Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Utom 2;1-47

2  Ekem ke adan̄aemi usọrọ usen Pentecost+ osụk akade iso, kpukpru mmọ ẹkedu ọtọkiet ke ebiet kiet,  ndien kpa idaha oro uyom oto heaven ọwọrọ emi ebietde uyom ata ọkpọsọn̄ ofụm, ndien enye ọyọhọ ofụri ufọk emi mmọ ẹketiede.+  Ndien mmọ ẹkụt mme edeme eke ẹbietde edemeikan̄+ nte ẹdemede ẹdoro mmọ owo kiet kiet,  ndien kpukpru mmọ ẹyọhọ ye edisana spirit+ ẹnyụn̄ ẹtọn̄ọ ndisem nsio nsio usem,+ kpa nte spirit ọnọde mmọ ukeme ndisem.  Edi, mme Jew emi ẹdụn̄de ke Jerusalem ẹma ẹdu,+ kpa mmọ eke ẹbakde Abasi,+ emi ẹtode kpukpru idụt oro ẹdude ke idak ikpaenyọn̄.  Ntre, ke ini uyom emi ọwọrọde, akwa udịmowo ẹsop idem ọtọkiet idem onyụn̄ akpa mmọ, koro owo kiet kiet okopde nte mmọ ẹtịn̄de ikọ ke usem mmọ.  Ke akpanikọ, idem ama akpa mmọ, mmọ ẹnyụn̄ ẹyịk ẹte: “Kamse, nte kpukpru mmọ emi ẹtịn̄de ikọ mi idịghe mbon Galilee?+  Anam didie ndien nnyịn owo kiet kiet ikopde nte mmọ ẹsemde usem emana nnyịn?  Mbon Parthia ye mbon Media+ ye mbon Elam,+ ye mme andidụn̄ Mesopotamia, ye Judea+ ye Cappadocia,+ Pontus+ ye Asia,*+ 10  ye Phrygia+ ye Pamphylia,+ Egypt ye mme ikpehe Libya, emi ekperede Cyrene, ye mbon Rome emi ẹdan̄de do, mme Jew ye mme okpono Abasi ke ido mme Jew,+ 11  mbon Crete+ ye mbon Arabia,+ nnyịn imokop nte mmọ ẹtịn̄de ẹban̄a ikpọ utom Abasi ke usem nnyịn.” 12  Ih, idem ama akpa mmọ kpukpru, ekikere onyụn̄ etịmede mmọ, mmọ ẹnyụn̄ ẹdọhọ kiet eken ẹte: “N̄kpọ emi ọwọrọ nso?” 13  Nte ededi, mbon efen ẹsak mmọ nsahi ẹnyụn̄ ẹdọhọ ẹte: “Edinem wine oyụhọ mmọ.”+ 14  Edi Peter adaha ada ye mme apostle duopekiet+ eken onyụn̄ emenede uyo esie ọdọhọ mmọ ete: “Mbon Judea ye kpukpru mbufo mme andidụn̄ Jerusalem,+ ẹfiọk emi ẹnyụn̄ ẹkpan̄ utọn̄ ke ikọ mi. 15  Ke akpanikọ, mbon emi ikpaha mmịn,+ nte mbufo ẹkerede, sia emi edide ọyọhọ hour ita.* 16  Utu ke oro, emi edi se ẹkedade prọfet Joel ẹtịn̄, ẹte, 17  ‘“Ndien ke mme akpatre usen,” Abasi ọdọhọ, “nyan̄wan̄a ndusụk spirit+ mi nduọk kpukpru orụk obụkidem, ndien nditọiren mbufo ye nditọiban mbufo ẹyetịn̄ prọfesi,* n̄kparawa mbufo ẹyekụt n̄kukụt, n̄kani iren mbufo ẹyenyụn̄ ẹdaba ndap;+ 18  nyonyụn̄ n̄n̄wan̄a ndusụk spirit mi ke mme usen oro nduọk ifịn iren mi ye ifịn iban mi, ndien mmọ ẹyetịn̄ prọfesi.+ 19  Ndien ami nyọnọ mme utịben̄kpọ ke heaven ke enyọn̄ ye mme idiọn̄ọ ke isọn̄ ke idak, iyịp ye ikan̄ ye uye nsụn̄ikan̄;+ 20  utịn+ ayakabade ekịm, ọfiọn̄ oyonyụn̄ akabade iyịp mbemiso akwa ye n̄wọrọnda usen Jehovah edisịm.+ 21  Ndien ẹyenyan̄a+ kpukpru owo eke ẹsemede ẹkot enyịn̄ Jehovah.”’ 22  “Mbufo mbon Israel, ẹkop ikọ emi: Jesus eyen Nazareth,+ owo emi Abasi okowụtde mbufo an̄wan̄wa ebe ke mme utom odudu+ ye mme utịben̄kpọ ye mme idiọn̄ọ oro Abasi akadade enye anam ke otu mbufo,+ kpa nte mbufo ẹfiọkde, 23  owo emi, nte enye emi ẹkedade mbiere-nnịm uduak ye mbemiso ifiọk Abasi ẹyak enye ẹnọ,+ mbufo ẹma ẹkọn̄ enye ke eto ẹwot ke ubọk mme abiatibet.+ 24  Edi Abasi amatat urụk n̄kpa+ ke ndinam enye eset,+ koro n̄kpa mîkemeke ndisọn̄ọ mmụm enye n̄kama.+ 25  Koro David etịn̄ aban̄a enye ete, ‘Mmokụt Jehovah ke iso mi kpukpru ini; koro enye odude mi ke ubọk nnasia mbak ẹdinyen̄e mi.+ 26  Ke ntak emi esịt adat mi, edeme mi onyụn̄ adara etieti. Akan oro, obụkidem mi oyodụn̄ ke idotenyịn;+ 27  koro afo mûdukpọn̄ke ukpọn̄ mi ke Udi,* udunyụn̄ uyakke owo fo emi ọsọn̄ọde ada okụt mbiara.+ 28  Afo amanam mi mfiọk usụn̄ uwem, afo ayanam mi nyọhọ ye idatesịt ke iso fo.’+ 29  “Nditọete, mmekeme ndida ifụre utịn̄ikọ oro nnyenede ntịn̄ ikọ nnọ mbufo mban̄a ete ubon oro David, nte ke enye ama akpa+ ẹnyụn̄ ẹbụk enye, ndien udi esie odu ye nnyịn tutu esịm mfịn emi. 30  Ke ntre, sia enye ekedide prọfet onyụn̄ ọfiọkde ete ke Abasi ama ọn̄wọn̄ọ un̄wọn̄ọ ọnọ imọ ete ke iyada mfri emi otode imọ ke idem ọwọrọ, idori ke ebekpo+ imọ, 31  enye ama ebem iso okụt onyụn̄ etịn̄ aban̄a ediset ke n̄kpa Christ, ete ke Abasi ikọkpọn̄ke enye ke Udi,* obụkidem esie ikonyụn̄ ikwe mbiara.+ 32  Abasi akanam Jesus emi eset ke n̄kpa, emi kpukpru nnyịn idide ntiense.+ 33  Ke ntre sia ẹma ẹkemenede enye ẹnịm ke ubọk nnasia Abasi,+ enye onyụn̄ ọbọde Ete+ edisana spirit emi ẹken̄wọn̄ọde ndinọ, enye an̄wan̄a se mbufo ẹkụtde ẹnyụn̄ ẹkopde emi. 34  Ke akpanikọ David ikọdọkke ikodụk heaven,+ edi enye ọdọhọ ete, ‘Jehovah ọkọdọhọ Ọbọn̄ mi ete: “Tie mi ke ubọk nnasia,+ 35  tutu nda mme asua fo nnịm nte udoriukot fo.”’+ 36  Ke ntre yak ofụri ufọk Israel ẹtịm ẹfiọk ẹte Abasi ama anam enye edi Ọbọn̄+ ye Christ, kpa Jesus emi mbufo ẹkekọn̄de ke eto.”+ 37  Ekem ke ini mmọ ẹkopde emi esịt afịna mmọ,+ mmọ ẹnyụn̄ ẹdọhọ Peter ye mme apostle eken ẹte: “Nditọete, nso ke nnyịn inyene ndinam?”+ 38  Peter ọdọhọ mmọ ete: “Ẹkabade esịt,+ kpukpru mbufo ẹnyụn̄ ẹna baptism+ ke enyịn̄+ Jesus Christ man ẹfen+ mme idiọkn̄kpọ mbufo, ndien mbufo ẹyebọ edisana spirit emi edide enọ+ mfọn. 39  Koro un̄wọn̄ọ+ emi enyene mbufo ye nditọ mbufo ye kpukpru mbon oro ẹdude nsannsan,+ kpa adan̄a ediwak owo nte Jehovah Abasi nnyịn edikotde ẹtiene enye.”+ 40  Ndien enye ada ediwak ikọ efen ọnọ ọyọhọ ikọ ntiense onyụn̄ ọdọdiọn̄ eteme mmọ, ete: “Ẹnyan̄a idem ẹsio ke n̄kakwan̄a emana emi.”+ 41  Ntre mbon emi ẹkenyịmede ikọ esie ke ofụri esịt ẹna baptism,+ ndien ke usen oro n̄kpọ nte ukpọn̄ tọsịn ita ẹdiana+ ye mmọ. 42  Ndien mmọ ẹka iso ndisịn idem ke ukpepn̄kpọ mme apostle ye edibuana n̄kpọ ye kiet eken,+ ẹdia udia+ ọtọkiet enyụn̄ ẹkọbọ ke akam.+ 43  Ke akpanikọ, ndịk ọtọn̄ọ ndimụm kpukpru ukpọn̄, mme apostle ẹnyụn̄ ẹtọn̄ọ ndinam ediwak utịben̄kpọ ye mme idiọn̄ọ.+ 44  Kpukpru mbon oro ẹkabarede ẹdi mme andinịm ke akpanikọ ẹdu ọtọkiet ẹnyụn̄ ẹbuana kpukpru n̄kpọ,+ 45  mmọ ẹnyụn̄ ẹnyam inyene+ mmọ ye kpukpru n̄kpọ mmọ ẹnyụn̄ ẹdeme okụk ẹnọ kpukpru owo, nte unana owo edide.+ 46  Ndien ke usen ke usen mmọ ẹsọn̄ọ ẹdu ke temple ye esịt kiet,+ ẹnyụn̄ ẹdia udia mmọ ke ufọk kiet eken ẹnyụn̄ ẹdia udia ye akwa idara+ ye ke eti esịt, 47  ẹtoro Abasi ẹnyụn̄ ẹkụt mfọn ke iso kpukpru owo.+ Ke ukem ini oro, Jehovah aka iso ndida mbon oro ẹnyan̄ade+ ndian+ nnọ mmọ ke usen ke usen.

Mme Ikọ Idakisọn̄

Asia enye emi edi mbahade obio ukara ke Obio Ukara Rome.
“Ọyọhọ hour ita,” oro edi, n̄kpọ nte n̄kanika usụkkiet usenubọk.
Emi ekeme ndisịne ntịn̄nnịm ikọ, etop eke odudu spirit, ọkọrọ ye uduak Abasi oro ẹyararede m̀mê ẹtan̄ade.
Gr., “Hades.” Se N̄w. Ik. 5.
Gr., “Hades.”