Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Ẹdemede!  |  No. 6 2017

Se ntaifiọk ẹtịn̄de ẹban̄a N̄kanika Usen Nsobo iditịbeke sia Abasi ọn̄wọn̄ọ ndidiọn̄ isọn̄ emi nnyụn̄ nnam mme owo ẹdụn̄ ke esịt ke nsinsi

 IBUOTIKỌ MAGAZINE EMI | NDI ERERIMBOT EMI ABIARA AMA?

Bible Ọdọhọ Didie?

Bible Ọdọhọ Didie?

ATA ediwak isua ko ke edem, Bible ama etịn̄ nte n̄kpọ editiede ke ererimbot ke eyo nnyịn emi. Bible ama onyụn̄ etịn̄ nti n̄kpọ emi Abasi edinamde inọ mme owo ke ini iso. Ikpanaha ida se Bible etịn̄de didie didie sia ediwak n̄kpọ emi enye etịn̄de ososu.

Ke uwụtn̄kpọ, se ndusụk n̄kpọ emi Bible ọkọdọhọde ke ẹyetịbe ke eyo nnyịn emi:

  • “Idụt ayadaha an̄wana ye idụt, obio ubọn̄ kiet oyonyụn̄ adaha an̄wana ye obio ubọn̄ en̄wen, ndien akan̄ ye unyekisọn̄ ẹyedu ke nsio nsio ebiet.”—Matthew 24:7.

  • “Edi fiọk emi, ete ndiọkeyo emi ọsọn̄de ndiyọ oyodu ke mme akpatre usen. Koro mme owo ẹyedi mme ama idem, mme ama okụk, ẹtan̄ idem, ẹseri iseri, ẹsụn̄i isụn̄i, ẹsọn̄ ibuot ye ete ye eka, ẹnana esịtekọm, inyeneke nsọn̄ọnda, inyeneke ndammana ima, inyịmeke ndidụk ediomi ekededi, mbon edidọk, ẹnana mfara ke idem, ẹtie obom obom, imaha eti ido, mme andida owo nnọ, ẹsọn̄ ibuot, ẹkohode idem, ẹma unọ idem inemesịt utu ke ndima Abasi.”—2 Timothy 3:1-4.

Mme prọfesi oro ẹwụt nte ererimbot nnyịn edidiọkde iketre, ntak edi oro ndusụk owo ẹkerede ke ererimbot emi abiara ama. Ke akpanikọ, mfịna ererimbot emi akan mme owo ubọk. Bible ọdọhọ ke idụhe owo emi enyenede ifiọk m̀mê odudu ekem ndikọk mfịna ererimbot emi. Mme itie N̄wed Abasi emi ẹwụt ke emi edi akpanikọ:

  • “Enyene usụn̄ eke enende owo ke enyịn, edi utịt esie edi usụn̄ n̄kpa.”—Mme N̄ke 14:12.

  • “Owo [akara] owo tutu ọnọ enye unan.”—Ecclesiastes 8:9.

  • “Isịneke ke ubọk owo . . . ndinen̄ede ikpatisan̄ esiemmọ.”—Jeremiah 10:23.

Edieke ẹyakde mme owo ẹka iso ẹnam se mmọ ẹmade, ererimbot nnyịn emi akpabiara ofụri ofụri. Edi oro iditịbeke! Ntak-a? Se se Bible etịn̄de mi:

  • Abasi “owụk isọn̄ ke itie esie; idisehekede tutu amama, m̀mê ke nsinsi.”—Psalm 104:5.

  • “Emana kiet ebe, emana efen onyụn̄ edi; edi isọn̄ ada ke nsinsi.”—Ecclesiastes 1:4.

  • “Ndinen owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.”—Psalm 37:29.

  • “Uwak n̄kpasịp ẹyedu ke isọn̄; ọyọyọhọ ọduọhọ ke mme enyọn̄ obot.”—Psalm 72:16.

 Se Bible ekpepde emi anam nnyịn idiọn̄ọ ke ererimbot nnyịn emi idibiarake ofụri ofụri. Mme owo idikpaha ima ke ntak emi ẹsabarede isọn̄, ofụm, ye mmọn̄, ke ntak emi udia ye eti mmọn̄ mîdụhe, m̀mê ke ntak idiọk udọn̄ọ. Owo idinyụn̄ idaha bọmb isobo ofụri ererimbot ifep. Ntak-a? Sia Abasi idiyakke emi etịbe. Imọdiọn̄ọ ke Abasi ayak mme owo ẹnam se mmọ ẹmama. Edi mmọ ẹyebọ utịp n̄kpọ ekededi oro mmọ ẹnamde. (Galatia 6:7) Ererimbot emi itiehe nte tren emi iso ọbọhọde odụk obio. Abasi idiyakke mme owo ẹbiat ererimbot emi ofụri ofụri sia enye enịm adan̄a ke se mmọ ẹkemede ndibiat.—Psalm 83:18; Mme Hebrew 4:13.

Edi ikụreke ke oro. Abasi ayanam “ediwak emem” odu ke isọn̄ emi. (Psalm 37:11) Nti n̄kpọ emi ẹnemede ke ibuotikọ emi edi ata ekpri ke otu ediwak nti n̄kpọ oro Abasi edinamde ke isọn̄ emi. Ndien Mme Ntiense Jehovah ẹfiọk kpukpru emi ke ntak emi mmọ ẹkpepde Bible.

Mme Ntiense Jehovah ẹdu ke ofụri ererimbot. Kpa ye oro mmọ ẹtode nsio nsio idụt, kpukpru mmọ—irenowo ye iban, n̄kpri ye ikpọ—ẹtuak ibuot ẹnọ ata Abasi emi Bible ọdọhọde ke ekere Jehovah. Mmọ ikopke ndịk iban̄a se iditịbede ke ini iso sia Bible ọdọhọ ete: “Ntem ke Jehovah ọdọhọ, kpa Andibot enyọn̄, Enye emi edide ata Abasi, kpa Andibot isọn̄ ye Andinam enye, Enye emi ọkọsọn̄ọde owụk enye, emi mîkobotke enye ke ikpîkpu, emi okobotde enye man ẹdụn̄ ke esịt: ‘Ami ndi Jehovah, ndien baba kiet efen idụhe.’”—Isaiah 45:18.

Ibuotikọ emi anam ifiọk se Bible etịn̄de aban̄a nte isọn̄ emi editiede ke ini iso ye se Abasi edinamde inọ mme owo. Edieke oyomde ndifiọk n̄kpọ en̄wen mban̄a se inemede emi, mbọk kot ọyọhọ ukpepn̄kpọ 5 ke Eti Mbụk Emi Otode Abasi! ediye ekpri n̄wed Mme Ntiense Jehovah n̄wed emi odu n̄ko ke www.jw.org/efi

Emekeme n̄ko ndise vidio emi, Ntak Emi Abasi Okobotde Isọn̄ Emi? Vidio emi odu ke www.jw.org/efi. (Se ke ebiet emi okụtde: SE ẸDỌN̄DE > MME VIDIO)