Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

Utom 12;1-25

12  Ke n̄kpọ nte ukem ini oro, Herod edidem ọtọn̄ọ ndifiomo+ ndusụk mbon emi ẹdude ke esop.  Enye owot James eyeneka John+ ke akan̄kan̄.+  Sia enye okụtde ete emi enem mme Jew esịt,+ enye aka okomụm Peter n̄ko. (Edi, emi ekedi mme usen usọrọ uyo eke leaven mîdụhe.)+  Ndien ke ama okomụm enye, esịn enye ke ufọk-n̄kpọkọbi,+ onyụn̄ ayak enye ọnọ otu mbonekọn̄ inan̄ emi otu kiet kiet esịnede mbonekọn̄ inan̄ ete ẹkpeme enye ke adiana ke adiana, sia enye aduakde ndisio enye nnọ mbio obio ke passover ama ebe.+  Mmọdo ẹsịn Peter ke ufọk-n̄kpọkọbi; edi esop ẹka iso ndibọn̄ akam+ ifịk ifịk nnọ Abasi mban̄a enye.  Edikem ke ini Herod oyomde ndisio enye ndi, okoneyo oro Peter ede idap ke ufọt mbonekọn̄ iba emi ẹdade n̄kpọkọbi iba ẹkọbi enye, mbon ukpeme ẹnyụn̄ ẹda ke enyịnusụn̄ ẹkpeme ufọk-n̄kpọkọbi.  Edi, sese! angel Jehovah ada+ enye ke n̄kan̄, un̄wana onyụn̄ ayama ke ubet ufọk-n̄kpọkọbi. Enye atuak Peter ke n̄kan̄ edemede enye,+ onyụn̄ ọdọhọ ete: “Daha ke enyọn̄ iwiwa!” Ndien n̄kpọkọbi ẹfọrọde+ enye ke ubọk.  Angel+ oro ọdọhọ enye ete: “Ben̄e idem nyụn̄ sịne ikpaukot fo.” Enye anam ntre. Ke akpatre enye ọdọhọ enye ete: “Men ewụra+ fo sịne nyụn̄ tiene mi.”  Ndien enye ọwọrọ onyụn̄ etiene enye, edi enye ifiọkke ite ke se angel oro anamde edi ata idem n̄kpọ. Enye akakam ekere ete imọ ikụt n̄kukụt.+ 10  Mmọ ẹsan̄a ẹbe akpa ye udiana mbon ukpeme, ẹnyụn̄ ẹdisịm inuaotop ukwak emi ẹsisan̄ade ẹdụk obio, ndien usụn̄ inuaotop oro eberede ikpọn̄+ ọnọ mmọ. Ndien ke mmọ ẹma ẹkewọn̄ọ, mmọ ẹsan̄a ẹsụhọde ke efak kiet, ndien kpa idaha oro angel oro adaha ọkpọn̄ enye. 11  Ndien enyịn an̄wan̄a Peter, enye onyụn̄ ọdọhọ ete: “Ke emi mmọfiọk ke akpanikọ nte ke Jehovah ama osio+ angel esie ọdọn̄ onyụn̄ anyan̄a+ mi osio ke ubọk Herod ye ke ofụri se mme Jew ẹkedoride enyịn.” 12  Ndien ke enye ama ekekere n̄kpọ emi, enye aka ufọk Mary eka John emi udorienyịn̄ esie edide Mark,+ ke ebiet emi ediwak owo ẹkesopde idem ẹnyụn̄ ẹbọn̄de akam. 13  Ke ini enye ọkọn̄de usụn̄ inuaotop, ofụn an̄wan kiet emi ekerede Rhoda edi ediyere ikot, 14  ndien, ke ọdiọn̄ọde uyo Peter, idatesịt iyakke enye eberede inuaotop, edi efehe odụk esịt ufọk eketịn̄ ete ke Peter mmọdo ke inuaotop ada. 15  Mmọ ẹdọhọ enye ẹte: “Idat anam fi.” Edi enye ọsọn̄ọ ọdọhọ ete edi ntre. Mmọ ẹtọn̄ọ ndidọhọ ẹte: “Edi angel esie.”+ 16  Edi Peter osụk ada do ọkọn̄ usụn̄. Ke ini mmọ ẹbererede, mmọ ẹkụt enye, idem onyụn̄ akpa mmọ. 17  Edi enye ada ubọk anam idiọn̄ọ+ ọnọ mmọ ete ẹdop uyo onyụn̄ asian mmọ ọyọhọ ọyọhọ nte Jehovah okosiode enye ke ufọk-n̄kpọkọbi, ndien enye ọdọhọ ete: “Ẹtịn̄ n̄kpọ emi ẹnọ James+ ye nditọete.” Ndien enye ọwọrọ aka ebiet en̄wen. 18  Edikem, ke ini eyo esierede,+ akwa ndutịme odu ke otu mbonekọn̄ aban̄a se iketịbede inọ Peter. 19  Herod+ etịn̄ enyịn oyom enye ndien, ke ini mîkwe enye, enye obụp mbon ukpeme mbụme onyụn̄ owụk ete ẹda mmọ ẹkenọ ufen;+ ndien enye oto Judea osụhọde aka Caesarea onyụn̄ okodu do ke ndusụk ini. 20  Edi enye ama ayat esịt ye mbon Tyre ye Sidon. Ntre mmọ ẹsan̄a ye esịt kiet ẹdi ẹbịne enye ndien ke ẹma ẹkekpe ye Blastus, emi esede aban̄a ufọk edidem, mmọ ẹtọn̄ọ ndikpe nyom emem, koro idụt edidem ọkọnọ idụt mmọ udia.+ 21  Edi ke usen emi ẹnịmde, Herod esịne ọfọn̄ ubọn̄ onyụn̄ osụhọde etie ke itie ikpe ọtọn̄ọ nditịn̄ ikọ an̄wan̄wa nnọ mmọ. 22  Ndien mbon emi ẹsopde idem ẹfiori ẹte: “Uyo abasi, idịghe uyo owo!”+ 23  Kpa idaha oro angel Jehovah ọtọ enye,+ koro enye mînọhọ Abasi ubọn̄;+ ndien ndọn̄ ẹta enye, enye onyụn̄ akpa. 24  Edi ikọ+ Jehovah ọdọdiọn̄ ọkọri onyụn̄ asuana.+ 25  Amaedi Barnabas+ ye Saul, ke ẹma ẹkenam utom unọ n̄kpọ un̄wam+ ẹma ke Jerusalem, mmọ ẹfiak ẹnyọn̄ọ ẹnyụn̄ ẹda John,+ emi udorienyịn̄ esie edide Mark, ẹdian idem.

Mme Ikọ Idakisọn̄