Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Utom 9;1-43

9  Edi Saul ke osụk esịn mbet+ Ọbọn̄ ndịk ke idem onyụn̄ oyom ndiwot+ mmọ, ndien aka ebịne akwa oku  ọkọdọhọ enye ọnọ imọ leta ida isọk mme synagogue emi ẹdude ke Damascus, man ikpada owo ekededi emi asan̄ade ke Usụn̄ Oro+ ke n̄kpọkọbi idi Jerusalem, iren ye iban.  Edikem nte enye ekperede Damascus, un̄wana oto ke enyọn̄ ke mbuari ayama akan enye okụk,+  ndien enye ọduọ ke isọn̄ onyụn̄ okop uyo ọdọhọde enye ete: “Saul, Saul, ntak emi afo ọkọbọde mi?”+  Enye ọdọhọ ete: “Afo edi anie, Ọbọn̄?” Enye ọdọhọ ete: “Ami ndi Jesus, emi afo ọkọbọde.+  Edi, daha ke enyọn̄+ dụk obio, ndien ẹyesian fi se anade afo anam.”  Ndien mbon emi ẹkesan̄ade ye enye+ ẹda ikemeke ndisioro uyo,+ koro mmọ ẹkopde uyo,+ edi mîkwe baba owo kiet.  Edi Saul adaha ke isọn̄, ndien okposụkedi enye atatde enyịn enye ikwe usụn̄.+ Ntre mmọ ẹmụm enye ubọk ẹnyụn̄ ẹda enye ẹdụk Damascus.  Ndien ke usen ita enye ikwe usụn̄,+ idiaha udia inyụn̄ in̄wọn̄ke n̄kpọ. 10  Mbet kiet ama odu ke Damascus emi ekerede Ananias,+ ndien Ọbọn̄ ọdọhọ enye ke n̄kukụt ete: “Ananias!” Enye ọbọrọ ete: “Se mi mi, Ọbọn̄.” 11  Ọbọn̄ ọdọhọ enye ete: “Daha ke enyọn̄, ka efak emi ẹkotde Nnennen, nyụn̄ kobụp ke ufọk Judas ban̄a owo emi ekerede Saul, emi otode Tarsus.+ Koro, sese! enye ke ọbọn̄ akam, 12  enye omonyụn̄ okụt owo emi ekerede Ananias ke n̄kukụt nte odụkde edi edidori enye ubọk man enye afiak okụt usụn̄.”+ 13  Edi Ananias ọbọrọ ete: “Ọbọn̄, mmokop nto ediwak owo mban̄a owo emi, adan̄a ediwak ndiọi n̄kpọ emi enye akanamde ndisana ikọt fo ke Jerusalem. 14  Ndien ke emi enye ama ọbọ odudu oto mbọn̄ oku ndisịn kpukpru mbon emi ẹsemede ẹkot enyịn̄ fo ke n̄kpọkọbi.”+ 15  Edi Ọbọn̄ ọdọhọ enye ete: “Daha ka, koro owo emi edi owo eke mmekde+ nte ada enyịn̄ mi aka iso mme idụt+ ye ndidem+ ye nditọ Israel. 16  Koro nyowụt enye adan̄a ediwak ukụt eke anade enye osobo kaban̄a enyịn̄ mi.”+ 17  Ntre ke Ananias adaha aka okodụk ufọk oro, ndien odori enye ubọk onyụn̄ ọdọhọ ete: “Saul, eyenete, Ọbọn̄, kpa Jesus emi okowụtde fi idem ke usụn̄ emi afo akasan̄ade edi, osio mi ọdọn̄, man afo akpafiak okụt usụn̄ onyụn̄ ọyọhọ ye edisana spirit.”+ 18  Ndien kpa idaha oro se itiede nte ikpọk ẹdian̄ade enye ke enyịn ẹduọn̄ọ, enye onyụn̄ afiak okụt usụn̄; ndien enye adaha ke enyọn̄ onyụn̄ ana baptism, 19  onyụn̄ adia udia okop odudu.+ Enye odu ndusụk usen ye mme mbet ke Damascus,+ 20  ndien kpa idaha oro enye ọtọn̄ọ ndikwọrọ Jesus ke mme synagogue,+ ete ke Enye edi Eyen Abasi. 21  Edi kpukpru mbon emi ẹkopde ikọ esie ẹkop n̄kpaidem ẹnyụn̄ ẹdọhọ ẹte: “Nte idịghe owo emi okosobo+ mmọ eke ẹsemede ẹkot enyịn̄ emi ke Jerusalem, nte enye ikonyụn̄ idịghe mi kpa kaban̄a uduak emi, man enye akpada mmọ ke n̄kpọkọbi ọsọk mbọn̄ oku?”+ 22  Edi Saul ọdọdiọn̄ okop odudu onyụn̄ anam idem akpa mme Jew oro ẹdụn̄de ke Damascus nte enye owụtde ke nde ke nde ete ke emi edi Christ.+ 23  Edi ke ata ediwak usen ẹma ẹkebe, mme Jew ẹdiomi ndiwot enye.+ 24  Nte ededi, Saul edifiọk odu emi mmọ ẹdụkde ẹban̄a enye. Edi mmọ ẹtịm ẹkpeme mme inuaotop n̄ko uwemeyo ye okoneyo man ẹkpewot enye.+ 25  Ntre mme mbet esie ẹda enye ke okoneyo ẹsịn ke akpasa ẹsụhọde ke odudu ibibene.+ 26  Ke ini enye esịmde Jerusalem,+ enye esịn ukeme ndidian idem ye mme mbet; edi kpukpru mmọ ẹfefehe enye, koro mmọ mînịmke ke akpanikọ ite enye edi mbet. 27  Ntre Barnabas edi edin̄wam+ enye onyụn̄ ada enye ebịne mme apostle, onyụn̄ asian mmọ ọyọhọ ọyọhọ nte enye okokụtde Ọbọn̄+ ke usụn̄ ye nte Ọbọn̄ eketịn̄de ikọ ye enye,+ ye nte enye eketịn̄de ikọ uko uko ke enyịn̄ Jesus ke Damascus.+ 28  Ndien enye aka iso odu ye mmọ ke Jerusalem, ododụk ọwọwọrọ, etịn̄ ikọ uko uko ke enyịn̄ Ọbọn̄;+ 29  ndien enye etịn̄ ikọ onyụn̄ eneni eneni ye mme Jew emi ẹsemde usem Greek. Edi mmọ emi ẹdomo ndiwot enye.+ 30  Ke ini nditọete ẹfiọkde emi, mmọ ẹda enye ẹsụhọde ẹdi ke Caesarea ẹnyụn̄ ẹnọ enye ọnyọn̄ Tarsus.+ 31  Ntre, esop+ ke ofụri Judea ye Galilee ye Samaria ebe odụk ini emem onyụn̄ ọkọri; ndien nte enye asan̄ade ke uten̄e Jehovah+ ye ke ndọn̄esịt edisana spirit+ enye ọdọdiọn̄ ọtọt. 32  Edikem nte Peter asan̄ade ebe ke kpukpru ikpehe enye osụhọde edi n̄ko ndise ndisana owo emi ẹdụn̄de ke Lydda.+ 33  Do enye okụt owo kiet emi ekerede Aeneas, emi anade ke n̄kpọnna esie isua itiaita, koro enye ọkọdọn̄ọde akpauben̄. 34  Ndien Peter ọdọhọ enye ete:+ “Aeneas, Jesus Christ ọkọk fi udọn̄ọ.+ Daha ke enyọn̄ tịm n̄kpana fo.” Ndien enye adaha ke enyọn̄ kpa idaha oro. 35  Ndien kpukpru mbon oro ẹdụn̄de ke Lydda ye unaisọn̄ Sharon+ ẹkụt enye, mmọ emi ẹnyụn̄ ẹwọn̄ọde ẹtiene Ọbọn̄.+ 36  Edi mbet kiet ama odu ke Joppa+ emi ekerede Tabitha, emi ọwọrọde Dorcas ke usem Greek. Enye ọyọhọ ye nti edinam+ ye mme enọ mbọm oro enye ọnọde. 37  Ekem ke mme usen oro enye ọduọ udọn̄ọ onyụn̄ akpa. Ntre mmọ ẹyet enye idem ẹnyụn̄ ẹnịm enye ke ubet enyọn̄. 38  Edi sia Lydda ekperede Joppa,+ ke ini mme mbet ẹkopde ẹte Peter odu ke obio emi, mmọ ẹsio owo iba ẹdọn̄ ẹte ẹka ẹkekpe enye ubọk ẹte: “Mbọk kûbịghi ndibe ndisịm nnyịn.” 39  Ntem Peter adaha ke enyọn̄ onyụn̄ aka ye mmọ. Ndien ke ini enye esịmde, mmọ ẹda enye ẹdọk ubet enyọn̄; ndien kpukpru mme ebeakpa ẹnyụn̄ ẹdisobo ye enye, ẹtua eyet ẹnyụn̄ ẹwụt ediwak ọfọn̄ idakidem ye ewụra+ emi Dorcas ekesikịmde ke adan̄aemi enye okodude ye mmọ.+ 40  Edi Peter anam kpukpru owo ẹwọn̄ọ,+ onyụn̄ ọtọn̄ọ edọn̄, ọbọn̄ akam, ndien, ọwọn̄ọde ese okpo, ọdọhọ ete: “Tabitha, daha ke enyọn̄!” Enye atat enyịn esie ndien, ke ini enye okụtde Peter, enye adaha etetie.+ 41  Peter anyan ubọk omụm enye, emenede enye ke enyọn̄,+ onyụn̄ okot ndisana owo ye mme ebeakpa ẹdi, ayak enye ọnọ mmọ ye uwem.+ 42  Ẹma ẹfiọk ẹban̄a n̄kpọ emi ke ofụri Joppa, ediwak owo ẹnyụn̄ ẹkabade ẹdi mme andinịm Ọbọn̄ ke akpanikọ.+ 43  Edi enye aka iso odu ata ediwak usen ke Joppa+ ye owo kiet emi ekerede Simon, akwatikpa.+

Mme Ikọ Idakisọn̄