Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ẸDEMEDE! NO. 4 2016

 SE BIBLE ETỊN̄DE ABAN̄A

Uyai

Uyai

Edieke owo ọdiọn̄ọde nte enye akpadade uyai, emi ekeme ndinam enye okop inemesịt. Edi edieke enye mîdiọn̄ọke, emi ekeme ndinam enye ofụhọ.

Ntak emi isimade uyai?

Nnyịn ifiọkke nte mfre nnyịn esisan̄ade ọfiọk n̄kpọ emi eyede. Bible itịn̄ke nte emi esisan̄ade etịbe, edi enye etịn̄ se isinamde nnyịn ima uyai: Abasi okobot nnyịn ke mbiet esie. (Genesis 1:27; Ecclesiastes 3:11) Enye n̄ko okobot idem nnyịn ke ata utịbe utịbe usụn̄ onyụn̄ ọnọ nnyịn ndiye ndido. Ntak edi oro andiwet Psalm ekewetde ete: “Nyotoro fi koro afo [Abasi] akanamde mi ke utịbe utịbe usụn̄ emi enyenede ndịk.”—Psalm 139:14.

Edi ediwak owo mfịn ifiọkke nte ẹkpedade uyai sia mme anyam-ọfọn̄ ye mme osio-fim ẹnam etie nte uyai edi uwem. N̄wed emi ẹkotde Body Image ọdọhọ ke ediwak ndụn̄ọde oro ẹkenamde ke obio mbakara okowụt ke mbon emi mînen̄ekede iye isikopke inemesịt ọkpọkọm mmọ ẹnyenyene nti edu. Ndikere n̄kpọ ntre ekeme ndinam ẹfre ẹban̄a se ikam idide ata akpan n̄kpọ, oro edi, se idude owo ke esịt.—1 Samuel 16:7.

Ediwak owo ẹda uyai ye idan̄ nte uwouwo n̄kpọ

Kpa nte ndusụk owo ẹsinen̄erede ẹkere ẹban̄a nte mmimọ iyede, ntre n̄ko ke ndusụk owo ẹsinen̄ede ẹkere ẹban̄a nte idem mmimọ ekemede ndinam owo ẹkere aban̄a idan̄. Iban ẹsinen̄ede ẹnam emi. Ndụn̄ọde kiet emi ẹkenamde ke 2007 okowụt ke ẹsiwak ndisio iban ke TV ye ke Intanet man mme owo ẹse ẹnyụn̄ ẹkere oburobụt n̄kpọ. Bible ọdọhọ ke utọ n̄kpọ emi ifọnke.—Colossae 3:5, 6.

“Ẹkûyak mbanaidem mbufo edi enyọn̄ enyọn̄ . . . , edi ẹyak edi ndedịbe owo eke esịt emi edide edisịnen̄kpọ eke mîkemeke ndibiara, kpa sụn̄sụn̄ ye ifụre ifụre edu, emi enen̄erede ọsọn̄ urua ke enyịn Abasi.1 Peter 3:3, 4.

Ntak emi mîfọnke ndida uyai nte uwouwo n̄kpọ?

Ndusụk owo ẹkere ke akpana mbon emi ẹyede uyai ẹnam asian. Ke mme idụt emi ediwak owo ẹsidade uyai nte uwouwo n̄kpọ, n̄kpri n̄kaiferi ẹsikama idem ẹnyụn̄ ẹnam n̄kpọ man mme owo ẹma ndise mmọ ẹnyụn̄ ẹkụt ke mmọ ẹye. Utọ ido  emi ifọnke, onyụn̄ ekeme ndinam owo ọdọn̄ọ mîdịghe ofụhọ kpukpru ini. Enye ekeme n̄ko ndinam esịt etịmede owo, anam owo esidia udia awak akaha m̀mê ekpri akaha, onyụn̄ ekere ke imọ iwọrọke n̄kpọ.

“Sio iyatesịt ke esịt fo fep, nyụn̄ bịn afanikọn̄ ke obụkidem fo fep; koro uyen ye usiere uwem ẹdide ikpîkpu.”Ecclesiastes 11:10.

Nso ke owo akpanam man owụt ke imenyene eti ibuot?

Bible owụt ke owo emi enyenede eti ibuot esisịne ọfọn̄ emi owụtde iso o-bụt. (1 Timothy 2:9) Ke uwụtn̄kpọ, mbon oro ẹnyenede eti ibuot isikamake idem nte mbon ntan̄idem, isinyụn̄ ikereke iban̄a idemmọ ikan nte ẹkpekerede. Mmọ isikamake idem ke usụn̄ emi edifịnade mbon en̄wen, ndien emi esinam mme owo ẹma ẹnyụn̄ ẹkpono mmọ, onyụn̄ anam Abasi ama mmọ. (Micah 6:8) N̄ko, mmọ ẹsinyene nti ufan ẹnyụn̄ ẹnyene owo emi edidọde mmọ, edinyụn̄ amade mmọ ata ima, idịghe owo emi oyomde ndida mmọ nyụhọ udọn̄ idemesie.

Oro anam Bible ọdọhọ inen̄ede ikere iban̄a edu nnyịn utu ke ndikere mban̄a uyai. (1 Peter 3:3, 4) Owo emi enyenede nti edu esisụk eyeye ọkpọkọm enye ọsọsọn̄. Mme N̄ke 16:31 ọdọhọ ete: “Iwat edi anyanya uyai ke ini ẹkụtde enye ke usụn̄ edinen ido.” Ntre, mbon oro ẹnamde item Bible, edide nditọwọn̄ m̀mê ikpọ owo, ẹsiye ẹbịghi ẹnyụn̄ ẹkop inemesịt.

“Mfọnidem edi nsu, uyai onyụn̄ edi ikpîkpu; edi n̄wan emi abakde Jehovah ọyọbọ itoro.”Mme N̄ke 31:30.

Kpep N̄kpọ En̄wen

Didie ke Mme Edumbet Bible Ẹn̄wam Nnyịn?

Jesus ama etịn̄ ntak emi iyomde ndausụn̄ onyụn̄ etịn̄ edumbet iba emi okponde akan.