Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Ẹdemede!  |  No. 1 2018

 SE AKPANAMDE MAN OKOP INEMESỊT

Se Ban̄a Idemfo Nyụn̄ Kpep Ndiyọ N̄kpọ

Se Ban̄a Idemfo Nyụn̄ Kpep Ndiyọ N̄kpọ

UNỌMỌ M̀MÊ UDỌN̄Ọ EMI MÎMAHA NDIKỤRE EKEME NDINAM OWO IKOPKE INEM UWEM. Ete kiet emi ekerede Ulf ama esinen̄ede okop inem uwem. Edi nte ini akade, enye ama ọdọn̄ọ udọn̄ọ emi akanamde enye okûkeme ndida ubọk m̀mê ukot esie nnam n̄kpọ. Enye ọkọdọhọ ete: “Mma nsifụhọ kpukpru ini. N̄kekemeke ndinam n̄kpọ ndomokiet aba. N̄kekere ke nnyeneke ufọn aba.”

Se ikọwọrọde Ulf anam nnyịn ikụt ke idụhe owo emi ekemede ndifehe mbọhọ udọn̄ọ. Kpa ye oro, enyene mme n̄kpọ emi ikemede ndinam mbak nnyịn ididọn̄ọ ntịme ntịme. Edi edieke edide imenyene idiọk udọn̄ọ, ndi oro ọwọrọ ke nnyịn idikopke aba inemesịt? Iwọrọke ntre. Se idinemede ayanam ikụt emi. Akpa kan̄a, yak ineme ndusụk item Bible emi ẹkemede ndin̄wam nnyịn ikûdọn̄ọ ntịme ntịme.

‘FARA KE IDEM.’ (1 Timothy 3:​2, 11) Ndisidia udia m̀mê ndin̄wọn̄ mmịn mbe ubọk ekeme ndinam owo ọdọn̄ọ, esinyụn̄ atahade owo. Bible ọdọhọ ete: “Kûdu ke otu mme ofobo wine, ke otu mmọ eke ẹtade unam ke en̄weme. Koro akpammịn ye ama-udia ẹyekabade ubuene.”​​—Mme N̄ke 23:​20, 21.

KÛNAM N̄KPỌ EKEDEDI EMI EDISABAREDE FI. “Ẹyak nnyịn iyet kpukpru se isabarede obụkidem ye spirit ifep ke idem nnyịn.” (2 Corinth 7:1) Mme owo ẹsisabade idemmọ ke ini mmọ ẹsịnde un̄wọn̄, ẹn̄wọn̄de sika m̀mê ikọn̄ekpo, ẹn̄wọn̄de mmịn ekaha, ẹnyụn̄ ẹdade n̄kpọsọn̄ ibọk. Itieutom United States emi ẹsitịn̄de se ẹkpenamde mbak udọn̄ọ idisuana ẹdọhọ ke ndin̄wọn̄ sika esinam owo ọdọn̄ọ nsio nsio udọn̄ọ onyụn̄ abiat ata ediwak n̄kpọ ke idem owo.

DA UWEM EMI ABASI ỌNỌDE FI NTE ATA ETI ENỌ. Bible ọdọhọ ke Abasi anam “nnyịn inyene uwem inyụn̄ isan̄a inyụn̄ idu uwem.” (Utom 17:28) Edieke imade uwem emi Abasi ọnọde nnyịn, nnyịn idinamke n̄kpọ ekededi emi ekemede ndinọ nnyịn unan mîdịghe ada nnyịn ibuot, edide ke itieutom, ke ini iwatde moto, m̀mê ke ini imekde se idinamde inem idem esịt. Ọfọn ikpeme mbak nnyịn idinam n̄kpọ emi ekemede ndinam ibiomo ndo ke ofụri eyouwem nnyịn.

 KPEME SE EKEREDE. Se nnyịn ikerede ekeme ndifịna nnyịn. Ntre, kpọn̄ ọkpọsọn̄ editịmede esịt, iyatesịt, isịnenyịn, ye mme ido ntre. Psalm 37:8 ọdọhọ ete: “Tre iyatesịt nyụn̄ kpọn̄ ifụtesịt.” Bible ọdọhọ n̄ko ete: “Ẹkûtịmede esịt ẹban̄a n̄kpọn̄, koro n̄kpọn̄ eyenyene editịmede esịt esie.”​​—Matthew 6:34.

KERE NTI N̄KPỌ. Mme N̄ke 14:30 ọdọhọ ete: “Sụn̄sụn̄ esịt edi uwem obụkidem.” Ndien Mme N̄ke 17:22 anam nnyịn idiọn̄ọ ke “esịt eke adarade ọkọk ubiak.” Ntaifiọk ẹnyịme ye se itien̄wed emi etịn̄de. Dọkta kiet ke Scotland ọdọhọ ete: “Edieke esikopde inemesịt, udûdọn̄ọke ndusụk udọn̄ọ oro mbon emi mîsikopke inemesịt ẹsidọn̄ọde.”

KPEP NDISIYỌ N̄KPỌ. Ukem nte Ulf emi iketịn̄de iban̄a, ekeme ndiyom ikpep ndiyọ se iwọrọde nnyịn. Ndusụk owo ẹsiyak se iwọrọde mmọ anam idem emem mmọ. Edi emi idin̄wamke ke usụn̄ ndomokiet. Mme N̄ke 24:10 ọdọhọ ete: “Nte idem emem fi ke usen nnanenyịn? Odudu fo oyosụhọde.”

Ndusụk owo ẹsifiak ẹkop idem ke ẹma ẹkefụhọ esisịt. Mmọ ẹsinam nsio nsio n̄kpọ emi ẹdin̄wamde mmọ ẹyọ. Se Ulf akanamde edi oro. Enye ọdọhọ ke imọ ima isibọn̄ akam isinyụn̄ itie ikere se Bible ekpepde, ndien ke oro ama anam imọ itọn̄ọ ndikụt mme n̄kpọ oro udọn̄ọ imọ anamde imọ inen̄ede idiọn̄ọ ndinam. Ukem nte mbon en̄wen emi ẹsobode nsio nsio mfịna, Ulf ama ekpep ndisitua owo mbọm, ndien emi ama anam enye esida etop Bible ọdọn̄ mbon en̄wen esịt.

Owo en̄wen emi ọkọbọde ufen etieti ke ntak n̄kpọ emi ọkọwọrọde enye edi Steve. Ke ini enye ekedide isua 15, enye ama odorode ke enyọn̄ eto ọduọ onyụn̄ obụn̄ idem idiọk idiọk; ọtọn̄ọde ke itọn̄ esie sụhọde ama akpa. Edi ke ini enye ekedide isua 18, enye ama afiak ekeme ndida ubọk esie nnam n̄kpọ. Ekem, enye ama ọtọn̄ọ ufọkn̄wed ntaifiọk. Ikebịghike, enye ama ọtọn̄ọ ndida n̄kpọsọn̄ ibọk, ndin̄wọn̄ mmịn mbe ubọk, nnyụn̄ ndu oburobụt uwem. Uwem esie ikọwọrọke n̄kpọ. Edi n̄kpọ ama okpụhọde ke ini enye ọkọtọn̄ọde ndikpep Bible. Se enye ekekpepde ama anam enye etre oburobụt uwem emi enye ekesidude. Enye ọdọhọ ete: “Uwem enem mi idahaemi. Mmenyene emem nnyụn̄ nnen̄ede n̄kop inemesịt.”

Se Steve ye Ulf ẹtịn̄de anam iti se idude ke Psalm 19:​7, 8. Itie oro ọdọhọ ete: “Ibet Jehovah ọfọn ama, edemede ukpọn̄. . . . Mme ewụhọ Jehovah ẹnen, ẹdat owo esịt; ibet Jehovah asana, an̄wan̄a owo enyịn.”