Ata ediwak owo ẹsikot Abasi Ọbọn̄, Nsinsi Ete, Allah, m̀mê Abasi. Edi Abasi enyene enyịn̄. Ndi odot ikot enyịn̄ emi?

Abasi ekere didie?

SE NDUSỤK OWO ẸDỌHỌDE

 

Ediwak mbon oro ẹdọhọde ke idi mme Christian ẹdọhọ ke Abasi ekere Jesus. Ndusụk owo ẹdọhọ ke ufọn idụhe ndikot Abasi ke enyịn̄ sia enye ikpọn̄ edi Ata Ọkpọsọn̄ Abasi. Mbon en̄wen ẹkere ke idotke-dot owo ndomokiet ndikot Abasi ke enyịn̄.

SE BIBLE ỌDỌHỌDE

 

Ata Ọkpọsọn̄ Abasi ikereke Jesus sia idịghe Jesus edi Abasi. Jesus ọkọdọhọ mbet esie ẹsibọn̄ akam ẹnọ Abasi ntem: “Ete, yak ẹnam enyịn̄ fo asana.” (Luke 11:2) Enye ke idemesie ọkọbọn̄ akam ọnọ Abasi ete: “Ete, nọ enyịn̄ fo ubọn̄.”—John 12:28.

Abasi ọdọhọ ke Isaiah 42:8 ete: “Ami ndi Jehovah. Enyịn̄ mi edi oro; ndinọhọ baba owo kiet ubọn̄ mi.” Jehovah edi enyịn̄ emi ẹkabarede ẹto abisi Hebrew inan̄ emi YHWH, ndien abisi emi ada aban̄a enyịn̄ Abasi. Enyịn̄ Abasi odu n̄kpọ nte itie 7,000 ke N̄wed Abasi Usem Hebrew, emi ndusụk owo ẹsikotde Akani Testament. * Enyịn̄ emi awak akan udori-enyịn̄ ekededi emi odude ke Bible, utọ nte, “Abasi,” “Ata Ọkpọsọn̄,” m̀mê “Ọbọn̄,” onyụn̄ awak akan enyịn̄ efen ekededi ke Bible, utọ nte Abraham, Moses, ye David.

Idụhe itie ndomokiet ke Bible emi Jehovah ọdọhọde ke imọ imaha ẹkot imọ ke enyịn̄. Utu ke oro, N̄wed Abasi owụt ke ikọt Abasi ẹma ẹsikot enyịn̄ Abasi. Enyịn̄ Abasi ama esịne ke ndusụk enyịn̄ emi mmọ ẹkesisiode nditọ mmọ, utọ nte Elijah, emi ọwọrọde “Jehovah Edi Abasi Mi,” ye Zechariah, emi ọwọrọde “Jehovah Eti.” Mmọ ẹma ẹsinyụn̄ ẹkot enyịn̄ Abasi ke ini ẹnemede nneme ke usen ke usen.—Ruth 2:4.

Abasi oyom nnyịn isikot enyịn̄ imọ. Bible ọdọhọ isikọm Jehovah inyụn̄ iseme ikot enyịn̄ esie. (Psalm 105:1) Esịt esikam enenem Abasi ke ini enye okụtde mbon oro “ẹkerede ẹban̄a enyịn̄ esie.”—Malachi 3:16.

“Man mme owo ẹkpefiọk ẹte ke afo, emi enyịn̄ fo edide Jehovah, afo ikpọn̄ edi Ata Edikon̄ ke ofụri isọn̄.”—Psalm 83:18.

 Nso ke enyịn̄ Abasi ọwọrọ?

Ndusụk ntaifiọk emi ẹsinamde ndụn̄ọde ẹban̄a Bible ẹdọhọ ke enyịn̄ oro Jehovah ke usem Hebrew ọwọrọ “Enye Anam Akabade Edi.” Emi ọwọrọ ke Jehovah ekeme ndikabade ndi se ededi oro enye oyomde mîdịghe anam owo m̀mê n̄kpọ emi enye okobotde akabade edi se ededi oro enye oyomde man uduak esie osu. Ntre, Abasi emi okobotde kpukpru n̄kpọ ikpọn̄ odot ndikere Jehovah.

SE ENYỊN̄ ABASI EKEMEDE NDINAM NNỌ FI

 

Edieke ọfiọkde enyịn̄ Abasi, ọyọdiọn̄ọ nte akpadade enye. Eyemem fi utom ndisan̄a n̄kpere enye sia owo ikemeke ndikpere owo emi enye mîdiọn̄ọke enyịn̄. Ntre, Abasi ndinam ọfiọk enyịn̄ esie owụt ke enye oyom asan̄a ekpere imọ.—James 4:8.

Nịm ke Jehovah iditreke ndinam se ededi oro enye ọn̄wọn̄ọde ke ntak enyịn̄ esie. Ntak edi oro Bible ọdọhọde ete: “Mmọ eke ẹfiọkde enyịn̄ fo ẹyebuọt idem ye afo.” (Psalm 9:10) Afo ọyọbuọt idem ye Jehovah ke ini okụtde ke mme edu esie, utọ nte ima, mbọm, ye mfọnido ẹsinam enye anam se ededi oro enye anamde. (Exodus 34:5-7) Enem nnyịn ndifiọk ke Jehovah oyosu kpukpru se enye ọn̄wọn̄ọde ye nte ke enye idinamke n̄kpọ ekededi emi edinamde ọsọn̄ ndikụt nti edu esie.

Kpukpru se inemede emi owụt ke edi n̄kpọ ukpono ndifiọk enyịn̄ Ata Ọkpọsọn̄ Abasi. Ndifiọk enyịn̄ esie ekeme ndinam n̄kpọ ọfọn ye afo idahaemi onyụn̄ anam odu uwem ke nsinsi. Abasi ọdọhọ ete: “Ami nyekpeme enye koro enye ọfiọkde enyịn̄ mi.”—Psalm 91:14.

“Kpukpru owo eke ẹsemede ẹkot enyịn̄ Jehovah ẹyebọhọ.”—Joel 2:32.

Nte ẹwetde enyịn̄ Abasi ke nsio nsio usem

^ ikp. 9 Ẹsio enyịn̄ Abasi ẹfep ke ediwak Bible, ẹnyụn̄ ẹwet “ỌBỌN̄” ke ikpọ abisi ke mme itie emi ẹkpesịnde enyịn̄ Abasi. Ẹsịn enyịn̄ Abasi ke itie ifan̄ kpọt ke ndusụk Bible mîdịghe ẹsịn ke ikọ idakisọn̄. Edi ẹsịn enyịn̄ Abasi ke kpukpru itie oro enye okpodude ke Edisana N̄wed Abasi—Edikabade Eke Obufa Ererimbot.