Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Utom 10;1-48

10  Edi owo kiet ama odu ke Caesarea emi ekerede Cornelius, akwa owoekọn̄+ ke se ẹkekotde udịmekọn̄ Italy,+  owo emi eten̄ede+ onyụn̄ abakde+ Abasi ọkọrọ ye ofụri mbonufọk esie, enye onyụn̄ esinọ mme owo+ ediwak enọ mbọm onyụn̄ anam n̄kpeubọk ọnọ Abasi kpukpru ini.+  Ke n̄kpọ nte ọyọhọ hour usụkkiet,*+ enye okụt in̄wan̄-in̄wan̄ ke n̄kukụt+ nte angel+ Abasi odụkde etiene enye onyụn̄ edidọhọ enye ete: “Cornelius!”  Enye owụk enyịn ese angel oro ndien, ke okopde ndịk, ọdọhọ ete: “Nso, Ọbọn̄?” Enye ọdọhọ enye ete: “Akam+ fo ye mme enọ mbọm fo ẹdọk nte n̄kpọ editi ẹkesịm iso Abasi.+  Ntre dọn̄ mme owo ẹka Joppa ẹkekot Simon emi udorienyịn̄ esie edide Peter.  Owo emi edi esen ọnọ Simon akwatikpa, emi enyenede ufọk ke mbeninyan̄.”+  Ke ndondo oro angel emi eketịn̄de ikọ ye enye ọkpọn̄de, enye okot nditọ ufọk esie iba ye owoekọn̄ kiet emi eten̄ede Abasi ke otu mbon oro ẹnamde n̄kpọ ẹnọ enye kpukpru ini,+  onyụn̄ obụk kpukpru n̄kpọ ọnọ mmọ ndien osio mmọ ọdọn̄ ẹka Joppa.+  Ke ndan̄nsiere nte mmọ ẹsan̄ade ẹka ke usụn̄ ẹnyụn̄ ẹkperede obio, Peter ọdọk aka enyọn̄ ufọk+ ke n̄kpọ nte ọyọhọ hour itiokiet* ndibọn̄ akam.+ 10  Edi enye okop biọn̄ etieti onyụn̄ oyom ndidia udia. Ke adan̄aemi mmọ ẹnamde udia, enye okụt ke n̄kukụt+ 11  nte heaven ebererede+ ye nte n̄kpọ osụhọrede nte akwa ubak ọfọn̄ linen eke ẹmụmde ke utịt mbinan̄ ẹsụhọde ẹnịm ke isọn̄; 12  ndien kpukpru orụk unam ukot inan̄ ye n̄kpọ emi ẹnyọnide ke isọn̄ ye mme inuen enyọn̄ ẹdu ke esịt.+ 13  Ndien uyo esịm enye ete: “Peter, daha ke enyọn̄, wot ta!”+ 14  Edi Peter ọdọhọ ete: “N̄wan̄ansa-o, Ọbọn̄, koro akananam ntaha n̄kpọ ekededi emi asabarede onyụn̄ edehede.”+ 15  Ndien uyo ọtọn̄ọ ntak esịm enye ọyọhọ utịm ikaba ete: “Tre ndikot n̄kpọ emi Abasi ama akanam asana edidehe.”+ 16  Emi etịbe ọyọhọ utịm ikata, ndien kpa idaha oro ẹmen n̄kpọ oro ẹdọk heaven.+ 17  Edi ke adan̄aemi ekikere enen̄erede etịmede Peter aban̄a se n̄kukụt emi enye okụtde ọwọrọde, sese! mme owo emi Cornelius okosiode ọdọn̄ ẹbụp ẹban̄a ufọk Simon ẹnyụn̄ ẹdida do ke inuaotop.+ 18  Ndien mmọ ẹfiori ẹkot ẹnyụn̄ ẹbụp m̀mê Simon emi udorienyịn̄ esie edide Peter odu do. 19  Nte Peter osụk ekerede aban̄a n̄kukụt emi, spirit+ ọdọhọ enye ete: “Sese! Owo ita ke ẹyom fi. 20  Ntre daha ke enyọn̄, sụhọde isọn̄ nyụn̄ tiene mmọ ka, kûyịk ndomokiet, koro ami nsio mmọ ndọn̄.”+ 21  Ntre Peter osụhọde isọn̄ etiene mmọ onyụn̄ ọdọhọ ete: “Sese! Ami ndi owo emi mbufo ẹyomde. Ntak emi mbufo ẹdude mi-e?” 22  Mmọ ẹdọhọ ẹte: “Cornelius, akwa owoekọn̄, kpa owo emi enende onyụn̄ abakde Abasi,+ emi ofụri idụt mme Jew ẹnyụn̄ ẹtịn̄de eti ikọ ẹban̄a,+ ama ọbọ item Abasi oto edisana angel kiet ete ọdọn̄ ẹdikot fi edi ufọk imọ man idikop mme n̄kpọ emi afo enyenede nditịn̄.” 23  Ke ntre enye okot mmọ ẹdụk ẹdi onyụn̄ akama mmọ esen. Ke ndan̄nsiere enye adaha asan̄a ye mmọ aka, ndusụk nditọete emi ẹtode Joppa ẹnyụn̄ ẹsan̄a ye enye. 24  Ke ndan̄nsiere oro enye odụk Caesarea. Nte ededi, Cornelius ama odori enyịn mmọ ndidi onyụn̄ okot iman esie ye mme n̄kpet n̄kpet ufan esie obon ọtọkiet. 25  Nte Peter odụkde, Cornelius edisobo ye enye, ọduọ enye ke ukot onyụn̄ onụhọ ọnọ enye. 26  Edi Peter emenede enye, ọdọhọ ete: “Daha ke enyọn̄; ami n̄ko ndi owo.”+ 27  Ndien nte enye enemede nneme ye enye, enye ebe odụk onyụn̄ okokụt nte ediwak owo ẹsopde idem, 28  enye onyụn̄ ọdọhọ mmọ ete: “Mbufo ẹmetịm ẹfiọk nte ke ibet inyịmeke owo Jew adian idem m̀mê asan̄a ekpere owo orụk efen;+ edi Abasi owụt mi ete n̄kûdọhọ ke baba owo kiet asabade m̀mê edehe.+ 29  Oro anam mi ndi ye unana mfan̄a, ke ini ẹkedọn̄de ẹdikot mi. Ke ntre mmoyom ndifiọk ntak emi mbufo ẹdọn̄de ẹdikot mi.” 30  Mmọdo Cornelius ọdọhọ ete: “Usen inan̄ emi ẹkebede ọtọn̄ọde ke hour emi, n̄kọbọn̄ akam ke ufọk mi ke ọyọhọ hour usụkkiet,*+ ndien, sese! owo kiet emi esịnede nsemnsem ọfọn̄idem+ ada mi ke iso 31  onyụn̄ ọdọhọ ete, ‘Cornelius, ẹyere akam fo ẹnyụn̄ ẹti mme enọ mbọm fo ke iso Abasi.+ 32  Ke ntre, dọn̄ ẹka Joppa ẹkekot Simon, emi udorienyịn̄ esie edide Peter.+ Owo emi edi esen ke ufọk Simon akwatikpa, ke mbeninyan̄.’+ 33  Ntre mma nsọsọp ndọn̄ ẹbịne fi, ndien afo amanam ọfọn ndidi mi. Ndien ke emi kpukpru nnyịn idu mi ke iso Abasi man ikop kpukpru n̄kpọ emi Jehovah owụkde fi etịn̄.”+ 34  Mmọdo Peter atat inua esie ọdọhọ ete: “Ke akpanikọ mmokụt nte Abasi inamke asari,+ 35  edi ke kpukpru idụt enye enyenyịme owo eke abakde enye onyụn̄ anamde edinen ido.+ 36  Enye ọkọnọ ikọ+ ẹsọk nditọ Israel nditan̄a eti mbụk emem+ nnọ mmọ ebe ke Jesus Christ: Owo emi edi Ọbọn̄ kpukpru mmọ eken.+ 37  Mbufo ẹmefiọk owo oro ẹkenemede ẹban̄a ke ofụri Judea, ọtọn̄ọde ke Galilee ke baptism emi John ọkọkwọrọde ama ekebe,+ 38  oro edi, Jesus emi okotode Nazareth, nte Abasi ekeyetde enye aran ke edisana spirit+ ye odudu, enye onyụn̄ asan̄a ke idụt oro anam ufọn ọnọ mme owo onyụn̄ anam kpukpru mmọ emi Devil+ efịkde ẹkop nsọn̄idem; koro Abasi ama odu ye enye.+ 39  Ndien nnyịn idi mme ntiense iban̄a kpukpru n̄kpọ emi enye akanamde ke idụt mme Jew ye ke Jerusalem; edi mmọ n̄ko ẹma ẹwot enye ke ndikọn̄ enye ke eto.+ 40  Abasi ama anam Owo emi eset ke ọyọhọ usen ita onyụn̄ anam enye owụt mme owo idem,+ 41  iwụtke kpukpru owo, edi owụt mme ntiense emi Abasi ekebemde iso emek,+ kpa nnyịn, emi ikadiade inyụn̄ in̄wọn̄de n̄kpọ ye enye+ ke enye ama ekeset ke n̄kpa. 42  N̄ko, enye ama owụk nnyịn ete ikwọrọ ikọ inọ mme owo inyụn̄ inọ ọyọhọ ikọ+ ntiense ite ke emi edi Owo emi Abasi ekenịmde ete edi ebiereikpe ọnọ mme odu-uwem ye mme akpan̄kpa.+ 43  Kpukpru mme prọfet ẹketie ntiense ẹban̄a enye,+ ẹte owo ekededi eke ọbuọtde idem ye enye ọyọbọ edifen mme idiọkn̄kpọ ebe ke enyịn̄ esie.”+ 44  Ke adan̄aemi Peter osụk etịn̄de aban̄a mme n̄kpọ emi edisana spirit odoro kpukpru mmọ oro ẹkopde ikọ esie ke idem.+ 45  Ndien idem akpa mme anam-akpanikọ emi ẹkesan̄ade ye Peter ẹdi, kpa mbon oro ẹnade mbobi, koro ẹn̄wan̄ade edisana spirit emi edide enọ mfọn ẹduọk mbon idụt n̄ko.+ 46  Koro mmọ ẹkopde nte mmọ ẹsemde nsio nsio usem ẹnyụn̄ ẹnọde Abasi ubọn̄.+ Ekem Peter obụp ete: 47  “Nte owo ekededi ekeme ndikpan ete ẹkûda mmọn̄ ẹnịm mmọ emi baptism,+ emi ẹma ẹkebọ edisana spirit kpa nte nnyịn?” 48  Ndien enye owụk ete ẹnịm mmọ baptism ke enyịn̄ Jesus Christ.+ Ekem mmọ ẹben̄e enye ẹte aka iso odu ye mmimọ ke ndusụk usen.

Mme Ikọ Idakisọn̄

“Ọyọhọ hour usụkkiet,” oro edi, n̄kpọ nte n̄kanika ita uwemeyo.
“Ọyọhọ hour itiokiet,” oro edi, n̄kpọ nte n̄kanika duopeba uwemeyo.
Se ik. id. uf. 3.