Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme (Eke Ukpepn̄kpọ)  |  May 2016

 OTO ITIEUTOM UBON N̄KANI N̄KPỌ NNYỊN

“Mbon Oro Ẹyakde Utom Emi Ẹsịn ke Ubọk”

“Mbon Oro Ẹyakde Utom Emi Ẹsịn ke Ubọk”

KE EDỊM ama ekedep ke ediwak usen, Monday, September 1, 1919, ekedi ata ediye usen. Uwemeyo usen oro, ẹma ẹtọn̄ọ mbono ke Cedar Point, Ohio, U.S.A., ndien n̄kpọ nte owo 1,000 ẹkedu ke ufọkmbono emi owo 2,500 ẹsitiede. Edi etisịm mbubreyo, se ibede owo 2,000 ẹma ẹsan̄a ke ubom, ubomisọn̄, ye tren ẹdisịm. Mme owo ẹma ẹwak ke Tuesday tutu ẹkenịm mbono oro ke an̄wa, ndien mme owo ẹketie ke idak eto.

Sia mmọ ẹketiede ke idak eto, eyo ama odụk itie oro onyụn̄ anam kod emi irenowo ẹkesịnede etie nte lace. Ofụm emi otode Lake Erie ama enyen̄e ntan̄inuen emi ẹketoride ke itam nditọete iban. Eyenete kiet ọkọdọhọ ete: “Kpukpru itie ama odobo, asana, eye. Eketie nte idu ke paradise.”

Itie oro ama eye, edi nditọete nnyịn emi ẹkekamade iso imam imam ẹkeye ẹkan. N̄wedmbụk n̄kpọntịbe kiet ọkọdọhọ ete: “Kpa ye oro mmọ ẹnen̄erede ẹsịn idem ke n̄kpọ Abasi mmọ, kpukpru mmọ ẹma ẹkop inemesịt, ẹkenyụn̄ ẹtie mbre mbre.” Ama enen̄ede enem Nditọ Ukpepn̄kpọ Bible ndidu ye kiet eken ke ẹma ẹkebọhọ ediwak afanikọn̄, utọ nte ubiọn̄ọ ke ini ekọn̄, utọk ke esop, nditre utom ke Bethel Brooklyn, ndikọbi ediwak mmọ ke ntak n̄kpọ Abasi, esịnede nditọete itiaita emi ẹkedade iso ke utom mmọ, emi ẹkebierede n̄kpọkọbi isua 20 ẹnọ. *

Ndusụk Nditọ Ukpepn̄kpọ Bible ẹma ẹtre ndikwọrọ ikọ ke mme isua afanikọn̄ oro. Edi, ata ediwak eken ẹma ẹka iso ẹkwọrọ ikọ kpa ye kpukpru afanikọn̄ oro. Ke uwụtn̄kpọ, owo kiet ọdọhọ ke kpa ye oro ẹkenen̄erede ẹdụri Nditọ Ukpepn̄kpọ Bible utọn̄ ẹte ẹkûkwọrọ ikọ, ndusụk mmọ oro imọ ikenyenede nneme ẹkedọhọ ke mmimọ “iyaka iso ikwọrọ ikọ Abasi tutu esịm utịt.”

Ke ofụri ini afanikọn̄ emi, Nditọ Ukpepn̄kpọ Bible ẹma ẹka iso “ẹyak Ọbọn̄ ada mmọ usụn̄, . . .  ẹnyụn̄ ẹbọn̄ akam kpukpru ini ẹte Ete ada mmimọ usụn̄.” Idahaemi, mmọ ẹma ẹfiak ẹdisobo ye kiet eken ke mbono Cedar Point. Eyenete an̄wan kiet ama ekere se ediwak owo ẹkekerede ẹte m̀mê mmimọ idinam didie ifiak itọn̄ọ ndikwọrọ ikọ. Ama enen̄ede ọdọn̄ mmọ ndifiak ntọn̄ọ ndikwọrọ ikọ.

“GA”—OBUFA N̄KPỌUTOM!

Mbon oro ẹkedụkde mbono oro ẹma ẹkere se  “GA” emi ẹkewetde ke program mbono ye ke kpukpru itie ke an̄wa mbono oro ọwọrọde. Edi ke Friday, “Usen Nsan̄a-Mbonutom,” Joseph F. Rutherford ama anam owo 6,000 oro ẹkedụkde mbono oro ẹfiọk se “GA” ọwọrọde. Enye ọkọdọhọ ke “GA” ada aban̄a The Golden Age (Ini Mfọnọn̄kpọ). Enye edi obufa magazine emi ẹdikamade ikwọrọ ikọ. *

Brọda Rutherford ama ọdọhọ ke ntak emi nditọete esie oro ẹyetde aran ẹnyenede mbuọtidem, ke mmọ “ẹma ẹda ẹkụt ke afanikọn̄ oro ama ebe, ukara Messiah emi edinamde n̄kpọ ọfọn ke edi. . . . Mmọ ẹda ke edi utom mmimọ ye ata n̄kpọ ukpono ndinam ofụri ererimbot ẹdiọn̄ọ ke ini mfọnọn̄kpọ ke edi. Abasi ọdọn̄ mmọ utom enye emi.”

Ẹdida The Golden Age, “Magazine Emi Etịn̄de Akpanikọ Onyụn̄ Ọnọde Idotenyịn,” ẹtọn̄ọ obufa usụn̄ ukwọrọikọ, oro edi, ndisan̄a ke ufọk ke ufọk ndọhọ mme owo ẹtobo magazine emi. Ke ini ẹkebụpde m̀mê owo ifan̄ ẹnyịme ndinam utom emi, kpukpru mbon oro ẹkedụkde mbono oro ẹma ẹnyịme. Ekem mmọ ẹma ẹkwọ “Dọn̄ un̄wana fo ye akpanikọ fo utom, O Ọbọn̄.” Mmọ ẹma ẹkwọ ikwọ emi ye “inemesịt ye ifịk oro ẹdade ẹdiọn̄ọ mbon emi ẹtienede nde ikpat Jesus.” Brọda J. M. Norris ọkọdọhọ ke “ẹma ẹkwọ ikwọ tutu ẹtie nte mme eto ẹmọn̄ ẹduọn̄ọ.”

Ke mbono ama akasuana, nditọete ẹma ẹda ke udịm ke ediwak hour man ẹtiene ẹsịn enyịn̄ nte akpa mbon emi ẹtobode magazine emi. Eketie ediwak owo ke idem nte eketiede Sista Mabel Philbrick, emi ọkọdọhọde ete: “Esịt ama enen̄ede enem nnyịn ndifiọk ke imọn̄ ifiak itọn̄ọ ndikwọrọ ikọ!”

“MBON ORO ẸYAKDE UTOM EMI ẸSỊN KE UBỌK”

N̄kpọ nte Nditọ Ukpepn̄kpọ Bible 7,000 ẹma ẹben̄e idem ndifiak ntọn̄ọ ukwọrọikọ. N̄kpri n̄wed Organization Method ye To Whom the Work Is Entrusted ẹma ẹtịn̄ nte ẹdinamde utom emi: Obufa Itieutom Utịmutom ke ibuot itieutom ẹdise ẹban̄a utom emi. Ẹyemek Kọmiti Utom esop ye eseutom oro edinọde ndausụn̄ nte ẹdinamde utom emi. Ẹyebahade mme efakutom ẹdọn̄ ke ikpehe ke ikpehe, ndien ikpehe kiet kiet edinyene n̄kpọ nte ufọk 150 esịm 200. Ẹyesinịm Esoputom ke mbubreyo Thursday man nditọete ẹnọ ifiọkutom ye ibatutom mmọ.

Brọda Herman Philbrick ọkọdọhọ ete: “Ke ima ikesịm ufọk, kpukpru nnyịn ima itọn̄ọ ndinam mme owo ẹtobo The Golden Age.” Ẹma ẹsikpan̄ utọn̄ ẹnọ mmọ ke ebiet ekededi oro mmọ ẹdụkde. Sista Beulah Covey ọkọdọhọ ete: “Etie nte ekọn̄ ye ọkpọsọn̄ mfụhọ ama anam kpukpru owo ẹyom ini mfọnọn̄kpọ.” Brọda Arthur Claus ọkọdọhọ ete: “Idem ama enen̄ede akpa ofụri owo ke esop ndikụt ediwak owo emi ẹkenyịmede nditobo The Golden Age. Ke ufan̄ ọfiọn̄ iba kpọt ke ẹma ẹketọn̄ọ ndimịn̄ magazine emi, ẹma ẹnịm magazine emi n̄kpọ nte idem 500,000, ndien owo 50,000 ẹkenyịme nditobo enye.

Brọda A. H. Macmillan ọdọhọ ke ibuotikọ emi “Gospel Obio Ubọn̄,” emi okodude ke Enyọn̄-Ukpeme Ikọmbakara eke July 1, 1920, edi akpa ibuotikọ emi esop Abasi ẹkedade ẹdọhọ kpukpru nditọete ke ofụri ererimbot ẹkwọrọ ẹban̄a Obio Ubọn̄ Abasi.” Ibuotikọ oro ama ọdọhọ kpukpru mbon oro ẹyetde aran “ẹnam ererimbot ẹnen̄ede ẹfiọk ke obio ubọn̄ heaven enen̄ede ekpere.” Mfịn, ediwak miliọn owo ẹtiene nditọete Christ, kpa “mbon oro ẹyakde utom emi ẹsịn ke ubọk” ẹsịn ifịk ẹkwọrọ ikọ ke adan̄aemi mmọ ẹtiede ẹbet ukara Messiah emi edinamde n̄kpọ ọfọn.

^ ikp. 5 Se n̄wed oro Jehovah’s WitnessesProclaimers of God’s Kingdom, ibuot 6.

^ ikp. 9 Ẹkedikot The Golden Age, Consolation ke 1937, ekem ẹkot enye Awake! ke 1946.