IMESIYOM MME OWO ẸMA NNYỊN. Edieke ima mîdụhe, n̄wan ye ebe idikopke inem ndọ mmọ, ubon ididianake kiet, ufan idinyụn̄ ibịghike. Ọwọrọ ima esinam esịt ana owo sụn̄, onyụn̄ anam owo okop inemesịt. Edi nso utọ ima ke itịn̄ iban̄a?

Imọdiọn̄ọ ke akpana n̄wan ye ebe ẹma kiet eken, edi idịghe ima erenowo ye n̄wan ke itịn̄ iban̄a. Itịn̄ iban̄a utọ ima emi esinamde owo enen̄ede ekere aban̄a mbon en̄wen, onyụn̄ anam n̄kpọ ọnọ mmọ mbemiso ekerede aban̄a idemesie. Utọ ima emi ke Ikọ Abasi ọdọhọ nnyịn inyene, sia utọ ima emi esinen̄ede otụk owo.

Kop se Bible etịn̄de aban̄a ima mi: “Ima enyenyene anyanime onyụn̄ ọfọn ido. Ima ifịbeke ufụp, inamke inua, ikohokede idem, inamke ido eke mîdotke, iyomke ufọn idemesie, isọpke iyatesịt. Ibatke idiọk ibon. Idarake ukwan̄ido, edi adara se idide akpanikọ. Enye ememe kpukpru n̄kpọ, . . . ododori enyịn ke kpukpru n̄kpọ, ọyọyọ kpukpru n̄kpọ. Ima idibehe ifep tutu amama.”​​—1 Corinth 13:​4-8.

Utọ ima emi edisụk idodu ke nsinsi, ntak edi oro Bible ọdọhọde ke “ima idibehe ifep tutu amama.” Nte eyo esierede, ntre ke mbon emi ẹnyenede utọ ima emi ẹditetịm ima kiet eken ikan nte ẹkesimade. Sia utọ ima emi esinamde owo enyene ime, ọfọn ido, onyụn̄ efen ọnọ owo, ima emi esinam mme owo ẹnen̄ede ẹdiana kiet. (Colossae 3:14) Ntre, mbon emi ẹnyenede utọ ima emi ẹsikop inemesịt, kpa ye oro mmọ mîfọnke ima. Yak ineme nte utọ ima emi ekemede ndinam ndọ enem.

 IMA ESINAM N̄WAN YE EBE ẸNEN̄EDE ẸDIANA KIET

Jesus Christ ama ọnọ nsio nsio item emi ẹdin̄wamde n̄wan ye ebe. Ke uwụtn̄kpọ, enye ọkọdọhọ ete: “‘Erenowo ọyọkpọn̄ ete ye eka esie onyụn̄ akadiana ye n̄wan esiemmọ, ndien mmọ mbiba ẹyekabade ẹdi obụk kiet’ . . . Mmọdo, se Abasi ama akadian yak baba owo kiet okûdian̄ade.” (Matthew 19:​5, 6) Enyene akpan n̄kpọ iba emi odude ke item emi.

“MMỌ MBIBA ẸYEKABADE ẸDI OBỤK KIET.” Idụhe owo iba emi ẹkperede kiet eken nte n̄wan ye ebe. Ndien edieke n̄wan ye ebe ẹnen̄erede ẹma idemmọ, mmọ idikpọn̄ke kiet eken ikanam ima ye owo en̄wen; oro ekpetie nte ndikabade ndi “obụk kiet” ye owo en̄wen. (1 Corinth 6:16; Mme Hebrew 13:4) Efịbe isiyakke n̄wan ye ebe ẹnyene mbuọtidem ke idem kiet eken; efịbe ekeme n̄ko ndibiat ndọ. Ndien edieke mmọ ẹnyenede nditọ, emi esinen̄ede afịna nditọ oro sia emi esinam esịt etịmede mmọ, anam mmọ ẹkere ke owo imaha mmimọ, mîdịghe ayat mmọ esịt.

“SE ABASI AMA AKADIAN.” Abasi ọkọtọn̄ọ ndọ. N̄wan ye ebe emi ẹdiọn̄ọde emi ẹsinam se mmọ ẹkekeme man ndọ mmọ enem. Idem ke ini mmọ ẹnyenede mfịna, mmọ idiyomke usụn̄ ndidian̄ade n̄kpọn̄ kiet eken. Mmọ ẹsinen̄ede ẹma idemmọ. Bible ọdọhọ ke ima “ememe kpukpru n̄kpọ.” Ntre, n̄wan ye ebe emi ẹnyenede utọ ima emi ẹsiyom usụn̄ ẹbiere mfịna mmọ man ẹnyene emem, ẹnyụn̄ ẹkop inem ndọ mmọ.

Ke ini n̄wan ye ebe ẹnen̄erede ẹma kiet eken, nditọ mmọ ẹsinen̄ede ẹdia ufọn. N̄kaiferi kiet emi ekerede Jessica ọdọhọ ete: “Ete ye eka mi ẹnen̄ede ẹma ẹnyụn̄ ẹkpono kiet eken. Ke ini n̄kụtde nte eka mi okponode ete mi, esidọn̄ mi ndikpebe enye.”

Bible ọdọhọ ke “Abasi edi ima.” (1 John 4:8) Ọwọrọ ima edi akpan edu esie. Ntre, ikpaha nnyịn idem nte Bible okotde Jehovah “Abasi inemesịt.” (1 Timothy 1:11) Nnyịn n̄ko iyokop inemesịt edieke idomode ndikpebe mme edu Abasi, akpan akpan ima. Ephesus 5:​1, 2 ọdọhọ ete: “Ẹdi mme andikpebe Abasi, nte ndima nditọ, ẹnyụn̄ ẹka iso ẹsan̄a ke ima.”