Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) JUNE 2016

Owo oro akamade nnụk mmọn̄n̄wed ewetn̄wed ada aban̄a Jesus Christ. Enye enịm mbon emi ẹdibọhọde idiọn̄ọ

Mme Mbụme Oro Mme Andikot Ẹbụpde

Mme Mbụme Oro Mme Andikot Ẹbụpde

Mmanie ke owo emi akamade nnụk mmọn̄n̄wed ewetn̄wed ye owo itiokiet emi ẹkamade n̄kpọekọn̄ ke ubọk ndida nnuak, emi Ezekiel okokụtde ke n̄kukụt ẹda ẹban̄a?

Mmọ ẹda ẹban̄a mme angel emi Abasi akadade osobo Jerusalem, emi enye edinyụn̄ adade osobo idiọk ererimbot Satan ke ekọn̄ Armageddon. Ntak emi idọhọde ntem idahaemi?

Ke Ezekiel ama okokụt mbubiam n̄kpọ emi ẹnamde ke Jerusalem mbemiso ẹkesobode obio oro ke isua 607 mbemiso eyo Christ, Abasi ama owụt enye mme n̄kpọ oro ẹditịbede mbemiso ẹsobode obio oro. Enye ama okụt irenowo itiokiet emi ẹkamade n̄kpọekọn̄ ndida nnuak, onyụn̄ okụt owo emi “esịnede linen,” oro akamade “nnụk mmọn̄n̄wed ewetn̄wed.” (Ezek. 8:6-12; 9:2, 3) Ẹma ẹdọhọ owo emi esịnede linen asan̄a ke obio “[enịm] idiọn̄ọ ke ọkpọiso mbon oro ẹsemede ẹnyụn̄ ẹtuan̄ade ẹban̄a kpukpru mbubiam n̄kpọ oro ẹnamde ke esịt esie.” Ekem ẹma ẹdọhọ irenowo itiokiet oro ẹkamade n̄kpọekọn̄ ke ubọk ndida nnuak ẹte ẹwot kpukpru mbon emi mînyeneke idiọn̄ọ ke ọkpọiso mmọ. (Ezek. 9:4-7) Nso ke n̄kukụt emi ekpep nnyịn, ndien anie edi owo emi akamade nnụk mmọn̄n̄wed ewetn̄wed?

Abasi okowụt Ezekiel n̄kukụt emi ke isua 612 mbemiso eyo Christ, ndien akpa ini emi n̄kukụt emi okosude ekedi ke isua ition ama ekebe, ke ini mbonekọn̄ Babylon ẹkesobode Jerusalem. Kpa ye oro edide mme okpono ndem ẹkesobo Jerusalem, Jehovah akanam mmọ ẹsobo obio oro. (Jer. 25:9, 15-18) Jehovah akayak mmọ ẹsobo Jerusalem ke ntak emi ikọt esie ẹkesọn̄de ibuot ye enye. Edi enye ikayakke ẹwot mme owo ntịme ntịme. Enye ama anyan̄a mme Jew emi ẹkesuade mbubiam n̄kpọ emi ẹkenamde ke obio oro.

Ezekiel iketieneke inịm mme owo idiọn̄ọ, ikonyụn̄ itieneke isobo mme owo. Mme angel ẹkewot mbon emi mîkenyeneke idiọn̄ọ ke ọkpọiso. N̄kukụt emi anam nnyịn ifiọk se iketịbede ke heaven. Jehovah ama ọdọn̄ mme angel esie ẹbahade nti owo ye ndiọi owo ẹnyụn̄ ẹsobo ndiọi owo. *

Akpa, ikesidọhọ ke owo emi akamade nnụk mmọn̄n̄wed ewetn̄wed ada aban̄a mme Christian oro ẹyetde aran emi ẹsụk ẹdude ke isọn̄ mfịn. Ikesinịm ke mbon emi ẹkopde etop nnyịn ẹnyụn̄ ẹnamde se mmọ ẹkopde, ke ẹnịm idiọn̄ọ. Edi, imedikụt ke se ikenịmde oro inenke. Se Matthew 25:31-33 etịn̄de owụt ke Jesus edibiere ikpe inọ mme owo. Jesus edibiere ikpe ke ini akwa ukụt. Ini oro ke enye edibahade mbon emi ẹdide erọn̄ ye mbon emi ẹdide ebot. Enye ayanyan̄a mbon emi ẹdide erọn̄ onyụn̄ osobo mbon emi ẹdide ebot.

Nso ke n̄kukụt Ezekiel emi ekpep nnyịn idahaemi inen̄erede ifiọk se enye ọwọrọde mi? N̄kukụt emi ekpep nnyịn ke nsụhọde n̄kaha n̄kpọ ition:

  1. Ke ini ẹkeyomde ndisobo Jerusalem, Ezekiel ye Jeremiah ẹkedi mbon ukpeme ẹnọ nditọ Israel kpa nte Isaiah ekedide. Mfịn, Jehovah ada ekpri otu mme Christian oro ẹyetde aran ọbọk ikọt esie onyụn̄ ada mmọ anam mme owo ẹfiọk ke akwa ukụt ọmọn̄ ọtọtọn̄ọ. Kpukpru ikọt Abasi ẹnyụn̄ ẹtiene mmọ ẹnam mme owo ẹfiọk emi n̄ko.—Matt. 24:45-47.

  2. Idịghe Ezekiel ekenịm mbon emi ẹkebọhọde ke eyo esie idiọn̄ọ, kpasụk ntre n̄ko, idịghe ikọt Jehovah ẹdinịm mbon oro ẹdibọhọde ke  eyo nnyịn idiọn̄ọ. Utom ikọt Jehovah edi ndikwọrọ ikọ nnọ mme owo. Mme angel Abasi ẹda mmọ usụn̄ ke utom emi.—Edi. 14:6.

  3. Owo ikenịmke mme owo ata ata idiọn̄ọ ke ọkpọiso ke eyo Ezekiel, kpasụk ntre ke onyụn̄ edi mfịn. Edi, nso ke owo akpanam man ẹkpenịm enye ndamban̄a idiọn̄ọ man ẹkpenyan̄a enye? Ana owo oro ama etop Obio Ubọn̄ emi ikwọrọde, okpụhọde odu uwem nte Jehovah oyomde, ayak idemesie ọnọ Jehovah, onyụn̄ enen̄ede an̄wam nditọete Christ. (Matt. 25:35-40) Ẹyenịm mbon oro ẹnamde kpukpru n̄kpọ emi idiọn̄ọ ke ini akwa ukụt.

  4. Kpa nte owo oro akamade nnụk mmọn̄n̄wed ewetn̄wed ekenịmde mbon oro ẹdibọhọde idiọn̄ọ, Jesus Christ edinịm mbon emi ẹdibọhọde idiọn̄ọ. Jesus Christ edinịm akwa otuowo idiọn̄ọ ke ini akwa ukụt, ke enye ama ekebiere ke mmọ ẹdi erọn̄. Mbon emi Enye edinịmde idiọn̄ọ ẹyenyene ifet ndidu uwem ke nsinsi ke isọn̄.—Matt. 25:34, 46. *

  5. Irenowo itiokiet emi ẹkamade n̄kpọekọn̄ ẹda ẹban̄a mme angel emi Jesus edidade idisobo idiọk ererimbot emi ke mîbịghike.—Ezek. 9:2, 6, 7; Edi. 19:11-21.

Se ikpepde emi anam nnyịn inen̄ede inịm ke Jehovah isidianke nti owo ye mme idiọkowo isobo. (2 Pet. 2:9; 3:9) Imonyụn̄ ikpep n̄ko ke ukwọrọikọ edi ata akpan utom oro anade inam idahaemi. Ana inam mme owo ẹfiọk se Jehovah aduakde ndinam mbemiso utịt edide.—Matt. 24:14.

^ ikp. 6 Kpa ye oro owo mîkenịmke owo ndomokiet ata ata idiọn̄ọ ke ọkpọiso, ẹma ẹnyan̄a Baruch (ewetn̄wed Jeremiah), Ebed-melech owo Ethiopia, ye nditọ Rechab. (Jer. 35:1-19; 39:15-18; 45:1-5) Abasi ama anam ẹnịm mmọ ndamban̄a idiọn̄ọ man ẹkpenyan̄a mmọ.

^ ikp. 12 Owo idinịmke mme Christian emi ẹyetde aran ukem idiọn̄ọ emi ẹdinịmde akwa otuowo. Utu ke oro, ẹdifịk mmọ akpatre idiọn̄ọ mbemiso mmọ ẹkpade mîdịghe mbemiso akwa ukụt ọtọn̄ọde.—Edi. 7:1, 3.