Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme (Eke Ukpepn̄kpọ)  |  May 2016

Bọ Ufọn Mme N̄kpọ Emi Jehovah Ọnọde Nnyịn

Bọ Ufọn Mme N̄kpọ Emi Jehovah Ọnọde Nnyịn

“Ami Jehovah, ndi Abasi fo, Enye emi ekpepde fi man afo ọbọ ufọn.”—ISA. 48:17.

IKWỌ: 117, 114

1, 2. (a) Mme Ntiense Jehovah ẹda Bible didie? (b) Ewe n̄wed Bible ke afo ama akan?

MME NTIENSE JEHOVAH ẹma Bible etieti. Bible esinọ nnyịn item, ọdọn̄ nnyịn esịt, onyụn̄ ọnọ nnyịn idotenyịn. (Rome 15:4) Nnyịn idaha Bible nte ikọ owo, edi ida enye nte “se enye ke akpanikọ edide, kpa ikọ Abasi.”—1 Thess. 2:13.

2 Kpukpru nnyịn imenyene n̄wed Bible emi imade. Ndusụk owo ẹnen̄ede ẹma mme Gospel, koro mmọ ẹtịn̄ n̄kpọ ẹban̄a Jesus, enye emi anamde nnyịn inen̄ede ifiọk Jehovah. (John 14:9) Mbon en̄wen ẹma mme n̄wed Bible emi ẹdide prọfesi, utọ nte n̄wed Ediyarade emi anamde ifiọk “mme n̄kpọ eke ẹditịbede ke mîbịghike.” (Edi. 1:1) Ndusụk owo ẹsikop ndọn̄esịt ke ini ẹkotde n̄wed Psalm, mbon eken ẹsima ndikot n̄wed Mme N̄ke man ẹbọ nti item. Ke akpanikọ, Bible edi n̄wed ofụri owo.

3, 4. (a) Nnyịn ida didie mme n̄wed nnyịn? (b) Adianade ye mme n̄wed oro ẹwetde ẹnọ kpukpru Mme Ntiense Jehovah, ewe n̄wed en̄wen ke nnyịn inyene?

3 Nnyịn imama mme n̄wed emi isidade ikpep Bible kpa nte imade Bible. Jehovah ọnọ nnyịn kpukpru n̄wed, ndiye n̄kpri n̄wed, magazine, ye mme n̄wed eken oro inyenede ke esop  esie. Mme n̄wed emi ẹn̄wam nnyịn inen̄ede ikpere Jehovah inyụn̄ ‘isọn̄ọ ida ke mbuọtidem.’—Titus 2:2.

4 Adianade ye mme n̄wed emi ẹwetde ẹnọ kpukpru Mme Ntiense Jehovah, enyene ndusụk n̄wed emi ẹwetde san̄asan̄a ẹnọ mme uyen, mme ete ye eka, m̀mê mbon en̄wen. Ẹwet ediwak n̄wed nnyịn ẹnọ mbon oro mîdịghe Mme Ntiense Jehovah ẹnyụn̄ ẹdọn̄ ediwak n̄kpọ ke ikpehe Intanet nnyịn ẹnọ mmọ. Jehovah ndinam nnyịn inyene kpukpru n̄kpọ emi owụt ke enye ‘ọnọ kpukpru owo udia emi enyenede isek,’ kpa nte enye ọkọn̄wọn̄ọde.—Isa. 25:6.

5. Nso ke isinam emi Jehovah enen̄erede ama?

5 Ediwak nnyịn imesikere nte ikpenen̄erede inyene ini itie ikot Bible ye mme n̄wed esop Abasi. Imọfiọk ke Jehovah enen̄ede ama nte ‘isidepde ifet’ itie ikot Bible inyụn̄ ikpepde Ikọ esie ke idem nnyịn kpukpru ini. (Eph. 5:15, 16) Ke nditịn̄ akpanikọ, imesisịn idem ikot ndusụk n̄wed esop Abasi ikan ndusụk. Kpa ye oro, enyene n̄kpọ emi anade inen̄ede ikpeme. Nso idi oro?

6. Nso ke akpana inen̄ede ikpeme?

6 Edieke nnyịn mîkpemeke, imekeme ndikere ke ndusụk itie N̄wed Abasi m̀mê ndusụk n̄wed nnyịn inyeneke ufọn inọ nnyịn. Ke uwụtn̄kpọ, nso ke isinam edieke etiede nte se ikotde ke itie N̄wed Abasi m̀mê se ẹwetde ke n̄wed esop Abasi ibeheke nnyịn? Ndi imesikot n̄kpọ oro enyọn̄ enyọn̄ mîdịghe itetre ndikot? Edieke inamde ntem, ọwọrọ ndusụk n̄kpọ emi ekpenyenede ufọn ọnọ nnyịn ayatak nnyịn. Nso ke ikpanam mbak emi iditịbe? Ikpanaha ifre ke Jehovah ọnọ nnyịn kpukpru se ikotde ke Bible ye n̄wed esop Abasi. Prọfet Isaiah ọkọdọhọ ete: “Ami Jehovah, ndi Abasi fo, Enye emi ekpepde fi man afo ọbọ ufọn.” (Isa. 48:17) Yak ineme n̄kpọ ita emi ẹdin̄wamde nnyịn inen̄ede ibọ ufọn ke ini ikotde itie N̄wed Abasi ekededi ye n̄kpọ ekededi oro esop Abasi ẹwetde.

SE IDIN̄WAMDE FI ENEN̄EDE ỌBỌ UFỌN KE INI OKOTDE BIBLE

7. Ntak emi ikpokotde Bible ke ofụri esịt?

7 Kot Bible ke ofụri esịt. Bible ọdọhọ ke “Abasi ọkọnọ odudu spirit ẹda ẹwet ofụri N̄wed Abasi.” (2 Tim. 3:16) Edi akpanikọ ke ẹkewet ndusụk itie Bible ẹnọ owo kiet m̀mê otuowo. Ntak edi oro ọfọnde ikot Bible ke ofụri esịt. Eyenete kiet ọdọhọ ete: “Ke ini n̄kotde Bible, mmesiti ke mmekeme ndikpep ediwak n̄kpọ ke itie oro n̄kotde.” Enye adian do ete: “Emi esinam nnen̄ede ntịn̄ enyịn nyom mme akpan n̄kpọ emi owo mîsisọpke ikụt ke itien̄wed emi n̄kotde.” Ọyọfọn ibọn̄ akam iben̄e Jehovah ite anam nnyịn ikot Ikọ esie ke ofụri esịt onyụn̄ ọnọ nnyịn ọniọn̄ man ikeme ndikpep se enye oyomde nnyịn ikpep.—Ezra 7:10; kot James 1:5.

Ndi afo emesinen̄ede ọbọ ufọn ke ini okotde Bible? (See Se ikpehe 7)

8, 9. (a) Nso mbụme ke ikpobụp idem nnyịn ke ini ikotde Bible? (b) Nso ke 1 Timothy 3:2-7 ekpep nnyịn aban̄a Jehovah?

8 Bụp mbụme. Ke ini okotde Bible, tuak da bụp idemfo ete: ‘Nso ke emi ekpep mi aban̄a Jehovah? Didie ke n̄keme ndinam se n̄kotde emi? Didie ke n̄keme ndida se n̄kotde emi n̄n̄wam mbon en̄wen?’ Edieke ibụpde idem nnyịn utọ mbụme emi ke ini ikotde Bible, iyekeme ndikpep ediwak n̄kpọ. Ke uwụtn̄kpọ, kere ban̄a mme n̄kpọ oro N̄wed Abasi ọdọhọde erenowo anam man odot ndidi ebiowo. (Kot 1 Timothy 3:2-7.) Ediwak nnyịn emi mîdịghe mbiowo imekeme ndikere ke itie N̄wed Abasi enye emi ibeheke nnyịn. Edi, yak ise nte mbụme ita  oro ibụpde ke ikpehe emi ẹkemede ndin̄wam nnyịn ikụt ke se ẹdọhọde irenowo ẹnam man ẹdot ndidi mbiowo ebehe kpukpru nnyịn n̄ko.

9 Nso ke emi ekpep mi aban̄a Jehovah? Jehovah nditịn̄ se anade erenowo anam man odot ndidi ebiowo owụt ke enye oyom mbon oro ẹmekde ndidi mbiowo ẹnen̄ede ẹdot mbemiso ẹmekde mmọ. Enye oyom mmọ ẹnịm nti uwụtn̄kpọ, enye oyonyụn̄ okot mmọ ẹdinam ibat ẹban̄a nte mmọ ẹnamde n̄kpọ ye esop “emi enye ekedepde ke iyịp Eyen esie.” (Utom 20:28) Jehovah oyom nnyịn idiọn̄ọ ke imọ iyak nnyịn isịn ke ubọk mbon emi ẹdikemede ndise mban̄a nnyịn. (Isa. 32:1, 2) Ke ini ikotde 1 Timothy 3:2-7, imesikụt ke Jehovah enen̄ede ama nnyịn.

10, 11. (a) Didie ke ikeme ndinam se ikotde ke 1 Timothy 3:2-7? (b) Didie ke ikeme ndida se ikotde ke itien̄wed emi n̄n̄wam mbon en̄wen?

10 Didie ke n̄keme ndinam se n̄kotde emi? Edieke afo edide ebiowo, ọfọn esida 1 Timothy 3:2-7 odụn̄ọde idemfo ke ini ke ini man ese m̀mê ke ananam mme n̄kpọ oro ẹtịn̄de do? Ọyọfọn eyenete emi “anyanarede ebịne itieutom esenyịn” okụt ete ke imodomo ofụri ukeme imọ ndinam se ẹtịn̄de emi. (1 Tim. 3:1) Kpukpru nnyịn imekeme ndinam se ẹdọhọde irenowo ẹnam man ẹdot ndidi mbiowo, sia ediwak n̄kpọ emi ẹsiakde do onyụn̄ edi se Jehovah oyomde kpukpru ikọt esie ẹnam. Ke uwụtn̄kpọ, akpana kpukpru nnyịn inyene eti ibuot ikûnyụn̄ ima okụk. (Phil. 4:5; Heb. 13:5) Ke ini mbiowo ẹdide “uwụtn̄kpọ ẹnọ otuerọn̄,” emi ayanam nnyịn emi idide erọn̄ ‘ikpebe mbuọtidem mmọ.’—1 Pet. 5:3; Heb. 13:7.

11 Didie ke n̄keme ndida se n̄kotde emi n̄n̄wam mbon en̄wen? Imekeme ndida mme n̄kpọ oro ẹnamde owo odot ndidi ebiowo n̄n̄wam owo oro ọtọn̄ọde-tọn̄ọ ndidụk mbono esop m̀mê eyen ukpepn̄kpọ nnyịn okụt nte mbiowo Mme Ntiense Jehovah ẹkpụhọrede ye mme ọkwọrọ ederi ufọkabasi. Ke ini ikotde mme n̄kpọ oro ẹnamde owo odot ndidi ebiowo, imesikụt ke utom oro mbiowo esop nnyịn ẹsinamde ẹnọ nnyịn idịghe ekpri. Emi esinam nnyịn inen̄ede ikpono mmọ ke ntak ọkpọsọn̄ utom oro mmọ ẹnamde  ẹnọ nnyịn. (1 Thess. 5:12) Nte nnyịn ikponode mmọ, ntre n̄ko ke esịt esitetịm enem mmọ.—Heb. 13:17.

12, 13. (a) Nso ke ikeme ndidụn̄ọde? (b) Nọ uwụtn̄kpọ nte ndinam ndụn̄ọde ekemede ndin̄wam nnyịn.

12 Nam ndụn̄ọde. Imekeme ndida mme n̄kpọ oro esop Abasi ẹsiode, emi ẹsidade ẹnam ndụn̄ọde, idụn̄ọde mme n̄kpọ nte:

  • Anie ekewet n̄wed Bible emi?

  • Ẹkewet ke m̀mọ̀n̄, ẹkenyụn̄ ẹwet ini ewe?

  • Nso akpan n̄kpọ iketịbe ke ini ẹkewetde n̄wed Bible emi?

Utọ ndụn̄ọde emi ekeme ndin̄wam nnyịn ikpep mme akpan n̄kpọ emi owo mîsisọpke ikụt ke ini ẹkotde Bible.

13 Ke uwụtn̄kpọ, Ezekiel 14:13, 14 ọdọhọ ete: “Edieke isọn̄ anamde idiọkn̄kpọ edue mi ke enye nditre ndinam akpanikọ, ami n̄ko nyanyanade ubọk mi n̄n̄wana ye enye nnyụn̄ mbụn̄ mme eto emi ẹyịride ekara uyo nnọ enye, ndien nyọdọn̄ akan̄ utom nnọ enye nnyụn̄ nsịbe owo ye ufene mfep ke enye. ‘Ndien edieke owo mbita emi, Noah, Daniel ye Job, ẹkpedude ke esịt esie, mmọ ẹkpenyan̄a ukpọn̄ mmọ ke ntak edinen ido mmọ,’ uyo Jehovah Akakan Ọbọn̄ Andikara edi emi.” Edieke inamde ndụn̄ọde, iyokụt ke ẹkewet itien̄wed emi ke n̄kpọ nte isua 612 mbemiso Christ akamanade. Ke ini Abasi eketịn̄de ikọ emi, Noah ye Job ẹma ẹkpan̄a ata ediwak isua ke edem, edi Abasi ikefreke mmọ. Edi Daniel okosụk ododu ke uwem. Etie nte enye ekedi n̄kpọ nte isua 20 ke ini Abasi ọkọdọhọde ke enye ekedi edinen owo kpa nte Noah ye Job. Nso ke emi ekpep nnyịn? Jehovah esikụt onyụn̄ ama se kpukpru ikọt esie ẹnamde ẹnọ enye, esịnede se mme uyen ẹnamde.—Ps. 148:12-14.

KOT NSIO NSIO N̄WED NNYỊN MAN ENEN̄EDE ỌBỌ UFỌN

14. Didie ke mme n̄wed oro ẹwetde ẹnọ mme uyen an̄wam mmọ, ndien nso ufọn ke mbon en̄wen ẹkeme ndibọ edieke ẹkotde mme n̄wed emi? (Se akpa ndise ibuotikọ emi.)

14 Kpa nte ofụri Bible enyenede ufọn ọnọ nnyịn, ntre n̄ko ke kpukpru se esop Abasi ẹsiode ẹnyene ufọn. Yak ineme uwụtn̄kpọ ifan̄. Mme n̄wed emi ẹwetde ẹnọ mme uyen. Ke mme isua ndondo emi, ẹwet ediwak n̄wed ẹnọ mme uyen. [1] Ẹwet ndusụk n̄wed emi man an̄wam mmọ ẹkọk mme mfịna emi mmọ ẹsinyenede ke ufọkn̄wed, m̀mê mbon oro mmọ ẹsinyenede ke ini mmọ ẹtọn̄ọde ndidụk akwaowo. Nso ufọn ke kpukpru nnyịn ikeme ndibọ edieke ikotde mme n̄wed emi? Ke ini ikotde mme n̄wed emi, iyọfiọk mme n̄kpọ oro mme uyen ẹsisobode, ndien emi ayanam nnyịn idiọn̄ọ nte ikpan̄wamde inyụn̄ isọn̄ọ mmọ idem.

15. Ntak emi ikpọ owo ẹkpekotde mme n̄wed oro ẹwetde ẹnọ mme uyen?

15 Idịghe mme uyen kpọt ẹsisobo mme mfịna oro ẹsinemede ke mme n̄wed oro ẹwetde ẹnọ mmọ. Ke uwụtn̄kpọ, ana kpukpru nnyịn inam mme owo ẹfiọk se inịmde ke akpanikọ, ikûdụk idiọk nsan̄a, ikûda oburobụt n̄kpọ inem idem nnyịn esịt, isịn nditiene mme ufan nnyịn nnam n̄kpọ emi mîfọnke, inyụn̄ ikpep ndimụm idem n̄kama ke ini ẹnamde se iyatde nnyịn. Ẹneme mme n̄kpọ emi ye ediwak n̄kpọ eken ke mme n̄wed oro ẹwetde ẹnọ mme uyen. Ndi akpana ikpọ owo ẹkere ke ufọn idụhe ndikot mme n̄wed emi? Baba! Kpa ye oro ẹwetde mme n̄wed emi ẹnọ mme uyen, kpukpru nnyịn imekeme ndibọ ufọn ke ini ikotde mmọ, sia mmọ ẹdi n̄wed Ikọ Abasi.

16. Nso n̄kpọ en̄wen ke mme n̄wed nnyịn ẹsin̄wam mme uyen ẹnam?

 16 Mme n̄wed emi in̄wamke mme uyen ndikọk mfịna mmọ kpọt, edi ẹsin̄wam mmọ ẹsọn̄ idem ke esop ẹnyụn̄ ẹtetịm ẹkpere Jehovah. (Kot Ecclesiastes 12:1, 13.) Mme n̄wed emi ẹkeme ndin̄wam ikpọ owo ẹnam emi n̄ko. Ke uwụtn̄kpọ, Ẹdemede! Ikọmbakara eke April 2009 ama enyene ibuotikọ emi, “N̄kparawa Owo Ẹbụp . . . Nso ke N̄kpanam Man Enem Mi Ndisikot Bible?” Ibuotikọ emi ama etịn̄ se ẹkpenamde, onyụn̄ enyene ekebe emi ẹkemede ndisịbe nsio nsịn ke Bible man an̄wam owo ke ini okotde Bible. Ndi ikpọ owo ẹma ẹbọ ufọn ibuotikọ emi? N̄wanndọ emi enyenede nditọ ọkọdọhọ ete: “Ama esisọn̄ mi ndikot Bible. Edi mma nnam se ẹketịn̄de ke ibuotikọ emi ye ekebe oro n̄kesịbede nsio. Idahaemi edinenem mi ndikot Bible. Mmedikụt ke mme n̄wed Bible idịghe ẹtetịn̄ ẹsịn ẹtetịn̄ osio, kpukpru mmọ ẹtịn̄ ukem n̄kpọ. Etie nte nsa emi ẹsitan̄de nsio nsio n̄kpri ndise ẹdian tutu ẹnyene ofụri ndise. Idahaemi ndien ke enen̄ede enem mi ndikot Bible.”

17, 18. Nso ufọn ke idibọ edieke ikotde mme n̄kpọ emi ẹwetde ẹnọ mbon an̄wa? Nọ uwụtn̄kpọ.

17 Se ẹwetde ẹnọ mbon an̄wa. Ẹketọn̄ọ ndisio Enyọn̄-Ukpeme eke ukpepn̄kpọ ke 2008. Ẹkesio Enyọn̄-Ukpeme emi ẹnọ Mme Ntiense Jehovah. Edi nso kaban̄a mme magazine nnyịn emi ẹwetde ẹnọ mbon an̄wa? Nso ufọn ke nnyịn ikeme ndibọ edieke ikotde mme magazine emi? Ke uwụtn̄kpọ: Esịt esinen̄ede enem nnyịn ndikụt owo emi nnyịn ikokotde edi Ufọkmbono Obio Ubọn̄ edikop utịn̄ikọ. Nte utịn̄ikọ osụk akade iso, nnyịn imesikop inemesịt ke ẹneme n̄kpọ oro ebehede enye, emi onyụn̄ ekemede ndinam enye okpụhọde. Kpa ye oro utịn̄ikọ oro ebehede mbon an̄wa, nnyịn imesikpep n̄kpọ ito se ẹnemede oro.

18 Imekeme ndibọ ufọn n̄ko edieke ikotde mme n̄wed oro ẹwetde ẹnọ mbon an̄wa. Ke uwụtn̄kpọ, Enyọn̄-Ukpeme ofụri owo esineme mme ibuotikọ Bible ke usụn̄ oro esinen̄erede an̄wan̄a mbon oro mîdịghe Mme Ntiense Jehovah. Kpasụk ntre ke edi ye mme ibuotikọ oro ẹdude ke jw.org/efi, utọ nte mbon oro ẹnemede ke ikpehe oro ẹkotde “Mme Mbụme Bible Oro Ẹbọrọde” ye “Mme Mbụme Ẹbụpde Ẹkan.” Ke ini ikotde mme ibuotikọ emi, mme n̄kpọ oro ima ikọfọfiọk esinen̄ede an̄wan̄a nnyịn. Ke adianade do, imesikpep mbufa usụn̄ oro ikemede ndinam se inịmde an̄wan̄a mbon en̄wen ke ini ikwọrọde ikọ. Kpasụk ntre, Ẹdemede! esinam nnyịn itetịm inịm ke ata Abasi odu, onyụn̄ an̄wam nnyịn ifiọk nte ikpanamde mme owo ẹdiọn̄ọ se inịmde ke akpanikọ.—Kot 1 Peter 3:15.

19. Didie ke ikeme ndiwụt ke imadara kpukpru se Jehovah ọnọde nnyịn?

19 Kpukpru se inemede emi owụt ke Jehovah ọnọ nnyịn ediwak n̄kpọ oro ẹkemede ndin̄wam nnyịn ika iso ikpono enye. (Matt. 5:3) Ẹyak ika iso ikot Ikọ esie ye kpukpru n̄wed oro esop esie ẹsiode. Edieke inamde emi, iwụt ke imadara kpukpru se Jehovah, kpa Enye emi ekpepde nnyịn man ibọ ufọn, ọnọde nnyịn.—Isa. 48:17.

^ [1] (ikpehe 14) Mme n̄wed emi esịne Mme Mbụme Oro N̄kparawa Owo Ẹbụpde—Mme Ibọrọ Oro Ẹnyenede Ufọn, Eboho 1 ye 2, ye se ẹsinemede ke ibuotikọ oro “N̄kparawa Owo Ẹbụp,” emi odude ke jw.org/efi.