Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Utom 4;1-37

4  Ekem ke adan̄aemi mmọ mbiba ẹsụk ẹtịn̄de ikọ ẹnọ mbio obio, mbọn̄ oku ye etubom temple+ ye mme Sadducee+ ẹdi ẹdibuat mmọ,  ẹnyụn̄ ẹyat esịt koro mmọ ẹkpepde mbio obio n̄kpọ ẹnyụn̄ ẹtan̄ade in̄wan̄-in̄wan̄ ẹte ke Jesus ama eset ke n̄kpa;+  ndien mmọ ẹmụm mmọ ẹnyụn̄ ẹsịn mmọ ke ufọk-n̄kpọkọbi tutu esịm ndan̄nsiere,+ sia ekedide mbubreyo.  Nte ededi, ediwak mbon oro ẹkekpan̄de utọn̄ ẹnọ utịn̄ikọ oro ẹnịm ke akpanikọ,+ ndien ibat mmọ edi n̄kpọ nte tọsịn ition.+   Ke ndan̄nsiere, mme andikara ye mbiowo ye mme scribe*+ mmọ ẹsop idem ọtọkiet ke Jerusalem  (ye Annas+ ọbọn̄ oku ye Caiaphas+ ye John ye Alexander ye adan̄a ediwak owo emi ẹdide iman ọbọn̄ oku),  ndien mmọ ẹnam mmọ ẹwọn̄ọ ẹdida ke ufọt ẹnyụn̄ ẹbụp mmọ ẹte: “Mbufo ẹda odudu ewe m̀mê enyịn̄ anie ẹnam n̄kpọ emi?”+  Ekem Peter ọyọhọ ye edisana spirit,+ ọdọhọ mmọ ete: “Mme andikara mbio obio ye mbiowo,  edieke ẹdade eti utom emi inamde inọ owo emi idem mîsọn̄ke+ ẹdụn̄ọde nnyịn ẹse mfịn emi, ẹte m̀mê anie anam idem ọsọn̄ owo emi, 10  kpukpru mbufo ye kpukpru mbon Israel ẹfiọk emi ẹte ke edi enyịn̄ Jesus Christ eyen Nazareth,+ emi mbufo ẹkekọn̄de ke eto,+ edi emi Abasi akanamde eset ke n̄kpa,+ edi enye emi esịn owo emi ada mi ke iso mbufo ye nsọn̄idem. 11  Emi edi ‘itiat emi mbufo mme ọbọpufọk mîkadaha ke n̄kpọ, enye amakabade edi etubom inụk.’+ 12  N̄ko-n̄ko, edinyan̄a itoho owo efen ekededi, koro enyịn̄+ baba kiet efen idụhe ke idak enyọn̄ eke ẹnọde owo, emi ẹkpedade ẹnyan̄a nnyịn.”+ 13  Edi ke ini mmọ ẹkụtde uko Peter ye John, ẹnyụn̄ ẹkụtde ke mmọ ẹdi mmọ emi mîfiọkke n̄wed* ye mme usụhọde owo,+ idem akpa mmọ. Ndien mmọ ẹdifiọk ke mmọ ẹkesidu ye Jesus;+ 14  ndien sia mmọ ẹkụtde owo emi ẹkenamde udọn̄ọ okụre nte adade ye mmọ,+ mmọ inyeneke n̄kpọ ndifan̄a.+ 15  Ntre mmọ ẹwụk mmọ ẹte ẹwọn̄ọ ẹkeda ke an̄wa ufọkesop Sanhedrin, mmọ ẹnyụn̄ ẹtọn̄ọ ndineme ke otu idemmọ, 16  ẹte: “Nso ke nnyịn idinam ye mmọ emi?+ Koro mmọ ẹmenam n̄wọrọnda idiọn̄ọ, emi kpukpru mme andidụn̄ Jerusalem ẹkụtde;+ nnyịn inyụn̄ ikemeke ndineni. 17  Nte ededi, mbak n̄kpọ emi edika iso asuana ke otu mbio obio, ẹyak nnyịn isịn mmọ ndịk ke idem ite ẹkûtịn̄ aba ikọ ye baba owo kiet ke enyịn̄ emi.”+ 18  Ndien ẹkot mmọ ẹdi ẹnyụn̄ ẹwụk mmọ ẹte ẹkûtịn̄ baba ikọ kiet m̀mê ndikpep n̄kpọ ke enyịn̄ Jesus. 19  Edi Peter ye John ẹbọrọ mmọ ẹte: “Ẹkere ise ke idem mbufo m̀mê enen ke enyịn Abasi ndikop uyo mbufo n̄kan eke Abasi. 20  Edi amaedi nnyịn, nnyịn ikemeke nditre nditịn̄ mban̄a mme n̄kpọ emi nnyịn ikokụtde inyụn̄ ikopde.”+ 21  Ntre, ke ẹma ẹkefiak ẹsịn mmọ ndịk ke idem, ẹsana mmọ ẹyak, sia mîkwe isọn̄ ndomokiet ndida nnọ mmọ ufen ye ke ntak mbio obio,+ koro kpukpru owo ẹnọde Abasi ubọn̄ ẹban̄a se iketịbede; 22  koro owo emi ẹkedade idiọn̄ọ emi ẹkọk enye udọn̄ọ ama ebe isua aba ke emana. 23  Ke ẹma ẹkesana mmọ ẹyak, mmọ ẹka ẹbịne ikọt mmọ+ ẹnyụn̄ ẹkebụk mme n̄kpọ oro mbọn̄ oku ye mbiowo ẹketịn̄de ye mmọ. 24  Ke ẹkopde emi, mmọ ẹmenede uyo mmọ ye esịt kiet ẹdọhọ Abasi+ ẹte: “Akakan Ọbọn̄ Andikara,+ afo edi Enye emi akanamde enyọn̄ ye isọn̄ ye inyan̄ ye kpukpru n̄kpọ emi ẹdude ke mmọ,+ 25  emi okonyụn̄ adade edisana spirit etịn̄ ke inua ete ete nnyịn David,+ asan̄autom fo, ete, ‘Ntak emi mme idụt ẹsịnde editịm, mbio obio ẹnyụn̄ ẹtiede ẹkere ikpîkpu n̄kpọ?+ 26  Ndidem isọn̄ ẹdaha ẹda, mme andikara ẹnyụn̄ ẹsop idem ọtọkiet nte owo kiet ndibiọn̄ọ Jehovah ye enye emi enye eyetde aran.’+ 27  Ndien, Herod ye Pontius Pilate+ ye mbon idụt ye mbon Israel ẹma ẹkam ẹsop idem ọtọkiet ke obio emi ndibiọn̄ọ edisana+ asan̄autom fo Jesus, emi afo ekeyetde aran,+ 28  man ẹkpenam mme n̄kpọ emi ubọk ye uduak fo ẹkebemde iso ẹbiere ẹte ẹtịbe.+ 29  Ndien ke emi, Jehovah, nọ ntịn̄enyịn ke ikọ ndịghe mmọ,+ nyụn̄ nọ ifịn fo ukeme ndika iso ntịn̄ ikọ fo uko uko,+ 30  ke adan̄aemi afo anyanarede ubọk fo ndikọk udọn̄ọ ye ke adan̄aemi mme idiọn̄ọ ye mme utịben̄kpọ+ ẹtịbede ke enyịn̄+ edisana asan̄autom+ fo Jesus.” 31  Ndien ke mmọ ẹma ẹkenam n̄kpeubọk, ebiet emi mmọ ẹkesopde idem ọtọkiet enyek;+ ndien kpukpru mmọ ẹyọhọ ye edisana spirit+ ẹnyụn̄ ẹtịn̄ ikọ Abasi uko uko.+ 32  Akan oro, akwa udịmowo emi ẹkenịmde ke akpanikọ ẹnyene esịt kiet ye ekikere kiet,*+ baba owo mmọ kiet inyụn̄ idọhọke ite n̄kpọ ekededi emi imọ inyenede edi eke imọ; edi kpukpru mmọ ẹkebabuana n̄kpọ.+ 33  N̄ko, mme apostle ẹka iso ẹnọ ikọ ntiense ye akwa odudu ẹban̄a ediset ke n̄kpa Ọbọn̄ Jesus;+ mfọnido oro owo mîdotke onyụn̄ odu ye kpukpru mmọ ke akamba udomo. 34  Ke akpanikọ, baba owo kiet ke otu mmọ ikodụhe ke unana;+ koro mbon emi ẹkenyenede in̄wan̄ m̀mê ufọk ẹma ẹnyam mmọ ẹnyụn̄ ẹda okụk n̄kpọ emi mmọ ẹkenyamde ẹdi 35  ẹdinịm mme apostle ke ukot.+ Ekem ẹdeme+ ẹnọ owo kiet kiet, kpa nte unana esie edide. 36  Ntre Joseph, emi mme apostle ẹkenọde enye udorienyịn̄ oro Barnabas,+ emi ọwọrọde, Eyen Ndọn̄esịt, emi edide owo esien Levi, amanaisọn̄ eyen Cyprus, 37  emi enyenede isọn̄, anyam enye onyụn̄ ada okụk edi edinịm mme apostle ke ukot.+

Mme Ikọ Idakisọn̄

Ke akpa, emi akaban̄a mme andision̄o N̄wed Abasi n̄wet, edi ke eyo Jesus, emi akaban̄a mbon oro ẹfiọkde Ibet ẹnyụn̄ ẹdide mme andikpep Ibet.
Nte an̄wan̄ade, emi aban̄a unana edibọ ukpep ke ufọkn̄wed ido ukpono mme Jew.
At. Ed., “esịt kiet ye ukpọn̄ kiet.”