ ke esop nnyịn ke ini ẹketọn̄ọde Ufọkn̄wed Utom Ukara Abasi ke 1943. Item oro ẹkesinọde mi ama enen̄ede an̄wam mi n̄keme ndinọ utịn̄ikọ ọfọn.

N̄KAMAHA NDIDỤK EKỌN̄

Ẹma ẹdọhọ ndidụk ekọn̄ ke 1944, ke ini ẹkesụk ẹn̄wanade ọyọhọ ekọn̄ ererimbot iba. Mma n̄ka itie uda owo ke ekọn̄ ke Fort Hayes ke Columbus, Ohio. Mmọ ẹma ẹse mi idem ẹnyụn̄ ẹnọ mi babru ẹte n̄wet n̄kpọ mban̄a idemmi. Mma ndọhọ ikpọ mbonekọn̄ ke nyomke ndidi owoekọn̄. Mmọ ẹma ẹyak mi nnyọn̄. Edi usen ifan̄ ama ekebe, bodisi kiet ama edi ufọk mi edidọhọ mi ete: “Corwin Robison, ẹdọhọ ndimụm fi.”

Ke ini ẹkemende mi ẹka esop ke urua iba ẹbede, ekpeikpe ama ọdọhọ ete: “Nte ami nte ami, n̄kpọkọbi fi nduọk ukpọhọde. Nso ke enyene nditịn̄?” Mma ndọhọ nte: “Ọbọn̄ mi, etie nte owo ikanamke fi ọdiọn̄ọ ke ndi ọkwọrọ ikọ. Iwakke enyịnusụn̄ owo emi mmen̄kwọrọke ikọ, mmọkwọrọ eti mbụk Obio Ubọn̄ Abasi nnọ ata ediwak owo ke obio emi.” Ekpeikpe ama ọdọhọ mme ebiereikpe ete: “Utom mbufo idịghe ndibiere m̀mê ufan emi edi ọkwọrọikọ m̀mê idịghe, edi, edi ndibiere m̀mê enye ama enyịme ndidụk ekọn̄ m̀mê ikenyịmeke.” Ikọyọhọke-yọhọ minit 30, mmọ ẹma ẹbiere ke mmedue ibet sia mmen̄kodụkke ekọn̄. Ekpeikpe ama ebiere ete ẹkọbi mi isua ition ke ufọk-n̄kpọkọbi Ashland ke Kentucky.

JEHOVAH AMA EKPEME MI KE UFỌK-N̄KPỌKỌBI

Ẹma ẹkọbi mi urua iba ke ufọk-n̄kpọkọbi ke Columbus, Ohio. Akpa usen oro, n̄kodu ke ubet n̄kpọkọbi mi nnyụn̄ n̄wọrọke an̄wa. Mma mbọn̄ akam nnọ Jehovah nte: “Mbọk n̄wam mi ke ndikemeke ndisịne ke ufọk-n̄kpọkọbi ke ofụri isua ition.”

Edem usen, mme ekpeme ufọk-n̄kpọkọbi ẹma ẹyak mi n̄wọrọ ke ubet ufọk-n̄kpọkọbi mi nsan̄a. Mma nsan̄a n̄kada ye owo n̄kpọkọbi kiet emi ọkọniọn̄de onyụn̄ okop idem. Enye ekekere Paul. Nnyịn mbiba ima ida ke mben window ise an̄wa. Enye ama obụp mi ete, “Da ikpọn, nsida fi idi mi?” Mma mbọrọ, “Ndi Ntiense Jehovah.” Enye ete, “Etịn̄ akpanikọ, ntak emi ẹkọbide fi ndien?” Mma ndọhọ, “Mme Ntiense Jehovah isikaha ekọn̄, isinyụn̄ iwotke owo.” Enye ete mi, “Ẹkọbi fi ke ntak emi mûmaha ndiwot owo ẹnyụn̄ ẹkọbi mbon eken ke ntak emi ẹkewotde owo. Ndi mmọ ẹsụk ẹdiọn̄ọ se ẹnamde?” Mma ndọhọ, “Idiọn̄ọke.”

Enye ama ọdọhọ mi ete, “Mma n̄kot n̄wed mbufo ke ini n̄kodude ke ufọk-n̄kpọkọbi en̄wen ke isua 15.” Ke ini n̄kokopde oro, mma mbọn̄ akam nte, “Jehovah mbọk nam ete emi edi ufan mi.” Ndondo oro, Paul ama ọdọhọ ete, “Owo ekpededei otụk fi ubọk, kot mi. Nyekpep enye n̄kpọ.” Ntre, ke ofụri ini emi  n̄kodude do, n̄kenyeneke mfịna ndomokiet ye mbon n̄kpọkọbi 50 emi ikodude kiet.

Ami ye nditọete oro ẹkekọbide ke Ashland ke Kentucky, sia nnyịn mîkamaha ndidụk ekọn̄

Ke ini ẹkesiode mi ẹka ufọk-n̄kpọkọbi ke Ashland, mma n̄kokụt ndusụk nditọete do. Mmọ ẹma ẹn̄wam mi ye nditọete eken inen̄ede ikpere Jehovah. Mmọ ẹma ẹsinọ nnyịn itie N̄wed Abasi oro idikotde kpukpru urua, ima isinyụn̄ iwet mme mbụme ye mme ibọrọ oro idinemede ke ini isopde idem ọtọkiet. Nnyịn ikodu ke akamba ubet ufọk-n̄kpọkọbi oro ẹkesibonde bed ẹkpere ibibene. Ẹma ẹmek eyenete kiet ndise mban̄a nte idisikwọrọde ikọ ke ubet ufọk-n̄kpọkọbi emi. Enye ama esidọhọ mi ete: “Robison, afo enyene bed enye emi ye enye oko. Kụt ete ke ọmọkwọrọ ikọ ọnọ owo ekededi emi edinade ke bed emi.” Nte ikesisan̄ade ikwọrọ ikọ ke ubet n̄kpọkọbi edi oro.

SE N̄KOKỤTDE KE ẸMA ẸKESIO MI KE UFỌK-N̄KPỌKỌBI

Ọyọhọ ekọn̄ ererimbot iba ama okụre ke 1945, edi owo ikọsọpke isio mi ke ufọk-n̄kpọkọbi. Mma n̄kere nte n̄kpọ eketiede ye eka ye nditọeka mi ke ntak se ete mi ọkọdọhọde mi. Enye ọkọdọhọ mi ete: “Edieke n̄kemede ndinam fi ọkpọn̄ ufọk, idisọn̄ke mi ndinam eka ye nditọeka fo ẹtre ufọkabasi mbufo.” Edi ke ini ẹkesiode mi ke ufọk-n̄kpọkọbi, idem ama akpa mi ndikụt ke owo itiaba ke ufọk nnyịn ẹma ẹsidụk mbono esop, ndien eyeneka mi an̄wan ama ana baptism kpa ye oro ete mi ọkọbiọn̄ọde nnyịn.

Ndu ke an̄wautom ye Brọda Demetrius Papageorge, eyenete oro ẹyetde aran emi ọkọtọn̄ọde ndinam n̄kpọ Jehovah toto ke 1913

Ke ini Ekọn̄ Korea ọkọtọn̄ọde ke 1950, ẹma ẹdọhọ mfiak ndi itie uda owo ke ekọn̄ ke Fort Hayes ke Columbus, Ohio. Ke ẹma ẹketem mi udomo, owoekọn̄ kiet ama ọdọhọ mi ete: “Afo ebe akan kpukpru owo.” Mma ndọhọ enye nte: “Oro ọfọn etieti, edi ndidụkke ekọn̄.” Mma ntịn̄ se 2 Timothy 2:3 ọdọhọde nnọ enye nte ke “ndi owoekọn̄ Christ.” Enye ama odop uyo, ekem ọdọhọ, “nyọn̄.”

Ke oro ebede, ke ini n̄kodụkde akamba mbono ke Cincinnati ke Ohio, mma ndụk mbono oro ẹsinịmde ẹnọ mbon emi ẹyomde ndika Bethel. Brọda Milton Henschel ama ọdọhọ nnyịn emi ikodụkde mbono oro ke ẹnen̄ede ẹyom nditọete emi ẹdisịnde idem inam utom ke Bethel. Mma nsịn n̄wed ke n̄kpama ndinam utom ke Bethel, ẹma ẹnyụn̄ ẹkot mi. N̄kọtọn̄ọ utom Bethel ke Brooklyn, ke August 1954, do ke ndu tutu esịm emi.

Mmanam ediwak utom ke Bethel. Ke ediwak isua, ami n̄kesise mban̄a masịn emi esinamde ẹnyene ufiop mmọn̄ ke itie umịn̄n̄wed ye ke mme ọfis. Mma nsidiọn̄ ukwakutom ye ukpọhọde. Mma nsinam utom n̄ko ke Itie Mbono ke New York City.

Ini emi n̄kesisede mban̄a masịn emi esinamde ẹnyene ufiop mmọn̄ ke mme ọfis Bethel Brooklyn

Mmesima akam usenubọk ye Ukpepn̄kpọ Enyọn̄-Ukpeme oro ẹsinịmde ke Bethel, nnyụn̄ mma nditiene esop nnyịn n̄kwọrọ ikọ. Se ubon Mme Ntiense Jehovah ẹkpesinamde edi emi. Ke ini kpukpru owo ke ubon ẹtiede kiet ẹdụn̄ọde N̄wed Abasi kpukpru usen,  ẹnịmde Utuakibuot Ubon kpukpru ini, ẹdụkde ẹnyụn̄ ẹtienede ẹnam n̄kpọ ke mbono esop, ẹnyụn̄ ẹsịnde idem ẹkwọrọ ikọ, kpukpru owo ke ubon oro ẹyenen̄ede ẹkpere Jehovah.

Mmenyene ediwak ufan ke Bethel ye ke esop nnyịn. Ndusụk ẹkedi mbon oro ẹyetde aran, ẹma ẹnyụn̄ ẹdaha heaven. Mbon eken ẹdori enyịn ndidu uwem mi ke isọn̄. Edi kpukpru mme asan̄autom Jehovah ifọnke ima, esịnede nnyịn emi idụn̄de ke Bethel. Ke ini nnyenede mfịna ye eyenete, mmesidomo ndinam emem, nnyụn̄ nnam nte Matthew 5:23, 24 ọdọhọde inam. Imemke ndidọhọ owo “mbọk kûyat esịt,” edi ndikpe owo ubọk esikọk ata ediwak mfịna.

JEHOVAH ỌDIỌN̄ UTOM MI

Usọn̄ iyakke nsan̄a ke ufọk ke ufọk n̄kwọrọ ikọ aba, edi ke nsụk nnanam se n̄kemede. Mmọdiọn̄ọ ndisem Mandarin Chinese ekpri, mmesinyụn̄ nda n̄kwọrọ ikọ nnọ mbon China emi nsikụtde ke efak. Enyene ndusụk usenubọk emi nsinịmde magazine 30 m̀mê 40.

Ndikwọrọ ikọ nnọ mbon China ke Brooklyn ke New York

Mmenyene mfiakn̄ka kiet ke China! Usen kiet, ediye n̄kaiferi kiet ama atuak inua imam ke ini enye ọkọnọde mi ekpri n̄wed emi owụtde ebiet emi enye esinyamde mfri. Mma ntuak inua imam n̄ko nnyụn̄ nsio Enyọn̄-Ukpeme ye Ẹdemede! ke usem Chinese nnọ enye. Enye ama ọbọ mi onyụn̄ ọdọhọ ke imọ ikere Katie. Ọtọn̄ọde ke usen oro, ekesidi enye ama okụt mi, enye asan̄a edineme nneme ye ami. Mma n̄kpep enye nte ẹsikotde mme mfri ye ikọn̄ ke Ikọmbakara. Mma nsikwọrọ ikọ nnọ enye, enye ama onyụn̄ ọbọ mi n̄wed Bible Ekpep. Edi ke urua ifan̄ ẹbede, n̄kekwe enye aba.

Ke ọfiọn̄ ifan̄ ama ekebe, ekpri n̄kaiferi en̄wen ama edinọ mi ekpri n̄wed n̄kpọurua, mma nnọ enye magazine, enye ama ọbọ. Ke urua oro eketienede, enye ama ọnọ mi fon onyụn̄ ọdọhọ ete: “Tịn̄ ikọ ye owo ke China.” Mma ndọhọ enye ke ndiọn̄ọke owo ndomokiet ke China. Edi enye ama osụk eyịre mi, ntre mma mbọ enye fon oro nnyụn̄ ndọhọ, “Hello, n̄kere Robison.” Owo oro ama ọdọhọ ete: “Robby, ami Katie ke edi. Ndu ke China.” Mma mbụp enye nte: “Etịn̄ akpanikọ?” Enye ama ọbọrọ: “Ih. N̄kaiferi oro ọnọde fi fon etịn̄ ikọ ye ami edi eyeneka mi. Mbọk kpep enye kpukpru nti n̄kpọ oro ekesikpepde mi.” Mma ndọhọ enye: “Nyanam se n̄kemede. Sọsọn̄ọ nte anamde mi ndiọn̄ọ ebiet emi odude.” Ke mma n̄kafiak nneme nneme ye eyeneka Katie ini kiet kpọt, n̄kekwe enye aba. Ndiọn̄ọke ebiet emi mmọ mbiba ẹdude idahaemi, edi mben̄e Jehovah an̄wam mmọ ẹdifiọk enye.

Mmanam n̄kpọ Jehovah ke isua 73 idahaemi; mmenen̄ede n̄kọm Abasi nte enye akan̄wamde mi n̄kûdụk ekọn̄, n̄kûnyụn̄ n̄kpọn̄ enye ke ini n̄kodude ke ufọk-n̄kpọkọbi. Nditọeka mi ẹsidọhọ mi ke nte n̄kọsọn̄ọde nda ke ini ete nnyịn ọkọkọbọde mi akan̄wam mmimọ inam n̄kpọ Abasi. Nte ini akakade, eka mi ye nditọeka mi itiokiet ẹma ẹna baptism. Ete mi ama akam etre ndikọbọ nnyịn. Enye ama ọtọn̄ọ ndisidụk mbono esop ndusụk ini mbemiso enye akakpade.

Edieke Abasi amade, enye ayanam mbon mi ye mme ufan mi oro ẹma ẹkekpan̄a ẹset ẹdidu uwem ke obufa ererimbot. Kere nte edinemde nnyịn ndidiana ye mbon nnyịn ntuak ibuot nnọ Jehovah ke nsinsi. *—Se ikọ idakisọn̄.

^ ikp. 32 Brọda Corwin Robison ama akpa ke ini ẹkesụk ẹtịmde mbụk emi. Enye ama ọsọn̄ọ ada ye Jehovah tutu esịm usen emi enye akpade.