Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Numbers 20;1-29

20  Ndien nditọ Israel, kpa ofụri esop, ẹdisịm wilderness Zin+ ke akpa ọfiọn̄, ndien mmọ ẹdidụn̄ ke Kadesh.+ Do ke Miriam+ akakpa, do ke ẹkenyụn̄ ẹbụk enye.  Ndien ofụri esop inyeneke mmọn̄ in̄wọn̄,+ mmọ ẹnyụn̄ ẹsop idem ọtọkiet ẹnam ikọ ye Moses ye Aaron.+  Ndien mmọ ẹtọhọ+ ye Moses ẹte: “Ọkpọkọfọn nnyịn ndikpan̄a ke ini nditọete nnyịn ẹkekpan̄ade ke iso Jehovah!+  Ntak emi mbufo ẹdade esop Jehovah ẹdi wilderness emi man nnyịn ye mme unam mbiomo nnyịn idikpan̄a mi?+  Ntak emi mbufo ẹkenyụn̄ ẹsion̄ode nnyịn ke Egypt ẹda ẹdi idiọk ebiet emi?+ N̄kpasịp ye fig ye vine ye pomegranate idụhe mi,+ mmọn̄ inyụn̄ idụhe ndin̄wọn̄.”  Ekem Moses ye Aaron ẹdaha ke iso ofụri esop ẹdida ke enyịnusụn̄ tent usopidem ẹnyụn̄ ẹduọ ẹkịbi iso+ mmọ ke isọn̄, ubọn̄ Jehovah onyụn̄ ọbiọn̄ọde ke iso mmọ.+  Ekem Jehovah ọdọhọ Moses ete:  “Men esan̄+ nyụn̄ kot ofụri esop bon ọtọkiet, afo ye Aaron eyenuka, ndien mbufo ẹnyene nditịn̄ ikọ nnọ akamba itiat emi ke iso mmọ man mmọn̄ ọwọrọ; afo onyụn̄ enyene ndisio mmọn̄ ke akamba itiat emi nnọ mmọ ye ofụri esop ye mme unam mbiomo mmọ ẹn̄wọn̄.”+  Ntre Moses emen esan̄ ọwọrọ ke iso Jehovah,+ kpa nte enye eketemede enye. 10  Ndien Moses ye Aaron ẹkot ofụri esop ẹdida ke iso akamba itiat oro, enye onyụn̄ ọdọhọ mmọ ete: “Ẹkpan̄ utọn̄, mbufo mbon nsọn̄ibuot!+ Nte nnyịn idisio mmọn̄ ke akamba itiat emi inọ mbufo?”+ 11  Ndien Moses emenede ubọk ke enyọn̄ onyụn̄ ada esan̄ esie eyịbi itiat oro utịm ikaba; ndien mmọn̄ ọwọrọ ediwak, ofụri esop ye mme unam mbiomo mmọ ẹnyụn̄ ẹn̄wọn̄.+ 12  Ekem Jehovah ọdọhọ Moses ye Aaron ete: “Sia mbufo mîkọbuọtke idem ye ami, mîkonyụn̄ idaha mi ke edisana+ ke iso nditọ Israel, mbufo ididaha esop emi idụk isọn̄ emi ndinọde mmọ.”+ 13  Emi edi mmọn̄ Meribah,*+ koro nditọ Israel ẹketọhọde ye Jehovah, tutu ẹnịm enye ke edisana ke otu mmọ. 14  Ekem Moses etie ke Kadesh ọdọn̄ mme isụn̄utom ẹka ẹbịne edidem Edom+ ẹkedọhọ enye ẹte: “Eyenete fo Israel+ ọdọhọ ntem ete, ‘Afo emetịm ọfiọk ofụri ukụt emi nnyịn ikokụtde.+ 15  Mme ete nnyịn ẹma ẹsụhọde ẹka Egypt,+ nnyịn ima inyụn̄ idụn̄ ke Egypt ediwak usen;+ nditọ Egypt ẹma ẹnyụn̄ ẹtọn̄ọ ndinam nnyịn ye mme ete nnyịn idiọk.+ 16  Ekem nnyịn ima iseme inọ Jehovah,+ ndien enye okop eseme nnyịn onyụn̄ ọdọn̄ angel+ edida nnyịn ọwọrọ ke Egypt; ndien sese nnyịn mi ke Kadesh, kpa obio emi odude ke adan̄a obio fo. 17  Mbọk, yak nnyịn isan̄a ke obio fo ibe. Nnyịn idisan̄ake ibe ke ikọt m̀mê ke in̄wan̄ vine fo, idinyụn̄ in̄wọn̄ke mmọn̄ ke obube mmọn̄ fo. Nnyịn idisan̄a ke usụn̄ edidem ibe.+ Nnyịn idiwahake idụk nnasia m̀mê ufien,+ tutu nnyịn isan̄a ke obio fo ibe.’” 18  Edi Edom ọdọhọ enye ete: “Kûsan̄a mi ube, mbak ndiwọrọ ye akan̄kan̄ mbiọn̄ọ fi.” 19  Ndien nditọ Israel ẹdọhọ enye ẹte: “Nnyịn idisan̄a ke ọkpọusụn̄ ibe; ndien edieke ami ye ufene mi in̄wọn̄de mmọn̄ fo, nyekpe fi okụk.+ Nyomke n̄kpọ efen n̄kan ndisan̄a ke ukot mbe.”+ 20  Edi enye osụk ọdọhọ ete: “Kûsan̄a ube.”+ Ndien Edom+ asan̄a ye ata ediwak owo ye akwa odudu ọwọrọ edi ndibiọn̄ọ enye. 21  Ntre Edom inyịmeke Israel ẹsan̄a ke obio esie ẹbe.+ Ntem Israel ẹwọn̄ọde ẹkpọn̄ enye.+ 22  Ndien nditọ Israel, kpa ofụri esop, ẹdaha ke Kadesh+ ẹnyụn̄ ẹdi ẹdisịm Obot Hor.+ 23  Ekem Jehovah ọdọhọ Moses ye Aaron ke Obot Hor ke adan̄a idụt Edom ete: 24  “Aaron ayakpa etiene orụk esie,+ koro enye mîdidụkke isọn̄ emi ndinọde nditọ Israel, ke ntak emi mbufo mîkokopke uyo mi kaban̄a mmọn̄ Meribah.+ 25  Da Aaron ye Eleazar eyen esie dọk Obot Hor. 26  Nyụn̄ sion̄o Aaron mme ọfọn̄ esie,+ da mmọ sịne Eleazar+ eyen esie; ndien Aaron ayakpa do+ etiene orụk esie.” 27  Ntre Moses anam kpa nte Jehovah eketemede enye; kpukpru mbon esop ẹnyụn̄ ẹkụt nte mmọ ẹdọkde Obot Hor. 28  Ndien Moses osion̄o Aaron mme ọfọn̄ esie ada esịne Eleazar eyen esie, ndien ke oro ebede Aaron akpa do ke enyọn̄ obot oro.+ Ndien Moses ye Eleazar ẹto obot oro ẹsụhọde ẹdi. 29  Ndien kpukpru mbon esop ẹkụt ke Aaron amakpa, ofụri ufọk Israel ẹnyụn̄ ẹtua Aaron ke usen edịp ye duop.+

Mme Ikọ Idakisọn̄

Ọwọrọ “utọk.”