Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

Numbers 9;1-23

9  Ndien Jehovah ọdọhọ Moses ke wilderness Sinai ke ọyọhọ isua iba tọn̄ọ nte mmọ ẹkewọn̄ọ ke isọn̄ Egypt, ke akpa ọfiọn̄,+ ete:  “Nditọ Israel ẹnyene ndinam uwa passover+ ke edikem ini.+  Mbufo ẹnyene ndinam enye ke edikem ini ke mbubreyo*+ ọyọhọ usen duopenan̄ ke ọfiọn̄ emi. Mbufo ẹdinam enye nte ekemde ye kpukpru mme ewụhọ esie ye ido nte ẹsinamde enye.”+  Ntre Moses ọdọhọ nditọ Israel ete ẹnam uwa passover.  Ndien mmọ ẹnam uwa passover ke mbubreyo ọyọhọ usen duopenan̄, ke akpa ọfiọn̄, ke wilderness Sinai. Kpa nte Jehovah eketemede Moses, ntre ke nditọ Israel ẹnam.+  Edi ama odu ndusụk owo emi ẹkedehede koro mmọ ẹketụkde ukpọn̄ owo,*+ anam mmọ ikemeke ndinam uwa passover ke usen oro. Ntem mmọ ẹdi ke iso Moses ye Aaron ke usen oro.+  Ndien mmọ ẹdidọhọ enye ẹte: “Nnyịn imedehe koro ima itụk ukpọn̄ owo.* Ntak emi ẹkpekpande nnyịn ndida uwa+ nsọk Jehovah ke edikem ini ke otu nditọ Israel?”  Ntre Moses ọdọhọ mmọ ete: “Ẹbet kan̄a, yak n̄kokop se Jehovah editemede mi aban̄a mbufo.”+  Ekem Jehovah ọdọhọ Moses ete: 10  “Dọhọ nditọ Israel ete, ‘Edieke owo ekededi ke otu mbufo m̀mê ke emana mbufo edehede koro enye okotụkde ukpọn̄,*+ mîdịghe edieke owo akakade isan̄ ke anyan idụt, enye n̄ko enyene ndinam uwa passover nnọ Jehovah. 11  Mmọ ẹnyene ndinam emi ke mbubreyo ọyọhọ usen duopenan̄, ke ọyọhọ ọfiọn̄ iba.+ Mmọ ẹdita enye ye uyo eke leaven mîdụhe ye ndotndot ikọn̄.+ 12  Mmọ inyeneke ndiyak ndomokiet osụhọ eyo esiere,+ inyụn̄ inyeneke ndibụn̄ ọkpọ baba kiet.+ Mmọ ẹdinam enye nte ofụri ewụhọ passover asan̄ade.+ 13  Edi ke ini owo asanade mînyụn̄ ikaha isan̄ edi etre ndinam uwa passover, ẹnyene ndisịbe ukpọn̄ oro mfep ke otu mbio obio esie,+ sia enye mîkadaha uwa Jehovah idi ke edikem ini. Idiọkn̄kpọ esie oyobiom enye.+ 14  “‘Ndien edieke esenowo odụn̄de ye mbufo, enye n̄ko enyene ndinam uwa passover nnọ Jehovah.+ Enye edinam nte ewụhọ passover asan̄ade ye ke ido nte ẹsinamde enye.+ Ewụhọ kiet odu ọnọ mbufo, odudun̄ ye amanaisọn̄.’”+ 15  Edikem ke usen emi ẹwụkde tent utuakibuot,+ obubịt enyọn̄ ofụk tent utuakibuot emi tent Ntiense odude,+ edi ke mbubreyo n̄kpọ eke ebietde ikan̄+ ofụk tent utuakibuot tutu eyo esiere. 16  Ntem ke edi kpukpru ini: Obubịt enyọn̄ oyofụk enye ke uwemeyo, se ibietde ikan̄ onyụn̄ ofụk enye ke okoneyo.+ 17  Ndien ini ekededi emi obubịt enyọn̄ adahade ọkpọn̄ enyọn̄ tent, nditọ Israel ẹdaha isan̄ ke ndondo oro,+ ndien ke ebiet emi obubịt enyọn̄ atuakde ada, do ke nditọ Israel ẹnam nna.+ 18  Ke uyo Jehovah ke nditọ Israel ẹdaha isan̄, onyụn̄ edi ke uyo Jehovah ke mmọ ẹnam nna.+ Mmọ ẹdu ke itienna mmọ ke ofụri usen emi obubịt enyọn̄ ofụkde tent utuakibuot. 19  Ndien ke ini obubịt enyọn̄ odude ke enyọn̄ tent utuakibuot ebịghi ediwak usen, nditọ Israel ẹnam ewụhọ emi Jehovah okowụkde mmọ ete ẹkûdaha isan̄.+ 20  Ndien ndusụk ini obubịt enyọn̄ odu ke enyọn̄ tent utuakibuot ebịghi ke usen ifan̄ efen. Ke uyo+ Jehovah ke mmọ ẹdu ke itienna mmọ, onyụn̄ edi ke uyo Jehovah ke mmọ ẹdaha isan̄. 21  Ndien ndusụk ini obubịt enyọn̄+ oyodu ọtọn̄ọde ke mbubreyo tutu eyo esiere; ndien ke ini obubịt enyọn̄ adahade ke usenubọk, mmọ ẹdaha isan̄. Ekpededi obubịt enyọn̄ adaha ke uwemeyo m̀mê ke okoneyo, mmọ ẹyedaha isan̄.+ 22  Edide obubịt enyọn̄ odu ke enyọn̄ tent utuakibuot ebịghi ke usen iba m̀mê ọfiọn̄ kiet m̀mê awakde akan oro, nditọ Israel ẹdu ke itienna mmọ inyụn̄ idahake isan̄, edi ke ini enye adahade, mmọ ẹyedaha isan̄.+ 23  Ke uyo Jehovah ke mmọ ẹnam nna, onyụn̄ edi ke uyo Jehovah ke mmọ ẹdaha isan̄. Mmọ ẹnam+ ke uyo Jehovah kpa nte Jehovah akadade Moses eteme.+

Mme Ikọ Idakisọn̄

At. Ed., “ke ufọt mbubreyo iba.”
“Ukpọn̄ eke akpade.”
“Ukpọn̄ eke akpade.”
“Ukpọn̄ eke akpade.”