Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Ruth 2;1-23

2  Ndien Naomi enyene owo kiet emi edide iman+ ebe esie, akwa owo inyene,+ emi otode ubon Elimelech, ndien enye ekere Boaz.+  Ekem Ruth owo Moab ọdọhọ Naomi ete: “Mbọk, yak n̄ka in̄wan̄ n̄kasan̄a ke edem owo ekededi eke ndikụtde mfọn ke iso esie, ntan̄+ nsụhọ barley.” Ntem enye ọdọhọ enye ete: “Ka, eyen mi.”  Ndien enye adaha aka in̄wan̄ ọkọtọn̄ọ ndisan̄a ke edem mbon ukpen̄e ntan̄ nsụhọ barley.+ Ndien ke mbuari enye asan̄a edisịm in̄wan̄ Boaz,+ emi otode ubon Elimelech.+  Ndien, sese! Boaz oto Bethlehem edi onyụn̄ edikọm mbon ukpen̄e ete: “Jehovah akpakam odu ye mbufo.”+ Ndien mmọ ẹbọrọ enye ẹte: “Jehovah akpakam ọdiọn̄ fi.”+  Ekem Boaz+ obụp akparawa oro ẹkenịmde ẹte edi etubom mbon ukpen̄e ete: “Anie enyene eyenan̄wan emi?”  Ntre etubom mbon ukpen̄e ọbọrọ ete: “Eyenan̄wan emi edi owo Moab,+ emi okotode obio Moab asan̄a ye Naomi ọnyọn̄ edi.+  Ndien enye ọkọdọhọ ete: ‘Mbọk, yak nsan̄a ke edem mbon ukpen̄e ntan̄+ nsụhọ barley.’ Ntem ke enye odụk in̄wan̄ inyụn̄ iduọkke odudu ọtọn̄ọde ke usenubọk tutu esịm idahaemi enye osụhọrede etetie mi esisịt ke ufọk in̄wan̄.”+  Ekem Boaz ọdọhọ Ruth ete: “Kpan̄ utọn̄, eyen mi. Kûka ukatan̄ nsụhọ barley ke in̄wan̄ efen,+ kûnyụn̄ udaha ke ebiet emi, edi dian idem ye nditọiban mi.+  Tịn̄ enyịn ke in̄wan̄ eke mmọ ẹdikpen̄ede, nyụn̄ tiene mmọ. Mmowụk n̄kparawa emi nte mmọ ẹkûtụk+ fi. Ke ini itọn̄ asatde fi, ka kọn̄wọn̄ mmọn̄ oro n̄kparawa emi ẹdikoide ẹdọn̄ ke aban̄.”+ 10  Ntem enye onụhọ onyụn̄ ọduọ ekịbi iso ke isọn̄,+ ọdọhọ enye ete: “Nso inam ọfọnde mi mfọn ntem onyụn̄ ọnọde mi ntịn̄enyịn, ke ini ndide esenowo?”+ 11  Ndien Boaz ọbọrọ enye ete: “Ẹma ẹtịm ẹsian+ mi kpukpru se afo anamde ọnọ eka ebe fo tọn̄ọ nte ebe fo akakpa,+ ye nte afo ọkọkpọn̄de ete ye eka fo ye isọn̄ emana fo onyụn̄ edide ebịne mbon oro akanam afo mûdiọn̄ọke.+ 12  Jehovah akpakam ọnọ fi utịp utom fo,+ Jehovah Abasi Israel, emi afo efehede edidụk idak mba esie oyom ubọhọ+ akpakam ọnọ fi utịp+ eke ọfọnde ama.” 13  Ndien Ruth ọdọhọ ete: “Yak n̄kụt mfọn ke iso fo, ọbọn̄ mi, koro afo ọmọdọn̄ mi esịt omonyụn̄ etịn̄ ikọ osụk ofụn an̄wan fo esịt,+ okposụkedi mmentiehe nte kiet ke otu ifịn iban fo.”+ 14  Ndien Boaz ọdọhọ enye ke ini udia ete: “Di, didia udia+ nyụn̄ debi uyo fo ke vinegar.” Ntem enye osụhọde etie ye mbon ukpen̄e, Boaz onyụn̄ anyan edifọp barley+ ọnọ enye ndien enye ata oyụhọ, onyụn̄ enyene nyọhọ-nsụhọ. 15  Ekem enye adaha ke enyọn̄ ete itan̄+ nsụhọ barley. Ndien Boaz owụk n̄kparawa esie ete: “Ẹyak enye atan̄ nsụhọ, ẹkûfịna+ enye. 16  Mbufo ẹkam ẹdụri ndusụk barley ẹsion̄o ke ebek ẹnọ enye, ẹnyụn̄ ẹbe ẹkpọn̄ ndusụk ẹnọ enye atan̄,+ ẹkûnyụn̄ ẹduari enye.” 17  Ntre enye aka iso atan̄ mbuot barley tutu esịm mbubreyo,+ onyụn̄ eyịbi+ se enye akatan̄de, ndien ekpere ndisịm ephah+ barley kiet. 18  Ndien enye emen oro aka obio, ndien eka ebe esie okụt se enye akatan̄de. Ekem enye osio udia oro okosụhọde+ ke se enye akadiade oyụhọ ọnọ eka ebe esie. 19  Ekem eka ebe esie obụp enye ete: “Afo akatan̄ nsụhọ ke m̀mọ̀n̄ mfịn, okonyụn̄ anam utom ke m̀mọ̀n̄? Osụk ọfọfọn ọnọ owo emi ọkọnọde fi ntịn̄enyịn.”+ Ndien enye asian eka ebe esie owo emi enye akanamde utom kiet; enye onyụn̄ ọdọhọ ete: “N̄kanam utom mfịn ye eren kiet emi ekerede Boaz.” 20  Ntem Naomi ọdọhọ n̄wan eyen esie ete: “Jehovah, emi mîtreke ndiwụt mme odu-uwem ye mme akpan̄kpa+ ima-mfọnido+, akpakam ọdiọn̄ enye.”+ Ndien Naomi ọdọhọ enye ete: “Owo emi edi iman nnyịn.+ Enye edi kiet ke otu mme andifak nnyịn.”+ 21  Ndien Ruth owo Moab ọdọhọ ete: “Enye n̄ko ama ọdọhọ mi ete, ‘Dian idem ye mbonutom mi tutu mmọ ẹkpen̄e ofụri ukpen̄e mi ẹma.’”+ 22  Edi Naomi+ ọdọhọ Ruth n̄wan eyen esie ete:+ “Eyen mi, ọfọn afo asan̄a ye nditọiban esie, mbak owo edifịna fi ke in̄wan̄ efen.”+ 23  Ndien enye adian idem ye nditọiban Boaz atan̄ mbuot tutu ẹkpen̄e barley+ ye wheat ẹma. Ndien enye osụk odụn̄ ye eka ebe esie.+

Mme Ikọ Idakisọn̄