Rome 2;1-29
2 O owo,+ inamke n̄kpọ m̀mê afo edi anie, edieke afo ekpede ikpe ọnọ owo,+ afo unyeneke n̄kpọ nditịn̄ nnyan̄a idem; koro afo omobiom idemfo ikpe ke n̄kpọ eke adade ekpe ikpe ọnọ owo efen, adan̄a nte afo emi ekpede ikpe+ ọnọ owo anamde kpa mme n̄kpọ emi.+
2 Ndien nnyịn imọfiọk ite ke ubiereikpe Abasi, emi ekemde ye akpanikọ,+ obiom mbon oro ẹkade iso ẹnam mme utọ n̄kpọ oro.
3 Edi nte afo, O owo,+ emi ekpede ikpe mbon oro ẹkade iso ẹnam mme utọ n̄kpọ oro edi ekem afo anam mmọ, ekere ete ke imọ iyọbọhọ ubiereikpe Abasi?+
4 Mîdịghe nte afo esịn uwak mfọnido+ esie ye ime+ esie ye anyanime+ esie ke ndek, sia mûfiọkke ete ke edu mfọnido Abasi odomo ndinam fi akabade esịt?+
5 Edi ke ntak emi afo ọsọn̄de esịt+ mûnyụn̄ ukabakede esịt,+ afo ọkọ iyatesịt+ obon ọnọ idemfo ke usen iyatesịt+ ye usen eke ẹdiyararede+ edinen ubiereikpe Abasi.+
6 Ndien enye ọyọnọ owo kiet kiet nte ekemde ye mme utom esie:+
7 ada nsinsi uwem ọnọ mbon oro ẹyomde ubọn̄ ye ukpono ye se mîdibiarake+ oto ke ediyịre nnam utom oro ọfọnde;
8 nte ededi, amaedi mbon ndomoidem+ ye mmọ eke mîsụkke ibuot inọ akpanikọ+ edi ẹsụkde ẹnọ ukwan̄ido, iyatesịt ye ifụtesịt,+
9 ukụt ye nnanenyịn, ẹyedoro ukpọn̄ owo ekededi eke anamde se idiọkde, ebem iso odoro mme Jew+ ndien ekem odoro mme Greek n̄ko;+
10 edi ubọn̄ ye ukpono ye emem ẹyedoro owo ekededi eke anamde se ifọnde,+ ebem iso odoro mme Jew+ ndien ekem odoro mme Greek+ n̄ko.
11 Koro Abasi inamke asari.+
12 Ke uwụtn̄kpọ, kpukpru mbon oro ẹkenamde idiọkn̄kpọ sia mîdụhe ke idak ibet ẹyetak okposụkedi mîkodụhe ke idak ibet;+ edi amaedi kpukpru mbon oro ẹkenamde idiọkn̄kpọ ke idak ibet+ ẹyeda ibet ẹkpe ikpe ẹnọ mmọ.+
13 Koro idịghe mmọ oro ẹkopde ibet ẹdi ndinen owo ke iso Abasi, edi mme andinam+ ibet ke ẹdibat ke ndinen.+
14 Koro ini ekededi emi mbon idụt+ emi mînyeneke ibet+ ẹnamde se ibet etemede ke ndammana usụn̄,+ mmọ emi, okposụkedi mînyeneke ibet, ẹdi ibet ẹnọ idemmọ.
15 Mmọ emi ẹwụt se idude ke ibet emi ẹwetde ke esịt mmọ,+ ke adan̄aemi ubieresịt+ mmọ etienede mmọ edi ntiense, ndien ke ekikere mmọ, esịt obiom mmọ ikpe+ mîdịghe etebe mmọ ikpe.
16 Emi edidi ke usen oro Abasi edidade Christ Jesus ebiere ikpe+ ke se ubonowo+ ẹkerede ẹnyụn̄ ẹnamde ke ndịbe,+ nte ekemde ye eti mbụk oro ami ntan̄ade.+
17 Edi, edieke afo edide Jew ke enyịn̄+ onyụn̄ eberide edem ke ibet+ onyụn̄ obụrede mbụre ke Abasi,+
18 onyụn̄ ọfiọkde uduak+ esie onyụn̄ ọfiọkde mme n̄kpọ oro ẹnen̄erede ẹfọn koro ẹdade Ibet ẹkpep fi;+
19 ẹnyụn̄ ẹnamde fi enịm ke akpanikọ ete imọ idi andida mme nnan usụn̄,+ ye un̄wana mmọ oro ẹdude ke ekịm,+
20 ye andinen̄ede mme anana-ibuot,+ ye andikpep nditọwọn̄,+ ye nte ke imenyene mbiet+ ifiọk ye akpanikọ+ emi ẹdude ke Ibet—
21 edi, afo emi ekpepde owo efen, nte emekpep idemfo?+ Afo emi ọkwọrọde ete, “Kûyịp inọ,”+ nte afo emeyịp inọ?+
22 Afo emi ọdọhọde ete, “Kûsịn efịbe,”+ nte afo emesịn efịbe? Afo emi asuade ndem, nte afo omowo+ mme temple?
23 Afo emi obụrede mbụre ke ibet, nte afo emesuene Abasi ke ndibiat Ibet?+
24 Koro ẹwet ẹte: “Ke ntak mbufo ke ẹsụn̄i enyịn̄ Abasi ke otu mme idụt.”+
25 Ke akpanikọ, edina mbobi+ enyene ufọn n̄kukụre edieke afo enịmde ibet;+ edi edieke afo edide abiatibet, edina mbobi+ fo amakabade etie nte ukanaha mbobi.+
26 Ke ntre, edieke owo oro mînaha mbobi+ anamde ndinen n̄kpọ oro Ibet oyomde,+ nte owo idibatke unana edina mbobi esie nte ke enye ana mbobi?+
27 Ndien owo emi mînaha mbobi ke obụkidem, ebede ke enye ndinịm Ibet, eyekpe ikpe ọnọ fi+ emi edide abiatibet okposụkedi afo enyenede n̄wed ibet onyụn̄ anade mbobi.
28 Koro idịghe owo emi edide Jew ke enyọn̄ idem+ edi ata Jew, inyụn̄ idịghe mbobi emi ẹnade ke obụkidem edi ata mbobi.+
29 Edi ata Jew edi enye emi edide Jew ke esịtidem,+ mbobi esie onyụn̄ edi eke ọwọn̄esịt+ emi edide ke spirit, idịghe ke ibet oro ẹwetde-wet.+ Itoro+ owo oro itoho owo, edi oto Abasi.+
