Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ẸDEMEDE! NO. 2 2016

 NDỤN̄ỌDE | YAN-DER HSUUW

Ataifiọk Etịn̄ Se Enye Enịmde

Ataifiọk Etịn̄ Se Enye Enịmde

PRỌFESỌ Yan-Der Hsuuw edi akwa owo ke itie emi ẹsinamde ndụn̄ọde ẹban̄a ọbọn̄eyen ke Ufọkn̄wed Ntaifiọk Pingtung ke Taiwan. Enye ekesinịm ke n̄kpọ ẹkefoforo, edi ama okpụhọ ekikere ke enye ama akakabade edi ataifiọk. Enye ama enyene nneme ye mme andiwet Ẹdemede! onyụn̄ etịn̄ se ikanamde imọ itre ndinịm ke n̄kpọ ẹkefoforo.

Mbọk tịn̄ ekpri n̄kpọ ban̄a idemfo ise.

N̄kamana ke 1966, n̄konyụn̄ n̄kpon ke Taiwan. Ete ye eka mi ẹkesikpono abasi nte mbon Buddha ye Tao ẹsikponode. Kpa ye oro ikesituakde ibuot inọ mme ete-ete nnyịn, ikesinyụn̄ ibọn̄de akam inọ ndisọi mbiet, nnyịn ikekereke ke Abasi emi okobotde kpukpru n̄kpọ odu.

Ntak emi ekekpepde n̄kpọ aban̄a mme odu-uwem n̄kpọ?

Ke ini n̄kedide eyenọwọn̄, mma nsima ndibre mbre ye mme unam ke ufọk. Mma nnyụn̄ nyom ndifiọk se n̄kpanamde man mme unam ye mme owo ẹtre ndibọ ufen. Mma n̄kekpep n̄kpọ mban̄a nte ẹsisọbọde unam idem, ekem n̄kpep mban̄a ọbọn̄eyen, sia n̄kekere ke oro ayanam mfiọk nte uwem ọkọtọn̄ọde.

Ntak emi ekesinịmde ke n̄kpọ ẹkefoforo?

Mme prọfesọ ke ufọkn̄wed ntaifiọk nnyịn ẹkekpep ke n̄kpọ ẹkefoforo, ndien mmọ ẹkedọhọ ke enyene mme n̄kpọ emi ẹwụtde ke emi edi akpanikọ. Mma nnịm se mmọ ẹkekpepde.

Nso ikanam ọtọn̄ọ ndikot Bible?

N̄kpọ iba akanam. Akpa, mma n̄kere ke anaedi enyene Abasi emi okponde akan ke otu ediwak abasi emi mme owo ẹkponode. Mma n̄kere m̀mê ewe ke ekpedi. Ọyọhọ iba, mma ndiọn̄ọ ke ata ediwak owo ẹda Bible nte ata akpan n̄wed, ntre mma ntọn̄ọ ndikpep Bible.

Ke 1992, mma n̄ka Ufọkn̄wed Ntaifiọk Leuven ke Belgium n̄kekpep n̄kpọ. Ufọkabasi Catholic ẹnyene ufọkn̄wed emi, ntre mma n̄kọdọhọ oku Ufọkabasi Catholic anam Bible an̄wan̄a mi, edi enye ikenyịmeke.

Anie ndien ekedinam Bible an̄wan̄a fi?

Isua iba ke oro ebede, ke ini n̄kosụk ndude ke Belgium nnam ndụn̄ọde ke ufọkn̄wed ntaifiọk, mma nsobo ye Ruth emi otode Poland onyụn̄ edide Ntiense Jehovah. Enye ama ekpep usem Chinese man an̄wam nditọ ufọkn̄wed ntaifiọk oro ẹyomde ndikpep n̄kpọ mban̄a Abasi. N̄kọbọbọn̄ akam nyom utọ owo oro, ntre ama enen̄ede enem mi ndikụt enye.

Ruth ama owụt mi ke kpa ye oro Bible mîdịghe n̄wed ifiọk ntaifiọk, ke se Bible etịn̄de ekem ye ndusụk se ntaifiọk ẹkpepde. Ke uwụtn̄kpọ, David ama ọbọn̄ akam ọnọ Abasi ete: “Enyịn fo ama okụt mi ke ini n̄kedide ọbọn̄eyen, ndien ẹma ẹwewet kpukpru ndido esie ẹsịn ke n̄wed fo, mbemiso usen emi mmọ ẹkeborode baba mmọ kiet mîkonyụn̄ idụhe.” (Psalm 139:16) Se David ekewetde emi enen. Idem mbemiso mme ndido idem nnyịn ẹtọn̄ọde ndikọri, mme nsen idem nnyịn ẹnyenyene ntọt emi aban̄ade nte nnyịn iditiede. Kpukpru se Bible etịn̄de enen, ndien emi akanam nnịm ke enye edi Ikọ Abasi. Mma ndifiọk n̄ko ke ata Abasi kiet kpọt odu, emi ekerede Jehovah. 1

 Nso ikanam enịm ke Abasi okobot owo?

Ntaifiọk ẹsinam ndụn̄ọde man ẹn̄wam mme owo ẹfiọk akpanikọ, idịghe ndiyom n̄kpọ ntịn̄ man ẹwụt ke ekikere mmimọ enen. Se n̄kokụtde ke ini n̄kanamde ndụn̄ọde mban̄a nte ọbọn̄eyen ẹsikọride ke esịt idịbi ama anam nnịm ke Abasi okobot owo. Ke uwụtn̄kpọ, ke ini ntaifiọk ẹyomde ndibot n̄kpọ, mmọ ẹsibem iso ẹnam ukwakutom emi editan̄de n̄kpọ kiet kiet idọn̄ ke itie mmọ man se mmọ ẹyomde ndibot ọfọn. Se isinyụn̄ itịbede edi oro ke ini ọbọn̄eyen ọkọride ke esịt idịbi, edi ọbọn̄eyen awak n̄kukọhọ akan ukwakutom ekededi.

N̄kọ ọbọn̄eyen esitọn̄ọ nte nsen kiet?

Ih. Edi nsen oro owo mîkemeke ndida ata enyịn n̄kụt do esitọn̄ọ ndibahade. Ke nsonso oro, nsen emi esibahade kpukpru hour 12 esịm 24. Ekem, ndusụk ke otu nsen emi ẹsikabade ẹdi nsen ndido idem owo. 2 Mme nsen emi ẹsision̄o n̄kpọ nte utọ nsen 200 emi ẹsinamde nsekeyen enyene nsio nsio n̄kpọ ke idem, utọ nte iyịp, ọkpọ, esịp, ye mme n̄kpọ eken.

Ndụn̄ọde oro n̄kanamde mban̄a ọbọn̄eyen anam nnịm ke Abasi okobot owo

Man se ntịn̄de emi etịbe, ana mme nsen emi ẹsion̄o nnennen nsen ke nnennen ini ye ke nnennen itie. Mme nsen emi ndien ẹsiboho kiet ẹkabade nsio nsio ndido idem owo. Idụhe ataifiọk ndomokiet emi ekemede ndinam emi. Edi ẹwet nte ọbọn̄eyen edikọride ke n̄kpọ emi ẹkotde DNA. DNA emi odu ke nsen kiet kiet ke idem owo. Ke ini n̄kesede nte kpukpru emi ẹsitịbede ke esịt idem owo, mma nnịm ke Abasi okobot owo.

Nso ikanam akabade edi Ntiense Jehovah?

Ke nditịn̄ ibio ibio, ima akanam. Jesus Christ ọkọdọhọ ete: “Edieke mbufo ẹnyenede ima ke otu idem mbufo, kpukpru owo ẹyeda emi ẹfiọk ẹte mbufo ẹdi mbet mi.” (John 13:35) Owo emi enyenede utọ ima emi isinamke asari—isehe ebiet emi owo otode m̀mê nte ikpaidem owo etiede. Utọ ima emi ke n̄kokụt ke ini n̄kọtọn̄ọde ndidụk mbono esop Mme Ntiense Jehovah.

^ 2. Sia Prọfesọ Yan-Der Hsuuw edide Christian, enye ebiere ke imọ idisioho nsen ke ọbọn̄eyen ikada inam n̄kpọ en̄wen.