Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Ruth 3;1-18

3  Ndien Naomi eka ebe esie ọdọhọ enye ete: “Eyen mi, nte n̄kpoyomke ebiet nduọkodudu+ nnọ fi, man ọfọn ye afo?  Nte Boaz emi afo adiande idem ye nditọiban esie idịghe iman+ nnyịn? Sese! Enye ke asak+ barley ke ọtọ udịghi barley okoneyo emi.  Ntem yere mmọn̄ nyụn̄ fiọn̄ọ aran+ nyụn̄ sịne ọfọn̄ fo+ ndien sụhọde ka ke ọtọ udịghi barley. Kûyak enye ọdiọn̄ọ owo emi afo edide tutu ke enye ama akadia udia onyụn̄ ọn̄wọn̄ n̄kpọ ama.  Ama ekem ke ini enye osụhọrede ana ke isọn̄, tịm se ebiet emi enye anade; ndien ka kofụhọde enye ukot sụhọde na; ndien enye eyeteme fi se edinamde.”  Ekem enye ọdọhọ eka ebe esie ete: “Nyanam kpukpru se afo ọdọhọde mi.”  Ndien enye osụhọde aka ọtọ udịghi barley ndinam kpukpru se eka ebe esie eketemede enye.  Ndien Boaz adia onyụn̄ ọn̄wọn̄, esịt onyụn̄ enem enye.+ Ekem enye aka okosụhọde ana ekpere otu barley. Ekem Ruth asan̄a ndịbe ndịbe edifụhọde enye ukot osụhọde ana.  Edikem ke ufọt okoneyo idem ọtọn̄ọ ndinyek Boaz. Ntre enye emenede idem, ndien sese! n̄wan anade ekpere enye ukot!  Ekem enye obụp ete: “Afo edi anie?” Enye ọbọrọ ete: “Ami ndi Ruth ofụn an̄wan fo, tat isọn̄ọfọn̄ fo fụk ofụn an̄wan fo, koro afo edide andifak.”+ 10  Ntem Boaz ọdọhọ ete: “Eyen mi, Jehovah akpakam ọdiọn̄ fi.+ Afo omowụt ima-mfọnido+ ke emi akan nte okowụtde ke akpa,+ ke emi mûtieneke n̄kparawa, edide ubuene onyụn̄ edide imọ. 11  Eyen mi, kûfehe ndịk. Nyanam kpukpru se afo ọdọhọde nnam nnọ fi,+ koro kpukpru owo ke inuaotop mbio obio nnyịn ẹdiọn̄ọ ke afo edi ata eti an̄wan.+ 12  Ndien okposụkedi ami ndide andifak,+ andifak efen odu emi ekperede fi idem akan mi.+ 13  Dan̄ ke ebiet emi okoneyo emi, ndien ama ekem ke usenubọk edieke enye edifakde+ fi, idiọk idụhe! Yak enye afak fi. Edi edieke enye mîmaha ndifak fi, ma uwem Jehovah,+ nyafak fi. Na do tutu eyo esiere.” 14  Enye osụhọde ana ekpere enye ukot tutu eyo esiere ndien adaha ke enyọn̄ ke ini owo mîkemeke ndikụt owo ndiọn̄ọ. Ndien Boaz ọdọhọ ete: “Kûyak ẹfiọk ke n̄wan ama edi ọtọ udịghi barley.”+ 15  Ndien enye ọdọhọ ete: “Men akwa ọfọn̄idem emi afo esịnede san̄a di, nyụn̄ tat enye kama.” Ntre enye atat akama, ndien Boaz odomo udomo barley itiokiet ọdọn̄ enye ke ọfọn̄, ekem Boaz adaha odụk obio. 16  Ndien Ruth ọnyọn̄ etiene eka ebe esie, eka ebe esie obụp enye ete: “Eyen mi, afo edi anie?” Ekem enye emen kpukpru se owo oro akanamde etịn̄ ọnọ enye. 17  Ndien enye ọdọhọ ete: “Enye ọkọnọ mi udomo barley itiokiet emi, koro enye ọkọdọhọde mi ete: ‘Kûnyọn̄ ubọk ubọk utiene uka uberi.’”+ 18  Ndien Naomi ọdọhọ ete: “Dop tie, eyen mi, tutu afo ọdiọn̄ọ nte n̄kpọ emi edisan̄ade, koro enye mîdiduọkke odudu tutu n̄kpọ emi esịm utịt mfịn.”+

Mme Ikọ Idakisọn̄