Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Utom 3;1-26

3  Ekem Peter ye John ẹdọk ẹka temple ke ini akam, ke ọyọhọ hour usụkkiet,*+  ndien ẹmen owo kiet emi edide mbụn̄ọ toto ke idịbi+ eka esie ẹdi, mmọ ẹsinyụn̄ ẹnịm enye ke usen ke usen ẹkpere enyịnusụn̄ temple emi ẹkotde Ediye,+ man enye ekpeben̄e mbon oro ẹdụkde temple+ enọ mbọm.  Ke ini enye okụtde nte Peter ye John ẹyomde ndidụk temple enye ọtọn̄ọ ndiben̄e mmọ enọ mbọm.+  Edi Peter ye John ẹwụk enyịn ẹse+ enye ẹnyụn̄ ẹdọhọ ẹte: “Menede enyịn se nnyịn.”  Ntre enye owụk enyịn ese mmọ, odoride enyịn mmọ ndinọ enye n̄kpọ.  Nte ededi, Peter ọdọhọ ete: “Nnyeneke silver ye gold, edi se nnyenede ke nnọ fi:+ Ke enyịn̄ Jesus Christ eyen Nazareth,+ san̄a!”+  Ndien enye omụm enye ke ubọk nnasia+ emenede enye ke enyọn̄. Kpa idaha oro ikpat ye ọkpọ itọn̄ukot esie ẹkop odudu;+  ndien, enye obụmede adaha ke enyọn̄+ adada onyụn̄ ọtọn̄ọ ndisan̄a, onyụn̄ etiene mmọ odụk temple,+ asan̄a onyụn̄ ọfrọ onyụn̄ otoro Abasi.  Ndien kpukpru owo+ ẹkụt enye asan̄ade onyụn̄ otorode Abasi. 10  Akan oro, mmọ ẹdiọn̄ọ enye, ẹnyụn̄ ẹkụt ke enye edi owo oro ekesitiede ke Ediye+ Inuaotop temple eben̄e enọ mbọm, ndien se iketịbede inọ enye anam idem akpa mmọ, mmọ ẹnyụn̄ ẹdat esịt.+ 11  Edi, nte owo emi omụmde Peter ye John akama, kpukpru owo ẹfen̄e ẹtiene mmọ ke ebiet emi ẹkotde etehe Solomon,+ idem onyụn̄ akpa mmọ etieti. 12  Ke ini Peter okụtde emi, enye ọdọhọ mbio oro ete: “Mbon Israel, ntak emi idem akpade mbufo aban̄a emi, nso inyụn̄ inam mbufo ẹwụkde enyịn ẹse nnyịn nte n̄kpọ eke nnyịn idade odudu idem nnyịn m̀mê uten̄e Abasi nnyịn inam enye asan̄a?+ 13  Abasi Abraham ye eke Isaac ye eke Jacob,+ Abasi mme ete ete nnyịn, amada ubọn̄+ ọnọ Asan̄autom+ esie, Jesus, emi mbufo ẹkedade ẹnọ+ ẹnyụn̄ ẹkan̄de ke iso Pilate, ke ini enye ekebierede ndisana enye nyak.+ 14  Ih, mbufo ẹma ẹkan̄ edisana ye edinen owo+ oro, ẹnyụn̄ ẹben̄e ẹte ẹsana owo kiet, kpa owotowo,+ ẹyak ẹnọ mbufo, 15  ke adan̄aemi mbufo ẹwotde Akpan Isụn̄utom uwem.+ Edi Abasi ama anam enye eset ke n̄kpa, emi nnyịn idide ntiense.+ 16  Mmọdo enyịn̄ esie, sia nnyịn ibuọtde idem ke enyịn̄ esie, anam owo emi mbufo ẹkụtde ẹnyụn̄ ẹdiọn̄ọde okop nsọn̄idem, ndien mbuọtidem emi nnyịn inyenede ke enye ọnọ owo emi ọyọhọ nsọn̄idem ke iso kpukpru mbufo. 17  Ndien ke emi, nditọete, mmọfiọk nte ke mbufo ẹkenam emi ke unana ifiọk,+ kpa nte mme andikara+ mbufo ẹkenamde n̄ko. 18  Edi ke usụn̄ emi Abasi omosu mme n̄kpọ emi enye ekebemde iso ada inua kpukpru mme prọfet ọtọt, ete ke Christ imọ oyokụt ukụt.+ 19  “Ke ntre, ẹkabade esịt+ ẹnyụn̄ ẹfiak edem+ man ẹsọhi+ mme idiọkn̄kpọ mbufo ẹfep, man mme ini nduọkodudu+ ẹkpeto iso Jehovah ẹsịm mbufo 20  man enye okponyụn̄ osio Christ emi ẹkemekde ẹnọ mbufo ọdọn̄ edi, kpa Jesus, 21  emi heaven enyenede ndibọ n̄kama+ tutu esịm ini emi ẹdinamde kpukpru n̄kpọ ẹtọn̄ọ ntak ẹfọn ẹma,+ emi Abasi eketịn̄de ebe ke inua ndisana prọfet+ esie eke eset. 22  Ke akpanikọ, Moses ọkọdọhọ ete, ‘Jehovah Abasi ayanam prọfet eke edibietde mi+ adaha ada ọnọ mbufo ke otu nditọete mbufo. Ana mbufo ẹkpan̄ utọn̄ ẹnọ enye ke kpukpru n̄kpọ emi enye editịn̄de ọnọ mbufo.+ 23  Ke akpanikọ, ẹyesobo ukpọn̄ ekededi eke mîdikopke uyo Prọfet oro ẹfep ofụri ofụri ke otu mbio obio.’+ 24  Ndien kpukpru mme prọfet, ọtọn̄ọde ke Samuel ka iso ye mbon oro ẹtienede enye ke edem, kpa adan̄a ediwak mmọ emi ẹketịn̄de ikọ, ẹma ẹtịn̄ n̄ko in̄wan̄-in̄wan̄ ẹban̄a mme usen emi.+ 25  Mbufo ẹdi nditọ+ mme prọfet ye nditọ ediomi emi Abasi okodiomide ye mme ete ete mbufo, ọdọhọde Abraham ete, ‘Ndien oto ke mfri fo ke kpukpru mme ubon ke isọn̄ ẹdibọ edidiọn̄.’+ 26  Ke Abasi ama akanam Asan̄autom esie adaha ada, enye ebem iso+ osio enye ọdọn̄ ete edidiọn̄ mbufo ke ndinam mbufo owo kiet kiet ẹwọn̄ọde ẹkpọn̄ ndiọi edinam mbufo.”

Mme Ikọ Idakisọn̄

“Ọyọhọ hour usụkkiet,” oro edi, n̄kpọ nte n̄kanika ita uwemeyo.