Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Utom 13;1-52

13  Edi mme prọfet+ ye mme andikpep ẹma ẹdu ke esop Antioch, Barnabas ọkọrọ ye Symeon emi ekerede Niger, ye Lucius+ owo Cyrene, ye Manaen emi ọkọbọde ukpep ọtọkiet ye Herod andikara n̄kann̄kụk, ye Saul.  Nte mmọ ẹsan̄ade utom+ an̄wan̄wa ẹnọ Jehovah ẹnyụn̄ ẹtrede udia, edisana spirit ọdọhọ ete: “Ẹdian̄ade Barnabas ye Saul+ ẹnịm ẹnọ mi man ẹnam utom emi n̄kokotde mmọ nnọ.”  Ekem mmọ ẹtre udia ẹnyụn̄ ẹbọn̄ akam ẹnyụn̄ ẹdori mmọ ubọk+ ẹnyụn̄ ẹyak mmọ ẹka.  Ntre iren emi, emi edisana spirit osiode ọdọn̄, ẹsụhọde ẹka Seleucia, ẹnyụn̄ ẹto do ẹsio ẹka Cyprus.  Ndien ke ini mmọ ẹsịmde Salamis mmọ ẹtọn̄ọ ndikwọrọ ikọ Abasi ke mme synagogue mme Jew. Mmọ ẹma ẹda John+ n̄ko man asan̄a utom ọnọ mmọ.  Ke mmọ ẹma ẹkesan̄a ke ofụri isuo oro ẹsịm Paphos, mmọ ẹsobo ye owo kiet, abiaidiọn̄, prọfet nsu,+ eyen Jew emi ekerede Bar-Jesus,  ndien enye okodu ye andikara oro Sergius Paulus, ọfiọkn̄kpọ owo. Owo emi okot Barnabas ye Saul ẹdi onyụn̄ enen̄ede oyom ndikop ikọ Abasi.  Edi Elymas abiaidiọn̄ (nte ẹkabarede enyịn̄ esie edi oro) ọtọn̄ọ ndibiọn̄ọ mmọ,+ oyom ndiwọn̄ọde andikara oro n̄kpọn̄ mbuọtidem.  Saul, emi n̄ko edide Paul, ọyọhọ ye edisana spirit, owụk enyịn ese enye 10  onyụn̄ ọdọhọ ete: “O afo emi ọyọhọde ye kpukpru orụk abian̄a ye kpukpru orụk oburobụt ido, afo eyen Devil,+ afo emi asuade kpukpru n̄kpọ eke ẹnende, nte afo udutreke ndikwan̄a ndinen usụn̄ Jehovah? 11  Ndien, ke emi, sese! ubọk Jehovah odoro fi ke idem, afo oyonyụn̄ edi nnan, udukwe un̄wana utịn ke ndusụk ini.” Kpa idaha oro ntụhube ye ekịm ẹfụk enye, ndien enye asan̄a oyom owo eke omụmde enye ubọk+ asan̄a. 12  Ekem ke ini andikara+ oro okụtde se itịbede, enye akabade edi andinịm ke akpanikọ, sia idem akpade enye aban̄a ukpepn̄kpọ Jehovah. 13  Iren emi, ọkọrọ ye Paul, ẹsio ẹkpọn̄ Paphos ẹnyụn̄ ẹdisịm Perga emi odude ke Pamphylia.+ Edi John+ ọkpọn̄ mmọ afiak+ ọnyọn̄ Jerusalem. 14  Edi mmọ ẹto ke Perga ẹbe ẹka Antioch ke Pisidia, ndien mmọ ẹdụk synagogue+ ke usen sabbath ẹnyụn̄ ẹsụhọde ẹtetie. 15  Ke ẹma ẹkekot Ibet+ ye ikọ mme Prọfet an̄wan̄wa, ikpọ owo emi ẹtiede ibuot+ ke synagogue ẹdọn̄ ẹkedọhọ mmọ ẹte: “Nditọete, edieke edide ẹmenyene ikọ nsịnudọn̄ ekededi ẹnọ mbio obio, ẹtịn̄.” 16  Ntre Paul adaha ke enyọn̄, ada ubọk anam idiọn̄ọ,+ onyụn̄ ọdọhọ ete: “Nditọ Israel ye mbufo eken emi ẹbakde Abasi, ẹkop.+ 17  Abasi nditọ Israel emi ekemek mme ete ete nnyịn, ndien enye ama emenede mmọ ke enyọn̄ ke ini mmọ ẹkedụn̄de nte isenowo ke isọn̄ Egypt onyụn̄ ada ọkpọsọn̄ ubọk* osio mmọ ke esịt.+ 18  Ndien enye ọyọ edinam mmọ ke wilderness ke n̄kpọ nte isua aba.+ 19  Ke ama okosobo idụt itiaba ke isọn̄ Canaan, enye esịn afia+ edeme isọn̄ mmọ: 20  kpukpru oro ke n̄kpọ nte isua ikie inan̄ ye aba ye duop. “Ndien ke mme n̄kpọ emi ẹma ẹkebe, enye ọnọ mmọ mme ebiereikpe tutu esịm eyo Samuel prọfet.+ 21  Edi ọtọn̄ọde ke ini oro ka iso mmọ ẹyom edidem,+ ndien Abasi ọnọ mmọ Saul eyen Kish, owo esien Benjamin,+ ke isua aba. 22  Ndien ke ama okodorode enye,+ enye anam David adaha ada nte edidem mmọ,+ emi enye eketiede ntiense aban̄a onyụn̄ ọdọhọde ete, ‘Mmokụt David eyen Jesse,+ owo emi ekemde esịt ye ami,+ emi edinamde kpukpru n̄kpọ emi nyomde.’+ 23  Oto ke ubon+ owo emi nte ekemde ye un̄wọn̄ọ esie ke Abasi ọnọ Israel andinyan̄a,+ kpa Jesus, 24  ke John+ ama ekebem Owo+ oro iso edikwọrọ baptism an̄wan̄wa nte idiọn̄ọ edikabade esịt ọnọ kpukpru mbon Israel. 25  Edi nte John osụk anamde utom esie, enye ọdọhọ ete, ‘Mbufo ẹkere ẹte ami ndi anie? Ami ndịghe enye. Edi, sese! owo kiet ke etiene mi ke edem emi mmendotke nditat enye urụk ikpaukot ke ukot.’+ 26  “Nditọete, mbufo nditọ orụk Abraham ye mmọ eken ke otu mbufo emi ẹbakde Abasi, ẹma ẹnọ ikọ edinyan̄a emi ẹsọk nnyịn.+ 27  Koro mme andidụn̄ Jerusalem ye mme andikara mmọ ikọfiọkke Owo+ emi, edi, ke ini ẹbierede ikpe, mmọ ẹkenam mme n̄kpọ emi mme Prọfet ẹketịn̄de ẹsu,+ kpa mme n̄kpọ emi ẹsikotde uyo ọwọrọ ke kpukpru Sabbath, 28  ndien, okposụkedi mmọ mîkekwe ntak emi enye odotde n̄kpa,+ mmọ ẹben̄e Pilate ẹte ẹwot enye.+ 29  Edi, ke ini mmọ ẹma ẹkenam kpukpru n̄kpọ emi ẹkewetde ẹban̄a enye ẹsu,+ mmọ ẹkọn̄ọde enye ke eto+ ẹkesịn ke udi.*+ 30  Edi Abasi anam enye eset ke n̄kpa;+ 31  ndien mbon oro ẹkesan̄ade ye enye ẹto Galilee ẹdọk ẹdi Jerusalem ẹma ẹkụt enye ke ediwak usen, mmọ ke emi ẹdi ntiense esie ẹnọ mbio obio.+ 32  “Ndien ke ntre nnyịn itan̄a eti mbụk emi aban̄ade un̄wọn̄ọ emi ẹken̄wọn̄ọde ẹnọ mme ete ete inọ mbufo,+ 33  ite Abasi ama anam enye osu ofụri ofụri ọnọ nnyịn emi idide nditọ mmọ ke emi enye akanamde Jesus eset;+ kpa nte ẹwetde ke udiana psalm ẹte, ‘Afo edi eyen mi, ami mmakabade ndi Ete fo mfịn emi.’+ 34  Ndien kaban̄a enye ndikanam enye eset ke n̄kpa emi enye mîdifiakke aba inyene mbiara ikpọkidem, enye etịn̄ ntem ete, ‘Ami nyowụt mbufo ima-mfọnido emi mîsehekede, emi n̄wụtde David.’+ 35  Ntem enye ọdọhọ n̄ko ke psalm en̄wen ete, ‘Afo uduyakke owo fo emi ọsọn̄ọde ada okụt mbiara.’+ 36  Koro David+ ama anam uduak Abasi ke emana esie onyụn̄ ede ke n̄kpa ndien ẹbụk enye ye mme ete ete esie, enye ama onyụn̄ okụt mbiara.+ 37  Edi enye emi Abasi akanamde eset ikekwe mbiara.+ 38  “Ke ntre nditọete, ẹfiọk ẹte ke ẹmekwọrọ edifen mme idiọkn̄kpọ ẹnọ mbufo ebe ke Owo emi;+ 39  ye nte ke kpukpru n̄kpọ eke owo mîkpetebeke mbufo ikpe ke ibet Moses,+ ebede ke Owo emi ẹmetebe kpukpru owo eke ẹnịmde ke akpanikọ ikpe.+ 40  Mmọdo ẹkụt ẹte se ẹtịn̄de ke uwetn̄kpọ mme Prọfet isịmke mbufo, 41  ‘Mbufo emi esede n̄kpọ ke mbio, ẹse ẹnyụn̄ ẹdu ke n̄kpaidem ẹban̄a emi, ẹnyụn̄ ẹbe ẹfep, koro ami ke nnam utom ke eyo mbufo, kpa utom eke mbufo mîdinịmke ke akpanikọ idem ekpededi owo obụk enye ofụri ofụri ọnọ mbufo.’”+ 42  Edikem ke ini mmọ ẹwọn̄ọde, mme owo ẹtọn̄ọ ndikpe ubọk ẹte ẹtịn̄ mme n̄kpọ emi ẹnọ mmimọ ke sabbath+ en̄wen. 43  Ntre ke mbono synagogue oro asuanade, ediwak mme Jew ye mme okpono Abasi ke ido mme Jew emi ẹtuakde ibuot ẹnọ Abasi ẹtiene Paul ye Barnabas,+ emi ẹtịn̄de ikọ ẹnọ mmọ ẹnyụn̄ ẹkpede+ ye mmọ ẹte ẹka iso ẹdu ke mfọnido Abasi oro owo mîdotke.+ 44  Ke sabbath oro etienede, ekpere ndidi kpukpru owo ke obio ẹma ẹsop idem ndikop ikọ Jehovah.+ 45  Ke ini mme Jew ẹkụtde otuowo, ufụp+ ọyọhọ mmọ esịt, mmọ ẹnyụn̄ ẹtọn̄ọ ndida ikọ isụn̄i nneni mme n̄kpọ oro Paul etịn̄de.+ 46  Ndien Paul ye Barnabas ẹtịn̄ ikọ uko uko ẹte: “Akana ẹbem iso ẹtịn̄ ikọ Abasi ẹnọ mbufo.+ Sia mbufo ẹsịnde+ ikọ oro ẹnyụn̄ ẹkerede ke mmimọ idotke ndinyene nsinsi uwem, sese! nnyịn imọwọn̄ọde itiene mme idụt.+ 47  Ke akpanikọ, Jehovah ada mme ikọ emi owụk nnyịn, ete, ‘Mmemek fi nte un̄wana mme idụt,+ man afo ekpedi edinyan̄a tutu esịm utịt isọn̄.’”+ 48  Ke ini mbon idụt ẹkopde emi, mmọ ẹtọn̄ọ ndidara ẹnyụn̄ ẹnọ ikọ Jehovah ubọn̄,+ ndien kpukpru mbon oro ẹnyenede eti esịt oro edinamde mmọ ẹnyene nsinsi uwem ẹkabade ẹdi mme andinịm ke akpanikọ.+ 49  N̄ko-n̄ko, ẹka iso ndisuan ikọ Jehovah ke ofụri idụt oro.+ 50  Edi mme Jew+ ẹdemede iban eke ẹtịmde ẹkpono emi ẹtuakde ibuot ẹnọ Abasi ye ikpọ owo obio, ndien mmọ ẹtọn̄ọ ndikọbọ+ Paul ye Barnabas ẹnyụn̄ ẹbịn mmọ ẹsion̄o ke obio mmọ. 51  Mmọ emi ẹken̄ ntan ikpat mmọ ẹbon ẹnọ mmọ+ ẹnyụn̄ ẹdaha ẹka Iconium. 52  Ndien mme mbet ẹka iso ndiyọhọ ye idatesịt+ ye edisana spirit.

Mme Ikọ Idakisọn̄

At. Ed., “edimenede ubọk.”
At. Ed., “udi editi.”