NSO KE EMI ỌWỌRỌ?

Ebe ye n̄wan emi ẹkponode kiet eken ẹsikere ẹban̄a kiet eken, idem ke ini mmọ ẹnyenede mfịna. N̄wed kiet emi ẹkotde Ten Lessons to Transform Your Marriage ọdọhọ ke utọ ebe ye n̄wan oro isiyakke mfịna oro ọsọn̄ ubọk tutu edi se mmọ mîmaha ndinam emem. Edi mmọ ẹsineme mfịna ekededi oro mmọ ẹnyenede. Mmọ ẹsikpan̄ utọn̄ ẹkop ekikere kiet eken ẹnyụn̄ ẹneme nte mmọ ẹkemede ndikọk mfịna oro.

SE BIBLE ETỊN̄DE: “Ima . . . iyomke ufọn idemesie.”​—1 Corinth 13:​4, 5.

“Mmesikere mban̄a se n̄wan mi amade man nnam enye okụt ke mmokpono enye, nsinyụn̄ nyomke ndinam n̄kpọ ekededi oro edibụn̄de enye esịt m̀mê oro edibiatde ndọ nnyịn.”​—Micah.

NTAK EMI EDIDE AKPAN N̄KPỌ

Ebe ye n̄wan emi mîkponoke kiet eken ẹsisọp ndikụt ndudue nnọ kiet eken, ẹsụn̄i kiet eken, ẹnyụn̄ ẹmiom kiet eken ke ini ẹnemede nneme. Ntaifiọk ẹdọhọ ke utọ ndọ emi isibịghike.

“Ndida n̄wan fo nnam idọkọ m̀mê ndida mbubru ntịn̄ n̄kpọ emi esuenede enye, ekeme ndinam enye ekere ke imọ iwọrọke n̄kpọ, anam enye okûbuọt idem ye afo, onyụn̄ ekeme ndibiat ndọ mbufo.”​—Brian.

SE AKPANAMDE

FIAK SE NTE ESINAMDE N̄KPỌ

Se nte enemede nneme onyụn̄ anamde n̄kpọ ye ebe m̀mê n̄wan fo ke ufan̄ urua kiet. Ekem bụp idemfo ete:

  • ‘Ikafan̄ ke n̄kokụt ndudue nnọ n̄wan m̀mê ebe mi, ikafan̄ ke n̄kotoro enye?’

  • ‘Nso ye nso ke n̄kanam ndiwụt ke mmokpono enye?’

NEME N̄KPỌ EMI YE EBE M̀MÊ N̄WAN FO

  • Nso ke mbufo mbiba ẹkpetịn̄ ẹnyụn̄ ẹnam ndiwụt ke ẹmekpono kiet eken?

  • Nso ke mbufo mbiba mîkpetịn̄ke mîkponyụn̄ inamke mbak editie nte mbufo ikponoke kiet eken?

NAM EMI ISE

  • Wet n̄kpọ ita emi akpamade ebe m̀mê n̄wan fo anam man enye owụt ke imokpono fi. Dọhọ enye ewet esie n̄ko. Ekem yak se ekewetde nọ enye nyụn̄ bọ se enye ekewetde. Domo ndinam se enye ekewetde, enye n̄ko onyụn̄ anam se afo ekewetde.

  • Wet nti edu emi enye enyenede, nyụn̄ nam enye ọdiọn̄ọ ke emenen̄ede ama mme edu emi.

“Mmesidomo ndinam se inemde ebe mi esịt nnyụn̄ nnam enye ọfiọk ke ndaha enye mbre mbre. Idịghe ndinam ikpọ n̄kpọ esinam enye okụt ke mmokpono enye, edi n̄kpri n̄kpri n̄kpọ oro nsitịn̄de nnyụn̄ nnamde esinam enye okụt ke mmenen̄ede n̄kpono enye.”​—Megan.

Idịghe afo ndikere ke imokpono ebe m̀mê n̄wan fo ediwụt ke omokpono enye, edi edi enye ndikụt ke omokpono imọ.

SE BIBLE ETỊN̄DE: “Ẹmen esịt ima emi asan̄ade ye mbọm ẹsịne ọkọrọ ye mfọnido ye nsụhọdeidem ye ifụre ifụre ido ye anyanime.”​—Colossae 3:12.