Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ẸDEMEDE! NO. 4 2016

Nso ke Bible Etịn̄ Aban̄a Erenowo Ndidan̄ ye Erenowo?

Nso ke Bible Etịn̄ Aban̄a Erenowo Ndidan̄ ye Erenowo?

EDIWAK idụt ke ẹneneni ẹban̄a erenowo ndidọ erenowo m̀mê n̄wan ndidọ n̄wan. Edi n̄kponn̄kan esopikpe United States ẹma ẹbiere ke 2015 ẹte ke erenowo enyene unen ndidọ erenowo, n̄wan onyụn̄ ọdọ n̄wan. Ediwak owo ẹma ẹka Intanet ẹkeyom se mme owo ẹtịn̄de ẹban̄a n̄kpọ emi. Mbụme emi ẹkeyomde ẹkan edi: “Nso ke Bible etịn̄ aban̄a erenowo ndidọ erenowo m̀mê n̄wan ndidọ n̄wan?”

Bible itịn̄ke m̀mê erenowo enyene unen ndidọ erenowo, m̀mê n̄wan onyụn̄ enyene unen ndidọ n̄wan. Akpan mbụme emi ikpobụpde edi, Nso ke Bible etịn̄ aban̄a erenowo ndidan̄ ye erenowo m̀mê n̄wan ndidan̄ ye n̄wan?

Ndusụk owo ẹdọhọ ke Bible akpan erenowo ndidan̄ ye erenowo, m̀mê n̄wan ndidan̄ ye n̄wan. Mbon en̄wen ẹkere ke Bible ndidọhọ owo ‘ama mbọhọidụn̄ esie’ ọwọrọ ke enye enyịme owo anam idan̄ ye owo ekededi.—Rome 13:9.

NSO KE BIBLE ỌDỌHỌ?

Ekere ke ewe ke otu se ẹtịn̄de emi edi akpanikọ?

  1. Bible ọdọhọ erenowo okûdan̄ ye erenowo, n̄wan okûnyụn̄ adan̄ ye n̄wan.

  2. Bible enyịme erenowo adan̄ ye erenowo, n̄wan onyụn̄ adan̄ ye n̄wan.

  3. Bible ọdọhọ ẹsua irenowo emi ẹsidan̄de irenowo ye iban emi ẹsidan̄de iban.

IBỌRỌ:

  1. AKPANIKỌ. Bible ọdọhọ ete: “Irenowo emi ẹdan̄de ye irenowo . . . ididaha obio ubọn̄ Abasi inyene.” (1 Corinth 6:9, 10) Kpa ntre ke edi ye iban emi ẹsidan̄de ye iban.—Rome 1:26.

  2. NSU. Bible ọdọhọ ke erenowo ye n̄wan emi ẹdide ebe ye n̄wan kpọt ẹdot ndinam idan̄.—Genesis 1:27, 28; Mme N̄ke 5:18, 19.

  3. NSU. Kpa ye oro Bible ọdọhọde ke ifọnke erenowo adan̄ ye erenowo m̀mê n̄wan ndidan̄ ye n̄wan, enye idọhọke ẹsari, ẹsua, m̀mê ẹfiomo mbon emi ẹnamde utọ n̄kpọ emi.—Rome 12:18. [1]

 Nso ke Mme Ntiense Jehovah Ẹnịm?

Mme Ntiense Jehovah ẹnịm ke ndidu uwem nte Bible ọdọhọde ọfọn akan, ndien nte mmọ ẹsinyụn̄ ẹdude uwem edi oro. (Isaiah 48:17) [2] Emi ọwọrọ ke Mme Ntiense Jehovah ẹsua kpukpru oburobụt idan̄, esịnede erenowo ndidan̄ ye erenowo m̀mê n̄wan ndidan̄ ye n̄wan. (1 Corinth 6:18) [3] Se Mme Ntiense ẹnịmde edi oro, ndien mmọ ẹnyene unen ndidu uwem nte mmọ ẹmade.

Mme Ntiense Jehovah ẹsinam n̄kpọ ye mbon en̄wen nte mmọ ẹkpenyụn̄ ẹyomde mbon en̄wen ẹnam ye mmimọ

Edi Mme Ntiense Jehovah ẹsidomo ndidu ke “emem ye kpukpru owo.” (Mme Hebrew 12:14) Kpa ye oro mmọ ẹdade ke erenowo ndidan̄ ye erenowo m̀mê n̄wan ndidan̄ ye n̄wan ọdiọk, mmọ inyịkke mbon en̄wen ẹtiene ẹkere n̄kpọ nte mmọ ẹkerede. Mmọ inyụn̄ itieneke isua irenowo emi ẹsidan̄de irenowo m̀mê iban emi ẹsidan̄de iban. Mme Ntiense Jehovah ẹsinam n̄kpọ ye mbon en̄wen nte mmọ ẹkpenyụn̄ ẹyomde mbon en̄wen ẹnam ye mmimọ.—Matthew 7:12.

Ndi Bible Enyịme Ẹsari Owo Ndomokiet?

Ndusụk owo ẹdọhọ ke Bible anam mme owo ẹsua irenowo emi ẹsidan̄de irenowo m̀mê iban emi ẹsidan̄de iban. Mmọ ẹdọhọ n̄ko ke mbon emi ẹdude uwem nte Bible ọdọhọde imaha mbon emi mîdụhe uwem nte mmọ. Mmọ ẹdọhọ ke ẹkewet Bible ke ini enyịn mîkatarake mme owo, edi mfịn ke akpana ima kpukpru owo, inamke n̄kpọ m̀mê mmọ ẹto m̀mọ̀n̄ m̀mê ẹsinyụn̄ ẹma ndidan̄ ye irenowo m̀mê ye iban. Mmọ ẹkere ke ndidọhọ ke ifọnke erenowo adan̄ erenowo m̀mê n̄wan adan̄ ye n̄wan onyụn̄ etie nte ndidọhọ ke ifọnke mbakara odụk ndụk ye obubịt owo. Edi ndi utọ uwụtn̄kpọ emi enen? Inenke. Ntak idọhọde ntre?

Sia owo ndisua n̄kpọ emi mîfọnke idịghe ukem ye ndisua owo emi esinamde n̄kpọ oro. Ke nditịn̄ ke usụn̄ en̄wen, ndisua erenowo ndidan̄ ye erenowo m̀mê n̄wan ndidan̄ ye n̄wan idịghe ukem ye ndisua mbon emi ẹsinamde utọ n̄kpọ oro. Bible ọdọhọ mme Christian ẹkpono kpukpru owo. (1 Peter 2:17) [4] Edi oro iwọrọke ke ana mmọ ẹma kpukpru se mme owo ẹnamde.

Da sika ke uwụtn̄kpọ. Yak idọhọ ke afo usun̄wọn̄ke sika sia ọmọdiọn̄ọ ke sika ifọnke ye owo. Edi enyene owo itieutom mbufo emi esin̄wọn̄de sika. Ndi ekpenen ndidọhọ ke afo usunyịmeke ekikere mbon en̄wen sia mûsun̄wọn̄ke sika? Ndi ọwọrọ ke afo asasua owo emi esin̄wọn̄de sika? Edieke owo itieutom mbufo oro ọkọn̄de eyịre ete yak afo ọtọn̄ọ ndin̄wọn̄, ndi oro ikpakam iwụtke ke enye inyịmeke ekikere mbon en̄wen?

Mme Ntiense Jehovah ẹdu uwem nte Bible ọdọhọde. Mmọ imaha n̄kpọ ekededi emi Bible akpande. Edi mmọ isuaha mbon emi mîdụhe uwem nte mmọ ẹdude isinyụn̄ isakke mmọ nsahi.

Ndi Se Bible Etịn̄de Ọdiọk?

Esidọn̄ ndusụk irenowo ndidan̄ ye ekemmọ irenowo, iban ye ekemmọ iban. Ndi mmọ ẹkedada utọ udọn̄ emi ẹmana? Edieke edide ntre, ndi ọdiọk ndidọhọ ke ifọnke mmọ ẹnam se idọn̄de mmọ?

Bible itịn̄ke m̀mê irenowo emi ẹsidan̄de ye irenowo, ye iban emi ẹsidan̄de ye iban ẹkedada utọ udọn̄ oro ẹmana, edi enye ọdọhọ ke ndusụk edu ẹsinen̄ede ẹdọn̄ n̄kam ke esịt owo. Kpa ye oro, Bible ọdọhọ ke ana owo emi oyomde ndinem Abasi esịt etre ndusụk n̄kpọ, esịnede erenowo ndidan̄ ye erenowo m̀mê n̄wan ndidan̄ ye n̄wan.—2 Corinth 10:4, 5.

Ndusụk owo ẹkeme ndidọhọ ke se Bible etịn̄de emi ifọnke. Mmọ ẹkere ke akpana ẹyak owo anam se ededi oro enye amade, ke owo ikemeke ndifara ke idem sia udọn̄ idan̄ ọsọn̄ ubọk etieti. Edi Bible anam nnyịn ifiọk ke owo ekeme ndifara ke idem edieke enye oyomde. Nnyịn itiehe nte unam emi esinamde se ededi oro ọdọn̄de enye.—Colossae 3:5. [5]

 Yak inọ uwụtn̄kpọ ise: Ndusụk ntaifiọk ẹdọhọ ke enyene ndusụk edu emi esịnede-sịne owo ke iyịp, utọ nte iyatesịt. Bible itịn̄ke m̀mê iyatesịt esesịne ndusụk owo ke iyịp, edi enye ọdọhọ ke ndusụk owo ẹsisọp iyatesịt ẹnyụn̄ ẹfụt esịt. (Mme N̄ke 22:24; 29:22) Kpa ye oro, Bible ọdọhọ n̄ko ete: “Tre iyatesịt nyụn̄ kpọn̄ ifụtesịt.”—Psalm 37:8; Ephesus 4:31.

Ata ediwak owo ẹnịm ke item emi ọfọn ye mbon emi ẹsisọpde iyatesịt. Idem ntaifiọk emi ẹdọhọde ke iyatesịt esesịne ndusụk owo ke iyịp ẹsidomo ndin̄wam mmọ ẹmụm idem ẹkama ke ini n̄kpọ ayatde mmọ.

Se Mme Ntiense Jehovah ẹsinyụn̄ ẹnamde edi oro. Mmọ ẹkpep ndisua se ededi emi Bible akpande. Emi esịne erenowo ndidan̄ ye erenowo, n̄wan ndidan̄ ye n̄wan, erenowo ye n̄wan emi mîdịghe ebe ye n̄wan ndinyene ebuana, ye mme oburobụt ido eken. Bible ọdọhọ ke akpana owo kiet kiet ọfiọk “nte akpakarade ndido esie ke edisana ido ye ukpono, idịghe ke idiọk udọn̄ idan̄.”—1 Thessalonica 4:4, 5.

“Ndusụk Mbufo Ẹketie Ntem”

Mbon emi ẹkeyomde ndidi mme Christian ke eyo mme apostle ẹketo nsio nsio itie ẹnyụn̄ ẹdu nsio nsio uwem, ndien ndusụk mmọ ẹma ẹnen̄ede ẹkpụhọde nte mmọ ẹkesidude uwem. Ke uwụtn̄kpọ, Bible etịn̄ aban̄a “mbon use, mme okpono ndem, mme esịn efịbe, . . . irenowo emi ẹdan̄de ye irenowo,” onyụn̄ adian do ete: “Ndusụk mbufo ẹketie ntem.”1 Corinth 6:9-11.

Sia Bible ọdọhọde “ndusụk mbufo ẹketie ntem,” ndi oro ọwọrọ ke mbon oro ẹketrede ndisidan̄ ye ekemmọ irenowo m̀mê ekemmọ iban ikenyeneke aba utọ udọn̄ oro? Ẹma ẹnyene, oro anam Bible ọdọhọ n̄ko ete: “Ẹka iso ẹsan̄a ke spirit ndien mbufo idinamke baba n̄kpọ kiet emi ọdọn̄de obụkidem.”—Galatia 5:16.

N̄kọ omokụt do ke Bible idọhọke ke idiọkn̄kpọ ididọn̄ke Christian tutu amama. Edi ọdọhọ ke enye edibiere ke imọ idinamke idiọkn̄kpọ oro ọdọn̄de imọ do. Christian esikpep ndifara ke idem, utu ke ndika iso n̄kere mban̄a idiọkn̄kpọ tutu edi se enye anamde-nam.—James 1:14, 15. [6]

Bible owụt ke idiọkn̄kpọ ndidọn̄ owo idịghe ukem ye owo ndinam idiọkn̄kpọ. (Rome 7:16-25) Edieke esidọn̄de erenowo ndidan̄ ye ekemmọ erenowo mîdịghe ọdọn̄ n̄wan ndidan̄ ye n̄wan, akpana enye ekpeme se enye ekerede, kpa nte enye okponyụn̄ ekpemede idem ye n̄kpọ emi ekemede ndinam enye ayat esịt, esịn efịbe, m̀mê ọdiọk itọn̄.—1 Corinth 9:27; 2 Peter 2:14, 15.

Mme Ntiense Jehovah ẹnịm ke ndidu uwem nte Bible ọdọhọde ọfọn akan, edi mmọ inyịkke mbon en̄wen ẹdu uwem nte mmọ. Mmọ isinyụn̄ idomoke ndinam ẹkpụhọde ibet emi enyịmede mme owo ẹdu uwem nte mmọ ẹmade. Eti mbụk ke Mme Ntiense Jehovah ẹkwọrọ, ndien ọdọdọn̄ mmọ ndinam mbon en̄wen ẹtiene ẹkop.—Utom 20:20.

^ 1. Rome 12:18: “Ẹtie ke emem ye kpukpru owo.”

^ 2. Isaiah 48:17: “Ami Jehovah, ndi Abasi fo, Enye emi ekpepde fi man afo ọbọ ufọn.”

^ 3. 1 Corinth 6:18: “Ẹfehe ẹkpọn̄ use.”

^ 4. 1 Peter 2:17: “Ẹkpono kpukpru orụk owo.”

^ 5. Colossae 3:5: “Ẹwot mme ndido idem mbufo emi ẹdude ke isọn̄ man ẹtre use, mbubiam ido, ọkpọsọn̄ udọn̄ idan̄.”

^ 6. James 1:14, 15: “Idomo esịm owo kiet kiet ke ini udọn̄ idemesie odụride onyụn̄ atapde enye. Ekem ke ini udọn̄ emi oyomode, aman idiọkn̄kpọ.”

Kpep N̄kpọ En̄wen

Ndi Bible Etịn̄ N̄kpọ Ndomokiet Aban̄a Ndọ Erenowo ye Erenowo m̀mê eke N̄wan ye N̄wan?

Anditọn̄ọ ndọ etịm ọfiọk se ikpanamde ndọ enem onyụn̄ ebịghi.