Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Obadiah 1;1-21

 N̄kukụt Obadiah: Ntem ke Jehovah Akakan Ọbọn̄ Andikara ọdọhọ aban̄a Edom,+ ete: “Nnyịn imokop etop emi otode Jehovah, ẹmenyụn̄ ẹdọn̄ isụn̄utom aka ke otu mme idụt ọkọdọhọ ete, ‘Mbufo ẹdaha ke enyọn̄, ẹyak nnyịn inyụn̄ idaha ke enyọn̄ ika ekọn̄ ye enye.’”+  “Sese! Mmanam fi ekpri ke otu mme idụt.+ Ẹmenen̄ede ẹse fi ke ndek.+  Iseri esịt fo amabian̄a fi,+ afo emi odụn̄de ke mme aba akwa itiat,+ emi ebietidụn̄ fo okon̄de, emi onyụn̄ ọdọhọde ke esịt fo ete, ‘Anie edikeme ndisụhọde mi nnịm ke isọn̄?’  Ọkpọkọm afo anam idaha fo okon̄ nte ntrukpom, m̀mê onyụn̄ enịm efọk fo ke otu mme ntantaọfiọn̄, nyada fi nto do nsụhọde,”+ ntem ke Jehovah ọdọhọ.  “Edieke inọ ekpedide ke ọtọ fo, mbon n̄wo ẹkpenyụn̄ ẹdide ke okoneyo, adan̄a didie ke mmọ ẹkpeyịp fi?+ Nte mmọ ikpeyịpke sụk se mmọ ẹyomde? Mîdịghe edieke mme etet grape ẹkpedide ke ọtọ fo, nte mmọ ikpayakke ndusụk ẹsụhọ?+  O sese adan̄a nte ẹdụn̄ọrede ẹyom kpukpru se idide eke Esau!+ Sese nte ẹnyụn̄ ẹdụn̄ọrede ẹyom mme n̄kpọuto esie eke ẹdịbede!  Mmọ ẹmesio fi ẹdọn̄ utom tutu esịm adan̄a. Kpukpru mmọ emi ẹdụkde ediomi ye afo ẹmebian̄a+ fi. Mmọ emi ẹtiede ke emem ye afo ẹmekan fi.+ Mbon emi ẹdiade udia ye afo ẹyeda iyịre ẹsịn fi ke idak ukot nte owo emi mînyeneke mbufiọk.+  Nte ididịghe ke usen oro?” ntem ke Jehovah ọdọhọ. “Nyonyụn̄ nsobo mbon ọniọn̄ ke Edom,+ nnyụn̄ nsobo mbufiọk ke obot obot ikpehe Esau.  Ndien idem eyenyek n̄kpọsọn̄ owo fo,+ O Teman,+ koro ẹyesịbe+ owo kiet kiet ke obot obot ikpehe Esau ẹfep ke nsobo.+ 10  Ke ntak afai oro afo akadade etiene Jacob eyenuka,+ bụt oyofụk fi,+ ẹyenyụn̄ ẹsịbe fi ẹfep ke nsinsi.+ 11  Ke usen oro afo akadade nsannsan ese, ke usen oro isenowo ẹketan̄de mbonekọn̄ esie ẹka ntan̄mfep,+ mbon esenidụt ẹkenyụn̄ ẹdụkde inuaotop+ esie ẹnyụn̄ ẹsịnde afia+ ẹban̄a Jerusalem, afo n̄ko eketie nte owo mmọ kiet. 12  “Ndien afo ukpakadaha-da use ke usen eyenuka,+ ke usen ukụt esie; ukpokonyụn̄ udatke esịt uban̄a nditọ Judah ke usen oro ẹkesobode mmọ;+ ukpokonyụn̄ ukponke inua ke usen nnanenyịn mmọ. 13  Ukpokodụkke inuaotop ikọt mi ke usen emi mmọ ẹkedude ke afanikọn̄.+ Afo n̄ko ukpokonyụn̄ usehe itie nnanenyịn esie ke usen emi enye okodude ke afanikọn̄; afo ukpokonyụn̄ unyanke ubọk utụk inyene esie ke usen emi enye okodude ke afanikọn̄.+ 14  Afo ukpokonyụn̄ udaha ke n̄wan̄a-usụn̄ uyom ndiwot ikọt esie emi ẹkefen̄ede ẹbọhọ;+ ukpokonyụn̄ umenke ikọt esie emi ẹsụhọde uyak unọ mme asua ke usen nnanenyịn.+ 15  Koro usen emi Jehovah edinamde ikọ ye kpukpru mme idụt emekpere.+ Nte afo akanamde, kpa ntre ke ẹdinam ye afo.+ Usụn̄ emi afo akanamde n̄kpọ ke ẹdida ẹsio fi usiene.+ 16  Koro kpa nte mbufo ẹken̄wọn̄de n̄kpọ ke enyọn̄ edisana obot mi, ntre ke kpukpru mme idụt ẹdin̄wọn̄ kpukpru ini.+ Mmọ ẹyen̄wọn̄ ẹnyụn̄ ẹmen ẹsịn ke idịbi, ẹnyụn̄ ẹtie nte akanam mmọ idụhe. 17  “Edi mbon oro ẹbọhọde ẹyedu ke Obot Zion,+ obot emi oyonyụn̄ akabade edi edisana;+ ndien mbonufọk Jacob ẹyeda mme n̄kpọ oro ẹnyenede mmọ ẹnyene.+ 18  Ndien ufọk Jacob ayakabade edi ikan̄,+ ufọk Joseph oyonyụn̄ edi edemeikan̄, ndien ufọk Esau eyedi nnyanyan̄a;+ ndien mmọ ẹyesịn ikan̄ obụbede ata mmọ. Ndien baba owo kiet idibọhọke ke ufọk Esau;+ koro Jehovah ọdọhọ. 19  Ndien mmọ ẹyeda Negeb ẹnyene, ọkọrọ ye obot obot ikpehe Esau,+ ye Shephelah, ye mbon Philistia.+ Mmọ ẹyenyụn̄ ẹda in̄wan̄ Ephraim+ ye in̄wan̄ Samaria+ ẹnyene; ndien Benjamin ayada Gilead+ enyene. 20  Ndien mbon emi ẹketan̄de ẹfep ke ibibene ukpeme,+ kpa nditọ Israel, ẹyeda inyene mbon Canaan+ ẹnyene tutu esịm Zarephath.+ Ndien mbon Jerusalem emi ẹketan̄de ẹfep, emi ẹdude ke Sepharad, ẹyeda mme obio Negeb ẹnyene.+ 21  “Ndien mme andinyan̄a+ ẹyedọk ẹdi Obot Zion,+ man ẹdikpe ikpe ẹnọ obot obot ikpehe Esau;+ ndien itie edidem ayakabade edi eke Jehovah.”+

Mme Ikọ Idakisọn̄