Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

Utom 19;1-41

19  Edikem, ke adan̄aemi Apollos+ odude ke Corinth, Paul asan̄a ke esịt obio ebe onyụn̄ osụhọde edi Ephesus,+ onyụn̄ okụt ndusụk mbet;  ndien enye obụp mmọ ete: “Nte mbufo ẹma ẹbọ edisana spirit+ ke ini mbufo ẹkekabarede ẹdi mme andinịm ke akpanikọ?” Mmọ ẹbọrọ enye ẹte: “Kamse, akananam nnyịn ikopke ite edisana spirit odu.”+  Ndien enye obụp ete: “Nso orụk baptism ke ẹkenịm mbufo?” Mmọ ẹbọrọ ẹte: “Baptism John.”+  Paul ọdọhọ ete: “John ekenịm owo baptism nte idiọn̄ọ edikabade esịt,+ ọdọhọde mme owo ete ẹnịm enye emi etienede imọ ke edem+ ke akpanikọ, oro edi, Jesus.”  Ke ẹkopde emi, mmọ ẹna baptism ke enyịn̄ Ọbọn̄ Jesus.+  Ndien ke ini Paul odoride mmọ ubọk,+ edisana spirit edi edidoro mmọ ke idem, mmọ ẹnyụn̄ ẹtọn̄ọ ndisem nsio nsio usem ẹnyụn̄ ẹtịn̄ prọfesi.*+  Ke ofụri ofụri, ẹkedi n̄kpọ nte irenowo duopeba.  Ekem enye odụk synagogue,+ etịn̄ ikọ ye uko ke ọfiọn̄ ita, ọnọ utịn̄ikọ onyụn̄ ada mbukpek etịn̄ aban̄a obio ubọn̄ Abasi.+  Edi ke ini ndusụk mmọ ẹsọn̄de esịt mînyụn̄ inịmke ke akpanikọ,+ ẹnyụn̄ ẹtịn̄de n̄kpọ ẹbiat Usụn̄ Oro+ ke iso mbio obio, enye ọkpọn̄ mmọ+ onyụn̄ adian̄ade mme mbet ọkpọn̄ mmọ,+ ọnọ utịn̄ikọ ke usen ke usen ke efe mbono ufọkn̄wed Tyrannus. 10  Emi akada itie ke isua iba,+ tutu kpukpru mbon oro ẹdụn̄de ke Asia,*+ mme Jew ye mme Greek,* ẹkop ikọ Ọbọn̄. 11  Ndien Abasi ọdọdiọn̄ ada ubọk Paul anam n̄wọrọnda utom odudu,+ 12  tutu ẹda ọfọn̄ ye mbọbọ esie ẹsọk mbon emi idem mîsọn̄ke,+ ndien udọn̄ọ okụre mmọ, ndiọi spirit ẹnyụn̄ ẹwọn̄ọ mmọ ke idem.+ 13  Edi ndusụk nyon̄ Jew emi ẹkesibịnde mme demon+ ẹfep ẹdomo n̄ko nditan̄a enyịn̄ Ọbọn̄ Jesus+ nnọ mbon oro ẹnyenede ndiọi spirit, ẹdọhọde ẹte: “Mmenen̄ede n̄wụk+ mbufo ke enyịn̄ Jesus emi Paul ọkwọrọde.” 14  Ndien iren itiaba emi ẹdide nditọ Sceva, ọbọn̄ oku mme Jew, ẹkenam emi. 15  Edi idiọk spirit oro ọdọhọ mmọ ete: “Mmọfiọk Jesus+ mmonyụn̄ mmehe ye Paul;+ edi mbufo ẹdi mmanie?” 16  Ndien owo emi idiọk spirit okodude enye ke idem ọfrọ ọkọtọ mmọ,+ an̄wana ye mmọ kiet kiet, onyụn̄ akan mmọ, tutu mmọ ẹda unan ẹfen̄e iferi ẹwọn̄ọ ke ufọk oro. 17  Kpukpru owo, mme Jew ye mme Greek oro ẹdụn̄de ke Ephesus, ẹdi ẹdifiọk emi; ndien ndịk+ anam kpukpru mmọ, ẹnyụn̄ ẹdọdiọn̄ ẹkpono enyịn̄ Ọbọn̄ Jesus.+ 18  Ndien ediwak mmọ emi ẹkekabarede ẹdi mme andinịm ke akpanikọ ẹdi ẹdiyarade+ ẹnyụn̄ ẹtịn̄ se mmọ ẹkenamde an̄wan̄wa. 19  Ke akpanikọ, ediwak mmọ emi ẹkesibrede mfọni+ ẹtan̄ n̄wed mmọ ẹbon ọtọkiet ẹnyụn̄ ẹfọp mmọ ke iso kpukpru owo. Ndien mmọ ẹbat ekọmurua mmọ ẹnyụn̄ ẹkụt ke ẹdi mbak silver tọsịn aba ye duop. 20  Ntem ke ikọ Jehovah ọdọdiọn̄ ọkọri onyụn̄ akan ke okopodudu usụn̄.+ 21  Ke mme n̄kpọ emi ẹma ẹkebe, Paul aduak ke spirit esie ete, ke ima isan̄a ke Macedonia+ ye Achaia ibe, imọ iyebe ika Jerusalem,+ ọdọhọde ete: “Mma nsịm do ana n̄ka n̄kese Rome+ n̄ko.” 22  Ntre ke enye osio owo iba ke otu mbon oro ẹsan̄ade utom ẹnọ enye, Timothy+ ye Erastus,+ ọdọn̄ ẹka Macedonia, edi enye osụk odu ndusụk ini ke Asia.* 23  Ke ini oro akwa ndutịme+ etịbe aban̄a Usụn̄ Oro.+ 24  Koro owo kiet emi ekerede Demetrius, odom silver, ama esinam mme anamutom usọ ẹkọ uwak udori ebe ke enye ndida silver nnam mme itieuwa Artemis;*+ 25  ndien enye okot mmọ ye mbon oro ẹnamde orụk n̄kpọ+ oro obon ọtọkiet onyụn̄ ọdọhọ ete: “Mme ete, mbufo ẹmetịm ẹfiọk ẹte uforo nnyịn oto mbubehe emi.+ 26  N̄ko, mbufo ẹmekụt ẹnyụn̄ ẹkop ke idịghe ke Ephesus+ ikpọn̄ edi ekpere ndidi ke ofụri Asia* ke Paul emi ekpek ata ediwak owo ẹnịm ke akpanikọ onyụn̄ anam mmọ ẹwọn̄ọde ẹnyene ekikere en̄wen, ọdọhọde ete ke mme abasi eke ẹdade ubọk+ ẹnam idịghe abasi. 27  Akan oro, n̄kpọndịk emi odude idịghe nte ke ẹyeda esuene ẹsọk ubọkutom nnyịn emi kpọt, edi n̄ko nte ke owo idibatke temple akwa abasi-an̄wan Artemis+ ke n̄kpọ, ẹyenyụn̄ ẹbiat akwa ubọn̄ esie emi ofụri Asia* ye ofụri isọn̄ ẹtuakde ibuot ẹnọ.” 28  Ke ini mmọ ẹkopde emi esịt enen̄ede ayat mmọ, mmọ ẹnyụn̄ ẹfiori ẹte: “Artemis mbon Ephesus omokpon!” 29  Ntre ndutịme ọyọhọ obio, mmọ ẹnyụn̄ ẹbụmede ẹfehe ye esịt kiet ẹkedụk akwa efe ndise, ẹmụm Gaius ye Aristarchus,+ mbon Macedonia, emi ẹsan̄ade ye Paul. 30  Paul oyom ndidụk ntiene mmọ oro, edi mme mbet inyịmeke inọ enye. 31  Idem ndusụk mme esenyịn usọrọ ye mbre, emi ẹtiede ufan ufan ye enye, ẹdọn̄ ẹkekpe enye ubọk ẹte enye okûsịn uwem esie ke itiendịk ke akwa efe ndise oro. 32  Akpanikọ edi, ndusụk owo ẹkefiori n̄kpọ kiet, mmọ en̄wen ẹnyụn̄ ẹfiori n̄kpọ efen;+ koro esop odude ke ndutịme, ediwak mmọ inyụn̄ ifiọkke ntak eke mmọ ẹdide ẹdisop idem ọtọkiet. 33  Ntre mmọ ẹdiana kiet ẹmụm Alexander ẹsio ke otuowo, mme Jew ẹnyụn̄ ẹnụk enye ọwọrọ iso; ndien Alexander ada ubọk esie anam idiọn̄ọ onyụn̄ oyom nditịn̄ ikọ unyan̄a idem nnọ mbio obio. 34  Edi ke ini mmọ ẹfiọkde ẹte ke enye edi eyen Jew, kpukpru mmọ ẹsio n̄kpo ẹnyụn̄ ẹfiori uyo kiet ke n̄kpọ nte hour iba, ẹte: “Artemis mbon Ephesus omokpon!”+ 35  Ke akpatre, ke ini ewetn̄wed obio ama akanam otuowo ẹdop uyo,+ enye ọdọhọ ete: “Mbon Ephesus, anie ke otu ubonowo mîfiọkke ite obio Ephesus edi andikpeme temple akwa Artemis ye mbiet emi okotode heaven ọduọ ke isọn̄? 36  Ke ntre sia owo mîkemeke ndineni n̄kpọ emi, odot mbufo ẹsụhọde esịt ẹkûnyụn̄ ẹnam n̄kpọ ke ibụmede.+ 37  Koro mbufo ẹmeda mmọ emi ẹdi emi mîdịghe mme andiwo temple mînyụn̄ idịghe mme andisụn̄i abasi-an̄wan nnyịn. 38  Ke ntre edieke Demetrius+ ye mme anamutom usọ emi ẹdude ye enye ẹnyenede ikọ ye owo ekededi, mme usen ẹdu emi ẹsidụkde esop,+ mme andikara+ ẹnyụn̄ ẹdu; yak mmọ ẹda ikọ emi mmọ ẹdoride kiet eken ẹdi. 39  Edi, edieke edide odu n̄kpọ efen emi mbufo ẹyomde ẹkan oro, ana ẹbiere oro ke ata esop. 40  Koro nnyịn inen̄ede idu ke itiendịk edidi se ẹbiomde ikpe kaban̄a ndutịme emi odude mfịn emi, ke emi nnyịn mînyeneke ntak ndomokiet ndinọ mban̄a otu mbon ntịme emi.” 41  Ndien ke ini enye ama eketịn̄ mme n̄kpọ emi ama,+ enye asuan esop.+

Mme Ikọ Idakisọn̄

Emi ekeme ndisịne ntịn̄nnịm ikọ, etop eke odudu spirit, ọkọrọ ye uduak Abasi oro ẹyararede m̀mê ẹtan̄ade.
Eyedi emi aban̄a mbon oro ẹkesemde usem Greek, kpa mbon emi mîkedịghe mme Jew.
Se ik. id. Ut 2:9.
Se ik. id. Ut 2:9.
M̀mê, “Diana.”
Se ik. id. Ut 2:9.
Se ik. id. Ut 2:9.