Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Numbers 6;1-27

6  Ndien Jehovah ọdọhọ Moses ete:  “Dọhọ nditọ Israel ete, ‘Edieke eren m̀mê n̄wan akan̄ade san̄asan̄a akan̄a ndidu uwem nte Nazirite+ nnọ Jehovah,  yak enye okûn̄wọn̄ wine ye ọkpọsọn̄ mmịn. Enye inyeneke ndin̄wọn̄ vinegar emi ẹdade wine ẹnam m̀mê vinegar emi ẹdade ọkpọsọn̄ mmịn ẹnam,+ inyụn̄ inyeneke ndin̄wọn̄ n̄kpọ ekededi emi ẹdade grape* ẹnam, inyụn̄ inyeneke ndidia grape, edide enye oro etetde obufa m̀mê enye oro ẹn̄wande asat.  Ofụri ini emi enye edide Nazirite enye inyeneke ndidia n̄kpọ ekededi emi ẹdade mfri vine ẹnam, edide n̄kịm onyụn̄ edide ikpọk esie.  “‘Ofụri ini emi enye akan̄ade ndidi Nazirite, akadan̄ inyeneke nditụk enye ibuot;+ tutu mme usen emi enye adian̄arede idem enịm san̄asan̄a ọnọ Jehovah ẹkụre, enye enyene ndidi edisana ke ndiyak idet+ ibuot esie ọkọri ọniọn̄.  Enye inyeneke ndisan̄a n̄kpere ukpọn̄ eke akpade+ ke ofụri ini emi enye adian̄arede idem enịm san̄asan̄a ọnọ Jehovah.  Enye inyeneke ndisabade idemesie, idem ke ini ete esie m̀mê eka esie m̀mê eyeneka esie eren m̀mê eyeneka esie an̄wan akpade,+ koro idiọn̄ọ emi owụtde ke enye edi Nazirite ọnọ Abasi esie odude enye ke ibuot.  “‘Enye edi edisana ọnọ Jehovah ke ofụri ini emi enye edide Nazirite.  Edi edieke owo akpade ata mbabuat n̄kpa ana enye ke n̄kan̄+ ndien enye asabade ibuot esie emi idiọn̄ọ Nazirite odude, enye enyene ndikporo+ idet ibuot esie ke usen emi ẹnamde enye asana. Enye enyene ndikporo idet ke ọyọhọ usen itiaba. 10  Ndien ke ọyọhọ usen itiaita enye enyene ndida mbomon̄kuku iba m̀mê nditọ ibiom iba nsọk oku ke enyịnusụn̄ tent usopidem.+ 11  Ndien oku enyene ndiwa kiet nte uwa idiọkn̄kpọ+ onyụn̄ awa enye eken nte edifọp uwa+ onyụn̄ osio isop ọnọ enye, sia enye akanamde idiọkn̄kpọ ke ntak ukpọn̄ oro akpade. Ndien enye enyene ndinam ibuot esie asana ke usen oro. 12  Ndien enye enyene ndidu uwem nte Nazirite+ nnọ Jehovah ke mme usen emi enye edide Nazirite, enye onyụn̄ enyene ndida abak okukịm erọn̄ isua kiet ndi nte uwa ubiomikpe;+ ndien owo idibatke mme usen emi ẹkebede koro enye akasabarede itie Nazirite esie. 13  “‘Ndien emi edi ibet aban̄ade Nazirite: Ke usen emi ini oro enye ekemekde ndidi Nazirite okụrede,+ ẹnyene ndida enye ndi ke enyịnusụn̄ tent usopidem. 14  Ndien enye enyene ndinọ Jehovah abak okukịm erọn̄ isua kiet emi eyede idem nte edifọp uwa+ ye uman eyenerọn̄ isua kiet emi eyede idem nte uwa idiọkn̄kpọ+ ye okukịm erọn̄ kiet emi eyede idem nte uwa ebuana,+ 15  ye akpasa ekara uyo eke leaven mîdụhe emi ẹdade eti ndomuyo+ ẹnam emi ẹnyụn̄ ẹbuakde aran,+ ye mfefere uyo eke leaven mîdụhe emi ẹyetde aran,+ ye uwa n̄kpasịp+ mmọ ye edin̄wọn̄ uwa+ mmọ. 16  Ndien oku enyene ndida mme n̄kpọ emi n̄ka iso Jehovah nnyụn̄ n̄wa uwa idiọkn̄kpọ ye edifọp uwa+ owo oro. 17  Ndien enye ayawa okukịm erọn̄ oro ọnọ Jehovah nte uwa ebuana+ ọkọrọ ye akpasa uyo eke leaven mîdụhe; oku onyụn̄ enyene ndiwa uwa n̄kpasịp+ ye edin̄wọn̄ uwa. 18  “‘Ndien Nazirite oro enyene ndikporo+ idet itie Nazirite esie ke enyịnusụn̄ tent usopidem, enye onyụn̄ enyene ndimen idet ibuot itie Nazirite esie nsịn ke ikan̄ emi odude ke idak uwa ebuana. 19  Ndien oku enyene ndida afara okukịm erọn̄ emi ẹketemde+ onyụn̄ osio ekara uyo kiet eke leaven mîdụhe ke akpasa oro, ye mfefere uyo kiet eke leaven mîdụhe,+ onyụn̄ ọdọn̄ mmọ ke ekaubọk Nazirite oro ke enye ama okokporo idet itie Nazirite esie. 20  Ndien oku enyene ndifụn̄ mmọ n̄ka iso mfiak edem nte edifụn̄ uwa ke iso Jehovah.+ Enye edi edisana n̄kpọ ọnọ oku, ọkọrọ ye ikọn̄esịt+ unam edifụn̄ uwa ye ukot unam etịbe.+ Ndien ke oro ebede Nazirite oro ekeme ndin̄wọn̄ wine.+ 21  “‘Emi edi ibet aban̄ade Nazirite+ emi akan̄ade akan̄a—uwa emi enye enyenede ndiwa nnọ Jehovah kaban̄a itie Nazirite esie, ọkọrọ ye se enye ekemede ndinọ. Nte enye akakan̄ade, ntre ke enye enyene ndinam ke ntak ewụhọ itie Nazirite esie.’” 22  Ekem Jehovah ọdọhọ Moses ete: 23  “Dọhọ Aaron ye nditọiren esie ete, ‘Ntem ke mbufo ẹdidiọn̄+ nditọ Israel, ẹte: 24  “Jehovah akpakam ọdiọn̄+ fi onyụn̄ enịm fi uwem.+ 25  Jehovah akpakam anam iso esie ayama ọnọ fi,+ onyụn̄ ọfọn fi mfọn.+ 26  Jehovah akpakam emenede iso esie ese fi+ onyụn̄ ọnọ fi emem.”’+ 27  Ndien mmọ ẹnyene ndida enyịn̄+ mi n̄kot nditọ Israel, man n̄kpọdiọn̄ mmọ.”+

Mme Ikọ Idakisọn̄

“Mfri vine.”