Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ẸDEMEDE! NO. 4 2016

 SE IDIN̄WAMDE UBON | MME UYEN

Se Akpanamde ke Ini N̄kpọ Okpụhọrede

Se Akpanamde ke Ini N̄kpọ Okpụhọrede

SE ISINAMDE ỌSỌN̄

  • Utom ete fo anam ẹwọrọ ẹkedụn̄ ke ebiet en̄wen.

  • Edima ufan fo ọmọn̄ ọwọrọ okodụn̄ ke itie en̄wen.

  • Eyeneka fo ọmọn̄ ọwọrọ ọkpọn̄ mbufo ọkọdọ ndọ.

Nso ke akpanam edieke utọ n̄kpọ emi etịbede?

Eto emi esinụhọde etiene ofụm isisọpke ibụn̄ọ ke ini oyobio. Kpasụk ntre, edieke ekpepde ndisinyịme mme ukpụhọde oro okụtde, akpan akpan mbon oro mûkemeke ndinyan̄a, se itịbede idinen̄ekede ifịna fi. Edi yak ibem iso itịn̄ n̄kpọ ifan̄ emi akpanade ọdiọn̄ọ.

SE AKPANADE ỌDIỌN̄Ọ

Idụhe owo emi n̄kpọ mîsikpụhọkede ke uwem esie. Se Bible etịn̄de ke Ecclesiastes 9:11 edi ata akpanikọ: ‘N̄kpọntịbe unana idotenyịn ẹsisịm kpukpru owo.’ Ebebịghi m̀mê awawara, n̄kpọ emi afo mûkodorike enyịn eyetịbe. Edi idịghe kpukpru n̄kpọntịbe unana idotenyịn ọdiọk. Ndusụk ukpụhọde emi ẹkemede nditie nte ke ifọnke ẹkeme ndikabade mfọn ye afo ke ini iso. Edi ndusụk owo isiyomke n̄kpọ ndomokiet okpụhọde ke uwem mmọ. Esinen̄ede afịna mmọ ke ini n̄kpọ mîtiehe nte ekesitiede.

Mme uyen ke ukpụhọde esifịna akan. Ntak-a? Akparawa emi ekerede Alex * ọdọhọ ete, “Sia edide idem nnyịn ke okpụhọde, edieke n̄kpọ okpụhọrede ke uwem nnyịn adian do, emi ekeme ndinen̄ede mfịna nnyịn.”

Ntak efen edi: Ikpọ owo ẹkụt ediwak n̄kpọ ke uwem, ntre edieke n̄kpọ okpụhọrede ke uwem mmọ, mmọ ẹsiti nte mmọ ẹkanamde n̄kpọ ke ini utọ n̄kpọ oro eketịbede. Edi mme uyen inyeneke kan̄a ekese ifiọk ke uwem.

Afo emekeme ndikpep ndiyọ se okụtde. Ọfọn owo ekpep ndiyọ n̄kpọ. Owo emi esiyọde n̄kpọ isiyakke se itịbede anam idem emem enye. Edi enye esidomo ndikụt eti n̄kpọ ke se itịbede oro. Mme uyen oro ẹsiyọde n̄kpọ isisọpke ida n̄kpọsọn̄ ibọk m̀mê ndin̄wọn̄ mmịn mbe ubọk ke ini mmọ ẹnyenede mfịna.

 SE AKPANAMDE

Da n̄kpọ nte onyụn̄ okụtde. Ekeme ndidi afo esima kpukpru n̄kpọ etie nte afo oyomde, edi oro ikemeke nditịbe. Mme ufan fo ẹyewọrọ ẹkedụn̄ ke ebiet en̄wen mîdịghe ẹdọ ndọ; nditọeka fo ẹyewọrọ ẹkpọn̄ ufọk ẹma ẹkpon owo; n̄kpọ ekeme ndinam fi ọkpọn̄ ubon mbufo ye mme ufan fo okodụn̄ ke ebiet en̄wen. Ntre, ọfọn ekpep ndida n̄kpọ nte onyụn̄ okụtde utu ke nditie ntịmede esịt sia n̄kpọ mîsan̄ake nte ekekerede.—Se se Bible etịn̄de ke Ecclesiastes 7:10.

Kere ban̄a ini iso. Nditie ntịmede esịt mban̄a se iketịbede etie nte ndiwụk enyịn nse ukụtiso ke ini awatde moto utu ke ndise usụn̄ n̄wat. Idiọkke nditop enyịn nse ukụtiso, edi ana owụk enyịn ese usụn̄. Se okponyụn̄ anamde edi oro ke ini n̄kpọ okpụhọrede ke uwem fo. Kere ban̄a se inade fi ke iso, idịghe se ima ikebebe. (Mme N̄ke 4:25) Ke uwụtn̄kpo, kere ban̄a se aduakde ndinam ọfiọn̄ en̄wen m̀mê ke ọfiọn̄ itiokiet ke iso.

Kere ufọn emi edidiade. N̄kaiferi kiet emi ekerede Laura ọdọhọ ete, “Edu owo esinam enye ekeme ndiyọ n̄kpọ. Domo ndikụt ufọn emi adiade ke ntak emi n̄kpọ okpụhọrede ke uwem fo.” Emekeme ndiwewet mme ufọn oro.—Se se Bible etịn̄de ke Ecclesiastes 6:9.

N̄kaiferi kiet emi ekerede Victoria ọdọhọ ke ini imọ ikedide ekpri, ke kpukpru ufan imọ ẹma ẹwọrọ ẹkedụn̄ ke ebiet en̄wen. Kop se enye etịn̄de mi: “Mma n̄kop ndobo etieti. N̄kekere ke akpana kpukpru n̄kpọ aka iso etie nte ekesitiede. Edi mmedi ndikụt ke n̄kenen̄ekede ndiọn̄ọ idem ini oro. Mma ndikụt ke nte owo okponde aka, ntre ke n̄kpọ edikpụhọde ke uwem esie. Ini oro n̄ko ke n̄kedi ndikụt ke mbon oro ẹkemede ndidi mbufa ufan mi ẹyọyọhọ mi idem.”—Se se Bible etịn̄de ke Mme N̄ke 27:10.

Nditie ntịmede esịt mban̄a se iketịbede etie nte ndiwụk enyịn nse ukụtiso ke ini awatde moto utu ke ndise usụn̄ n̄wat

Nam n̄kpọ nọ mbon en̄wen. Bible ọdọhọ ete: “Ẹkûse ẹban̄a mbubehe mbufo kpọt, edi ẹse ẹban̄a mbubehe mbon en̄wen n̄ko.” (Philippi 2:4) Ndinam n̄kpọ nnọ mbon en̄wen eyenen̄ede an̄wam fi. Anna emi edide isua 17 ọdọhọ ete: “Nte n̄kosụk n̄kọride n̄wọrọ owo, mma ndikụt ke edieke n̄n̄wamde owo en̄wen emi n̄kpọ okpụhọrede ke uwem esie, ke oro eyenen̄ede an̄wam mi.”

^ ikp. 11 Ẹkpụhọ ndusụk enyịn̄ ke ibuotikọ emi.