Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ẸDEMEDE! NO. 2 2016

Inịm emi edide awawa ye ndatndat. Ọniọn̄ ekpri akan yard kiet

Inịm Mbakara

Inịm Mbakara

ESINEN̄EDE eye ndikụt inịm ẹfede ke udịm! Ke ini mbon Europe emi ẹkesan̄ade ẹnam ndụn̄ọde ẹkesịmde America ke n̄kpọ nte isua 500 emi ekebede, mmọ ẹma ẹkụt inịm mbakara emi ẹnyenede anyan isịm. Ikebịghike, ẹma ẹtọn̄ọ ndisisịn ndise inịm emi ke mme map idụt oro ẹdude do man ẹwụt ke mme obio oro ẹnen̄ede ẹye.

Ayara ye uman inịm emi ẹnyene nsio nsio ndiye uduot, itiehe nte mme inuen emi ayara esiyede akan uman. Inịm emi ọdiọn̄ọ n̄kpọ etieti, isinyụn̄ iwakke ndisan̄a ikpọn̄. Mmọ ẹsinen̄ede ẹnam uyom. N̄kpọ nte inịm 30 ẹsife ke udịm ẹwọrọ ke efọk mmọ ke usenubọk ẹkeyom udia, utọ nte isịp ye mfri. Mmọ ẹsida mbara mmọ ẹmen udia ẹsịn ke anyan inua mmọ. Mmọ ẹkam ẹkeme ndibom isịp ke inua! Ke ini inuen emi ẹdiade udia ẹma, mmọ ẹsika ẹkesọrọ ke ebeden̄ m̀mê ke mbeninyan̄ ẹdia mbat. Ndien mbat emi isiyakke idiọk udia ekededi oro mmọ ẹkediade afịna mmọ, esinyụn̄ ọnọ mmọ n̄kpọ ke idem.

“[Abasi] amanam kpukpru n̄kpọ ẹye ke ini mmọ.”—Ecclesiastes 3:11

Ayara inịm emi esitiene uman kiet kpọt, ndien mmọ mbiba ẹsise ẹban̄a nditọ mmọ. Inuen emi ẹsibọp efọk mmọ ke  aba eto, abaitiat, ufọk ebu, ye ke ndudu ke mbeninyan̄, ndien mmọ ẹsisịne do ẹsari kiet eken idem. Kpa ye oro inuen emi esikponde ekem ndiwọrọ n̄kodụn̄ ikpọn̄ ke ini esịmde ọfiọn̄ itiokiet, enye esika iso odụn̄ ye ete ye eka esie tutu esịm n̄kpọ nte isua ita. Inịm emi odude ke akai ekeme ndidu uwem nsịm isua 40, edi ndusụk inịm emi ẹbọkde-bọk ẹsidu uwem ẹbe isua 60. Inịm ẹdi ke utọ ke utọ. Se ndusụk mmọ mi.

Inịm emi edide blu blu ye utouto. Ekpere ndiniọn̄ nsịm yard kiet

Inịm emi edide ndatndat ye blu blu. Ekpere ndiniọn̄ nsịm yard kiet

Inịm emi edide blu blu. Ọniọn̄ akan yard kiet. Enye okpon akan ke otu kpukpru inịm, onyụn̄ odobi kilogram kiet ye ubak