Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Ẹdemede!  |  No. 1 2018

 SE AKPANAMDE MAN OKOP INEMESỊT

Nso ke Akpanam?

Nso ke Akpanam?

EDIEKE ẸBỤPDE FI M̀MÊ EMESIKOP INEMESỊT, ỌKPỌDỌHỌ DIDIE? Edieke edide ọkpọdọhọ ke imesikop, nso isinam okop inemesịt? Ndi ubon fo, utom fo, m̀mê ufọkabasi emi esikade? Ekeme ndidi enyene n̄kpọ emi ekerede ke ayanam enen̄ede okop inemesịt, utọ nte ndikụre n̄wed, ndinyene eti utom, m̀mê ndidep obufa moto.

Esịt esinem ediwak owo ke ini mmọ ẹnamde n̄kpọ oro mmọ ẹkeduakde m̀mê ẹnyenede n̄kpọ oro mmọ ẹkeyomde. Edi, ndi utọ inemesịt oro esibịghi? Ediwak ini, isibịghike, ndien emi ekeme ndibiak owo.

Edi ata inemesịt esibịghi. Enye idịghe n̄kpọ emi odude ke ekpri ibio ini ekem ebe efep. Ndinen̄ede n̄kop uyụhọ ke n̄kpọ m̀mê ndinen̄ede n̄kop inem uwem esinam owo okop utọ inemesịt emi. Ọwọrọ idịghe se owo enyenede esinam enye okop inemesịt, edi nte owo odude uwem esinam. Ntre, owo ndidọhọ, “Nyokop inemesịt mma nnyene emi m̀mê oko” etie nte enye ndidọhọ ke imọ iyomke ndikop inemesịt kan̄a.

Man se itịn̄de emi enen̄ede an̄wan̄a, yak imen inemesịt idomo ye owo ndikop nsọn̄idem. Nso ke isinam man ikop nsọn̄idem? Imesidia nti udia, isịn̄ede idem, inyụn̄ itịm ikpeme se inamde. Kpasuk ntre, enyene mme n̄kpọ emi ikpanamde man ikop inemesịt. Nditịm nse nte idude uwem nnyụn̄ nnam nti item emi Abasi ọnọde nnyịn ayanam ikop inemesịt.

Nso ye nso ke ikpanam man isikop inemesịt? Kere ban̄a se ẹwetde ke idak emi. Kpa ye oro ndusụk ẹdide akpan n̄kpọ ẹkan ndusụk, kpukpru mmọ ẹnyene ufọn.

  • YỤHỌ YE SE ENYENEDE NYỤN̄ NỌ OWO N̄KPỌ

  • SE BAN̄A IDEMFO NYỤN̄ KPEP NDIYỌ N̄KPỌ

  • MA MME OWO

  • FEN NỌ OWO

  • FIỌK NTAK EMI IDUDE UWEM

  • NYENE IDOTENYỊN

N̄wed Abasi ọdọhọ ete: “Mbon oro usụn̄ mmọ ọfọnde ama . . . ẹkop inemesịt.” (Psalm 119:1) Yak ineme iban̄a mme n̄kpọ emi.