Be ka se isịnede

Be ka se isịnede

Mme Ntiense Jehovah

Mek usem Efịk

 IBUOTIKỌ MAGAZINE EMI | NSO ISINAM MME OWO ẸMA N̄KPỌ MME DEMON?

Ediwak Owo Ẹma N̄kpọ Mme Demon

Ediwak Owo Ẹma N̄kpọ Mme Demon

‘Fim emi aban̄ade ifọt, ekpo, ye ndem awak etieti, edi etie nte fim emi ẹwụtde nte demon afịnade owo ye nte ẹsiode owo idiọk spirit ke idem awak akan.’—The Wall Street Journal.

EDIWAK n̄wed, fim, ye mbre vidio mfịn ẹban̄a ifọt, ekpo, ye n̄kpọ mme demon. Ndusụk ifọt emi ẹsidi nditọwọn̄, ndusụk ẹdi ikpọ owo, ndien ndusụk ẹdi ndiye iban. Nso isinam mme owo ẹma utọ n̄kpọ emi?

Ataifiọk kiet emi ekerede Claude Fischer ọdọhọ ke mbon America emi ẹnịmde ke ekpo odu ẹwak idahaemi akan nte ekesidide ke eset. Enye ọdọhọ ke ediwak mmọ ẹdọhọ ke imesika use-n̄kpọ, ke imonyụn̄ inịm ke enyene ndusụk ufọk emi mme ekpo ẹdụn̄de. Ibat uyen oro ẹnịmde utọ n̄kpọ emi ekpere ndiwak utịm ikaba n̄kan ibat ikpọ owo oro ẹnịmde.

Ediwak owo ẹfiak ẹtọn̄ọ ndinịm ke ndusụk owo ẹkakama demon ẹsan̄a. Michael Calia ekewet ke n̄wed oro ẹkotde The Wall Street Journal ete ke isua ifan̄ emi ebede, ediwak fim, n̄wed, ye ikwọ ẹban̄a ifọt, ekpo, ye ndem, ndien emi anam ediwak owo ẹfiak ẹtọn̄ọ ndima n̄kpọ mme demon.

Ndụn̄ọde kiet oro ẹkenamde owụt ke n̄kpọ nte mbahade iba ke otu mme owo ke ofụri ererimbot ẹnịm ke ekpo odu, ndien ediwak n̄wed mfịn ẹban̄a ekpo. Ndụn̄ọde kiet emi Prọfesọ Christopher Bader ye Carson Mencken ẹkenamde ke United States owụt ke ata ediwak mbon America ẹnịm ke ifọt ẹsinam ndusụk n̄kpọ ẹtịbe.

Ntem, ndi ọdiọk ndise fim ifọt m̀mê ndinyene n̄kpọ ndinam ye mme demon?