Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Rome 11;1-36

11  Mmọdo mbụp nte, Nte Abasi ama esịn ikọt esie?+ Ikesịnke! Koro ami n̄ko ndi eyen Israel,+ eke mfri Abraham, ke esien Benjamin.+  Abasi ikesịnke ikọt esie, emi enye ekebemde iso ọnọ ntịn̄enyịn.+ Kamse, nte mbufo ifiọkke se N̄wed Abasi etịn̄de aban̄a Elijah, nte enye ekekpede Abasi ubọk ete ọnọ Israel ufen?+  “Jehovah, mmọ ẹmewot mme prọfet fo, ẹmenyụn̄ ẹdọk itieuwa fo ẹwụbede, ndien ami ikpọn̄ nsụhọ, ndien mmọ ke ẹyom ukpọn̄ mi.”+  Edi, uyo Abasi+ ọdọhọ enye didie? “Mmosụhọ owo tọsịn itiaba nnọ idemmi, kpa mme owo emi mîtọn̄ọke edọn̄ inọ Baal.”+  Mmọdo, ke usụn̄ emi, nsụhọ+ n̄ko omodu ke emi, oro ẹmekde+ oto ke mfọnido oro owo mîdotke.  Edi edieke otode ke mfọnido oro owo mîdotke,+ itoho aba utom;+ mîdịghe ntre, mfọnido oro owo mîdotke idịghe aba mfọnido oro owo mîdotke.+  Nso, ndien, ke ididọhọ? Israel ikenyeneke se enye ekesịnde ifịk oyom,+ edi mmọ emi ẹmekde+ ẹkenyene. Esịt mbon eken ama odoro ufiọn;+  kpa nte ẹwetde ẹte: “Abasi ọnọ mmọ spirit ọkpọsọn̄ idap,+ ye enyịn eke mîkemeke ndikụt usụn̄ ye utọn̄ eke mîkemeke ndikop n̄kpọ, tutu esịm mfịn emi.”+  N̄ko, David ọdọhọ ete: “Yak okpokoro mmọ akabade edi ekpọ ye afia ye n̄kpọ iduọ ye usiene ọnọ mmọ;+ 10  yak enyịn ekịm mmọ mbak mmọ ẹdikụt usụn̄, ẹdinyụn̄ ẹnam mmọ ẹnụhọ kpukpru ini.”+ 11  Mmọdo ami mbụp nte, Nte mmọ ẹma ẹtuak ukot ẹduọn̄ọ+ ofụri ofụri? Baba-o! Edi oto ke mmọ ndibiat ibet+ edinyan̄a esịm mbon idụt,+ ke ntak oro mmọ ẹfịbe ufụp.+ 12  Edi edieke mmọ ndibiat ibet ọwọrọde edidiọn̄ ọnọ ererimbot, mmọ ndisụhọde ke ibat onyụn̄ ọwọrọde edidiọn̄ ọnọ mbon idụt,+ adan̄a didie akan oro ke ibat mmọ ndiyọhọ+ ediwọrọ edidiọn̄! 13  Edi ntịn̄ nnọ mbufo emi ẹdide mbon idụt. Adan̄a nte ami ndide apostle+ nnọ mme idụt,+ mmokpono+ utom mi,+ 14  m̀mê ke usụn̄ ekededi, nyekeme ndinam mbon orụk mi ẹfịbe ufụp nnyụn̄ nnyan̄a+ ndusụk ke otu mmọ.+ 15  Koro edieke editop mmọ nduọk+ ọwọrọde edinam ererimbot afiak etie ke emem ye Abasi,+ edifiak nda mmọ ediwọrọ nso ke mîbọhọke edito ke n̄kpa ndinyene uwem? 16  N̄ko-n̄ko, edieke ubak oro ẹdade nte akpa mbun̄wụm+ edide edisana, ofụri ebok asana n̄ko; ndien edieke orụn̄ edide edisana,+ mme n̄kọk ẹsana n̄ko. 17  Nte ededi, edieke ẹkesịbede ndusụk n̄kọk ẹfep edi owo isịbeke fi, okposụkedi edide olive ikọt, ẹnyụn̄ ẹdade fi ẹdidian ke otu mmọ+ ndien afo akabade edi andibuana ke isek-isek+ orụn̄ olive oro,+ 18  kûda idem ke n̄kpọ ukan mme n̄kọk oro. Edi edieke afo adade idem ke n̄kpọ akan mmọ,+ idịghe afo omụm orụn̄ akama,+ edi orụn̄ omụm fi akama.+ 19  Afo ọyọdọhọ, ndien, ete: “Ẹkesịbe mme n̄kọk ẹfep+ man ẹkpesịbe mi ẹdidian.”+ 20  Ọfọn! Ẹkesịbe mmọ ẹfep ke ntak unana mbuọtidem,+ edi afo ada ke ntak mbuọtidem.+ Kûtan̄ idem,+ edi fehe ndịk.+ 21  Koro edieke Abasi mîkatuaha ata n̄kọk mbọm, enye idinyụn̄ ituaha fi mbọm.+ 22  Se, ndien, mfọnido+ ye ufen Abasi.+ Enye ọnọ mbon oro ẹduọn̄ọde ufen,+ edi mfọnido Abasi odu ye afo, ama akam edi afo ayaka iso odot ndinyene+ mfọnido esie; mîdịghe ntre, ẹyesịbe fi n̄ko ẹduọk.+ 23  Edieke mmọ n̄ko mîkaha iso inana mbuọtidem, ẹyesịbe mmọ ẹdidian;+ koro Abasi ekeme ndifiak nsịbe mmọ ndidian. 24  Koro edieke ẹkesịbede fi ẹsio ke eto olive ikọt emi edide uduot efen ẹnyụn̄ ẹdade fi ẹdidian+ ke eto olive in̄wan̄esa emi mbufo mîdịghe ukem uduot, adan̄a didie akan oro ke ẹdisịbe mmọ emi ẹdide ukem uduot ẹdidian ke eto olive emi edide eke mmọ!+ 25  Koro nyomke mbufo, nditọete, ẹnana ifiọk ẹban̄a edisana ndịben̄kpọ emi,+ mbak mbufo ẹdise idem mbufo ke ọniọn̄: nte ke esịt ndusụk nditọ Israel ama odoro ufiọn,+ tutu ofụri ibat+ mbon idụt oro ẹdụkde ẹdi ọyọhọ,+ 26  ndien ke usụn̄ emi ẹyenyan̄a ofụri Israel.+ Kpa nte ẹwetde ẹte: “Andinyan̄a oyoto ke Zion+ onyụn̄ emen mme edinam unana uten̄e Abasi efep ke Jacob.+ 27  Ndien emi edi ediomi oro ndidiomide ye mmọ,+ ke ini ndimende idiọkn̄kpọ mmọ mfep.”+ 28  Ke akpanikọ, kaban̄a eti mbụk, mmọ ẹdi mme asua ke ntak mbufo,+ edi kaban̄a edimek oro Abasi emekde, mmọ ẹdi ndima ke ntak mme ete ete mmọ.+ 29  Koro Abasi mîdituaha n̄kpọfiọk ke mme enọ esie m̀mê ikot oro enye okokotde.+ 30  Koro kpa nte mbufo ẹketụtde utọn̄+ ye Abasi ini kiet ko, edi ẹmetua mbufo mbọm+ ke emi ke ntak ntụtutọn̄ mmọ,+ 31  kpasụk ntre n̄ko mmọ ẹtụt utọn̄ ke emi ndien emi osụn̄ọ ke editua mbufo mbọm,+ man ẹkpetua mmọ n̄ko mbọm ke emi. 32  Koro Abasi ọmọkọbi mmọ kpukpru ọdọn̄ ọtọkiet ke ntụtutọn̄,+ man enye akpatua kpukpru mmọ mbọm.+ 33  Inyene+ ye ọniọn̄+ ye ifiọk+ Abasi ẹtụn̄ọ adan̄a didie! Mme ikpe+ esie ẹkak owo ndidụn̄ọde adan̄a didie onyụn̄ ayan̄a owo ndifiọk mme usụn̄ esie didie ntem! 34  Koro “anie ọfiọk ekikere Jehovah,+ anie onyụn̄ akabade edi andinọ enye item?”+ 35  Mîdịghe, “Anie ekebem iso ọnọ Abasi n̄kpọ, man Abasi ọkpọnọ enye usiene?”+ 36  Koro kpukpru n̄kpọ ẹto enye, enyụn̄ ẹdu ke enye, enyụn̄ ẹnyene enye.+ Yak ubọn̄ enyene enye ke nsinsi.+ Amen.

Mme Ikọ Idakisọn̄